གནས་མཆོག་ལུམ་བཱི་ནིར་ཕྱི་ཚེས་ ༡༥ ནས་ ༢༥ བར་གྱི་ཉིན་བཅུའི་རིང་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ཚོགས་པ་མཇུག་བསྒྲིལ་ཡོད་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཚེས་ ༡༥ ཉིན་ནས་བཟུང་བདག་ཅག་གི་སྟོན་པ་སྐུ་འཁྲུངས་ཡུལ་གནས་མཆོག་ལུམྦིནཱིར་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ཐེངས་ ༢༤ པ་དེ་དབུ་ཚུགས་གནང་ཡོད་ཅིང་། ཚོགས་མགོན་དུ་དཔལ་ས་སྐྱའི་སྐྱབས་མགོན་གོང་མ་ཁྲི་ཆེན་ཞེ་གཅིག་པ་ཆེན་པོ་མཆོག་དང་། གོང་མ་རཏྣ་བཛྲ་རིན་པོ་ཆེ་མཆོག་གིས་གཙོས་པའི་ཕོ་བྲང་གཉིས་ཀྱི་འཁོན་གདུང་རྣམ་པ། ངོར་ཁྲི་བ་ཐར་རྩེ་མཁན་རིན་པོ་ཆེ། ས་ངོར་ཚར་གསུམ་གྱི་ཞབས་དྲུང་རྣམ་པ། གདན་ས་ཁག་གི་མཁན་པོ་བླ་སྤྲུལ་བརྒྱ་ལ་ཉེ་བ་དང་། གཞན། རྒྱ་བལ་འབྲུག་གསུམ་ནས་ཕེབས་པའི་དགེ་འདུན་ཞལ་གྲངས་ ༤༠༠༠ ལ་ཉེ་བ་འཛོམས་ཡོད་འདུག
འདས་པའི་ཉིན་བཅུའི་རིང་འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་དང་། འཇམ་དཔལ་མཚན་བརྗོད་གཉིས་གྲངས་གསོག་མཛད་པ་དང་། ཚེས་ ༡༧ ཉིན་ས་སྐྱ་སྨོན་ལམ་ཁོར་ཡུག་ལྷན་ཚོགས་དང་། ལུམྦིནཱི་ཡར་རྒྱས་ཚོགས་པ་མཉམ་འབྲེལ་གྱིས་ལུམྦིནཱིའི་ཁོར་ཡུག་གཙང་སྦྲ་སྔར་ལས་ཡར་རྒྱས་ཡོང་ཐབས་སུ་ལས་འགུལ་སྤེལ་ཡོད་པ་དང་། ཚེས་ ༡༨ ཉིན་དེ་སྔོན་ནས་གསོལ་འདེབས་ཞུས་པ་བཞིན་ཐེངས་འདིའི་སྨོན་ལམ་རྒྱུན་ལས་ཀྱི་ངོས་ནས་ད་ལྟའི་ཆར་དགུང་གྲངས་གྱ་བདུན་ལ་ཕེབས་པ་ཕུན་ཚོགས་ཕོ་བྲང་གི་གོང་མ་བདག་ཆེན་འཇིགས་བྲལ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་དང་། ཚེས་ ༡༩ ཉིན་༧གོང་མ་རིན་པོ་ཆེ་མཆོག་གིས་ཧི་མ་ལ་ཡའི་མི་རིགས་གཙོ་བྱས་པའི་དད་ལྡན་སྟོང་ཕྲག་མང་པོར་གྲུབ་ཆེན་ཐང་སྟོང་རྒྱལ་པོ་ནས་བརྒྱུད་པའི་ཚེ་དབང་ལོ་བརྒྱ་མ་བསྩལ། ཚེས་ ༢༡ ཉིན་གོང་མ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས། ཚེས་ ༢༤ ཉིན་ས་པཎ་བླ་མཆོད་དང་འབྲེལ་རྒྱ་གར་གྱི་མཁས་དབང་མུཤྲིར་མཆོག་གིས་བསྒྱུར་གནང་ཞིང་། ས་པཎ་རིག་གཞུང་ཉམས་ཞིབ་བསྟི་གནས་ཁང་གིས་དཔེ་སྐྲུན་གནང་བའི་ཆོས་རྗེ་ས་པཎ་གྱི་རང་རྣམ་ང་བརྒྱད་མ་རྩ་འགྲེལ་ཧིན་རྡུ་དང་དབྱིན་ཇི། ལེགས་སྦྱར་བཅས་སྐད་ཡིག་གསུམ་དུ་འགྱུར་བ་དེ་ཉིད་༧གོང་མ་རིན་པོ་ཆེ་མཆོག་གིས་དབུ་འབྱེད་དང་། ཕྱི་དྲོར་ཆོས་རྗེ་ས་པཎ་གྱི་བརྩམས་ཆོས་གྲགས་ཅན། སྡོམ་གསུམ་རབ་དབྱེ་དང་། ཚད་མ་རིགས་གཏེར་གཉིས་བརྗོད་གཞིར་བཟུང་སྟེ་དཔལ་ས་སྐྱའི་གདན་ས་ཁག་གི་སློབ་གཉེར་པ་ཚོས་རྟགས་གསལ་གྱི་མཆོད་སྤྲིན་ཕུལ།
ཕྱི་ཚེས་ ༢༥ ཉིན་དཔལ་ས་སྐྱའི་སྨོན་ལམ་ཚོགས་པས་གོ་སྒྲིག་འོག ད་ལོར་བལ་ཡུལ་གྱི་ས་ཡོམ་ཁྲོད་རྐྱེན་འདས་སུ་གྱུར་པ་དག་གི་ཆེད་གོང་མ་རིན་པོ་ཆེ་ཡབ་སྲས་རྣམ་པ་དབུ་བཞུགས་ཐོག་ཀུན་རིག་བྱང་ཆོག་འཚོགས་གནང་མཛད་མཐར་ལོ་འདིའི་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་ཡོངས་སུ་མཇུག་གྲུབ་ཡོད་འདུག གནས་ཚུལ་གཏོང་མཁན་ཨ་འདུས་སྐལ་བཟང་རྒྱ་མཚོ།
