རྩོམ་བསྡུའི་གསལ་བརྡ།

༄༅། །ངག་གི་རང་བཞིན་ལ་བརྟེན་ནས་ཆོས་སྲིད་ལུགས་གཉིས་ཀྱི་བླང་དོར་གསལ་བར་བྱེད་པའི་རྒྱ་ཆེའི་རྩོམ་པ་པོ་ཡོངས་ལ་

ཆེད་ཞུ།

ཇི་ལྟར་དགོངས་པར་མངའ་གསལ་བཞིན། ཕྱོགས་བཅུའི་རབ་འབྱམས་ཞིང་གི་རྒྱལ་བ་མ་ལུས་པའི་སྙིང་རྗེའི་རང་གཟུགས་ངུར་སྨྲིག་གར་གྱིས་རྣམ་པར་རོལ་པ།   ཁམས་གསུམ་ཆོས་ཀྱི་རྒྱལ་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག འགྲོ་བ་ལྷ་དང་བཅས་པའི་སྟོན་པ་བླ་ན་མེད་པ། འཇིག་རྟེན་ཞི་བདེའི་དེད་དཔོན།   རང་ཅག་ཁ་བ་རི་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཕགས་མཆོག་ཕྱག་ན་པདྨོ།   ལྷར་བཅས་སྲིད་ཞིའི་གཙུག་རྒྱན་༸གོང་ས་ལྷ་མིའི་རྣམ་འདྲེན་སྐུ་ཕྲེང་བཅུ་བཞི་པ་ཆེན་པོ་མཆོག་དགོས་པ་དང་དོན་གྱི་སླད་དུ་མཚན་ཡོངས་སུ་སྨོས་ན་༸རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་གི་སྐུ་རབས་ཀྱི་ཕྲེང་བ་འཕགས་བོད་ཧོར་སོག་གིས་གཙོས་པའི་འཛམ་གླིང་ཡུལ་གྲུ་དུ་མར་རྒྱལ་བློན་པཎ་གྲུབ་སོགས་གང་ལ་གང་འདོད་ཀྱི་སྤྲུལ་པའི་རོལ་གར་བསམ་གྱིས་མི་ཁྱབ་ཅིང་བརྗོད་ཀྱིས་མི་ལང་ཞིང་།   གངས་ཅན་ཁ་བའི་ལྗོངས་སུའང་ཆོས་ཀྱི་རྒྱལ་པོ་སྲོང་བཙན་སྒམ་པོ་དང་། འབྲོམ་སྟོན་རྒྱལ་བའི་འབྱུང་གནས་སོགས་དང་།   གངས་ཅན་ཚད་མའི་སྟོན་པ་ཤར་རྒྱལ་བ་ཙོང་ཁ་པ་ཆེན་པོའི་ཐུགས་སྲས་ཐམས་ཅད་མཁྱེན་པ་དགེ་འདུན་གྲུབ་པ་སོགས་དང་།   ལྷག་པར་དུ་དྲེགས་ལྡན་བྱེ་བའི་གཙུག་རྒྱན་༸གོང་ས་ལྔ་པ་ཆེན་པོ་ངག་དབང་བློ་བཟང་རྒྱ་མཚོས་གཞུང་ས་དགའ་ལྡན་ཕོ་བྲང་པ་ཆེན་པོའི་ཆོས་སྲིད་ལུགས་གཉིས་ཀྱི་ཁ་ལོ་མངོན་པར་བསྒྱུར་བ་ནས་བཟུང་གསེར་སྦྱངས་བཙོ་མ་ལྟ་བུའི་འཇམ་མགོན་རྒྱལ་བ་གཉིས་པའི་མདོ་སྔགས་བཤད་སྒྲུབ་ཀྱི་བསྟན་པ་རིན་པོ་ཆེ་ཕྱོགས་དང་སྒོ་ཐམས་ཅད་ནས་དར་ཞིང་རྒྱས་ཤིང་།   ༸གོང་ས་བཅུ་གསུམ་པ་ཆེན་པོས་མཁས་གྲལ་གསར་གཏོད་མཛད་པ་སོགས་བསྟན་འགྲོའི་ཕན་བདེའི་འབྱུང་གནས་འདི་ཉིད་ལ་བཀའ་དྲིན་བླ་ལྷག་ཏུ་ཆེ་བ་དང་།   ཁྱད་པར་དུ་རང་ཅག་གཞིས་བྱེས་བོད་མི་ཡོངས་ཀྱི་ཕན་བདེའི་སྲོག་རྩ་༸བསྟན་པ་འདི་ལ་སྟོན་པ་གཉིས་པ་ལྟ་བུའི་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་མཁའ་ཁྱབ་སྐྱེ་འགྲོ་སྤྱི་དང་། ལྷག་པར་བོད་གངས་ཅན་གྱི་དོན་དུ་ཕྱི་ལོ་༡༩༣༥ བོད་ཟླ་༥ ཚེས་༥ ཉིན་འཇམ་མགོན་རྒྱལ་བ་གཉིས་པའི་འཁྲུངས་ཡུལ་སྐུ་འབུམ་ལྟག་འཚེར་དུ་བསམ་བཞིན་མིའི་སྲིད་པ་བཟུང་བ་ནས་ད་ཆ་ཕྱི་ལུགས་དགུང་གྲངས་༨༠ ཕེབས་ཀྱང་སྐུ་ངལ་བརྒྱ་ཕྲག་ལྷུར་བཞེས་ཀྱིས་བསྟན་པ་དང་འགྲོ་བའི་དོན་དུ་འཇམ་མགོན་རྒྱལ་བ་གཉིས་པ་སླར་ཡང་འཇིག་རྟེན་དུ་བྱོན་པ་ལྟར། མཛད་བཟང་རྣམ་གསུམ་གྱིས་མཚོན་གུས་ཅག་ཐབས་མཁས་ཐུགས་རྗེས་བསྐྱངས་དང་སྐྱོང་བཞིན་པར་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་དང་། བཀའ་དྲིན་རྣམས་བརྗེད་མེད་སྙིང་བཅངས་ཀྱིས་སྔ་ཕྱིའི་རྩ་ཆེའི་བཀའ་སློབ་ལམ་སྟོན་རྣམས་ལག་ལེན་ཐོག་ཁེལ་ཐུབ་པ་ཞུ་རྒྱུའི་སྒྲུབ་པའི་མཆོད་སྤྲིན་སྤྲོ་སླད།

ཕྱི་ལོ་༢༠༡༤ ལོར་དགེ་ལྡན་བསྟན་བདག་རྣམ་པ་དབུ་བཞུགས་ཀྱིས་ཆེད་འཛུགས་དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་སྔ་ཕྱི་ལན་མང་ཚོགས་པའི་ཚོགས་འདུའི་གྲོས་ཆོད་དང་། ལྷག་པར་ཕྱི་ལོ་༢༠༡༥ ཟླ་༦ ཚེས་༢༣ དང་༢༤ ཉིན་གཉིས་རིང་རྡ་སར་བསྐོང་ཚོགས་གནང་བའི་༸རྒྱལ་བའི་བཀའ་དྲིན་རྗེས་དྲན་དང་འབྲེལ་དགེ་ལུགས་ཡོངས་ཀྱི་ཚོགས་ཆེན་ཐེངས་དང་པོའི་ཐོག་སྤྱི་མོས་ཀྱིས་གཏན་འབེབས་གནང་བའི་དགོངས་དོན། ཕྱི་ལོ་༢༠༡༥ ཟླ་ ༦ ཚེས་༢༡ ནས་ཕྱི་ལོ་༢༠༡༦ ཟླ་༦ ཚེས་༢༡ བར་ལོ་གཅིག་རིང་༸རྒྱལ་བའི་བཀའ་དྲིན་རྗེས་དྲན་ཞུ་རྒྱུའི་མཛད་རིམ་ནང་གསེས། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་གླེང་བའི་གཏམ་བཅད་ལྷུག་སྤེལ་མ་ཚང་འཛོམས་ཀྱི་དེབ་ཅིག་རྩོམ་སྒྲིག་བྱ་རྒྱུ།” ཞེས་གསལ་བ་ལྟར་རིས་སུ་མ་ཆད་པའི་རྩོམ་པ་པོ་རྣམས་ཀྱིས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་། བཀའ་སློབ། གསུང་རྩོམ། དགོངས་གཞི་སོགས་གླེང་སློང་ཐོག་དཔྱད་བསྟོད་ཅི་རིགས་ཀྱི་བཅད་ལྷུག་སྤེལ་མའི་རྩོམ་གང་ཡིན་ཡང་རུང་། ཕྱི་ལོ་༢༠༡༦ ཕྱི་ཟླ་༤ འགྱངས་མེད་གཤམ་གསལ་ཡིག་ཟམ་ཐོག་སྨོན་ལམ་ཡིག་གཟུགས་གཉིས་པའི་ཐོག་སྩོལ་གནང་ཡོང་བ་དང་ཆབས་ཅིག       རྩོམ་པ་པོ་སོ་སོའི་ཞལ་པར་ཨང་ངམ།   སྐད་འཕྲིན་ཨང་སོགས་འབྲེལ་གཏུགས་སྟབས་བདེའི་ཨང་དང་ཁ་བྱང་རེ་བསྐུར་རྒྱུའི་རེ་སྐུལ་ཞུ་བཞིན་ཡོད།

དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གིས་

བོད་རྒྱལ་ལོ་༢༡༤༢ ཕྱི་ལོ་༢༠༡༥ ཟླ་༨ ཚེས་༢༠ ཉིན།

རྒྱུན་ལས་ཀྱི་ཡིག་ཟམ་ཁ་བྱང་། gelugkadrinjedren@gmail.com

འབྲེལ་གཏུགས་ཁ་པར་ཨང་།   ༩༨༨༦༥༨༣༣༦༤།

ཡང་ན།༩༨༨༠༠༦༦༠༡ ཡིན།