འདི་གར་གནས་ཚུལ་བཏང་འབྱོར་ལྟར་ན། སྔ་འགྱུར་རྙིང་མའི་བླ་ཆེན་སྟག་ལུང་རྩེ་སྤྲུལ་རིན་པོ་ཆེ་མཆོག འདང་ནུབ་ཐོ་རེངས་ཆུ་ཚོད་ ༢།༣༠ པ་ཙམ་ལ། གནས་མཆོག་རྡོ་རྗེ་གདན་དུ་སྐུར་སྙུང་གཞི་སོགས་ཀྱི་རྟགས་མཚན་ཆེན་པོ་གང་ཡང་མེད་པར་དགོངས་པ་ཆོས་དབྱིངས་སུ་འཐིམ་ཡོད་པ་དང་། ད་ལྟ་སྐུ་ཐུགས་དམ་དུ་བཞུགས་ཡོད་འདུག
རིན་པོ་ཆེ་མཆོག་ནི་བོད་དབུས་ལྷོ་ཁ་ས་ཁུལ་ཡར་འབྲོག་སྣ་དཀར་རྩེའི་ཕུན་དཀྱིལ་ཞེས་པའི་ཁྱིམ་དུ་ཡབ་རྣམ་རྒྱལ་རྡོ་རྗེ་དང་། ཡུམ་རྡོ་རྗེ་སྒྲོལ་མ་གཉིས་ཀྱི་སྲས་སུ་ཕྱི་ལོ་ ༡༩༢༦ ལོར་སྐུ་འཁྲུངས་ཤིང། རྡོ་བྲག་རིག་འཛིན་ཆེན་པོ་སྐུ་ཕྲེང་དགུ་པ། ཐུབ་བསྟན་ཆོས་དབང་མཉམ་ཉིད་རྡོ་རྗེ་མཆོག་གིས་རིན་པོ་ཆེ་མཆོག་ལ་སྟག་ལུང་རྩེ་སྤྲུལ་སྐུ་ཕྲེང་གསུམ་པ་ངོས་འཛིན་གནང་པ་ཡོད་འདུག ༢༠༡༢ ལོ་ནས་བཟུང་ཁོང་རྙིང་མའི་དབུ་འཛིན་གྱི་མཚན་གནས་བཞེས་ཡོད་པ་དང་། ཁོང་ད་ལོ་དགུང་གྲངས་ ༨༩ བཞེས་ཡོད་འདུག
བདག་ཅག་ལྷ་འབངས་ཡོངས་ཀྱི་དགེ་བའི་བཤེས་གཉེན་ཆེན་པོ་༸སྐྱབས་རྗེ་རྡོ་རྗེ་འཆང་མཚན་བརྗོད་པར་དཀའ་བ་སྟག་ལུང་རྩེ་སྤྲུལ་སྐུ་ཕྲེང་གསུམ་པ་མཆོག ཉེ་ཆར་གནས་མཆོག་རྡོ་རྗེ་གདན་དུ་སྐུར་སྙུང་གཞི་སོགས་ཀྱི་རྟགས་མཚན་ཆེན་པོ་གང་ཡང་མེད་པར་དགོངས་པ་ཆོས་དབྱིངས་སུ་འཐིམ་པའི་ཡིད་སྐྱོའི་གནས་ཚུལ་བྱུང་བ་དེར་སྔ་འགྱུར་བསྟན་པའི་དད་ལྡན་སློབ་འབངས་ཡོངས་ལ་ཐུགས་གསོ་དང་སྦྲགས། སྤྱིར་༸སྐྱབས་རྗེ་ཁོང་ཉིད་ཞི་བར་གཤེགས་པ་དེ་ནི། རྣམ་འདྲེན་བཞི་པ་མཉམ་མེད་བུ་རམ་ཤིང་པའི་མདོ་རྒྱུད་ཀྱི་བསྟན་པ་རིན་པོ་ཆེ་དང་། སྒོས་སུ་བོད་བརྒྱུད་ནང་བསྟན་དང་བཀའ་གཏེར་ཟུང་གི་སྔ་འགྱུར་གྱི་བསྟན་པ་རིན་པོ་ལ་ཤིན་ཏུ་ནས་གྱོང་གུན་གསབ་ཐབས་བྲལ་བ་བརྗོད་ཅི་ལ་དགོས། འོན་ཀྱང་བསྟན་པའི་གསལ་བྱེད་༸སྐྱབས་རྗེཁོང་ཉིད་ཀྱི་སླར་ཡང་བསྟན་པ་རིན་པོ་ཆེ་དང་། སྙིགས་དུས་ཀྱི་གདུལ་བྱ་་རྟག་འཛིན་པ་རྣམས་ཆོས་ལ་སྐུལ་བའི་དོན་དུ་མགྱོགས་ནས་མྱུར་དུ་ཡང་སྲིད་རིན་པོ་ཆེ་བྱོན་པའི་སྨོན་ལམ་གདུང་ཤུགས་དྲག་པོའི་གསོལ་འདེབས་ཀྱང་ཞུས།