ཨ་མྱེས་རྨ་ཆེན་རིག་གཞུང་ཞིབ་འཇུག་ཁང་གིས་སྤྱི་ཟུར་ཁྱུང་ལྷོ་གྲགས་པ་རྣམ་རྒྱལ་ལགས་ཀྱིས་བརྩམས་པའི་སྟོད་མངའ་རིས་ཡུལ་ལུང་ཆགས་རབས་དང་མཐོང་ཐོས་མྱོང་གསུམ་སྐོར་གྱི་དཔེ་དེབ་ཅིག་དབུ་འབྱེད་གནང་སོང་།
དེ་རིང་ཕྱི་དྲོའི་ཆུ་ཚོད་ ༤ བའི་སྟེང་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གིས་དཔར་སྐྲུན་གནང་བའི་སྤྱི་ཟུར་ཁྱུང་ལྷོ་གྲགས་པ་རྣམ་རྒྱལ་ལགས་ཀྱིས་བརྩམས་མཛད་པའི་བོད་ཀྱི་ལོ་རྒྱུས་ <<སྟོད་མངའ་རིས་སྒར་ཁོངས་གཞུང་རྒྱུགས་རྙིང་ཁུངས་འབྲོག་སྡེ་གཞུང་པ་མ་མཚན་པའི་ཡུལ་ལུང་ཆགས་རབས་དང་འབྲེལ་མྱོང་ཐོས་ལོ་རྒྱུས་ད་ཕན་རི་ཁྲ་མཆོར་མོའི་སྲིད་པའི་གངས་རྒན་ཞེས་བྱ་བ་ཞུགས་སོ་>>ཞེས་པ་དབུ་འབྱེད་གནང་སོང་།
དཔེ་དེབ་དབུ་འབྱེད་ཀྱི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་ཚེ་རིང་མཆོག་དང་། ལོ་རྒྱུས་རྩོམ་པ་པོ་སྤྱི་ཟུར་ཁྱུང་ལྷོ་གྲགས་པ་རྣམ་རྒྱལ་ལགས། དེ་བཞིན། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་། བོད་མིའི་སྒྲིག་འཛུགས་ཀྱི་ལས་བྱེད་ཁག་ཅིག་བཅས་འཛོམས་འདུག དཔེ་དེབ་དེར། མངའ་རིས་སྐོར་གསུམ་དང་། འབྲོག་སྡེ་གཞུང་པ་མ་མཚན་པའི་ཆགས་རབས། སྡེ་ཚོའི་མགོ་དཔོན། ཆོས་ཕྱོགས་ཀྱི་སྐོར། རྒྱ་དམག་བོད་དུ་བཙན་འཛུལ་བྱས་པ་བཅས་ས་བཅད་ ༤ དང་། ཟུར་རྒྱན་དཔར་དང་ཡིག་ཆ་ཁག་ཅིག་གི་ངོ་བཤུས་བཅས་ཁྱོན་ཤོག་ངོས་ ༣༦༤ འདུག
ཐོག་མར་རྩོམ་པ་པོ་སྤྱི་ཟུར་ཁྱུང་ལྷོ་གྲངས་པ་རྣམ་རྒྱལ་ལགས་ཀྱིས་ཁོང་གི་དེབ་དེའི་དཀར་ཆག་ས་བཅད་སོགས་རོབ་ཙམ་ངོ་སྤྲོད་གནང་རྗེས། སྐུ་མགྲོན་གཙོ་བོ་ཚོགས་གཙོ་སྤེན་པ་ཚེ་རིང་མཆོག་གིས་བོད་ཀྱི་ལོ་རྒྱུས་བརྩམས་ཆས་དེ་དང་འབྲེལ་བའི་སྐོར་ལ། ང་ཚོའི་སྤྱི་ཚོགས་ནང་གྲགས་པ་རྣམ་རྒྱལ་ལགས་ལྟ་བུ་ཡིན་ན་དགུང་ལོ་ ༧༦ ཙམ་ལ་བསླེབས་ཀྱི་ཡོད་སྟབས། ཕལ་ཆེར་བོད་ནས་ཕེབས་སྐབས་ལོ་ ༡༩ དང་ ༢༠ ཙམ་ཆགས་བསྡད་ཡོད་རྒྱུ་རེད། བོད་ས་མ་ཤོར་གོང་དུ་སོ་སོའི་ལུང་པའི་ནང་གི་གནས་ཚུལ་ངོ་མ་ག་འདྲ་ཡིན་གང་ལ་གང་འཚམ་རྒྱུས་མངའ་ཡོད་པ་དང་། ལྷག་པར་དུ་ཁོང་གི་ཡབ་དེ་མངའ་རིས་ས་ཁུལ་གྱི་སྤྱི་ཁྱབ་ཀྱི་འགན་བཞེས་མཁན་ཞིག་ཡིན་པའི་ཆ་ནས་ལོ་རྒྱུས་ཀྱི་མི་སྣ་ཞིག་ཆགས་ཡོད། དེབ་འདིའི་ཟུར་རྒྱན་ནང་དུ་སྔ་མོར་ཕར་ཚུར་ཡིག་འབྲེལ་བྱས་པའི་གནས་སྟངས་མང་པོ་ཞིག་བཀོད་ཡོད་སྟབས། གྲགས་པ་རྣམ་རྒྱལ་ལགས་ཀྱིས་བོད་ནང་ལོགས་སུ་ལོ་ ༢༠ ཙམ་རིང་མི་ཚེ་བསྐྱལ་བའི་ཉམས་མྱོང་དང་། རྒན་རབས་ཚོར་མཐུད་པའི་གནས་ཚུལ། ཡིག་ཆ་ལ་བལྟས་པའི་དངོས་ཡོད་གནས་ཚུལ། དེ་ནས་བཙན་བྱོལ་ནང་ཕེབས་ཏེ་ཐོག་མར་ང་ཚོ་ཧི་མ་ལ་ཡའི་རྒྱུད་དུ་ལམ་བཟོར་རྒྱུག་པའི་སྐབས་སུ། མ་ནཱ་ལི་རུ་སྤྱི་པའི་འགན་འཁུར་བ་དང་། དེ་ནས་གཞིས་ཆགས་འཛུགས་སྐབས་ཀོ་ལི་སྒར་གྱི་གནས་སྟངས་བཅས་ས་བཅད་ལྔ་ཡི་ཐོག་བགོ་བཤའ་བརྒྱབ་ནས་བཀོད་ཡོད་པ་རེད། ཅེས་གསུངས་སོང་།
ཡང་ཁོང་གིས། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ད་ལྟའི་བར་ཁྱེད་རང་གིས་བོད་སྤྱི་དོན་གྱི་ཆེད་དུ་སྐུ་ལས་བསྐྱོན་བཞག་པ་དེ་ཚོར་བསྔགས་བརྗོད་ཞུས་པ་ཡིན། དེའི་ཐོག་མི་རབས་རྒན་པ་ཚོ་རྫོགས་འགྲོ་བཞིན་ཡོད་པས། ཁྱེད་རྣམ་པས་སྔ་མོའི་བོད་ཀྱི་འགྲོ་སྟངས་དང་སོ་སོ་བཞུགས་པའི་རིང་གི་ཉམས་མྱོང་། མཐོང་ཚོར་དེ་ཚོ་ཚང་མ་བྲིས་མ་གནང་བ་ཡིན་ན། མི་རབས་རྗེས་མ་ཚོར་གཟིགས་ས་ཞིག་མེད་དུས། དེབ་འདི་ལ་ཏན་ཏན་དུས་ཚོད་མང་པོ་ཞིག་བཏང་ཡོད་སྟབས། འབྱུང་འགྱུར་གྱི་མི་རབས་ཚོར་དེབ་འདིས་སྟོད་མངའ་རིས་སྐོར་གསུམ་གྱི་བྱུང་སྟངས་དང་བྱུང་རབས་ངོས་མ་ཟིན་པའི་གནས་སྟངས། དེ་ནས་བཙན་བྱོལ་ནང་བསླེབས་པའི་གནས་སྟངས་སྐོར་ལ་ཏན་ཏན་ཞིབ་འཇུག་བྱེད་པར་ཐུགས་ཕན་གསོ་ཐུབ་པ་ཞིག་འདུག དེར་བརྟེན། གྲགས་པ་རྣམ་རྒྱལ་ལགས་ཀྱིས་སྐུ་ལས་བསྐྱོན་ཏེ་དེབ་འདི་བརྩམས་གནང་བར་ཐུགས་རྗེ་ཆེ་ཞུས་པ་དང་། ཨ་མྱེ་རྨ་ཆེན་རིག་གཞུང་ཞིབ་འཇུག་ཁང་གིས་དེབ་འདི་པར་སྐྲུན་བྱས་པ་དང་། དེ་ཙམ་མ་ཟད་བཀྲ་ཤིས་ཚེ་རིང་ལགས་ཀྱིས་ལོ་རྒྱུས་ཀྱི་ཐོག་ནས་ཏག་ཏག་བསྡད་ཡོད་མེད་སོགས་ལ་བལྟས་ནས་མ་འགྲིག་པ་འགྲིག་པ་བཟོ་བའི་ཕན་ཐོགས་བྱུང་ཡོད་པ་རེད་བསམ་གྱི་འདུག ཨ་མྱེས་རྨ་ཆེན་རིག་གཞུང་ཞིབ་འཇུག་ཁང་གི་འགན་འཛིན་དང་ལས་མི་ཚང་མར་ཐུགས་རྗེ་ཆེ་ཞུས་པ་ཡིན། ཞེས་གསུངས་སོང་།
གཞན། ལོ་རྒྱུས་བརྩམས་ཆས་འདིའི་གླེང་བརྗོད་ནང་། བོད་ལྗོངས་མངའ་རིས་སྐོར་གསུམ་འདི་བཞིན་སྔ་དུས་ཞང་ཞུང་གི་ཤེས་རིག་དང་། ཆབ་སྲིད། དམག་དོན་སོགས་ཀྱི་ལྟེ་གནས་ཡིན་འདུག་ཅིང་། དེང་གི་མངའ་རིས་སྐོར་གསུམ་ཆགས་ཚུལ་ནི། ནུབ་ཕྱོགས་སེང་གེ་ཁ་འབབ་གཙང་ཆུ་རྒྱུད་ལ་དྭགས་དང་། བྱང་ཕྱོགས་ཤིན་ཅང་ཡུ་གུར། ལྷོ་ཕྱོགས་ལ་སྒོ་ཁག་རྒྱ་གར་དང་། བལ་པོ་སོགས་ཧི་མ་ལ་ཡ་ཞེས་གངས་རི་དར་དཀར་གྱི་ཡོལ་བ་འཐེན་པ་ལྟ་བུ། ཤར་ཕྱོགས་རྟ་མཆོག་ཁ་འབབ་གཙང་ཆུ་རྒྱུད་གཙང་དབུས་དང་འབྲེལ་བ་མ་ཟད། བྱང་ཤར་བརྒྱུད་ནག་ཚང་ཚོ་དྲུག་དང་འབྲེལ་བ་དེ་དག་གི་དབུས་སུ་གནས་མཆོག་གངས་དཀར་ཏི་སེ་རྒྱལ་པོ་གདན་ལ་བཞུགས་འདྲ་ངོ་མཚར་གྱི་དཔལ་འབར་བ། གངས་རིན་པོ་ཆེའི་གཡས་གཡོན་མདུན་རྒྱབ་རི་བྲག་མཐོ་དམའ་སྣ་ཚོགས་བཀྲ་ཤིས་རྟགས་བརྒྱད་དང་། རིན་ཆེན་སྣ་བདུན་གྱི་བཀོད་པ་ཚང་བ། མ་ཕམ་གཡུ་མཚོ་བཙུན་མོ་ཁྲུས་ལ་རོལ་བ་ལྟ་བུའི་མཛེས་སྡུག་ལང་ཚོས་སྒེག་པའི་གངས་མཚོ་གཉིས་ཀྱི་བྱང་ཤར་དུ་གནས་ཤིང་ཆགས་པའི་འབྲོག་སྡེ་གཞུང་པ་མ་མཚན་པའི་སྔ་རབས་ས་མི་ཆགས་ཚུལ་དང་འབྲེལ་གང་ཤེས་གང་དྲན་དྲན་ཐོར་བཀོད་པ་འདི་དག་འུར་བཤད་སྒྲོག་བཏགས་སོགས་མེད་པར་ཟུར་རྒྱུན་ཡིག་རིགས་སོགས་ཡོད་རིགས་ཟུར་སྦྱར་དང་བཅས་བྲིས། ཞེས་འཁོད་འདུག
གསར་འགོད་པ། པདྨ་རྒྱལ།
གུས་པོ་ལོ་མང་ལས་གྲོགས་བྱས་མྱོང་བའི་ཐད་བསྐོས་སྤྱི་ཟུར་སྐུ་ངོ་གྲགས་པ་རྣམ་རྒྱལ་མཆོག་གིས་<>ཞེས་པའི་ཕྱག་དེབ་བརྩམས་གྲུབ་སྟེ་འགྲེམས་སྤེལ་དབུ་འབྱེད་མཛད་སྒོ་ཚོགས་ཀྱི་ཡོད་པ་ཉིན་ཤས་སྔོན་བརྡ་ལན་གནང་། སྐབས་དེར་ང་རང་རྒྱ་གར་ལྷོ་ཕྱོགས་སུ་ཡོད་པས་ཉེ་བཅར་ཞུ་མ་ཐུབ།
རྒན་ལགས་ཁོང་ནི་བོད་ཀྱི་རིག་གནས་མཐའ་དག་ལ་ཐུགས་རྒྱུས་ཆེ་ཞིང་། ཉེ་རབས་ལོ་རྒྱུས་ལ་དེ་བས་རྒྱུས་མངའ་ཟབ་པ་མ་ཟད། བོད་ཀྱི་ལོ་རྒྱུས་ཁྲོད་ཧ་ཅང་གལ་ཆེན་ཡིན་པའི་མངའ་རིས་ཁུལ་གྱི་ལོ་རྒྱུས་འབྲི་རྩོམ་མཛད་པ་ནི་ཕྱི་རབས་མི་ཐོག་ལ་བཞག་པའི་ལེགས་སྐྱེས་གྱ་ནོམ་པ་ཞིག་ཏུ་ངེས་གཤིས། རྒན་ལགས་ཁོང་ལ་སེམས་གཏིང་ནས་ཐུགས་རྗེ་ཆེ་ཞུ།
གུས་པོས་བཙན་བྱོལ་བོད་མིའི་སྒྲིག་འཛུགས་ཀྱི་ལོ་རྒྱུས་འབྲི་རྩོམ་ཚན་པར་ལས་དུས་རིང་རྒན་ལགས་ཀྱིས་གཞུང་ཡིག་ཡིག་ཚགས་ཀྱི་རྒྱབ་ལྗོངས་ལོ་རྒྱུས་དང་། སྐབས་སྐབས་ཀྱི་གནས་ཚུལ་མ་གསལ་བ་ཁག་དང་། དེ་བཞིན་མངའ་རིས་ཁུལ་གྱི་ལོ་རྒྱུས་དང་སྤྱི་ཚོགས་ཀྱི་གནས་ཚུལ་སོགས་རྒྱུས་སྟོན་གནང་མྱོང་བ་ཐུགས་རྗེ་བླ་ལྷག་གིས་ཆེ་ཞིང་། དེའི་ཁྲོད་མངའ་རིས་ཁུལ་དུ་བྱུང་བའི་འཕྲིན་ཡིག་ཅིག་ལ་འགྲེལ་བཤད་དང་བཅས་གནང་བ་ནི་འདི་ལྟ་སྟེ།
སྒར་ཡིད་འོང་རྒོད་ཚང་དམར་ཡག་ལ།།
བྱ་ཁུ་བྱུག་གཉིས་ཀྱིས་གྲོས་ཚོགས་བྱས།།
དེ་ལ་བྱ་ཕྲན་མང་པོས་གྲལ་ཚོགས་རྒྱབ།།
ཤར་ཕྱོགས་ཀྱི་དོལ་བ་ནག་པོ་ཁྱོད།།
མ་བྲོས་གླུ་ཡི་གཏེར་སྒོ་རེ་ཕྱེས།།
ཡི་གེ་འདི་གང་བྱུང་མ་ཤེས་ན།།
ཟབ་མོ་གླང་ཆུ་བྱ་ཡི་ཁ་ནས་སྤྲིངས།།
ཨོཾ་ཨཱ་ཧཱུཾ་མེ་ལྷ་དམར་པོའི་ཞལ་དུ་ཐོངས།།
ཞེས་པའོ།
མཐར་ཁོང་གི་སྐུ་ལུས་བདེ་ཐང་དང་སྐུ་ཚེ་ཡུན་རིང་བརྟན་པའི་སྨོན་འདུན་ཞུ་རྒྱུ་དང་། ཁོང་གིས་བརྩམས་པའི་ཕྱག་དེབ་ལ་མགྱོགས་ནས་མྱུར་དུ་མཇལ་ཐུབ་པའི་རེ་བ་ཆེན་པོ་དང་བཅས།
རང་ཅག་མངའ་རིས་བའི་ཕྱི་རབས་བུ་བརྒྱུད་ལ་མཁོ་བའི་དེབ་འདི་ལྟ་བུ་བྲིས་གནང་མཛད་པར་ཁོ་བ་ནས་སྙིང་ནས་སྤྲོ་བའི་ཐུགས་རྗེ་ཆེ་ཞུ། རྒད་པོ་ཁྱོད་སྐུ་ཚེ་རིང།
ཡག་པོ་རེད།་
ཨ་མྱེ་རྨ་ཆེན་ཚང་གིས་སྔོན་ཆད་དེབ་རིན་ཐང་ཅན་མང་པོ་ཞིག་དཔར་སྐྲུན་ཞུས་ཡོད་པ་རེད། བར་སྐབས་ཤིག་ནས་སྙན་ངག་གི་དེབ་ཐབ་ཐེབ་དེ་འདྲ་ཡང་འགའ་ཞིག་དཔར་སོང་། ཐེངས་འདིའི་དེབ་དེ་ག་འདྲ་ཞིག་ཡིན་ནམ་ཀློག་འདོད་ཤིན་ཏུ་ཆེ།