ཉེན་བརྡ་དམར་པོའི་འཇིཊ་སྐུལ།

རྒྱ་ནག་པེ་ཅིན་གྲོང་ཁྱེར་སོགས་གྲོང་ཁྱེར་ཆེ་ཁག་ ༦ ནང་མཁའ་དབུགས་འབག་བཙོག་གི་ཉེན་བརྡ་དམར་པོ་བཏང་སྟེ་བསྟུན་མར་ཉིན་གྲངས་ལྔ་འགྲོ་བཞིན་ཡོད་འདུག

ཟླ་འདིའི་ཕྱི་ཚེས་ ༡༩ ཉིན་གྱི་ཕྱི་དྲོ་ནས་བཟུང་པེ་ཅིན་གྲོང་ཁྱེར་གྱི་རྒྱུན་ལྡན་དུད་སྨུག་ཤུགས་ཆེ་རུ་ཕྱིན་ནས་ཉེ་འཁོར་ཡང་ནག་རབ་རུབ་ཏུ་གྱུར་ཏེ། འབག་བཙོག་རྡུལ་ཕྲན་གྱི་ཚད་གཞི་ (PM2.5)བརྒྱ་ཆ་ ༢༠ ནས་ ༢༥ བར་མར་ཆགས་ཡོད་པ་དང་། རྒྱ་ནག་གི་གྲོང་ཁྱེར་ ༤༨ ལ་འབག་བཙོག་ཅན་དང་ཚད་གཞི་འཕར་བའི་འབག་བཙོག་གི་སྣང་ཚུལ་བྱུང་ཡོད་པ་དང་། དེ་བཞིན། གྲོང་ཁྱེར་ ༡༨ ནང་འབག་བཙོག་ཚབས་ཆེན་གྱི་དུད་སྨུག་འཐུབས་ཡོད་པའི་ཁྲོད་ནས་པེ་ཅིན་གྲོང་ཁྱེར་དང་ཐིན་ཅིན་སོགས་གྲོང་ཁྱེར་ཆེ་ཁག་ ༦ ནང་། འབག་བཙོག་ཚབས་ཆེ་ཤོས་ཀྱི་ཉེན་བརྡ་དམར་པོ་བཏང་ནས་དེ་རིང་ཉིན་ལྔ་པ་ཆགས་ཡོད་པ་དང་། གྲོང་ཁྱེར་ཡོངས་ཀྱི་བཟོ་སྐྲུན་ཚོང་ལས་རྣམས་མཚམས་འཇོག་པའམ་ཡང་ན་ཐོན་སྐྱེད་ཚད་འཛིན་བྱས་པ་དང་བསྟུན། སྣུམ་འཁོར་རིགས་ཀྱི་འགྲོ་འོང་ཡང་ཚད་བཟུང་སྟེ་སློབ་གྲྭ་ཆུང་འབྲིང་རྣམས་སྒོ་བརྒྱབ་ཡོད་འདུག

དེ་རིང་སྔ་དྲོར་ཆེད་མཁས་པ་མང་པོ་རྒྱ་ནག་དབུས་ཁོར་ཡུག་སྲུང་སྐྱོབ་ཁང་དུ་འཛོམས་ཏེ་ཛ་དྲག་གི་འབག་བཙོག་རང་བཞིན་ལ་དཔྱད་ཞིབ་གོ་བསྡུར་བྱས་ཡོད་པ་དང་། ཆེད་མཁས་པ་ཞིག་གིས་སྲིད་གཞུང་གི་སྒྲིག་ཁྲིམས་འོག་ཚད་ངེས་ཅན་གྱི་སྟངས་འཛིན་བྱས་ཏེ་མྱུར་སྐྱོབ་བྱེད་མ་ཐུབ་ན། གྲོང་ཁྱེར་ཁུལ་གྱི་མཁའ་དབུགས་ཆ་རྐྱེན་མ་གཞི་ནས་ཞན་པོ་ཡིན་པའི་ཁར། གནས་གཅིག་ཏུ་མི་གྲངས་འབོར་ཆེན་འདུས་སྡོད་བྱས་ཏེ། བཟོ་ལས་ཐོན་སྐྱེད་དང་འགྲིམ་འགྲུལ་འཕྲུལ་རིགས་མྱུར་ཚད་མཐོན་པོས་འཕེལ་རྒྱས་སུ་འགྲོ་བཞིན་ཡོད་སྟབས། མཁའ་དབུགས་འབག་བཙོག་གི་དཀའ་ངལ་མུ་མཐུད་ནས་ཤུགས་ཆེ་རུ་འགྲོ་རྒྱུ་ཡིན་སྐོར་བརྗོད་འདུག

རྒྱ་ནག་གནམ་གཤིས་བརྟག་དཔྱད་ཁང་གི་དྲ་བའི་ཐོག་མཁའ་དབུགས་འབག་བཙོག་སྐོར་གྱི་གནས་ཚུལ་ཞིག་སྤེལ་བའི་ནང་། རྒྱ་ནག་བཟོ་ལས་ཅན་དང་གྲོང་ཁྱེར་ཅན་གྱི་འཕེལ་འགྱུར་ཁྲོད་མཁའ་དབུགས་འབག་བཙོག་ནི་འཐབ་རྩོད་ཆེ་ཤོས་ཤིག་ཡིན་པ་དང་། ལྷག་པར་དུ་ཕྱི་ལོ་ ༢༠༣༠ ཡས་མས་སུ་རྒྱ་ནག་གི་དྲོད་རླངས་སྲེག་ཁང་ (Greenhouse Gas)གི་གྲངས་འབོར་མང་ཤོས་ཆགས་རྒྱུ་ཡིན་པ་དེས། བཟོ་ལས་ཐོན་ཁུངས་ཟད་གྲོན་མ་འོངས་ ༡༥ ནང་མུ་མཐུད་རྒྱུ་ཡིན་པ་གསལ་པོ་བསྟན་ཡོད་སྟབས། འབྱུང་འགྱུར་གྱི་དུས་ཡུན་རིང་པོའི་ནང་མཁའ་དབུགས་འབག་བཙོག་ནི་རྒྱ་ནག་གཞུང་དང་མི་མང་གིས་ངེས་པར་དུ་གདོང་གཏོད་དགོས་པའི་གནད་དོན་ཆེན་པོ་ཞིག་ཆགས་བསྡད་ཡོད་པ་རེད། ཅེས་བརྗོད་འདུག

ཡང་གནས་ཚུལ་དེའི་ནང་། སྲུང་སྐར་ལྟ་ཞིབ་ཀྱི་ལས་གཞི་ནི་རྒྱ་ནག་གི་མཁའ་དབུགས་འབག་བཙོག་དཔྱད་ཞིབ་དང་སྔོན་བརྡ་གཏོང་བར་གལ་འགངས་ཆེ་ཤོས་ཤིག་ཆགས་ཡོད་སྟབས། རྒྱ་ནག་དང་ཡུ་རོབ་རྒྱལ་སྤྱིའི་མཉམ་འབྲེལ་ལས་གཞི་སྟེ་མཱར་ཁོ་ཕོ་ལོ་(Marco Polo)དང་དོམ་ཁྲ་(Panda)གཉིས་ཀྱི་ཐོག་ནས་མུ་མཐུད་ཞིབ་འཇུག་ཤུགས་སྣོན་བྱེད་ཀྱི་ཡོད་ལུགས་དང་། ཉེ་སྔོན་ཡུ་རོབ་མཉམ་འབྲེལ་མཐུན་ཚོགས་ཀྱིས་ཕྱི་ལོ་ ༢༠༡༦ ནས་ ༢༠༢༠ བར་ལོ་རེར་ཡུ་སྒོར་དུང་ཕྱུར་ ༡ ལྷག་རེའི་མཐུན་འགྱུར་རོགས་རམ་གནང་སྟེ། མཉམ་འབྲེལ་གྱི་ཞིབ་འཇུག་དང་ལག་བསྟར་བྱ་བར་རོགས་འདེགས་གནང་གཏན་ཁེལ་ཡོད་སྐོར་བརྗོད་འདུག

གསར་འགོད་པ། པདྨ་མཚོ།