ད་ལྟ་དྷ་རམ་ས་ལའི་སྔ་དྲོའི་ཆུ་ཚོད་ ༡༠།༤༠ སྟེང་༧གོང་ས་མཆོག་བཞུགས་སྒར་ཕོ་བྲང་དུ་ཆིབས་ཕེབས་གནང་ཡོད་ཅིང་། ཁ་སང་རྒྱ་གར་རྒྱལ་ས་ལྡི་ལིར་རྒྱ་གར་གྱི་གནད་ཡོད་མི་སྣ་སྐོར་ཞིག་གིས་༧གོང་ས་མཆོག་དགུང་གྲངས་ ༨༠ བཞེས་པའི་གྱ་སྟོན་སྲུང་གཙི་ཞུས་འདུག
༧གོང་ས་མཆོག་གིས་འདས་པའི་ཟླ་བ་གཅིག་ལྷག་རིང་རྒྱ་གར་ལྷོ་ཕྱོགས་བྷིང་ལོར་དང་། གདན་ས་ཆེན་པོ་འབྲས་སྤུངས་དང་སེ་ར། བརྒྱུད་སྨད་གྲྭ་ཚང་། བཀྲ་ཤིས་ལྷུན་པོ་བཅས་སུ་ཆོས་ཕྱོགས་ཀྱི་མཛད་འཕྲིན་བསྐྱངས་ཏེ། དེ་རིང་སྔ་དྲོའི་ཆུ་ཚོད་ ༡༠།༤༠ སྟེང་། བཞུགས་སྒར་དྷ་རམ་ས་ལ་ཁུལ་གྱི་སེར་སྐྱ་མི་མང་གི་ཕེབས་བསུའི་ཁྲོད་ཕྱིར་ཞུགས་སྒར་ཕོ་བྲང་དུ་ཆིབས་ཕེབས་གནང་ཡོད།
ཁ་སང་ཚེས་ ༤ ཉིན་གྱི་ཉིན་རྒྱབ་ཆུ་ཚོད་ ༡ ཙམ་ལ། རྒྱ་གར་རྒྱལ་ས་ལྡི་ལིའི་ཨོ་བྷེ་རོ་ཡི་གསོལ་མགྲོན་ཁང་(Oberoi hotel)དུ། ༧གོང་ས་མཆོག་དབུ་བཞུགས་ཐོག རྒྱ་གར་གྱི་མཐོ་རིམ་དཔོན་རིགས་དང་། ཆབ་སྲིད་དང་ཤེས་ཡོན་ཐད་ཀྱི་གནད་ཡོད་མི་སྣ་སྐོར་ཞིག་གིས་༧གོང་ས་མཆོག་དགུང་གྲངས་ ༨༠ བཞེས་པའི་གྱ་སྟོན་གྱི་མཛད་སྒོ་ཞིག་ཚོགས་ཡོད་འདུག
མཛད་སྒོ་དེའི་སྟེང་རྒྱ་གར་གྱི་སྲིད་བློན་ཟུར་པ་མན་མོ་ཧན་སིང་(Manmohan Singh)མཆོག་དང་། སྲིད་བློན་གཞོན་པ་ཟུར་པ་ཨེལ་ཀེ་ཨ་ཌི་ཝ་ནི་ Lal Krishna Advani མཆོག རྒྱ་གར་གྱི་དཔལ་འབྱོར་བློན་ཆེན་ཟུར་པ་སྐུ་ཞབས་པི་ཅི་ཏམ་བྷ་རམ་(P. Chidambaram)། དེ་བཞིན་ཆོས་ལུགས་འདྲ་མིན་གྱི་དབུ་ཁྲིད་ཁག་གཅིག ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཀེ་ལ་ཤི་སཏྱར་ཐི་(kailash satyarthi)། རྒྱ་གར་གྱི་གནའ་བོའི་སྒྱུ་རྩལ་ཐོག་མཁས་ལས་པ་ལྕམ་སྐུ་ཀ་པི་ལ་ཝཏ་སཱ་ཡན་ Dr.Kapila Vatsyayan མཆོག ཁྲིམས་རྩོད་པ་གྲགས་ཅན་དང་རྒྱ་གར་ཁྲིམས་ཀྱི་བློན་ཆེན་ཟུར་པ་སྐུ་ཞབས་རམ་ཇི་ཐ་མ་ལ་ནི་(Ram Jethamalani) གློག་བརྙན་འཁྲབ་སྟོན་པ་གྲགས་ཆེན་ཤར་མི་ལ་ཊ་གོར་ (Sharmila Tagore) མཆོག་སོགས་ལྷན་འཛོམས་ཐོག རྒྱ་གར་གྱི་སྒྱུ་རྩལ་བ་གྲགས་ཅན་སྐུ་ཞབས་ཨམ་ཇེ་ཏི་ཨ་ལི་ཁཱང་དང་ཁོང་གི་སྲས་གཉིས་བཅས་ཕེབས་ཡོད་འདུག
འདས་པའི་ཟླ་བ་གཅིག་རིང་གི་༧གོང་ས་མཆོག་གི་མཛད་འཕྲིན་རགས་ཟིན་ནི། ཟླ་བ་སྔོན་མའི་ཚེས་ ༤ ཉིན། ༧གོང་ས་མཆོག་བཞུགས་སྒར་དྷ་རམ་ས་ལ་ནས་ཆིབས་ཐོན་གནང་ཡོད་པ་དང་། ཚེས་ ༥ ཉིན་ལྡི་ལི་ནས་མཁའ་ལམ་བརྒྱུད་རྒྱ་གར་ལྷོ་ཕྱོགས་བྷིང་ལོར་དུ་ཆིབས་བསྒྱུར་བསྐྱངས།
ཕྱི་ཚེས་ ༦ ཉིན་༸གོང་ས་མཆོག་གིས་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་རྒྱལ་ས་བྷིང་ལོར་ནང་རྟེན་གཞི་བྱས་པའི་ཚན་རིག་བསྟི་གནས་ཁང་སྒོ་འབྱེད་དང་ཕྱི་རྒྱལ་གཞུང་ཚབ་ཡན་ལག་ཁང་མང་པོ་ཞིག་གི་དོན་གཅོད་པ་རྣམས་དང་ཚོགས་འདུ་དབུ་བྱེད་མཛད་སྒོར་ཕེབས་ཏེ་གསུང་བཤད་གནང་བ་དང་། ཉིན་རྒྱབ་རྒྱ་གར་རྒྱལ་ཡོངས་ཆེས་མཐོའི་ཤེས་ཡོན་བསྟི་གནས་ཁང་(National Institute of Advanced Studies)ཞེས་པར་ཤེས་ཡོན་ཅན་དང་སློབ་ཕྲུག་སོགས་མི་ ༣༠༠ ལྷག་ལ་གསུང་བཤད་གནང་།
ཚེས་ ༧ ཉིན། ༧གོང་ས་མཆོག་གིས་བྷིང་ལོར་བཞུགས་གནས་མགྲོན་ཁང་དུ་རྒྱ་གར་གྱི་གསར་འགོད་པ་ཁག་ཅིག་གི་དྲི་བར་ལན་འདེབས་དང་། ཉིན་རྒྱབ་རྒྱལ་ཡོངས་སེམས་ཁམས་དང་དབང་རྩའི་བསྟི་གནས་ཁང་དུ་ཚན་རིག་པ་དང་མཁས་དབང་ ༡༠༠༠ བརྒལ་བར་གསུང་བཤད་གནང་།
ཚེས་ ༧ ཉིན། བྷིང་ལོར་ནས་མཁའ་ལམ་བརྒྱུད་མོན་གྷོ་ཊི་འབྲས་སྤུངས་དགོན་པར་ཆིབས་བསྒྱུར་དང་། དེའི་རྗེས་དགའ་ལྡན་དགོན་པར་ཕེབས་ཏེ་དགའ་ལྡན་ཁྲི་ཐོག་ཁང་གསར་བཞེངས་ལེགས་འགྲུབ་ལ་རབ་གནས་མཛད།
ཚེས་ ༨ ཉིན། ཧོན་སུར་རབ་རྒྱས་གླིང་བརྒྱུད་སྨད་གྲྭ་ཚང་དུ་ཆིབས་བསྒྱུར་བསྐྱངས་ཡོད་པ་དང་། ཚེས་ ༩ ཉིན་ནས་བཟུང་དཔལ་གསང་བ་འདུས་པའི་དབང་དང་སྨད་རྒྱུད་ཁྲིད་ཆེན་བརྒྱད་ཀྱི་བཀའ་ཁྲིད་སོགས་དབུ་འཛུགས་གནང་།
ཚེས་ ༡༠ ཉིན། ཧོན་སུར་རབ་རྒྱས་གླིང་གཞིས་མགོ་དང་བརྒྱུད་སྨད་གྲྭ་ཚང་མཉམ་འབྲེལ་ཐོག་བརྒྱུད་སྨད་གསུང་ཆོས་ར་བར་༧གོང་ས་མཆོག་ལ་ནོ་བྷེལ་ཞི་བདེ་གཟེངས་རྟགས་ཕུལ་ཏེ་ལོ་ངོ་ ༢༦ འཁོར་བའི་དུས་དྲན་སྲུང་གཙི་གནང་བའི་མཛད་སྒོའི་སྟེང་ཕེབས་ཏེ་མི་མང་ལ་གསུང་བཤད་གནང་།
ཚེས་ ༡༣ ཉིན། སེ་ར་ཐེག་ཆེན་གླིང་དུ་ཆིབས་བསྒྱུར་བསྐྱངས་པ་དང་། ཚེས་ ༡༤ ཉིན་སེ་ར་བླ་སྤྱིའི་འདུ་ཁང་དུ་སེམས་དང་སྲོག་གི་བགྲོ་གླེང་ཐེངས་ ༣༠ པ་དབུ་འབྱེད་གསུང་བཤད་གནང་།
ཚེས་ ༡༥ ཉིན། སེར་སྨད་ཚན་རིག་སྡེ་ཚན་གྱི་ཚན་རིག་འགྲེམས་སྟོན་དབུ་འབྱེད་མཛད་པ་དང་སེར་བྱེས་སློབ་གྲྭར་ཆིབས་སྒྱུར་བསྐྱངས་ཏེ་གསུང་བཤད་གནང་། དེ་བཞིན། སེར་སྨད་སྤོ་འབོར་ཁམས་ཚན་དུ་གྲྭ་ཤག་དང་གཙུག་ལག་ཁང་རྟེན་དང་བརྟེན་པར་བཅས་གསར་བཞེངས་ལེགས་གྲུབ་བྱུང་བར་དབུ་འབྱེད་རབ་གནས་དང་ལམ་གཙོ་རྣམ་གསུམ་གྱི་བཤད་ལུང་གི་ཆོས་འབྲེལ་མཛད།
ཚེས་ ༡༧ ཉིན་སེམས་དང་སྲོག་གི་བགྲོ་གླེང་མཇུག་བསྡོམས་སྟེང་ཕེབས་ཏེ་གསུང་བཤད་གནང་།
ཚེས་ ༡༨ ཉིན། སེ་ར་བླ་སྤྱིའི་འདུ་ཁང་དུ། སེ་ར་བླ་སྤྱི་འདུས་མང་ཡོངས་དང་སྦེལ་ཀོབ་གཞིས་ཁོངས་ཀྱི་སེར་སྐྱ་ཐུན་མོང་ནས་བརྟན་བཞུགས་བསྟར་འབུལ་ཞུས།
ཚེས་ ༡༩ ཉིན། བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོར་ཆིབས་བསྒྱུར་བསྐྱངས་ཏེ། གཙུག་ལག་ཁང་གསར་པ་རྟེན་དང་བརྟེན་པར་བཅས་པ་ལེགས་གྲུབ་དབུ་འབྱེད་དང་། ལམ་རིམ་ཁྲིད་ཆེན་བཅོ་བརྒྱད་ཀྱི་བཀའ་ཆོས་དབུ་འཛུགས་གནང་།
ཚེས་ ༢༢ ཉིན། བཀྲ་ཤིས་ལྷུན་པོར་རྒྱ་ནག་སྐམ་ས་ཆེན་མོ་དང་མ་ཁའོ་སོགས་ནས་ཕེབས་པའི་རྒྱ་རིགས་ ༡༥༠ ལྷག་ལ་དམིགས་བསལ་བཀའ་སློབ་གནང་།
ཚེས་ ༣༠ ཉིན། ཕྱི་ནང་གི་དད་ལྡན་ཆོས་ཞུ་བ་སེར་སྐྱ་མང་ཚོགས་ཁྲི་ ༣༠༠༠༠ བརྒལ་བར་བཀའ་གདམས་ཐིག་ལེ་བཅུ་དྲུག་གི་བཀའ་དབང་བསྩལ་ཡོད་པ་དང་།
ཟླ་འདིའི་ཚེས་ ༡ ཉིན། བཀྲ་ཤིས་ལྷུན་པོ་དགོན་དུ་༧གོང་ས་མཆོག་གི་བཀའ་ཆོས་གྲུབ་པ་དང་བསྟུན་ཏེ་བརྟན་ཞུགས་བསྟར་འབུལ་ཞུས་ཡོད་པ་དང་། ཁོང་གིས་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་ཡོད་ཡོད།
