ད་ལྟ་པེ་ཅིན་དུ་འཚོགས་བཞིན་པའི་རྒྱལ་ཡོངས་མི་མང་འཐུས་མིའི་རྒྱུན་ལས་ཚོགས་འདུའི་སྟེང་འཇིགས་སྐུལ་དྲག་སྤྱོད་པར་རྟོག་ཞིབ་བྱེད་ཆེད་རྒྱལ་ནང་གི་བརྡ་འཕྲིན་ཚང་མས་གནས་གསལ་གལ་ཆེན་རིགས་སྲིད་གཞུང་ལ་མཁོ་སྤྲོད་བྱེད་དགོས་པའི་སྒྲིག་ཁྲིམས་ཞིག་གཏན་འབེབས་བྱས་ཡོད་འདུག
དེ་རིང་ཨེ་ཕེ་དང་བྷེ་བྷེ་སེ་གསར་ཁང་གཉིས་ཀྱིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ཉི་མའི་ཉིན་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་ནས་འཇིགས་སྐུལ་དྲག་སྤྱོད་པར་རྟོག་ཞིབ་དང་འགོག་རྒོལ་བྱེད་ཕྱོགས་ཀྱི་བཅའ་ཁྲིམས་གསར་བ་ཞིག་གཏན་འབེབས་བྱས་ཡོད་ཅིང་། སྒྲིག་ཁྲིམས་དེ་འཆར་ལོའི་ཕྱི་ཟླ་དང་པོ་ནས་དངོས་སུ་ལག་བསྟར་བྱ་འཆར་ཡོད་འདུག
ཐེངས་འདིར་གཏན་འབེབས་བྱས་པའི་སྒྲིག་ཁྲིམས་དེ་ནི་འཕྲུལ་རིག་ཚན་རྩལ་ཚོང་གཉེར་ཁང་ (technology companies) ཚང་མས་རྒྱ་ནག་གཞུང་ལ་ཉིན་རེའི་གློག་འཕྲིན་གལ་ཆེན་ཁག་མཁོ་སྤྲོད་བྱེད་དགོས་པ་ཞིག་ཡིན་སྟབས། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་ནག་གི་སྒྲིག་ཁྲིམས་གསར་པ་དེས་དེང་རབས་འཕྲུལ་རིག་ཚན་རྩལ་ཁེ་ལས་ཁག་ལ་གྱོང་གུད་ཐེབས་ངེས་ཡིན་པ་མ་ཟད། སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་སོགས་ལའང་དོ་ཕོག་འགྲོ་སྲིད་པར་སེམས་ཁུར་བྱེད་བཞིན་ཡོད་འདུག
རྒྱ་ནག་གཞུང་གིས་སྒྲིག་ཁྲིམས་གསར་པ་དེ་མང་མོས་ཐོག་གཏན་འབེབས་བྱས་པ་ཞིག་ཡིན་ལུགས་བཤད་ཀྱང་། ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་གིས་རྒྱ་ནག་གཞུང་གིས་འཇིགས་སྐུལ་དྲག་སྤྱོད་པར་རྟོག་ཞིབ་ལ་ཁ་གཡར་ཏེ། སྤྱི་ཚོགས་བརྒྱུད་ལམ་དང་དྲ་ལམ་ཁེ་ལས་ཁག་ལ། རྒྱལ་ཁབ་ཕྱི་ནང་གི་གསང་བའི་ཡིག་ཚགས་དང་བརྡ་འཕྲིན་ཡོད་ཚད་རྒྱལ་ཁབ་གསང་བའི་ལས་ཁུངས་ལ་མཁོ་སྤྲོད་དགོས་པའི་སུན་གཙེར་བཟོ་བཞིན་ཡོད་སྐོར་བརྗོད་འདུག
རྒྱ་ནག་དབུས་དྲ་ལམ་ཞིབ་བཤེར་ལྷན་ཁང་ (CCDIw) ཟེར་བས་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གཞུང་འབྲེལ་གློག་འཕྲིན་ཁང་ (China Telecom) གི་འགན་འཛིན་ཁྲང་ཞོ་པིན་ (Chang Xiaobing) ཟེར་བས་རྒྱལ་ཁབ་ཀྱི་དྲ་ལམ་སྒྲིག་ཁྲིམས་ལ་གཏོར་བརླག་ཚབས་ཆེན་བཟོས་པ་མ་ཟད། དེ་འབྲེལ་གྱི་རྒྱུ་ནོར་ལྐོག་ཟ་བྱས་པའི་ནག་ཉེས་ཐོག་འཛིན་བཟུང་བྱས་ཡོད་སྐོར་འཁོད་ཡོད་ཀྱང་། ཁྲང་ཞོ་པིན་གྱིས་ནག་ཉེས་གང་ཞིག་བསགས་ཡོད་པའི་བདེན་གསལ་བོ་གང་ཡང་འཁོད་མི་འདུག ཁྲང་ཞོ་པིན་ད་ལྟ་ལོ་ ༧༠ ཡིན་པ་དང་། ཁོ་རྒྱ་ནག་གཞུང་འབྲེལ་གློག་འཕྲིན་ཁང་གི་གཙོ་འཛིན་ཡིན་འདུག
རྒྱལ་སྤྱིའི་ཆབ་སྲིད་དབྱེ་ཞིབ་པ་ཚོས། རྒྱ་ནག་གཞུང་གི་ལྐོག་ཟ་རུལ་སུངས་གཙང་བཤེར་སྲིད་ཇུས་འོག ཁྲང་ཞོ་པིན་ནི་རྒྱལ་ཁབ་ཀྱི་སྒྲིག་ཁྲིམས་ལ་གཏོར་བརླག་བཏང་བ་དང་རྒྱུ་ནོར་ལྐོག་ཟ་བྱས་པའི་ཉེས་མིང་ཐོག་འཛིན་བཟུང་བྱས་པའི་དཔོན་རིགས་མཐའ་མ་དེ་ཡིན་སྲིད་པར་ཚོད་དཔག་བྱེད་ཀྱིན་ཡོད་འདུག
༢༠༡༤ ལོ་ནས་ད་ལྟའི་བར་རྒྱ་ནག་གཞུང་གི་ལྐོག་ཟ་རུལ་སུངས་གཙང་བཤེར་སྲིད་ཇུས་འོག རྒྱ་ནག་དམར་ཤོག་ཚོགས་ཁོངས་ཀྱི་གནད་ཡོད་དཔོན་རིགས་ ༧༠ ལྷག་འཛིན་བཟུང་དང་བཀག་བསྐྱིལ་བྱས་ཡོད་འདུག
གསར་འགོད་པ། པདྨ་རྒྱལ།
