ཁ་སང་སེ་ར་ཐེག་ཆེན་གླིང་དུ་༧གོང་ས་མཆོག་ལ་བརྟན་བཞུགས་བསྟར་འབུལ་དང་བསྟུན་ཏེ་སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོ་འདོན་ཐེངས་དང་པོ་དེ་དབུ་འབྱེད་གནང་ཡོད་འདུག
ཁ་སང་སྔ་དྲོར་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་གི་བླ་སྤྱིའི་འདུ་ཁང་དུ། སེ་ར་བླ་སྤྱིས་དབུས་ས་གནས་སེར་སྐྱ་མི་མང་ཐུན་མོང་ནས་༧གོང་ས་མཆོག་དགུང་གྲངས་ ༨༠ ཕེབས་པའི་གྱ་སྟོན་དང་བཀའ་དྲིན་རྗེས་དྲན་མཚོན་ཆེད་མདོ་ལུགས་ཀྱི་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད་པ་དང་། བརྟན་བཞུགས་ཀྱི་མཛད་སྒོ་དང་སྟབས་བསྟུན། ༧གོང་ས་མཆོག་ནས་སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོ་འདོན་ཐེངས་དང་པོ་དབུ་འབྱེད་བཀའ་དྲིན་བསྐྱངས་ཡོད་པ་མ་ཟད། ཚིག་མཛོད་ཆེན་མོས་མི་རབས་ནས་མི་རབས་སུ་ཕན་ཐོགས་ཡོང་རྒྱུ་ཡིན་པས་ཡི་རང་བསྔགས་བརྗོད་ཡོད་སྐོར་གསུངས་འདུག
༧གོང་ས་མཆོག་ནས་བརྟན་བཞུགས་བསྟར་འབུལ་དང་འབྲེལ་བའི་སྐོར་ལ་བཀའ་སློབ་གནང་རྗེས། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་གཙོ་གཉེར་གནང་བའི་༼སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོ་༽དབུ་འབྱེད་བཀའ་དྲིན་བསྐྱངས་བ་དང་འབྲེལ་བཀའ་སློབ་གནང་དོན། ལོ་མང་རིང་ངལ་བ་ཁྱད་བསད་ཀྱི་ཐོག་ནས་ཕུགས་རྒྱང་རིང་པོར་རྒྱ་ཆེའི་ཕན་ཐོགས་ཡོང་བར་དམིགས་པའི་ལས་དོན་གལ་ཆེན་པོ་ཞིག་སྨོན་ལམ་ལགས་ཀྱིས་རྐང་འཁུར་བླངས་ཡོད་པ་དང་། ཁོ་ལ་རོགས་པ་ཁ་ཤས་ཤིག་འདུག དེའི་སྔོན་དྷ་རམ་ས་ལ་ནས་ང་ཚོ་ཐུག་པ་རེད། ཁོ་ཚོས་ཚིག་མཛོད་ཆེན་མོའི་མིང་ཚིག་གི་གོ་དོན་དེ་ཚོའི་ནང་ནས་ཆོས་ཚིག་གི་གྲས་རྣམས་ཆོས་བརྒྱུད་སོ་སོར་འབྲེལ་བ་བྱས་ཏེ། རབ་སྤུས་དག་པོ་ཡོད་པ་ཞིག་མཐོང་སོང་ཡག་པོ་ཞེ་དྲགས་བཟོས་འདུག བོད་ཡིག་ཐོག་ལ་ཞབས་འདེགས་ངེས་ཅན་ཞིག་ཞུ་ཐུབ་པ་བྱུང་ཡོད་སྟབས། ཐུགས་རྗེ་ཆེ་ཞུས་པ་ཡིན། བོད་ནང་དུ་ད་ལྟའི་བར་འདི་འདྲ་གནང་མཁན་ཕལ་ཆེར་མ་བྱུང་བ་འདྲ་པོ་རེད། ང་ཚོ་བཙན་བྱོལ་བ་ཉུང་ཤས་ཤིག་ཡོད་པ་དེ་བཙན་བྱོལ་དུ་གནས་ཡོད་པ་དང་། ཕྱོགས་གཅིག་ནས་བསམ་བློ་བཏང་ན། སློབ་གྲྭ་ཆེན་མོ་ནས་ཐོན་པའི་མཁས་དབང་ཡིན་ཟེར་བ་དེ་འདྲ་མིན་པར་དགོན་པ་ནས་ཐོན་པའི་མི་ཞིག་གིས། ལས་གཞི་དེའི་འཁུར་བླངས་ཏེ་གྲུབ་འབྲས་མིག་མཐོང་ལག་ཟིན་དུ་ཐོན་པ་རེད། ཁྱེད་རང་ཚོས་དཀའ་ལས་བརྒྱབ་པ་དེར་རྗེས་སུ་ཡི་རང་དང་བསྔགས་བརྗོད་ཡོད། ཁྱེད་རང་ཚོས་དཀའ་ལས་བརྒྱབ་བཞག་པ་དེ་ཚོ་ཕལ་ཆེར་མི་རབས་ནས་མི་རབས་སུ་ཡོད་པ་ཞིག་རེད། ཅེས་སོགས་གསུངས་ཡོད་འདུག
དེ་རིང་འདི་གའི་གསར་འགོད་པས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་སྨོན་ལམ་ལགས་སུ་སྨོན་ལམ་ཚིག་མཛོད་ཆེན་མོའི་དམིགས་ཡུལ་དང་ཁྱད་ཆོས་སྐོར་དྲིས་པར་ཁོང་གིས། དེང་རབས་འཕྲུལ་ཆས་ཁྲོད་བོད་ཀྱི་སྐད་ཡིག་བཀོལ་སྤྱོད་ཀྱི་ཁོར་ཡུག་ཆ་ཚང་ཞིག་སྐྲུན་པའི་ཆེད་དུ་ཡིན་ལ། ཁྱད་ཆོས་ཀྱི་ཐད་ནས་བཤད་ན། ཚིག་མཛོད་ཆེན་མོའི་ནང་མ་ཚིག་ཆིག་འབུམ་བདུན་སྟོང་བརྒྱ་དང་བཅུ་གསུམ་ཙམ་(༡༠༧༡༡༣) ཡོད་པས་བོད་ཡིག་ཚིག་མཛོད་ཆེ་ཤོས་ཤིག་ཆགས་ཡོད་པ་མ་ཟད། སྒྲིག་སྟངས་ཀྱི་ཆ་ནས་དེང་རབས་ཀྱི་ཁྱད་ཆོས་ལྡན་པའི་ཚིག་མཛོད་རིག་པའི་གཞུང་ལུགས་དང་བོད་ཀྱི་སྐད་ཡིག་གི་ཆོས་ཉིད་ཟུང་འབྲེལ་བྱས་པའི་གསར་གཏོད་ཀྱི་རང་བཞིན་ལྡན་ཞིང་། འགྲེལ་ཚུལ་ཡང་དེ་སྔའི་ཚིག་མཛོད་ཁག་དང་མི་འདྲ་བར་བོད་ཀྱི་ཆོས་ལུགས་གྲུབ་མཐའ་ཁག་དང་རིག་གཞུང་སྡེ་ཚན་ཁག་མཉམ་འབྲེལ་གྱི་ལས་གཞི་ཞིག་ཡིན་སྟབས། འགྲེལ་ཚུལ་མི་འདྲ་བ་རྣམས་འཐུས་ཚང་ཡོང་ཐབས་གནང་བཞིན་ཡོད་སྐོར་བརྗོད་བྱུང་།
ཚིག་མཛོད་ཆེན་མོའི་ལས་གཞི་མཇུག་སྐྱོང་གནང་ཕྱོགས་ངོ་སྤྲོད་གནང་བ་ལྟར་ན། ད་ལྟའི་ཆར་རྩོམ་སྒྲིག་གི་ལས་གཞིའི་སུམ་ཆ་གཅིག་ཙམ་ལས་གྲུབ་མེད་སྟབས། མ་འོངས་ལོ་ངོ་ ༦ ལྷག་ལ་མུ་མཐུད་རྩོམ་སྒྲིག་གནང་རྒྱུ་ཡིན་ལ། འདོན་ཐེངས་དང་པོའི་ནང་ནོར་བཅོས་དང་ཁ་སྐོང་དགོས་པ་རྣམས་སྨོན་ལམ་བརྡ་འཕྲིན་ཞིབ་འཇུག་ཁང་དང་། འབྲེལ་ཡོད་ས་གནས་ཁག་གི་རྩོམ་སྒྲིག་སྡེ་ཚན་ལ་འབྲེལ་བ་གནང་ན་དག་བཅོས་ཁ་སྣོན་གནང་རྒྱུ་ཡིན་འདུག
གསར་འགོད་པ། པདྨ་མཚོ།
བོད་ཀྱི་སྐད་ཡིག་དང་རིག་གནས་ལ་དུངས་བ་ཟབ་པའི་དགེ་བཤེས་བློ་བཟང་སྨོན་ལམ་ལགས་དང་། ཁོང་གི་ལས་རོགས་ཡོད་ཚད་ལ་ཐུགས་རྗེ་ཆེ་སྙིང་དབུས་ནས་ཞུས། དེ་བཞིན་དེ་རིང་སྤྱི་ཚོགས་ནང་༼སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོ་༽དེ་དངོས་སུ་འགྲེམས་སྤེལ་དབུ་འབྱེད་ཀྱི་ལས་དོན་གནང་ཐུབ་པར་དགའ་བ་དང་སྤྲོ་བ་རབ་ཏུ་ཁོལ་བའི་སྒོ་ནས་བཀྲིས་ལེགས་ཡོད།