ཐེངས་འདིར་ཕམ་ཁ་རག་མཁན་རྒྱ་ནག་གཞུང་ཆགས་ཡོད།

ཁ་སང་ཨ་རིའི་གསར་འགོད་ལྷན་ཚོགས་ཁང་དུ་ཁེ་ན་ཌའི་མཛངས་མ་ཨེན་སི་ཊ་སི་ལིན་ལགས་ཀྱིས་ཁོང་མོ་ཐེངས་འདིར་རྒྱ་ནག་ནང་ཡོང་དུ་མ་བཅུག་པའི་རྒྱུ་རྐྱེན་སྐོར་གསར་འགོད་གསལ་བསྒྲགས་སྤེལ་འདུག

དེ་རིང་རྒྱ་ནག་ཧེ་ནན་ཞིང་ཆེན་སན་ཡ་གྲོང་ཁྱེར་དུ་སྐབས་ ༦༥ བའི་འཛམ་གླིང་མཛངས་མའི་སྟེང་རྩོད་འགྲན་བསྡུར་འཚོགས་བཞིན་ཡོད་སྟབས། ཁ་སང་ཨ་རིའི་ཝ་ཤིན་ཊོན་དུ་རྟེན་གཞི་བྱས་པའི་ཨ་རིའི་རྒྱལ་ཡོངས་གསར་འགོད་ལྷན་ཚོགས་ཁང་དུ། ད་རེབ་ཀྱི་འགྲན་བསྡུར་སྟེང་ཞུགས་པར་རྒྱ་ནག་གཞུང་གིས་ཐོངས་མཆན་སྤྲད་མེད་པའི་ཁེ་ན་ཌའི་མཛངས་མ་ཨེན་སི་ཊ་སི་ལིན་ (Anastasia Lin) ལགས་ཀྱིས་གསར་འགོད་གསལ་བསྒྲགས་ཤིག་སྤེལ་ཡོད་འདུག

སྐབས་དེར་མཛངས་མ་ཨེན་སི་ཊ་སི་ལིན་ལགས་ཀྱིས། ཕྱི་ཟླ་ ༡༢ ཚེས་ ༡༩ ཉིན་གྱི་འཛམ་གླིང་མཛངས་མའི་འགྲན་བསྡུར་ནང་རྒྱུར་རྒྱ་ནག་གཞུང་གིས་ཐོངས་མཆན་སྤྲད་མེད་པ་དང་། ཟླ་སྔོན་མའི་ཟླ་མཇུག་ལ་ཁོ་མོ་ཧོང་ཀོང་གནམ་ཐང་བརྒྱུད་ནས་རྒྱ་ནག་ཏུ་འགྲོ་རྒྱུ་བཀག་འགོག་བྱས་པ། གནད་དོན་དེ་དག་ཐད་རྒྱ་ནག་གཞུང་གིས་ཁོ་མོར་ནག་ཉེས་གང་བཙུགས་ཡོད་མེད་གསལ་བཤད་བྱས་མེད་སྐོར་སོགས་བརྗོད་འདུག

མཛངས་མ་ཨེན་སི་ཊ་སི་ལིན་ལགས་ཀྱིས་བརྗོད་དོན། “རྒྱ་ནག་རྒྱལ་ཁབ་ཆེན་པོ་འདིས་མི་མང་གི་བསམ་བློར་སྟངས་འཛིན་བྱས་ན་སྲིད་གཞུང་བརྟན་པོ་ཡིན་པའི་ཚོར་སྣང་ཡོང་གི་ཡོད་པ་རེད། ང་ལ་ཐོངས་མཆན་མ་སྤྲད་པ་དེས་ཐེངས་འདིར་ང་རང་འཛམ་གླིང་མཛངས་མའི་སྟེང་རྩོད་འགྲན་བསྡུར་སྟེང་ཞུགས་ཐུབ་མེད་ཀྱང་། དོན་དངོས་ཐོག་ཐེངས་འདིར་ཕམ་ཁ་རག་མཁན་དེ་ང་མ་རེད། རྒྱ་ནག་གཞུང་གིས་གལ་སྲིད་རང་ཉིད་དྲང་བདེན་ཡིན་ན་དྲང་བདེན་ཡིན་པའི་རྣམ་པ་ཕྱི་རུ་སྟོན་མ་ཐུབ་དེ་རེད།” ཅེས་བརྗོད་འདུག

རྒྱལ་སྤྱིའི་བརྒྱུད་ལམ་ཁག་ཏུ། རྒྱ་གཞུང་གིས་ཐེངས་འདིར་ཁོ་མོར་ཐོངས་མཆན་མི་སྤྲོད་དོན། ཁོ་མོ་ཆོས་འཁོར་རྩ་རླུང་སྒོམ་སྒྲུབ་པར་དད་མོས་བྱེད་མཁན་ཞིག་ཡིན་པ་མ་ཟད། རྒྱ་ནག་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་། དེ་བཞིན། བོད་སོགས་རྒྱའི་འོག་གི་གྲངས་ཉུང་མི་རིགས་ཀྱི་གནད་དོན་གླེང་མཁན་ཞིག་དང་། རྒྱ་ནག་གིས་རྡོག་རོལ་བཏང་བ་ཨ་རིའི་གྲོས་ཚོགས་ནང་བདེན་དབང་ཐོབ་པའི་མི་སྣ་ཞིག་ཡིན་པའི་རྒྱུ་མཚན་ཡིན་སྐོར་སོགས་བཀོད་འདུག

རྒྱལ་ཡོངས་གསར་འགོད་ལྷན་ཚོགས་ཁང་དེའི་འགན་འཛིན་ཇོན་ཧོ་ཧེ་སི་ (John Hughes) ཡིས། དེ་རིང་ཨེན་སི་ཊ་སི་ལིན་གྱིས་བཤད་པའི་སྐད་ཆ་རྣམས་འཛམ་གླིང་ཡོངས་སུ་ཁྱབ་བསྒྲགས་འགྲོ་རྒྱུ་ཡིན་པ་དང་། འཛམ་གླིང་གི་གསར་འགྱུར་བརྒྱུད་ཁག་གིས་འཛམ་གླིང་མཛམས་མའི་འགྲན་བསྡུར་གྱི་གནས་ཚུལ་སྤེལ་བ་དང་མཉམ་དུ་ཨེན་སི་ཊ་སི་ལིན་གྱི་གནས་ཚུལ་ཡང་གླེང་སློང་ཡོང་གི་རེད། ཅེས་བརྗོད་ཡོད་འདུག

ཡང་ཁོང་གིས། “རྒྱ་ནག་གི་འགྲོ་བ་མིའི་ཐོབ་ཐང་སྐོར་ལ་བརྒྱུད་ལམ་མང་པོ་ཞིག་གིས་དོ་སྣང་བྱེད་བཞིན་ཡོད་སྟབས། མཛངས་མ་ཨེན་སི་ཊ་སི་ལིན་གྱིས་གསར་འགོད་ལྷན་ཚོགས་ཁང་དུ་གདན་འདྲེན་ཞུས་ཏེ་ཁོ་མོར་དངོས་སུ་བརྗོད་བཅུག་པ་དེ་ཧ་ཅང་འོས་ཤིང་འཚམ་པ་ཞིག་ཆགས་ཡོད།” ཅེས་སོགས་བརྗོད་འདུག

ནེའུ་ཡོག་དུས་བབ་ཀྱིས་གནས་ཚུལ་སྤེལ་པའི་ནང་། ཉེ་བའི་ལོ་ཤས་ནང་རྒྱ་ནག་གཞུང་གིས་ཨ་རིའི་རོལ་དབྱངས་ཚོགས་པ་བྷོན་ཇོ་ཝེ་ (Bon Jovi) དང་ལིན་ཁེན་ཕཱ་ཁི་ (Linkin Park) ཨོ་སེ་སི་ (Oasis) སོགས་ཀྱིས་བོད་མིའི་འདི་ཕྱིའི་སྐྱབས་མགོན་ཏཱ་ལའི་བླ་མ་མཆོག་ལ་གདུང་སེམས་མཉམ་སྐྱེ་བྱས་སྟབས། ཁོ་ཚོ་རྒྱ་ནག་ལ་འགྲོ་རྒྱུ་བཀག་འགོག་བྱས་ཡོད་པ་མ་ཟད། འཁྲབ་སྟོན་པ་བྷི་ར་ཌི་ཕེ་ཊི་ (Brad Pitt) དང་ཁུར་ཞན་བྷ་ལེ་ (Christian Bale)། ཧྭ་རེ་སོན་ཧྥོཌ་ (Harrison Ford)། རེ་ཆཱ་ཌི་གྷི་རེ་ (Richard Gere) སོགས་ཀྱིས་འགྲོ་བ་མིའི་ཐོབ་ཐང་གླེང་སློང་བྱས་ཡོད་སྟབས། ཁོ་ཚོ་ཡང་རྒྱ་ནག་གི་མིང་ཐོ་ནག་པོའི་ནང་བཞག་ཡོད་པ་རེད། ཅེས་བཀོད་འདུག

གསར་འགོད་པ། འཇིགས་མེད་རྒྱ་མཚོ།