ཟླ་འདིའི་ཕྱི་ཚེས་ ༡ ཉིན་ཕྱི་ལོ་ ༢༠༡༥ ལོའི་༧གོང་ས་མཆོག་གི་རྒྱ་གར་ལྷོ་ཕྱོགས་ཁུལ་གྱི་མཛད་འཕྲིན་རྣམས་ལེགས་པར་གྲུབ་ཡོད་འདུག
ཟླ་འདིའི་ཕྱི་ཚེས་ ༡ ཉིན་རྒྱ་གར་ལྷོ་ཕྱོགས་སུ་རྟེན་གཞི་བྱས་པའི་བྱེས་ཀྱི་གདན་ས་བཀྲ་ཤིས་ལྷུན་པོ་རུ། ༧གོང་ས་མཆོག་གིས་དད་ལྡན་མང་ཚོགས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀའ་དྲིན་བསྐྱངས་ཡོད་པ་དང་འབྲེལ། ལམ་རིམ་གོ་སྒྲིག་ཚོགས་ཆུང་དང་ལྷོ་གཞིས་ཁག་བཅས་ཐུན་མོང་ནས་མཁའ་འགྲོའི་བསུན་བཟློག་གི་ཆོ་གའི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུས་ཡོད་པ་བཅས། ཕྱི་ལོ་ ༢༠༡༥ ལོའི་རྒྱ་གར་ལྷོ་ཕྱོགས་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས་ཡོད་འདུག
ཕྱི་ཚེས་ ༡ ཉིན་སྔ་དྲོར་༧གོང་ས་མཆོག་གིས་དད་ལྡན་སློབ་ཕྲུག་ཚོར་མ་འོངས་བོད་ཀྱི་སོན་རྩ་ཡིན་པ་ལྟར་སློབ་སྦྱོང་ཐོག་ཤུགས་རྒྱག་དགོས་པའི་སྐོར་ནས་བཀའ་སློབ་གནང་དོན། དེ་རིང་སྤྱི་ལོའི་ལོ་གསར་འཁེལ་ཡོད་སྟབས་སློབ་ཕྲུག་ཁྱེད་རང་ཚོ་ཚང་མར་སྤྱི་ལོ་གསར་པར་འཚམས་འདྲི་ཡོད། སློབ་ཕྲུག་གཞོན་ནུ་ཁྱེད་རང་ཚོ་ཧ་ཅང་གི་གལ་ཆེན་པོ་ཆགས་ཡོད། གང་ཡིན་བརྗོད་ན། ཁྱེད་རང་ཚོའི་མི་རབས་དེ་དུས་རབས་ཉེར་གཅིག་པའི་མི་རབས་གསར་པ་ཞིག་ཆགས་ཡོད། ངོས་དང་ངོས་ཀྱི་ལོ་མཉམ་ཡིན་པ་རྣམས་དུས་རབས་ཉི་ཤུ་པའི་མི་རབས་ཆགས་ཡོད། ང་ཚོའི་དུས་རབས་ཉི་ཤུ་པ་དེ་ཡོལ་ཟིན་པ་རེད་ལ་ང་ཚོའང་དུས་ཚོད་ཡོལ་གྲབས་ཡོད། འཛམ་གླིང་འདི་བཞིན་དངོས་ཡོད་གནས་ཚུལ་དང་མཐུན་པའི་སྒོ་ནས་འགྱུར་བ་ཞིག་འགྲོ་དགོས། ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན། འཛམ་གླིང་ཞི་བདེ་ལྡན་པ་ཞིག་དང་། ཁོར་ཡུག་ཞི་བདེ། ལུས་པོ་བདེ་ཐང་། སྤྱི་ཚོགས་བདེ་སྐྱིད་ལྡན་པ་ཞིག་ཡོང་བར་ནང་གི་ཞི་བདེ་དང་། བྱམས་བརྩེར་ཐུག་ཡོད། དེང་སྐབས་ཚན་རིག་པ་ཚོས་བརྟག་ཞིབ་བྱས་པའི་གྲུབ་དོན་གྱི་ལམ་ནས་མིའི་ལྷན་སྐྱེས་བྱམས་པ་དང་བརྩེ་བས་ལུས་པོའི་འཕྲོད་བསྟེན་ལ་བཟང་ཕྱོགས་ཀྱི་ཕན་ཐོགས་ཀྱི་ཡོད་པ་དངོས་ཡོད་ར་འཕྲོད་ཀྱི་ལམ་ནས་བརྗོད་ཀྱི་ཡོད། ང་རང་ཚོའི་རིག་གཞུང་གཏིང་ཟབ་ཡོད་པ་འདི་ཉམས་པ་སོར་ཆུད་དང་མི་ཉམས་གོང་སྤེལ་བྱས་ནས་རྒྱུན་འཛིན་ཐུབ་པ་བྱུང་ན། བོད་མི་རིགས་ཙམ་མ་ཟད། རྒྱ་མི་རིགས་ས་ཡ་བྱེ་བ་མང་པོ་ལ་ཕན་ཐོགས་ཐུབ་རྒྱུ་ཡིན་པ་བརྒྱ་ཆ་བརྒྱ་ཐམ་པ་རེད། དེ་དང་དེས་མཚོན་པས་ཤར་ཕྱོགས་ཀྱི་ཡུལ་གྲུ་མང་པོར་ཕན་ཐོགས་རྒྱུ་ཡིན་པ་གསལ་པོ་རེད། འཛམ་གླིང་སྤྱི་ལ་ཡིན་ནའང་ཕན་ཐོགས་རྒྱུ་ཡིན་པ་རེད། དེར་བརྟེན་བོད་རིགས་ན་གཞོན་དང་སློབ་ཕྲུག་ཁྱེད་རང་ཚོ་མ་འོངས་བོད་ཀྱི་སོན་རྩ་ལྟ་བུ་ཡིན་པས་ད་ལྟ་སློབ་སྦྱོང་བྱེད་རྒྱུར་དོ་སྣང་བྱས་ནས་ཤུགས་རྒྱག་རྒྱུ་ཧ་ཅང་གལ་ཆེན་པོ་རེད། སློབ་ཕྲུག་ཁྱེད་རང་ཚོས་དུས་རབས་ཉི་ཤུ་རྩ་གཅིག་པ་འདིའི་ནང་ད་ལྟ་ང་ཚོས་འབད་བརྩོན་བྱས་པ་ཡིན་ན་དུས་རབས་ཉི་ཤུ་རྩ་གཅིག་སྨད་ཆར་ཞི་བདེ་ཡོང་བ་ཞིག་དང་། ཞི་བདེ་ཟེར་བ་འདིའི་རྩ་བ་གཞན་ལ་བརྩེ་བ་ཡོད་པ་དང་། གཞན་གྱི་སྲོག་ལ་བརྩི་བཀུར་ཡོད་པ་དེ་འདྲ་ཞིག་བྱུང་ན་ཞི་བདེ་ཡོང་གི་རེད། གཞན་གྱི་བདེ་སྡུག་ཡལ་བར་དོར་བ། ཁྱད་དུ་བསད་པ་སོགས་དེ་འདྲ་བྱས་པ་ཡིན་ན་ཞི་བདེ་ཡོང་མི་ཐུབ། དེར་བརྟེན་དུས་རབས་ཉི་ཤུ་རྩ་གཅིག་པའི་མི་རབས་དེ་རེ་བ་ཡོད་ས་དེ་ཆགས་ཡོད། ཅེས་དང་།
ཡང་ཁོང་གིས་གཞིས་ཆགས་ཁག་ཏུ་སྨན་པས་འདང་གི་མེད་པ་དེ་འཆར་ཅན་བྱས་ནས་མ་བཞག་པར་གལ་ཆེར་བརྩི་དགོས་སྐོར་ལམ་སྟོན་གནང་དོན། མི་ཚེ་དོན་དང་ལྡན་པ་ཞིག་བྱུང་བ་ཡིན་ན་ཚེ་རིང་དུ་གནས་པ་ཡིན་ནའང་རང་གཞན་ཀུན་ལ་ཕན་རྒྱུ་ཞིག་ཡོང་ངེས་རེད། དེ་འདྲ་ཡིན་པར་བརྟེན་ཚེ་དབང་ཞུས་པ་དང་ཆབས་གཅིག་མི་ཚེ་བཟང་པོ་ཞིག་ལ་བསྐྱལ་རྒྱུའི་བསམ་བློ་གཏོང་དགོས། གཞིས་ཆགས་ནང་གི་གཞིས་མི་ཚོར་དེ་སྔ་འགོ་སྟོད་སྨན་ཁང་གི་མཐུན་རྐྱེན་ཐད་རོགས་བྱས་ནས་སྨན་ཁང་ཡོད་ནའང་སྨན་ཁང་ནང་སྨན་པ་སོགས་ཀྱི་མ་འདང་པ་དེ་འདྲ་ཡོང་གི་འདུག ཁ་སང་ཧུན་སུར་དུའང་སྨན་ཁང་ཡོད་པ་གང་ཞིག་སྨན་ཁང་ནང་སྨན་པ་སོགས་མཐུན་འགྱུར་མ་འདང་བ་ཡོད་ལུགས་བཤད་ཀྱི་འདུག འཆར་ཅན་འཆར་ཅན་ཞེས་བརྗོད་ནས་མ་བཞག་པར་དེ་ཚོའི་རིགས་གལ་ཆེ་དོན་ཆེར་བརྩི་དགོས་པ་རེད། དེ་བཞིན་སློབ་གྲྭ་ཡིན་ན་སློབ་གྲྭའི་དགེ་རྒན་ཚོས་སློབ་ཕྲུག་གི་འཕྲོད་བསྟེན་སྐོར་དོ་སྣང་བྱེད་རྒྱུ་ཧ་ཅང་གལ་ཆེན་པོ་རེད། ནད་ན་ཚ་བྱུང་བའི་རྗེས་སུ་ཕུ་རྒྱག་རོགས་ཟེར་བ་དེ་རིགས་ཕྱིས་དྲགས་པ་རེད། བཅོས་ཐབས་དེ་ཙམ་བྱེད་རྒྱུ་མེད་པ་རེད། སྤྱོད་ལམ་བསྲུང་རྒྱུ་དང་། ཟས་འཕྲོད་ལ་བལྟས་ནས་སྔ་ས་ནས་སྔོན་འགོག་བྱ་རྒྱུ་དེ་གལ་ཆེན་པོ་རེད། ལུས་པོ་བདེ་ཐང་ཡོང་བར་དོ་སྣང་བྱེད་དགོས་པ་རེད། ཅེས་གསུངས་ཡོད་འདུག
ཕྱི་ཟླ་ ༡༢ ཚེས་ ༣༡ ཉིན་གྱི་སྔ་དྲོར་གདན་ས་བཀྲ་ཤིས་ལྷུན་པོ་རུ་བཀའ་ཆོས་ལེགས་པར་གྲུབ་པ་དང་བསྟུན། ༧གོང་ས་མཆོག་ནས་ཐེངས་འདིའི་ཆོས་འབྲེལ་ཚར་ཏེ་ཚང་མ་ཕྱོགས་མཚམས་སོ་སོར་ལོག་འགྲོ་རྒྱུ་ཡིན་ཡང་། ཕྱི་ལོ་ ༢༠༡༧ ཟླ་ ༡ པོའི་ནང་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་གནང་རྒྱུ་ཡིན་པས་སྐབས་དེར་བསྐྱར་དུ་མཇལ་ཡོང་སྐོར་གསུངས་འདུག
པདྨ་མཚོས་བོད་མིའི་སྒྲིག་འཛུགས་ཀྱི་དྲ་བ་ནས་བསྡུ་སྒྲིག་བྱས།
