པེ་ཅིན་གྲོང་ཁྱེར་མཐོ་རིམ་མི་མང་ཁྲིམས་ཁང་གིས་ཀོའུ་ཁི་ལེ་ཡི་ལོ་གཉིས་ཕར་འགྱངས་ཀྱི་སྲོག་ཁྲིམས་ཚེ་བཙོན་དུ་བསྒྱུར་ཡོད་འདུག
རྒྱ་ནག་ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་ཟུར་པ་པའོ་ཞི་ལེའི་བཟའ་ཟླ་ཀོའུ་ཁི་ལེ་ཡིས། ཚོང་རོགས་དབྱིན་ཇི་བ་ནིལ་ཧེ་ཝོའུ་ཌི་ལ་དུག་བླུད་ནས་བསད་པའི་ནག་ཉེས་འོག ཕྱི་ལོ་ ༢༠༡༢ ཟླ་ ༨ པའི་ནང་ཨན་ཝེ་ཞིང་ཆེན་ཧི་ཧྥེ་གྲོང་ཁྱེར་འབྲིང་རིམ་མི་མང་ཁྲིམས་ཁང་གིས། ལོ་གཉིས་ཕར་འགྱངས་ཀྱི་སྲོག་ཁྲིམས་བཅད་དེ་ཡཱན་ཁྲིན་བཙོན་ཁང་དུ་བཅུག་ཡོད་ཀྱང་། ཉེ་སྔོན་པེ་ཅིན་གྲོང་ཁྱེར་མཐོ་རིམ་མི་མང་ཁྲིམས་ཁང་གིས། འདས་ལོའི་ཕྱི་ཟླ་ ༩ པའི་ནང་ཡན་ཁྲིན་བཙོན་ཁང་ནས་ཁོ་མོ་སོ་སོའི་ཁྲིམས་འགལ་བྱ་སྤྱོད་ལ་གནོང་འགྱོད་སྐྱེས་ཤིང་རྣམ་འགྱུར་ལེགས་པོ་ཡོད་སྟབས། མོའི་སྲོག་ཁྲིམས་དེ་ཚེ་བཙོན་དུ་བསྒྱུར་དགོས་པའི་རེ་འདུན་བཏོན་ཡོད་ལ། ཐོག་མར་ཁྲིམས་ཐག་གཅོད་སྐབས་ཀྱང་བཙོན་འཇུག་དུས་ཡུན་ནང་རྣམ་འགྱུར་ལེགས་པོ་ཡོད་ཚེ་ཁྲིམས་ཆད་ཉུང་འཕྲི་ཆོག་པའི་བཀའ་འཁྲོལ་ཡོད་པ་ལྟར་ཚེ་བཙོན་དུ་བསྒྱུར་ཡོད་སྐོར་བསྒྲགས་འདུག
ཀོའུ་ཡི་ཁྱོ་ག་པའོ་ཞི་ལེ་ཡིས་དབང་ཆ་སྒེར་གཅོད་དང་ལྐོག་རྔན་ཧམ་ལེན། གཞུང་རྒྱུ་ལྐོག་ཟ་སོགས་བྱས་པའི་ནག་ཉེས་འོག ཕྱི་ལོ་ ༢༠༡༣ ཟླ་ ༩ ནང་ཅི་ནན་འབྲིང་རིམ་མི་མང་ཁྲིམས་ཁང་གིས་ཚེ་བཙོན་གྱི་ཁྲིམས་ཐག་བཅད་ཡོད་པ་དང་། ཁོ་གཉིས་ཀྱི་བུ་པའོ་ཀཱ་ཀཱ་ཨ་རིའི་ཀོ་ལིམ་བྷི་ཡ་གཙུག་ལག་སློབ་ཆེན་དུ་ཡོད་སྟབས། རྒྱ་གཞུང་གི་ཕྱི་ཕྱོགས་བྲོས་བྱོལ་བ་འཛིན་བཟུང་གི་དམིགས་འབེན་གཙོ་བོ་ཞིག་ཏུ་གྱུར་ཡོད་སྐོར་བརྗོད་ཀྱི་འདུག
འདི་ལོའི་ཕྱི་ཟླ་ ༤ པའི་ནང་ལོན་ཏུན་དུ་རྟེན་གཞི་བྱས་པའི་རྒྱལ་སྤྱིའི་ཉེ་ཡང་ཚོགས་པའི་༼ཕྱི་ལོ་ ༢༠༡༤ ལོའི་སྲོག་ཁྲིམས་ཐག་གཅོད་དང་ལག་བསྟར་སྙན་ཐོ་༽ཞེས་པའི་ཞིབ་འཇུག་གྲུབ་དོན་ནང་། འཛམ་གླིང་གི་རྒྱལ་ཁབ་ ༥༥ ཡིས་ཁྱོན་བཙོན་པ་ ༢༤༦༦ ལ་སྲོག་ཁྲིམས་བཅད་ཡོད་པ་མ་ཟད། དེའི་ནང་ནས་རྒྱལ་ཁབ་ ༢༢ གྱིས་བཙོན་པ་ ༦༠༧ ལ་སྲོག་ཁྲིམས་དངོས་སུ་ལག་བསྟར་བྱས་ཡོད་པ་རེད། རྒྱ་གཞུང་གིས་སྲོག་ཁྲིམས་བཅད་པ་སྦེད་གསང་བྱས་ཏེ་བསྡོམས་འབོར་གཏན་ནས་ཡོངས་བསྒྲགས་བྱེད་ཀྱི་མེད་ཀྱང་། ཕྱི་ལོ་ ༢༠༡༤ ལོ་ཁོ་ནར་བཙོན་པ་ ༡༠༠༠ ལྷག་ལ་སྲོག་ཁྲིམས་ལག་བསྟར་བྱས་ཡོད་སྐོར་བཀོད་འདུག
ཨ་རིའི་ནང་རྟེན་གཞི་བྱས་པའི་གྲོས་མོལ་ཐེབས་རྩ་ཁང་གིས་ཞིབ་འཇུག་བྱས་པ་ལྟར་ན། ཕྱི་ལོ་ ༢༠༡༣ ལོར་རྒྱ་གཞུང་གིས་བཙོན་པ་ ༢༤༠༠ ཙམ་ལ་སྲོག་ཁྲིམས་ལག་བསྟར་བྱས་ཡོད་སྟབས། ཕྱི་ལོ་ ༢༠༡༣ ལོ་དང་བསྡུར་ན་གྲངས་འབོར་ཉུང་དུ་ཕྱིན་ཡོད་འདུག ཡིན་ནའང་། ད་ལྟའི་ཆར་རྒྱ་ནག་འཛམ་གླིང་ཐོག་སྲོག་ཁྲིམས་བཅད་པའི་གྲངས་འབོར་མང་ཤོས་ཨང་དང་པོ་ཡིན་པ་མ་ཟད། སྲོག་ཁྲིམས་བཅད་པའི་བཙོན་པ་མང་ཆེ་བ་དབང་ཤུགས་དང་འབྱོར་བ་མེད་པའི་མི་མང་དཀྱུས་མ་ཆགས་ཡོད་འདུག
གསར་འགོད་པ། པདྨ་མཚོ།
