རྒྱ་རིགས་ཁྲིམས་རྩོད་པ་ཞིག་ལ་ཁྲིམས་ཐག་བཅད།

རྒྱ་ནག་གི་ཁྲིམས་རྩོད་པ་པུ་ཀྲི་ཆང་ལ་པེ་ཅིན་འབྲིང་རིམ་ཁྲིམས་ཁང་གིས་ལོ་གསུམ་གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག

དེ་རིང་རྒྱ་ནག་པེ་ཅིན་གྲོང་ཁྱེར་འབྲིང་རིམ་ཁྲིམས་ཁང་གཉིས་པས། རྒྱ་ནག་མི་དམངས་ཀྱི་ཁེ་དབང་རྩོད་ལེན་པ་དང་ཁྲིམས་རྩོད་པ་པུ་ཀྲི་ཆང་ལ་མི་རིགས་ལ་ཞེ་འཁོན་བསླངས་ཏེ་དཀྲུག་ཤིང་བརྒྱབ་པ་དང་། སྤྱི་ཚོགས་ལ་ཟིང་ཆ་བསླངས་པའི་ཉེས་མིང་འོག ལོ་གསུམ་ཕྱིར་འགྱངས་བྱས་རྗེས། ཁྲིམས་ཆད་ལོ་གསུམ་ལག་བསྟར་བྱ་རྒྱུ་ཡིན་པ་ཁྱབ་བསྒྲགས་བྱས་འདུག

སྐུ་ཞབས་པུ་ཀྲི་ཆང་ལགས་ཕྱི་ལོ་ ༢༠༡༤ ལོ་ཟླ་ ༥ པའི་ནང་། ཆབ་སྲིད་ལ་འགལ་བའི་རྩོམ་ཡིག་སྤེལ་བའི་ནག་ཉེས་བཙུགས་ཏེ་འཛིན་བཟུང་བྱས་ཡོད་པ་དང་། ཟླ་འདིའི་ཕྱི་ཚེས་ ༡༤ ཉིན་ཁྲིམས་བཤེར་ཐོག་མ་བྱས་ཤིང་། དེ་རིང་ཁྲིམས་ཐག་བཅད་པ་ཁྱབ་བསྒྲགས་བྱས་ཡོད་པ་རེད།

རྒྱ་ནག་གཞུང་འབྲེལ་གསར་ལམ་ཁག་ཏུ། པུ་ཀྲི་ཆང་གིས་ཁྲིམས་ཐག་བཅད་པ་ངོས་ལེན་བྱས་ཏེ་གོང་ལ་ཞུ་གཏུག་བྱ་རྒྱུ་མིན་སྐོར་དང་། དེ་སྔོན་བཀག་བསྐྱིལ་སྐབས་ཁོས་ཐེངས་མང་པོར་གནོད་སྐྱོན་ནང་ཚུད་པའི་མང་ཚོགས་ལ་སེམས་གཏིང་ནས་དགོངས་སེལ་ཞུ་བཞིན་ཡོད་ཟེར་བ་དང་། ཁྲིམས་ཁང་གིས་ཉེས་ཆད་གང་བཅད་པར་དང་ལེན་བྱ་རྒྱུ་ཡིན་ཚུལ་སོགས་བརྗོད་ཡོད་ཀྱང་། པུ་ཀྲི་ཆང་གི་ཁྲིམས་རྩོད་པ་ཧྲང་པའོ་ཅོན་ (Shang Baojun) གྱིས་བྷི་བྷི་སི་གསར་ཁང་ལ། པུ་ཀྲི་ཆང་ལ་ཁྲིམས་བཤེར་བྱས་སྐབས་ཁོས་ཐེངས་འདིར་ཁྲིམས་ཁང་གིས་ནག་ཉེས་བཙུགས་པར་ངོས་ལེན་བྱས་མེད་ཀྱང་། ཁོས་ཝེ་པའོ་དྲ་བར་འབྲེལ་བ་ཡོད་པའི་མི་སྣ་གཞན་ལ་གནོད་སྐྱོན་ཐེབས་ཡོད་ན་དེར་དགོངས་དག་ཞུ་རྒྱུའི་འདོད་པ་ཡོད་ཅེས་བརྗོད་ཡོད་པ་རེད་ཟེར།

རྒྱ་ནག་གཞུང་གིས་པུ་ཀྲི་ཆང་ཐོག་མ་འཛིན་བཟུང་བྱས་སྐབས། བསྙད་འཚོལ་ཟིང་ཆ་བསླངས་པ་དང་ཁྲིམས་འགལ་ཐོག་སྤྱི་དམངས་ཀྱི་གནས་ཚུལ་རག་ཐབས་བྱས་པའི་ནག་ཉེས་ལས་བཙུགས་མེད་ཀྱང་། ལོ་སྔོན་མའི་ཟླ་ ༡༡ ནང་ནག་ཉེས་མང་དུ་བཏང་སྟེ། རྒྱལ་ཁབ་ཁ་བྲལ་དཀྲུག་ཤིང་བརྒྱབ་པ་དང་། མི་རིགས་མཐུན་སྒྲིལ་ལ་དཀྲུག་ཤིང་དང་ཞེ་འཁོན་བསླངས་པ་སོགས་ཀྱི་ནག་ཉེས་བགྲངས་ཡོད། དེ་རིང་དངོས་སུ་ཁྲིམས་ཐག་གཅོད་སྐབས། ཁོས་ཝེ་པའོ་དྲ་བའི་སྟེང་ཡི་གེ་འདྲ་མིན་ཐེངས་ ༧ ཙམ་ལ་སྤེལ་ཏེ། མི་རིགས་ཀྱི་ཞེ་འཁོན་དཀྲུག་ཤིང་བརྒྱབ་པ་དང་བསྙད་འཚོལ་ཟིང་ཆ་བསླངས་པ་བཅས་ཀྱི་ནག་ཉེས་འོག་ཁྲིམས་ཐག་བཅད་པ་ཁྱབ་བསྒྲགས་བྱས་འདུག

རྒྱལ་སྤྱིའི་ཉེས་ཡངས་ཚོགས་པས་གནས་ཚུལ་སྤེལ་བའི་ནང་། པུ་ཀྲི་ཆང་ལ་ཁྲིམས་བཤེར་བྱས་སྐབས་ཁྲིམས་ཁང་ཕྱི་ལོགས་སུ་རྒྱ་ནག་གི་ཉེན་རྟོག་པས་ཉུང་མཐར་པུ་ཀྲི་ཆང་ལ་རྒྱབ་སྐྱོར་བྱེད་མཁན་ ༡༢ ཙམ་འཛིན་བཟུང་བྱས་ཡོད་པ་དང་། རྒྱ་ནག་ཁྲིམས་ཁང་གིས་པུ་ཀྲི་ཆང་ལ་ཁྲིམས་ཐག་བཅད་པ་སྟེ། སྨྲ་བརྗོད་རང་དབང་གི་དབུ་ཁྲིད་ཅིག་ལ་ལྕགས་སྒྲོག་རྒྱག་རྒྱུའི་བསམ་ངན་བཅངས་པ་ལས་ཁོ་ལ་ནག་ཉེས་གང་ཡང་ཡོད་པ་མ་རེད། ཅེས་བཀོད་འདུག

རྒྱལ་སྤྱིའི་ཉེས་ཡངས་ཚོགས་པའི་རྒྱ་ནག་གི་ཉམས་ཞིབ་པ་ཝེ་ལེམ་ནཱེ་ (William Nee) གྱིས། ཁོ་རང་གིས་ཁྲིམས་ཐག་དྲང་བདེན་མིན་པ་ཕྱི་ལ་གསལ་བཤད་བྱེད་པའི་གོ་སྐབས་ཡོད་པ་མ་རེད། ཁོ་ལ་ནག་ཉེས་ཅི་ཡང་མེད་ཀྱང་ནག་ཉེས་ཡོད་པའི་ཁྲིམས་ཐག་བཅད་པ་དེ་རྒྱ་ནག་གཞུང་གིས་སྙིང་རུས་ཅན་གྱི་སྨྲ་བརྗོད་རང་དབང་རྩོད་ལེན་པ་ཚོར་འཇིགས་སྐུལ་བྱེད་ཀྱི་ཡོད་པ་རེད། ཅེས་བརྗོད་འདུག

གསར་འགོད་པ། འཇིགས་མེད་རྒྱ་མཚོ།