བོད་དོན་སེལ་དགོས་ན་ཐོག་མ་རང་ཉིད་ནས་མགོ་བརྩམ་དགོས།

རྒྱ་གར་བོད་དོན་རྒྱབ་སྐྱོར་བ་སྐུ་ཞབས་ཝེ་ལྗི་ཁི་རན་ཊེ་ལགས་ཀྱིས་༧གོང་ས་དགུང་གྲངས་ ༨ ནས་ ༨༠ བར་གྱི་མཛད་རྣམ་བྱིས་པའི་ཀློག་དེབ་ཀྱི་རི་མོའི་ལམ་ནས་བྲིས་ཡོད་པ་བོད་བསྒྱུར་གནང་སྟེ་དཔར་འགྲེམ་ཞུས་སོང་།

དེ་རིང་ཉིན་རྒྱབ་ཆུ་ཚོད་ ༣།༠༠ སྟེང་ངྷ་ས་བོད་ཀྱི་གསོལ་མགྲོན་ཁང་དུ། བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག རྒྱ་གར་བོད་དོན་རྒྱབ་སྐོར་བ་སྐུ་ཞབས་ཝེ་ལྗི་ཁི་རན་ཊེ་ (Vijay Kranti) ལགས་ཀྱིས་ ༢༠༡༣ དཔར་འགྲེམ་གནང་བའི་བོད་དོན་སྐོར་གྱི་ཁོང་གི་རྩོམ་དེབ་(Dalai Lama-the soldier of peace) ཞེས་པ་བོད་བསྒྱུར་བྱས་ཏེ་མིང་ལ་༼ཏཱ་ལའི་བླ་མ། ཞི་བདེའི་ཕོ་ཉ།༽ཞེས་པའི་དཔེ་དེབ་དབུ་འབྱེད་གནང་སོང་།

དཔེ་དེབ་དབུ་འབྱེད་ཀྱི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། རྩོམ་པ་པོ་ཝེ་ལྗི་ཁི་རན་ཊེ་ལགས་དང་ཁོང་གི་བཟའ་ཟླ་ཁཱ་ཝི་ཏ་ (Kavita)། དྷ་རམ་ས་ལ་ཁུལ་གྱི་རྩོམ་པ་པོ་དང་བོད་དོན་འཐབ་རྩོད་པ་སྐོར་ཞིག་བཅས་འཛོམས་སོང་།

དཔེ་དེབ་དེ་ནི་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་མཆོག་དགུང་ལོ་ ༨ ནས་ ༨༠ བར་གྱི་མཛད་རྣམ་ཁག་དེང་རབས་བྱིས་པའི་ཀློག་དེབ་ཀྱི་རི་མོའི་རྣམ་པའི་ཐོག་ནས་འགྲེལ་བཤད་བྱས་ཡོད་པ་ཞིག་ཡིན་པ་དང་། དེབ་འདིའི་མ་རྩ་འཕུད་པའི་ཁེ་བཟང་ཡོད་ཚད་བོད་ཀྱི་གཞོན་ནུ་ལྷན་ཚོགས་ལ་འབུལ་རྒྱུ་ཡིན་འདུག

ཐོག་མར་རྩོམ་པ་པོ་ཝི་ལྗའི་ཁེ་རན་ཏི་ཡིས་དཔེ་དེབ་ངོ་སྤྲོད་དང་འབྲེལ་བརྗོད་རྒྱུར། ང་རང་ལོ་ན་གཞོན་སྐབས་གསར་འགོད་པའི་ལས་ཀ་བྱས་སྐབས་༧གོང་ས་མཆོག་དང་བོད་ཀྱི་གནད་དོན་སྐོར་ལ་དོ་སྣང་ཞེ་དྲགས་ཡོད། བོད་དོན་དེ་སུ་ཞིག་གིས་སེལ་དགོས་པ་རེད་ཅེས་སོ་སོར་དྲི་བ་ཞིག་བཏང་པ་ཡིན་ན། བོད་མི་ཚོ་དང་བོད་དོན་ལ་རྒྱབ་སྐྱོར་གནང་མཁན་སུ་ཞིག་ཡིན་ནའང་ཐོག་རང་ཉིད་ནས་མགོ་བརྩམ་དགོས་པ་ཞིག་རེད་སྙམ་པའི་བསམ་བློ་འཁོར་ཡོང་གི་འདུག དེར་བརྟེན། ང་རང་གིས་བོད་དོན་ལ་རྒྱབ་སྐྱོར་བྱ་རྒྱུ་མགོ་བཙུགས་ཏེ་ད་བར་ལོ་ངོ་ ༤ ༠ ལྷག་འགྲོ་བཞིན་འདུག ངའི་ཕ་མ་གཉིས་ཀྱང་སྐྱབས་བཅོལ་བ་ཡིན་སྟབས་ངས་སྐྱབས་བཅོལ་བའི་དཀའ་ངལ་གསལ་བོར་ཤེས་ཀྱི་ཡོད། ཅེས་སོགས་བརྗོད་སོང་།

གཞན། བོད་ཀྱི་གཞོན་ནུ་ལྷན་ཚོགས་ནོ་བོད་དོན་འཐབ་རྩོད་ཐད་གཞུང་འབྲེལ་མ་ཡིན་པའི་ཚོགས་པ་གལ་ཆེན་ཞིག་ཆགས་ཡོད་སྟབས། ཐེངས་འདིའི་དཔེ་དེབ་ཀྱི་མ་རྩ་འཕུད་པའི་ཁེ་བཟང་ག་རེ་ཡོད་པ་དེ་བོད་ཀྱི་གཞོན་ནུ་ལྷན་ཚོགས་ལ་འབུལ་རྒྱུ་ཡིན་སྐོར་སོགས་བརྗོད་སོང་།

སྐུ་མགྲོན་གཙོ་བོ་ཆོས་རིགས་བཀའ་བློན་པདྨ་ཆོས་འབྱོར་མཆོག་གིས་གསུང་བཤད་ནང་དོན། སྤྱིར་བཏང་ང་འདིར་ཡོང་ན་འགྲིག་གི་ཡོད་མེད་ཧ་གོ་ཡི་མི་འདུག འོས་བསྡུ་འགན་འཛིན་གྱིས་བཀའ་གྲོས་ཞེ་བོ་ཞིག་གནང་ཡོད་པ་རེད། རྩོམ་པ་པོ་ཁོ་རང་གིས་ལོ་ ༤༠ ལྷག་ལ་དཔེ་དེབ་ཐོག་དཀའ་ངལ་མང་པོ་བརྒྱབ་སྟེ་བྲིས་པ་རེད། ང་ཚོའི་བོད་པའི་ནང་ལ་འདི་འདྲ་འབྲི་མཁན་བྱུང་ཡོད་པ་མ་རེད། ཁོ་རང་གིས་དེ་འདྲའི་གལ་ཆེན་པོ་ཞིག་ལ་རྩིས་པ་དེར་ང་ཚོའི་ཕྱོགས་ནས་ཀྱང་གལ་ཆེན་པོ་བརྩི་དགོས་པ་དང་། དེ་བཞིན་ཁོས་ང་ལ་རེ་བ་ཞིག་བརྒྱབ་ནས་ཡོང་དུས་ང་ཡོང་དགོས་པ་དེའང་ལས་འགན་ལྟ་བུ་ཞིག་ཆགས་འདུག་བསམས་ནས་ཡོང་པ་ཡིན། དེ་རིང་གསར་འགོད་པ་ཞེ་དྲགས་ཡོང་ཡོད་ས་རེད། ཁྱེད་རང་ཚོ་བོད་པའི་སྤྱི་ཚོགས་ནང་གལ་ཆེན་པོ་རེད། ང་ཚོར་ལྟ་བའི་མིག་དང་ཉན་པའི་རྣ་ཟེར་བའི་དཔེ་བཞིན་གསར་འགྱུར་བརྒྱུད་ལམ་ཁག་དེ་དཔེ་མི་སྲིད་པའི་གལ་ཆེན་པོ་རེད། དེར་བརྟེན་ང་ཚོ་ཚང་མས་ལྟ་ས་དེ་ཧི་མ་ལའི་རྒྱབ་ལོགས་དེར་རྒྱ་ནག་གིས་ག་རེ་བྱེད་ཀྱི་འདུག ང་ཚོའི་གནས་སྟངས་ག་རེ་ཆགས་ཀྱི་ཡོད་པ་དེ་དག་ཐུགས་ལ་བཞག་ནས་དགོངས་པ་བཞེས་རྒྱུ་དཔེ་མི་སྲིད་པའི་གལ་ཆེན་པོ་རེད་བསམ་གྱི་ཡོད། ཅེས་གསུངས་སོང་།

རྩོམ་པ་པོ་ཝི་ལྗའི་ཁེ་རན་ཏི་ནི་གསར་འགོད་པ་དང་པར་པ་རྩོམ་པ་པོ་སོགས་ཡིན་པ་མ་ཟད། ཕྱི་ལོ་ ༡༩༧༢ ལོ་ནས་བཟུང་བོད་དོན་སྐོར་ལ་དཔྱད་བརྗོད་དང་དབྱེ་ཞིབ་རྩོམ་ཡིག་མང་པོ་བྲིས་ཏེ། བོད་དོན་རྒྱབ་སྐྱོར་བའི་ཁྲོད་སྙན་གྲགས་ཡོད་མཁན་ཞིག་ཡིན་འདུག དམིགས་བསལ་ཁོང་གིས་ལོ་ངོ་ ༤༠ ལྷག་གི་རིང་བོད་དོན་སྐོར་ལ་པར་བརྒྱབ་པ་ཁག་ཕྱོགས་བསྒྲིགས་གནང་ཡོད་པའི་བརྙན་དེབ་དེར་མང་ཚོགས་ཀྱིས་དགའ་བསུ་ཆེན་པོ་ཐོབ་ཡོད་པ་དང་། ཁོང་གིས་རྒྱ་གར་དང་རྒྱལ་སྤྱིའི་ས་གནས་ཁག་ཏུ་བོད་དང་འབྲེལ་པའི་པར་རིས་འགྲེམས་སྟོན་ཐེངས་མང་གནང་ཞིང་། ད་སྔ་ཁོང་གིས་རྩོམ་པ་པོ་དང་རྩོམ་སྒྲིག་པ་སོགས་ཀྱི་མིང་ཐོག་ནས་དེབ་ ༡༡ ཙམ་པར་བསྐྲུན་གནང་ཡོད་འདུག

གསར་འགོད་པ། འཇིགས་མེད་རྒྱ་མཚོ།