རྒྱ་གར་ ༢༠༣༠ ལོར་འཛམ་གླིང་ཐོག་གི་དཔལ་འབྱོར་སྟོབས་ཆེ་ཤོས་ཨང་གསུམ་པ་དང་དུས་རབས་འདིའི་དུས་དཀྱིལ་ནས་བཟུང་འཛམ་གླིང་གི་དཔལ་འབྱོར་སྟོབས་ཆེ་ཤོས་ཨང་དང་པོ་ཆགས་རྒྱུ་རེད་ཟེར།
ཁ་སང་དབྱིན་ཡུལ་རྒྱལ་ས་ལོན་ཌོན་ནང་རྟེན་གཞི་བྱས་པའི་དཔལ་འབྱོར་ཚོང་ལས་དང་ཞིབ་འཇུག་ལྟེ་གནས་ (CEBR) ཞེས་པས་འདས་པའི་ལོ་གཅིག་རིང་རྒྱལ་སྤྱིའི་རྒྱལ་ཁབ་ཁག་གི་དཔལ་འབྱོར་འཕེལ་ཚད་ལ་ཞིབ་འཇུག་བྱས་པའི་གྲུབ་དོན་སྙན་ཐོ་ཞིག་བཏོན་པའི་ནང་། ༢༠༢༩ ལོར་རྒྱ་ནག་རྒྱལ་སྤྱིའི་ཐོག་དཔལ་འབྱོར་སྟོབས་ཆེ་ཤོས་དང་གཉིས་པ་ཨ་རི། གསུམ་པ་རྒྱ་གར་ཆགས་རྒྱུ་ཡིན་སྐོར་བསྒྲགས་འདུག
སྙན་ཐོའི་ནང་། “ཕྱི་ལོ་ ༢༠༡༥ ལོ་མགོ་ཚུགས་པ་ནས་འཛམ་གླིང་གི་མི་འབོར་ཆེ་ཤོས་ཨང་གཉིས་པ་རྒྱ་གར་གྱི་དཔལ་འབྱོར་འཕེལ་ཚད་རྒྱ་ནག་ལས་མྱུར་བ་བྱུང་ཡོད་ཀྱང་། རྒྱ་ནག་ལས་རྣམ་པར་རྒྱལ་བར་ད་དུང་ཡུན་རིང་འཐབ་རྩོད་བྱེད་དགོས་པ་ཆགས་ཡོད། ཡིན་ཡང་ད་ལྟ་རྒྱ་གར་གཞུང་གིས་དཔལ་འབྱོར་ལེགས་བཅོས་བཏང་སྟེ་རྣམ་པ་མི་འདྲ་བའི་ཐོག་ནས་རྩོད་ལེན་བྱས་ན་དུས་རབས་འདིའི་དུས་དཀྱིལ་དུ་རྒྱ་ནག་ལས་དཔལ་འབྱོར་སྟོབས་ཆེ་བ་ཆགས་རྒྱུའི་རེ་བ་ཡོད་པ་མ་ཟད། ཕྱི་ལོ་ ༢༠༡༩ ལོར་དབྱིན་ཡུལ་ལས་ཀྱང་དཔལ་འབྱོར་སྟོབས་ཤུགས་ཆེ་བ་ཆགས་ཏེ། དེ་སྔོན་དབྱིན་ཡུལ་གྱི་མངའ་འོག་ཏུ་ཚུད་མྱོང་བའི་རྒྱལ་ཁབ་ཁག་ (Commonwealth Nation) ནང་ནས་དཔལ་འབྱོར་ཆེ་ཤོས་ཨང་དང་པོ་ཆགས་རྒྱུ་རེད།”ཅེས་བཀོད་འདུག
དེའི་ནང་མུ་མཐུད་དུ། ད་ལྟ་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྒྲིག་འཛུགས་ཁག་གིས་དཔལ་འབྱོར་སྟོབས་ཤུགས་ཆེ་ཆུང་ལ་དཔག་སྟེ། མ་འོངས་པར་རྒྱལ་སྤྱིའི་སྟོབས་ཆེན་རྒྱལ་ཁབ་གདམ་རྒྱུའི་སྲིད་བྱུས་གསར་པ་འཛིན་བཞིན་ཡོད་ཀྱང་། ད་ལྟའི་འཛམ་གླིང་སྟོབས་ཆེན་རྒྱལ་ཁབ་བརྒྱད་ (G-8) དེ་ལོ་རེའི་རྒྱལ་ཁབ་སོ་སོའི་ཐོན་སྐྱེད་ཡོང་འབབ་མང་ཉུང་ལ་གཞིགས་ཏེ་བསྐོ་བཞིན་ཡོད་ཚེ། ༢༠༣༠ ལོའི་ནང་ཚུད་དུ་རྒྱ་གར་དང་བྷར་ཛེལ། ལྷོ་ཀོ་རི་ཡ་བཅས་ཀྱི་དཔལ་འབྱོར་འཕེལ་ཚད་ཇེ་མགྱོགས་སུ་ཕྱིན་ཏེ་ནུབ་ཕྱོགས་རྒྱལ་ཁབ་ཁག་ལས་སྟོབས་ཆེན་ཆགས་ཏེ། ཧྥ་རན་སི་དང་ཨུ་རུ་སུ། ཨི་ཌ་ལི་སོགས་སྟོབས་ཆེན་རྒྱལ་ཁབ་གྲས་ནས་ཕྱིར་འཕུད་རྒྱུ་རེད། ཅེས་སོགས་བཀོད་འདུག
ཕྱི་ལོ་ ༢༠༣༠ ལོར་རྒྱ་གར་ལ་ལོ་རེའི་འཆར་ཟིན་ཐོན་སྐྱེད་ཡོང་འབབ་ཨ་སྒོར་ཐེར་འབུམ་$10,133 དང་། ཨ་རིར་ཨ་སྒོར་ཐེར་འབུམ་ $32,996། རྒྱ་ནག་ལ་ཨ་སྒོར་ཐེར་འབུམ་$ 34,338 བཅས་ཟིན་ཏེ། རྒྱལ་སྤྱིའི་ཐོག་རྒྱ་ནག་དཔལ་འབྱོར་སྟོབས་ཆེ་ཤོས་དང་ཨ་རི་ཨང་གཉིས་པ། རྒྱ་གར་ཨང་གསུམ་པ་དང་ལྷོ་ཀོ་རེ་ཡ་ཨང་ལྔ་པ་ཆགས་རྒྱུ་ཡིན་པ་མ་ཟད། བྷེ་ལཱ་རུ་སི་ (Belarus) དང་སིང་གྷ་ལ། ཁེན་ཡ་དང་ཨི་ཋོ་པི་ཡ་ཡང་འཛམ་གླིང་གི་སྟོབས་ཆེན་རྒྱལ་ཁབ་ ༦༠ ཡི་ཁོངས་སུ་ཚུད་རྒྱུ་ཡིན་འདུག
ཨེ་ཤ་ཡའི་དུས་བབ་སྟེང་རྒྱལ་སྤྱིའི་དཔལ་འབྱོར་རིག་པ་ཁག་ཅིག་གིས། ཕྱི་ལོ་ ༢༠༣༠ ལོའི་རྗེས་རྒྱ་ནག་གི་མི་འབོར་མང་ཆེ་བ་བརྒས་ཏེ་དཔལ་འབྱོར་ཐོན་སྐྱེད་བྱེད་པའི་ནུས་པ་མེད་སྟབས། རྒྱ་གར་ལ་ཁེ་བཟང་རག་ནས་དཔལ་འབྱོར་འཕེལ་ཚད་གྲངས་ཆ་གཉིས་ཐོག་འཕར་ཏེ། དུས་རབས་འདིའི་དུས་དཀྱིལ་ནས་རྒྱལ་སྤྱིའི་ཐོག་དཔལ་འབྱོར་ཆེ་ཤོས་ཆགས་རྒྱུ་དང་། དེ་བཞིན། ད་ལྟ་རྒྱ་ནག་གི་དཔལ་འབྱོར་འཕེལ་ཚད་ཇེ་དལ་དུ་ཕྱིན་པ་དང་དངུལ་གྱི་ཛ་ཐང་མར་ཆག་པ་སོགས་ལ་བརྟེན་ཏེ། ཨ་རི་ལས་རྣམ་པར་རྒྱལ་ཁག་པོ་ཡིན་སྐོར་ཡང་བརྗོད་འདུག
གསར་འགོད་པ། དོན་གྲུབ།
