སྲིད་དོན་དབྱེ་ཞིབ་པ་ཁ་ཅིག་གིས་ཁེམ་ཡང་གྷོན་འདས་གྲོངས་ཕྱིན་པ་དེས་ལྷོ་བྱང་རྒྱལ་ཁབ་གཉིས་བར་ལྡོག་ཕྱོགས་ཀྱི་ཤན་ཤུགས་ཐེབས་སྲིད་པར་ཚོད་དཔག་བྱེད་བཞིན་འདུག
བྱང་ཀོ་རི་ཡའི་དབུས་བརྙན་འཕྲིན་ཁང་ (KCNA) གིས་གནས་ཚུལ་སྤེལ་བ་ལྟར་ན། ཁ་སང་ཕྱི་དྲོའི་ཆུ་ཚོད་ ༦། ༡༥ སྟེང་བྱང་ཀོ་རི་ཡའི་དབུས་ངལ་རྩོལ་ཚོགས་པའི་ (WPK) དྲུང་ཆེ་དང་བྱང་ཀོ་རི་ཡའི་དབུས་འཐབ་ཕྱོགས་གཅིག་གྱུར་ཁང་ (UFD) གི་གཙོ་འཛིན་ཁེམ་ཡང་གྷོན་ (Kim Yang-gon) ཟེར་བ་དེ་རླངས་འཁོར་གདོང་ཐུག་གི་དོན་རྐྱེན་ཁྲོད་འདས་གྲོངས་ཕྱིན་ཡོད་པ་དང་། ཁོང་གི་འདས་རྐྱེན་དེ་བྱང་ཀོ་རི་ཡའི་ནང་ཁུལ་དཔོན་རིགས་ཚོ་དང་འབྲེལ་བ་ཡོད་འདུག
བྱང་ཀོ་རི་ཡའི་གཙུག་ལག་སློབ་ཆེན་གྱི་ཞིབ་འཇུག་ལྟེ་གནས་ཁང་གི་སྲིད་དོན་དབྱེ་ཞིབ་པ་ཡང་མའོ་ཇེན་ (Yang Moo-jin) ཟེར་བ་ཞིག་གིས། ཁེམ་ཡང་གྷོན་གྱི་འདས་རྐྱེན་དེ་ལྷོ་བྱང་ཀོ་རི་ཡའི་མཐའ་མཚམས་རྩོད་གླེང་གི་གནད་དོན་དང་འབྲེལ་བ་ཡོད་སྟབས། ཁེམ་ཡང་གྷོན་གྱི་འདས་རྐྱེན་གྱིས་ལྷོ་བྱང་རྒྱལ་ཁབ་གཉིས་ཀྱི་འབྲེལ་ལམ་ཐད་ལ་ལྡོག་ཕྱོགས་ཀྱི་ཤན་ཤུགས་ཐེབས་སྲིད་པ་དང་། ད་ལྟའི་བྱང་ཀོ་རི་ཡའི་དཔོན་རིགས་ཚོའི་ཁྲོད་དུ་ལྷོ་བྱང་རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་གཏོང་ཐབས་སུ་ནུས་པ་འདོན་ཐུབ་པའི་དཔོན་རིགས་གཅིག་ཀྱང་མེད་སྐོར་བརྗོད་འདུག
ལྷོ་ཀོ་རི་ཡའི་དམག་དོན་ཞིབ་འཇུག་ཁང་ (Sejong Institute) གི་ཞིབ་འཇུག་པ་ཆོང་སོང་ཆང་ (Cheong Seong-chang) ཟེར་བ་ཞིག་གིས། ཉེ་ལམ་ལྷོ་བྱང་རྒྱལ་ཁབ་གཉིས་ཀྱི་མཐའ་མཚམས་རྩོད་གླེང་གི་གྲོས་མོལ་ལ་དོན་ཕན་བྱུང་མེད་སྟབས། ཁེམ་ཡང་གྷོན་གློ་བུར་འདས་གྲོངས་ཕྱིན་པ་དེས་ཕྱོགས་གཉིས་ཀྱི་འབྲེལ་ལམ་ཐད་འགོག་རྐྱེན་ཐེབས་སྲིད་པ་རེད། ཅེས་བརྗོད་འདུག
གནས་ཚུལ་འདིའི་ནང་མུ་མཐུད་དུ། ༢༠༠༧ ལོར་ཁེམ་ཡང་གྷོན་གྱི་ཕྱི་འབྲེལ་ནུས་སྟོབས་ལ་བརྟེན་ནས་ལྷོ་བྱང་རྒྱལ་ཁབ་གཉིས་བར་ཆེས་མཐོའི་དཔོན་རིགས་ཚོགས་ཆེན་བསྡུས་པའི་སྟེང་བྱང་ཀོ་རི་ཡའི་མགོ་ཁྲིད་ཁེམ་ཇོང་ཨལ་ (Kim Jong-il) དང་ལྷོ་ཀོ་རི་ཡའི་སྲིད་འཛིན་རའོ་མའོ་ཧེན་ (Roh Moo-hyun) གཉིས་མཇལ་འཕྲད་བྱུང་བ་མ་ཟད། ད་ལོའི་ཕྱི་ཟླ་ ༨ པའི་ནང་ཁེམ་ཡང་གྷོན་བྱང་ཀོ་རི་ཡའི་ཆེས་མཐོའི་སྐུ་ཚབ་ཀྱི་མིང་ཐོག་ནས་ལྷོ་བྱང་རྒྱལ་ཁབ་གཉིས་ཀྱི་མཐའ་མཚམས་རྩོད་གླེང་ཞི་འཇགས་སུ་གཏོང་ཐུབ་ཡོད་སྟབས། བྱང་ཀོ་རི་ཡའི་གཞུང་དམངས་གཉིས་ཀྱིས་ཁེམ་ཡང་གྷོན་ནི་རྒྱལ་དམངས་ལས་དོན་ཐད་འཇོན་ནུས་ལྡན་པ་དང་ལྷག་བསམ་དཀར་བའི་སྐྱེ་བུ་རླབས་ཆེན་ཞིག་ཡིན་ཞིང་། ཁོང་གློ་བུར་འདས་གྲོངས་ཕྱིན་པ་འདི་ནི་བྱང་ཀོ་རི་ཡ་གཞུང་དམངས་གཉིས་ཀྱི་གྱོང་གུད་ཆེན་པོ་ཞིག་སྐོར་སོགས་བརྗོད་འདུག
གནས་ཚུལ་ལྟར་ན། ཕྱི་ལོ་ ༡༩༥༠ ནས་ ༡༩༥༣ བར་ཀོ་རི་ཡའི་རྒྱལ་ནང་དུ་ཟིང་འཁྲུག་ལངས་ཏེ་ལྷོ་བྱང་གཉིས་གྱེས་པ་དང་། སྐབས་དེ་བཟུང་ཕྱོགས་གཉིས་བར་བཟང་ཕྱོགས་ཀྱི་འབྲེལ་ལམ་བྱུང་ཐུབ་མེད་ནའང་། ཁེམ་ཡང་གྷོན་གྱི་ཕྱི་འབྲེལ་སྲིད་ཇུས་ལ་བརྟེན་ནས། ལྷོ་བྱང་རྒྱལ་ཁབ་གཉིས་ཀྱི་མཐའ་མཚམས་རྩོད་གླེང་ཐད་ཞི་འགྲིག་གི་གྲོས་ཆོད་བཞག་སྟེ། ཕྱོགས་གཉིས་བར་འགྲོ་འོང་དང་ཉོ་འཚོང་བརྗེ་རེས་སོགས་ཕྱོགས་གང་ཐད་ནས་འབྲེལ་ལམ་སྔར་བས་ཡར་རྒྱས་སུ་འགྲོ་བཞིན་ཡོད་ཀྱང་། སྔོན་ཆད་ཀྱི་དུས་ཟིང་སྐབས་སུ། ཁ་བྲལ་དུ་བཏང་བའི་གྲོགས་གཉེན་ཉེ་ལྷན་འཛོམས་ཀྱི་འགྲོ་འོང་ཐད་ནས་ད་དུང་ཡང་རྩོད་རྙོག་མང་པོ་ཞིག་སེལ་ཐུབ་མེད་འདུག
གསར་འགོད་པ། པདྨ་རྒྱལ།
