རྒྱ་ནག་རྒྱལ་ཡོངས་དཔལ་འབྱོར་ལྷན་ཁང་གི་གཙོ་འཛིན་ཟུར་བ་ཡང་ཀཱང་གིས་རྒྱ་སྒོར་ས་ཡ་ ༡༣།༧༩ ལྐོག་རྔན་བླངས་ཡོད་པའི་ཉེས་མིང་འོག་ལོ་ ༡༢ གྱི་ཁྲིམས་ཐག་བཅད་ཡོད་འདུག
དེ་རིང་རྒྱ་ནག་གཞུང་འབྲེལ་བརྙན་འཕྲིན་ཁང་ (Press TV) གིས་གནས་ཚུལ་བསྒྲགས་པ་ལྟར་ན། ཁ་སང་ཕྱི་ཚེས་ ༢༠ ཉིན་པེ་ཅིན་མི་དམངས་འབྲིང་རིམ་ཁྲིམས་ཁང་གསུམ་པས་རྒྱ་ནག་རྒྱལ་ཡོངས་དཔལ་འབྱོར་ལྷན་ཁང་གི་གཙོ་འཛིན་ཟུར་བ་ཡང་ཀཱང་ (Yang Gang) ཟེར་བས་སྔ་རྗེས་སུ་རྒྱ་སྒོར་ཡ་ས་ ༡༣།༧༩ ལྷག་གི་ལྐོག་རྔན་བླངས་ཡོད་པའི་ནག་ཉེས་ཐོག་ལོ་ ༡༢ གྱི་ཁྲིམས་ཐག་བཅད་ཡོད་འདུག
རྒྱ་ནག་རྒྱལ་ཡོངས་སྲིད་གྲོས་ཀྱི་དཔལ་འབྱོར་ཨུ་ཡོན་ལྷན་ཁང་གི་གཙོ་འཛིན་ཟུར་བ་ཡང་ཀཱང་གིས་ཕྱི་ལོ་ ༡༩༩༩ ལོ་ནས་ ༢༠༠༦ བར་རྒྱ་ནག་དམར་ཤོག་ཚོགས་པའི་དྲུང་ཆེ་དང་ཤིན་ཅང་ཡུ་གུར་མི་རིགས་རང་སྐྱོང་ལྗོངས་ཀྱི་དམར་ཤོག་དྲུང་ཆེ། དེ་བཞིན། རྒྱ་ནག་རྒྱལ་ཁབ་སྤུས་ཚད་ལྟ་སྐུལ་ཞིབ་དཔྱོད་དང་ནད་ཡམས་ཞིབ་བཤེར་ཚན་པའི་མགོ་འཛིན་ཟུར་བ་བཅས་ཀྱི་གོ་གནས་ཁུར་ཡུན་རིང་། ཁོས་མི་གཞན་པར་ཐོན་རྫས་བརྒྱུད་འཚོང་དང་ཐོན་ལས་གསར་འཛུགས། གོ་གནས་དང་ལས་གནས་བརྗེ་སྤོར་སོགས་ཀྱི་གོ་སྐབས་ལ་བརྟེན་ནས། ཕྱི་ལོ་ ༡༩༩༩ ལོ་ནས་ཕྱི་ལོ་ ༢༠༠༨ ལོའི་ཕྱི་ཟླ་ ༨ པའི་བར་ཡང་ཀཱང་གིས་ཐད་ཀར་བླངས་པའམ་ཡང་ན་ཁོའི་ཆུང་མ་དང་བུ་ཆུང་བརྒྱུད་དེ་ཁྱོན་རྒྱ་སྒོར་ས་ཡ་ ༡༣།༧༩ ལྷག་གི་དངུལ་དངོས་ཀྱི་ལྐོག་རྔན་བླངས་ཡོད་འདུག
ཁ་སང་པེ་ཅིན་མི་དམངས་འབྲིང་རིམ་ཁྲིམས་ཁང་གསུམ་པས་ཁྲིམས་བཤེར་བྱས་པ་བརྒྱུད། ཡང་ཀཱང་གིས་རང་གི་ཉེས་སྤྱོད་མང་པོ་ངོས་ལེན་བྱས་ཡོད་པ་མ་ཟད། དེ་སྔོན་གཡོ་ལེན་བྱས་པའི་རྒྱུ་ནོར་ཡོངས་རྫོགས་ཕྱིར་རྩིས་སྤྲོད་གཞུང་བཞེས་བཏང་སྟེ། རྒྱ་ནག་གི་ལྐོག་ཟ་རུལ་སུངས་ཀྱི་བཅའ་ཁྲིམས་གཞིར་བཟུང་གིས་ ༡༢ གྱི་ཁྲིམས་ཐག་བཅད་ཡོད་པ་རེད།
གནས་ཚུལ་འདིའི་ནང་ ༢༠༡༣ ལོ་ནས་ད་ལྟའི་བར་རྒྱ་ནག་རྒྱལ་སྲུང་ལྷན་ཁང་གི་མགོ་གཙོ་ཀྲུའུ་ཡཱོང་ཁང་དང་ཁོང་དང་འབྲེལ་ཡོད་དཔོན་རིགས་ཁག་ཅིག་གཙོས་པའི་རྒྱ་ནག་གཞུང་འབྲེལ་ཤུལ་དངོས་ལྟ་ཞིབ་ཚན་པའི་མགོ་གཙོ་ཅཱང་ཅེ་མེན་ (Jiang Jiemin) དང་། རྒྱ་ནག་གི་སྲིད་འཛིན་ཟུར་བ་ཧུ་ཅིན་ཐོའི་ལས་རོགས་ལེན་ཅེ་ཧྭ་ (Ling Jihua)། རྒྱ་ནག་རྒྱལ་ཡོངས་དཔལ་འབྱོར་ལྷན་ཁང་གི་མཐོ་རིམ་དཔོན་རིགས་ལུ་ཐེ་ནན་ (Liu Tienan)། དེ་བཞིན། ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་ཟུར་བ་པོ་ཞེ་ལེ་ (Bo Xilai) སོགས་ཀྱིས་རྒྱལ་དམངས་ཀྱི་རྒྱུ་ནོར་ལྐོག་ཟ་བྱས་པའི་ཉེས་མིང་ཐོག་ཁྲིམས་ཐག་བཅད་ཡོད་སྐོར་འཁོད་འདུག
གསར་འགོད་པ། པདྨ་རྒྱལ།
