དྷ་རམ་ས་ལ་དེང་རབས་གྲོང་ཁྱེར་ཅན་དུ་འཛུགས་བསྐྲུན་བྱ་རྒྱུར་ཧི་མ་ཅལ་མངའ་སྡེའི་གཞུང་དང་རྒྱ་གར་དབུས་གཞུང་གཉིས་བར་ལྟ་ཚུལ་མི་མཐུན་པ་ཆགས་ཏེ། སིམ་ལ་གྲོང་སྡེའི་སྤྱི་ཁྱབ་ཀྱིས་དབུས་གཞུང་གི་ལས་འཆར་དེར་མོས་མཐུན་མེད་པའི་ཁྲིམས་གཏུག་བྱས་ཡོད་འདུག
ཁ་སང་སིམ་ལ་གྲོང་སྡེའི་སྤྱི་ཁྱབ་སཱན་ཆི་ཆཱོ་ཧཱན་ (Sanjay Chauhan) ལགས་ཀྱིས་ཧི་མ་ཅལ་ཆེས་མཐོའི་ཁྲིམས་ཁང་ལ། ཉེ་ལམ་རྒྱ་གར་དབུས་གཞུང་གིས་དྷ་རམ་ས་ལ་དེང་རབས་ཅན་གྱི་གྲོང་ཁྱེར་(Smart City)དུ་བསྒྱུར་རྒྱུའི་ཐག་གཅོད་ལ་མོས་མཐུན་མེད་པའི་ཁྲིམས་གཏུག་བྱས་ཡོད་པ་ལྟར། ཁྲིམས་དཔོན་ར་ཇེབ་ཤཱར་མཱ་ (Rajeev Sharma) དང་སུ་ར་ཤཱི་ཝར་ (Sureshwar Thakur) རྣམ་གཉིས་ཀྱིས་དབུས་གཞུང་གི་ཐག་གཅོད་ལ་རྩིས་མེད་བཏང་སྟེ། བདུན་ཕྲག་གཉིས་ནང་ཚུན་ལ་མངའ་སྡེའི་གཞུང་གིས་སིམ་ལ་དང་དྷ་རམ་ས་ལ་གཉིས་ལས་གང་རུང་ཞིག་ལས་འཆར་དེའི་ཁོངས་སུ་འདེམ་དགོས་པའི་བཅད་ཁྲ་བཏང་ཡོད་འདུག
ཧིན་རྡུ་སི་ཐན་དུས་བབ་སྟེང་སིམ་ལའི་གྲོང་སྡེ་སྤྱི་ཁྱབ་སཱན་ཆི་ཆཱོ་ཧཱན་ལགས་ཀྱིས། ཁྲིམས་ཁང་ལ་ཕུལ་བའི་ཁྲིམས་གཏུག་ཞུ་སྙན་ནང་། “རྒྱ་གར་དབུས་གཞུང་གིས་ཁྲིམས་ཀྱི་བརྒྱུད་རིམ་ཁག་མ་བརྒྱུད་པར་དྷ་རམ་ས་ལ་དེང་རབས་གྲོང་ཁྱེར་ཅན་དུ་བསྒྱུར་རྒྱུ་བྱས་པ་དེ་ནི་འོས་འཚམ་གྱི་ཐག་གཅོད་ཅིག་མིན་པ་མ་ཟད། དེ་སྔོན་ཐག་གཅོད་འདི་མ་གནང་གོང་ལ་སིམ་ལ་གྲོང་སྡེ་ལས་ཁུངས་ཀྱིས་གནད་དོན་འདིའི་སྐོར་དབུས་ས་གཉིས་ཀྱི་གཞུང་ལ་འབོད་སྐུལ་ཞུས་ཡོད་ཀྱང་གྲུབ་འབྲས་མ་ཐོན་སྟབས་གནས་ཚུལ་འདི་བྱུང་བ་རེད།” ཅེས་བརྗོད་འདུག
ཧི་མ་ཅལ་ཁྲིམས་ཁང་གིས། “ མངའ་སྡེའི་གཞུང་གིས་ཐག་གཅོད་བྱས་ཏེ་འདི་ལོའི་ཟླ་ ༧ པའི་ཚེས་ ༡༥ དང་ ༢༩ ཉིན་དབུས་གཞུང་ལ་གྲོང་ཁྱེར་འཛུགས་སྐྲུན་འོས་བབ་ཀྱི་མིང་ཐོ་ཕུལ་བ་དེ་ནི་ཁྲིམས་མེད་ལུགས་མེད་དང་རིགས་ལམ་དང་འགལ་བ་ཞིག་ཡིན། གཞུང་འཛིན་མི་སྣ་ཚོས་དབང་ཆ་བེད་སྤྱོད་བཏང་ནས་རྒྱ་ཆེའི་མི་མང་གི་མངོན་འདོད་སྐོང་དགོས་པ་ལས་མི་སྒེར་དང་སྐུ་དྲག་རིང་ལུགས་ཀྱི་འདོད་དོན་བསྒྲུབ་མི་རུང་། མ་འོངས་པར་ཐག་གཅོད་གང་ཞིག་བྱས་ཀྱང་དྲང་པོ་དྲང་བཞག་དང་རྒྱུ་མཚན་ལྡན་པའི་ཐོག་ནས་བྱེད་དགོས། ཉེ་སྔོན་གཞུང་གིས་རྒྱལ་ཡོངས་ཀྱི་གྲོང་ཁྱེར་དང་གྲོང་རྡལ་ཁག་ཅིག་དེང་རབས་ཅན་དུ་བསྒྱུར་རྒྱུའི་ཐག་གཅོད་བྱས་སྐབས། མི་ཁ་ཤས་ཀྱིས་ངན་སེམས་བཅངས་ཡོད་པ་ང་ཚོར་རྒྱུ་དངོས་གཉིས་ཀྱི་དཔང་རྟགས་སྟོན་རྒྱུ་ཡོད། དེ་ཡང་མངའ་སྡེའི་འཛུགས་སྐྲུན་ལས་འཆར་དོ་དམ་ཚན་པས་རང་ཉིད་ལ་ཚོགས་པ་འགའ་རེས་བཀའ་བཏང་བ་ལྟར་དབང་ཆ་ལོག་པར་བེད་སྤྱོད་བཏང་སྟེ། དུས་ཐོག་ལ་སོ་སོའི་ཁྱབ་ཁུངས་གྲོང་སྡེ་ཁག་དེང་རབས་གྲོང་ཁྱེར་ཅན་དུ་བསྒྱུར་རྒྱུའི་སྙན་ཞུ་ཕུལ་བ་དེར་བསྐྱར་ཞིབ་མ་བྱས་སྟབས། ད་ཐེངས་གནས་ཚུལ་འདི་ལྷག་པ་རེད།” ཅེས་བརྗོད་འདུག
དེ་རིང་རྒྱ་གར་ཕོ་ཉ་ (Indian Express )གསར་ལམ་ཐོག་གནས་ཚུལ་སྤེལ་བའི་ནང་། འདི་ལོའི་ཕྱི་ཟླ་ ༨ ཚེས་ ༢༧ ཉིན་ལྡི་ལིར། རྒྱ་གར་དབུས་གཞུང་གྲོང་སྡེ་འཕེལ་རྒྱས་ལྷན་ཁང་གི་བློན་ཆེན་ཝེན་ཁའེ་ཎཱ་དྷོ་ (M. Venkaiah Naidu)ལགས་ཀྱིས། རྒྱ་གར་གྱི་གྲོང་ཁྱེར་དང་གྲོང་བརྡལ་ ༩༨ ཙམ་དེང་རབས་གྲོང་ཁྱེར་དན་ལ་བསྒྱུར་རྒྱུའི་མིང་ཐོ་ཁྱབ་བསྒྲགས་བྱས་པའི་ཁོངས་སུ། མངའ་སྡེའི་རྒྱལ་ས་ ༢༤ དང་། ཚོང་ལས་དང་བཟོ་ལས་ལྟེ་གནས་ ༢༤ ། རིག་གཞུང་དང་ཡུལ་སྐོར་སྤྲོ་འཆམ་ལྟེ་གནས་ ༡༨། མཚོ་ཁུལ་གྲོང་ཁྱེར་ ༥ ། ཤེས་ཡོན་དང་འཕྲོད་བསྟེན་ས་ཁུལ་ ༣ བཅས་འཛུགས་སྐྲུན་བྱ་རྒྱུའི་འཆར་གཞི་ཡོད་པའི་ཁོངས་སུ་བོད་མིའི་འདི་ཕྱིའི་སྐྱབས་མགོན་༧གོང་ས་མཆོག་གི་བཞུགས་ཡུལ་དང་ཧི་མ་ཅལ་གྱི་རྒྱལ་ས་གཉིས་པར་འབོད་པའི་དྷ་རམ་ས་ལ་ལས་འཆར་དེའི་ཁོངས་ལ་ཚུད་ཡོད། ཅེས་སོགས་བཀོད་འདུག
གནས་ཚུལ་དེའི་ནང་མུ་མཐུད་དུ་བཀོད་དོན། ཧི་མ་ཅལ་མངའ་སྡེའི་གྲོང་ཁྱེར་འཕེལ་རྒྱས་ལྷན་ཁང་གི་བློན་ཆེན་སུ་དྷེར་ཤར་མཱ་ (Sudhir Sharma) ཡིས་རྒྱ་གར་དབུས་གཞུང་གི་འཛུགས་སྐྲུན་ལས་གཞི་དེ་དྷ་རམ་ས་ལར་མགོ་འཛུགས་བྱ་རྒྱུར་བརྒྱ་ཆ་ ༨༩།༥ དང་། སིམ་ལར་བརྒྱ་ཆ་ ༨༥ ཡི་རྒྱབ་སྐྱོར་ཐོབ་ཡོད་སྟབས་དྷ་རམ་ས་ལ་བདམས་པ་རེད། སིམ་ལར་རྒྱབ་སྐྱོར་མ་ཐོབ་མེད་པའི་རྒྱུ་མཚན་ནི། དེ་སྔོན་ནེ་རོ་རྒྱལ་ཡོངས་གྲོང་ཁྱེར་གསར་འཛུགས་ལས་འཆར་ཚོགས་པའི་ལས་གཞི་ (Jawaharlal Nehru National Urban Renewal Mission) ཞེས་པ་དེ་ལེགས་འགྲུབ་བྱུང་མེད་སྟབས་ཕམ་པ་རེད་ཅེས་བརྗོད་ཡོད། ཡིན་ནའང་སིམ་ལའི་གྲོང་སྡེ་སྤྱི་ཁྱབ་སཱན་ཆི་ཆཱོ་ཧཱན་གྱིས་རྒྱ་གར་དབུས་གཞུང་གིས་དྷ་རམ་ས་ལ་དེང་རབས་གྲོང་ཁྱེར་ཅན་དུ་བསྒྱུར་རྒྱུའི་ཐག་གཅོད་བྱས་པ་དེ་ནི་ཁྲིམས་མཐུན་མིན་པའི་སྐྱོན་འཛུགས་བྱས་པ་ནས་བཟུང་། ད་ལྟ་དབུས་གཞུང་དང་ས་ནས་གཞུང་གི་ཆབ་སྲིད་པ་འགས་སིམ་ལ་དེང་རབས་ཅན་གྱི་གྲོང་ཁྱེར་དུ་བསྒྱུར་རྒྱུའི་འཆར་གཞིའི་ཁོངས་ནས་གཡུགས་པ་དེར་མ་འདོད་པའི་རྩོད་གླེང་འབྱུང་བཞིན་ཡོད་སྐོར་བཀོད་འདུག
རྒྱལ་སྤྱི་དང་རྒྱ་གར་གྱི་བརྒྱུད་ལམ་ཁག་ཏུ་ཆབ་སྲིད་དབྱེ་ཞིབ་པ་ཁག་ཅིག་གིས། ཕྱོགས་གཅིག་ནས་དྷ་རམ་ས་ལ་ནི་ཧི་མ་ཅལ་གཞུང་གི་རྒྱལ་ས་མིན་པ་མ་ཟད། ཕྱོགས་གཞན་ཞིག་ནས་ད་ལྟའི་ཧི་མ་ཅལ་མངའ་སྡེའི་གྲོང་ཁྱེར་འཕེལ་རྒྱས་ལྷན་ཁང་གི་བློན་ཆེན་སུ་དྷེར་ཤར་མཱ་ཡི་ས་ཁུལ་ཡིན་སྟབས། ཕྱོགས་འགལ་ཚོགས་པ་དང་ཆབ་སྲིད་པ་ག་གེ་མོས་ཁོང་གིས་ཕྱོགས་ཞེན་བྱས་ཏེ། དྷ་རམ་ས་ལ་དེང་རབས་གྲོང་ཁྱེར་ཅན་དུ་བསྒྱུར་རྒྱུར་དབུས་གཞུང་ལ་བརྒྱུད་སྐུལ་བྱས་པ་ཞིག་ཡིན་ལུགས་རྗོད་ཀྱིན་ཡོད་ཀྱང་། དོན་དངོས་སུ་རྒྱ་གར་དབུས་གཞུང་ནི་ལས་གཞི་དེའི་མཐའ་མའི་ཐག་གཅོད་གནང་མཁན་ཡིན་སྟབས། མངའ་སྡེའི་གཞུང་གིས་ཁྲིམས་ཁང་གི་བཅད་ཁྲ་དེར་ཐག་གཅོད་ཡང་དག་པ་ཞིག་བྱེད་ངེས་རེད་ཅེས་སོགས་བཀོད་འདུག
གསར་འགོད་པ། དོན་གྲུབ།
