བོད་མིའི་སྐྱབས་མགོན་༧གོང་ས་མཆོག་གིས་ཟླ་འདིའི་ཚེས་ ༡༦ ཉིན། ཐའེ་ཝན་རྒྱལ་ཡོངས་འོས་བསྡུ་ཆེན་མོའི་ཁྲོད། དམངས་གཙོ་ཡར་ཐོན་ཚོགས་པའི་ལྕམ་ཚའེ་ཡེན་ཝན་(Tsai Ing-wen)མཆོག་ལ་སྲིད་འཛིན་རྒྱལ་ཁ་ཐོབ་པར་འཚམས་འདྲིའི་གསུང་འཕྲིན་བསྩལ་འདུག
གསུང་འཕྲིན་ནང་འཁོད་དོན། ཐེ་ཝན་ནང་མང་གཙོའི་རིང་ལུགས་ཀྱི་གཞི་རྟེན་ཧ་ཅང་བརྟན་པོར་ཚུགས་ཡོད་པ་མཐོང་སྐབས་སེམས་ནང་བློ་སྤོབས་སྐྱེ་གཞི་ཞིག་ཏུ་གྱུར། འཛམ་གླིང་ཁྱོན་དུ་རང་དབང་དང་འགན་ཁུར་ལྡན་པའི་མགོ་ཁྲིད་ལ་མོས་པ་ཡོད་མཁན་རྣམས་ཐེ་ཝན་ཡུལ་འདི་མིག་དཔེ་བཟང་པོ་ཞིག་དང་སྙིང་སྟོབས་སྤེལ་མཁན་ཞིག་ཏུ་གྱུར་ཐུབ་པ་བྱུང་ཡོད། ངོས་རང་མང་གཙོ་གོང་སྤེལ་གཏོང་རྒྱུར་འབད་བརྩོན་ཧུར་ཐག་བྱེད་མཁན་ཞིག་ཡིན་སྟབས། ཐེ་ཝན་མང་ཚོགས་རྣམས་ལ་གྲུབ་འབྲས་འདི་འདྲ་ཞིག་ཐོབ་པར་གུས་འདུད་ཞུ་རྒྱུ་ཡིན། ཞེས་སོགས་འཁོད་ཡོད་འདུག
གསུང་འཕྲིན་དེའི་སྐོར་བོད་མིའི་སྒྲིག་འཛུགས་ཀྱི་དྲ་བར་འཁོད་དོན། གསུང་འཕྲིན་ནང་༧གོང་ས་མཆོག་ ༢༠༠༩ ལོར་ཐེ་ཝན་དུ་ཆིབས་སྒྱུར་བསྐྱངས་སྐབས་ལྕམ་ཚའེ་ཡེན་ཝིན་མཆོག་དང་མཇལ་འཕྲད་མཛད་པ་དང་། ཡུལ་དེའི་ནང་དཔལ་འབྱོར་དང་ཤེས་ཡོན་ཐོག་ཡར་རྒྱས་ཤུགས་ཆེ་བྱུང་བའི་གཟིགས་ཚུལ་བྱུང་བ་རྣམས་ཐུགས་དྲན་གསོ་མཛད་པ་མ་ཟད། ཐེ་ཝན་དང་རྒྱ་ནག་སྐམ་ས་ཆེན་པོ་གཉིས་དབར་བཟང་ཕྱོགས་ཀྱི་འབྲེལ་ལམ་འཛུགས་རྒྱུའི་གཞི་རྩ་ལྟེ་བ་ནི་ཚོང་འབྲེལ་ཡིན་སྟབས། ཚོང་འབྲེལ་ད་དུང་ཡར་རྒྱས་ཕྱིན་པའི་ཐོག་ནས་ཕྱོགས་གཉིས་པོའི་མི་མང་ཕན་ཚུན་དབར་གྱི་འབྲེལ་ལམ་ཉེ་རུ་གཏོང་རྒྱུ་ཧ་ཅང་གལ་ཆེ་ཡིན་སྐོར་དང་། མཐའ་དོན་༸གོང་ས་མཆོག་གིས་ཙའེ་ཨིང་ཝེན་མཆོག་གི་སྲིད་འཛིན་ལས་ཡུན་རིང་གཞུང་འབྲེལ་ལས་དོན་སྒྲུབ་སྐབས་དཀའ་ངལ་རྣམས་ལ་གདོང་ལེན་དཔྱིས་ཕྱིན་གནང་ཐུབ་པ་དང་བྱ་བ་ལམ་ལྷོངས་ཡོང་བའི་ཐུགས་སྨོན་མཛད། ཅེས་སོགས་འཁོད་འདུག
