ཝེ་ཕོང་ཡན་གྱིས་དངུལ་དངོས་རྒྱ་སྒོར་ས་ཡ་ ༣༤༢ ལྐོག་ཟ་བྱས་པའི་ནག་ཉེས་འོག་འཛིན་བཟུང་བྱས་ཡོད་པ་དང་། ཁོ་ནི་ད་ལྟའི་བར་རྒྱ་ནང་གི་ལྐོ་ཟ་རུལ་སུངས་ཚབས་ཆེ་ཤོས་དེ་ཆགས་ཀྱི་ཡོད་འདུག
དེ་རིང་ཕྱི་དྲོར་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་རྒྱ་ནག་ཧི་པའེ་ (Hebei province) ཞིང་ཆེན་པའོ་ཏེན་ (Baoding) གྲོང་ཁྱེར་གྱི་རྒྱལ་ཡོངས་ནུས་ཤུགས་ཐོན་སྐྱེད་རྡོ་སོལ་ཚན་ཁག་གི་འགན་འཛིན་གཞོན་པ་ཟུར་བ་ཝེ་ཕོང་ཡན་ (Wei Pengyuan) ཟེར་བ་ཞིག་གིས་རྒྱ་སྒོར་ས་ཡ་ ༢༡༡ དང་། རྒྱུ་དངོས་ཀྱི་རིན་དོད་རྒྱ་སྒོར་ས་ཡ་ ༡༣༡ ལྷག་ལྐོག་བྱས་པའི་ནག་ཉེས་འོག་འཛིན་བཟུང་བྱས་ཏེ། པའོ་ཏེན་གྲོང་ཁྱེར་མི་དམངས་འབྲིང་རིམ་ཁྲིམས་ཁང་གིས་ཁྲིམས་བཤེར་བྱས་ཡོད་ཀྱང་། ད་སྔ་ཁྲིམས་ཐག་གཏན་འབེབས་བྱས་མེད་པ་དང་། ཝེ་ཕོང་ཡན་ནི་ད་ལྟའི་བར་རྒྱ་ནང་གི་གཞུང་འབྲེལ་དཔོན་རིགས་དང་སྒེར་གཉེར་ཁེ་ལས་སྡེ་ཁག་གི་དཔོན་རིགས་ཚོས་ལྐོག་རྔན་སྤྲོད་ལེན་བྱས་པའི་གྲས་ཀྱི་ལྐོག་རུལ་སུངས་ཚབས་ཆེ་ཤོས་དེ་ཆགས་ཡོད་འདུག
གསར་འགོད་པ། པདྨ་རྒྱལ།
