དེ་རིང་བྷི་བྷི་སི་རྒྱ་ཡིག་སྡེ་ཚན་གྱིས་གནས་ཚུལ་སྤེལ་བའི་ནང་། ཨ་རིའི་ནེའུ་ཡོག་ཏུ་རྟེན་གཞི་བྱས་པའི་ཡོད་གསར་འགོད་སྲུང་སྐྱོབ་མཐུན་ཚོགས་ཀྱིས་ཟླ་འདིའི་ཚེས་ ༡ ཉིན་སྙན་ཐོ་ཞིག་འདོན་སྤེལ་བྱས་པའི་ནང་། ད་ལོར་འཛམ་གླིང་ཡོངས་སུ་གནས་ཚུལ་འདྲ་མིན་འོག་གསར་འགོད་པ་ ༡༩༩ ཙམ་བཀག་སྐྱིལ་བྱས་ཡོད་པའི་ཁྲོད། རྒྱ་ནག་གིས་གསར་འགོད་པ་ ༤༩ བཀག་སྐྱིལ་བྱས་ཡོད་ཅིང་། དེ་ནི་ཕྱི་ལོ་ ༡༩༩༠ ལོར་གསར་འགོད་སྲུང་སྐྱོབ་མཐུན་ཚོགས་དབུ་བཙུགས་པ་ནས་རྒྱལ་ཁབ་གཅིག་གི་ནང་གསར་འགོད་པ་བཀག་སྐྱིལ་བྱས་པའི་གྲངས་འབོར་ཆེས་མང་ཤོས་དེ་ཆགས་ཡོད་འདུག
གསར་འགོད་སྲུང་སྐྱོབ་མཐུན་ཚོགས་ཀྱི་དྲ་བའི་སྟེང་། ད་ལོའི་སྙན་ཐོ་བསྒྲགས་པའི་ནང་རྒྱ་གཞུང་གིས་གསར་འགོད་པ་ ༤༩ བཀག་སྐྱིལ་བྱས་ཡོད་པ་མ་ཟད། གཞན་སྐྱེས་པ་ ༣ ལ་ཡང་གསར་འགོད་པར་འབྲེལ་པ་ཡོད་པའི་ནག་ཉེས་བཙུགས་ཏེ་བཀག་སྐྱིལ་བྱས་ཡོད་པའི་སྐོར་ཞིབ་འབྲི་བྱས་འདུག སྐྱེས་པ་དེ་དག་ནི་ཨ་རིར་རྟེན་གཞི་བྱས་པའི་ཨེ་ཤ་ཡ་རང་དབང་རླུང་འཕྲིན་ཁང་ཡུ་གུར་སྡེ་ཚན་གྱི་གསར་འགོད་པ་ཞོན་ཧིར་ཊི་ཧོ་ཞོར་ (Shohret Hoshur) གྱི་སྤུན་མཆེད་ཡིན་པ་དང་། གསར་འགོད་པ་ཞོན་ཧིར་ཊི་ཧོ་ཞོར་གྱིས་རྒྱ་ནག་གཞུང་གིས་ཤིན་ཅང་ཡུ་གུར་ཁ་ཆེ་ལ་མི་རིགས་དབྱེ་འབྱེད་བྱས་པའི་གནས་ཚུལ་ཤུགས་ཆེན་པོ་བསྒྲགས་ཡོད་སྟབས། རྒྱ་ནག་གཞུང་གིས་ཞི་ཅིང་དུ་ཡོད་པའི་ཁོའི་སྤུན་མཆེད་གསུམ་འཛིན་བཟུང་བྱས་ཏེ་འཁོན་ལན་སློག་པ་ཡིན་སྐོར་སོགས་བཀོད་འདུག
གསར་འགོད་སྲུང་སྐྱོབ་མཐུན་ཚོགས་ཀྱི་སྙན་ཐོའི་ནང་། གསར་འགོད་པ་བཀག་སྐྱིལ་བྱས་པའི་ཨང་རིམ་གཉིས་པ་ཨི་ཇིབ་ཆགས་ཡོད་པ་དང་། ད་ལྟ་ཨི་ཇིབ་ནང་གསར་འགོད་པ་ ༢༣ བཀག་སྐྱིལ་བྱས་ཡོད་པ་དང་། ལོ་སྔོན་མ་གསར་འགོད་པ་ ༡༢ བཀག་སྐྱིལ་བྱས་ཡོད་འདུག ཨི་ཇིབ་སྲིད་བློན་ཨེ་བྷིལ་ཧྥ་ཊ་ (Abdel Fattah al Sisi) ཡིས་རྒྱལ་ཁབ་ཀྱི་བདེ་འཇགས་ལ་ཁ་གཡར་ཏེ་གསར་འགོད་དང་སྨྲ་བརྗོད་རང་དབང་གི་ཁོར་ཡུག་ལ་གནོད་སྐྱོན་ཚབས་ཆེན་བཟོ་བཞིན་ཡོད་པའི་སྐྱོན་བརྗོད་ཀྱང་བྱས་འདུག
གསར་འགོད་པ་བཀག་སྐྱིལ་བྱེད་མཁན་ཁྲོད་ཀྱི་ཨང་རིམ་གསུམ་དེ་ཨི་རན་ཡིན་པ་དང་། ཨི་རན་ནང་གསར་འགོད་པ་ ༡༩ བཀག་སྐྱིལ་བྱས་ཡོད་འདུག
བྷི་བྷི་སི་གསར་ཁང་རྒྱ་ཡིག་སྡེ་ཚན་གྱིས་གནས་ཚུལ་སྤེལ་བའི་ནང་། གསར་འགོད་སྲུང་སྐྱོབ་མཐུན་ཚོགས་ཀྱིས་སྙན་ཐོ་བཏོན་པའི་ཉིན་དེར། ཧྥ་རན་སིའི་རྒྱལ་ས་ཕ་རེ་སི་ལ་ཡོད་པའི་རྒྱལ་མཚམས་མེད་པའི་གསར་འགོད་མཐུན་ཚོགས་ (Reporters without Borders) ཞེས་པས་ལོ་འཁོར་སྙན་ཐོ་ཞིག་བཏོན་པའི་ནང་། ད་ལྟ་འཛམ་གླིང་གི་གསར་འགོད་པ་ ༡༥༣ དང་ས་གནས་གསར་འགོད་པ་ ༡༦༡ ཙམ་བཙོན་ཁང་དུ་བཀག་སྐྱིལ་བྱས་ཡོད་པ་དང་། གསར་འགོད་པ་ ༥༤ ཙམ་བཙན་གྱིས་གཏའ་མར་ཉར་ཡོད་པའི་ཁྲོད་སེ་རི་ཡ་དང་ཨི་རག་ཁ་ཆེ་དྲག་སྤྱོད་པས་གསར་འགོད་པ་ ༡༨ བཙན་ཉར་བྱས་ཡོད་པ་དང་། ཡེ་མེན་ངོ་རྒོལ་ཚོགས་པས་གསར་འགོད་པ་ ༩ བཙན་ཉར་བྱས་ཡོད་སྐོར་སོགས་བཀོད་འདུག
གསར་འགོད་པ། འཇིགས་མེད་རྒྱ་མཚོ།
