བཀའ་ཤག་གིས་རྒྱ་གར་དམངས་གཙོའི་དུས་དྲན་སྲུང་གཙི་གནང་།

དེ་རིང་ཞོགས་པའི་ཆུ་ཚོད་ ༩།༠༠ པའི་སྟེང་། བཙན་བྱོལ་བོད་མིའི་བསྟི་གནས་གངས་སྐྱིད་བཀའ་ཤག་མདུན་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་གཙོས་པའི་བཀའ་བློན་རྣམ་པ་དང་དྲུང་ཆེ་རྣམ་པ་ལྷན་འཛོམས་གནང་སྟེ། རྒྱལ་གར་གྱི་རྒྱལ་གླུ་གྱེར་འདོན་དང་སྦྲགས་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་བསྒྲེངས་འཛུགས་གནང་སྟེ། རྒྱ་གར་གྱི་དམངས་གཙོའི་དུས་དྲན་ཐེངས་ ༦༧ པ་དེ་སྲུང་གཙི་གནང་སོང་།

སྐབས་དེར་སྲིད་སྐྱོང་མཆོག་གིས་གསར་འགོད་པ་ཚོར། “དེ་རིང་རྒྱ་གར་བའི་དམངས་གཙོ་དབུ་བརྙེས་ཏེ་མི་ལོ་ ༦༧ འཁོར་བའི་ཉིན་མོ་སྲུང་གཙི་བྱས་པ་འདི་ལ། ངས་བོད་མིའི་སྒྲིག་འཛུགས་ཀྱི་ཚབ་བྱས་ནས་རྒྱ་གར་གཞུང་མང་གཉིས་ལ་འཚམ་འདྲི་ཞུ་བཞིན་ཡོད། ད་ལྟའི་བར་དུ་རྒྱ་གར་གཞུང་ལས་ལྷག་ཅིག་ང་ཚོར་བཀའ་དྲིན་ཆེ་བ་ཡོད་པ་མ་རེད། རྒྱ་གར་མི་མང་ལས་ལྷག་ཅིག་བཙན་བྱོལ་བོད་མི་ཚོར་བཀའ་དྲིན་ཆེ་བ་མེད། གོ་སྐབས་འདི་བཟུང་ནས་ངས་རྒྱ་གར་གཞུང་དམངས་གཉིས་ལ་བསྐྱར་དུ་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན།

དེ་བཞིན། ད་ལོའི་རྒྱ་གར་གྱི་དམངས་གཙོའི་དུས་ཆེན་གྱི་སྐུ་མགྲོན་གཙོ་བོར་ཧྥ་རན་སིའི་སྲིད་འཛིན་ཧྥན་སཱོ་ཧོ་ལན་ཌི་ (François Hollande) མཆོག་ཆིབས་བསྒྱུར་བསྐྱངས་གནང་འདུག ཁོང་ལའང་ང་ཚོ་རྒྱ་གར་ནང་ཡོད་པའི་བོད་མི་ཚོའི་ཚབ་བྱས་ནས་འཚམ་འདྲི་དང་དགའ་བསུ་ཡོད་ཞུ་རྒྱུ་ཡིན”ཞེས་གསུང་སོང་།

དེའི་རྗེས་གསར་འགོད་པས་རྒྱ་གར་བའི་དམངས་གཙོ་དབུ་བརྙེས་ཏེ་མི་ལོ་ ༦༧ འཁོར་བའི་རིང་ལ་བོད་མི་ཚོས་བསླབ་བྱ་གཙོ་ག་རེ་ལེན་དགོས་མིན་དྲིས་པར་ཁོང་གིས། གཙོ་བོ་རྒྱ་གར་གྱི་རྩ་དོན་དེ་འཚེ་མེད་ཞི་བའི་ཐོག་ནས་བཟོས་ཏེ་གྲུབ་འབྲས་ཆེན་པོ་སྨིན་ཡོད་སྟབས། ༧གོང་ས་མཆོག་གི་བཀའ་དགོངས་གཞིར་བཟུང་བོད་ཕྱི་ནང་གཉིས་ཀྱི་བོད་མི་ཚོས་འཚེ་མེད་ཞི་བའི་ལམ་ནས་རྩ་དོན་བརྩོན་ལེན་གནང་གི་ཡོད་པ་དེ་ལ་ལམ་ལྷུང་ཏན་ཏན་ཡོང་གི་རེད། གང་ཡིན་ཟེར་ན་རྒྱ་གར་གཙོས་པའི་རྒྱལ་ཁབ་ཁག་མང་པོ་ཞིག་ལ་ལམ་འགྲོ་ཡོང་གི་ཡོད་སྟབས། ང་ཚོས་ཀྱང་ལམ་འགྲོ་ཡོང་གི་རེད། ང་ཚོར་ཐོབ་པའི་སློབ་གསོ་གཙོ་བོ་དེ་རྒྱ་གར་གྱི་ཡང་དག་པའི་དམངས་གཙོ་དེ་དམངས་གཙོ་ཆེ་ཤོས་སུ་བརྩི་ཡི་ཡོད་པ་རེད། ང་ཚོ་བཙན་བྱོལ་དུའང་ད་ལྟའི་ཆར་ལ་༧གོང་ས་མཆོག་གིས་གསོལ་རས་སུ་བསྩལ་གནང་བའི་དམངས་གཙོའི་ལམ་ལུགས་ལག་བསྟར་གནང་གི་ཡོད་པ་རེད་ལ་ལམ་ལྷུང་ཡང་ཆེན་པོ་འགྲོ་བཞིན་ཡོད་པ་རེད། དེ་བཞིན་མི་མང་ཚོས་ཀྱང་བརྩི་བཀུར་དང་འགན་ལེན་ལག་བསྟར་གནང་གི་ཡོད་པ་རེད། ཅེས་གསུངས་སོང་།

གསར་འགོད་པ། པདྨ་རྒྱལ།