སི་རི་ཡའི་སྐྱབས་བཅོལ་ཕྲུ་གུ་ཐེར་འབུམ་བདུན་ལ་ཤེས་ཡོན་སློབ་གསོ་བསྒྲུབ་པའི་སློབ་གྲྭ་དང་དགེ་རྒན། སློབ་དེབ་སོགས་གང་ཡང་མེད་པའི་དཀའ་སྡུག་འོག་པ་ཀི་སི་ཐན་གྱི་བུ་མོ་མཱ་ལཱ་ལཱ་ལགས་ཀྱིས་ཨ་སྒོར་ས་ཡ་ ༡.༤ རོགས་སྐྱོར་འཚོལ་བཞིན་ཡོད་འདུག
དེ་རིང་རོའུ་ཊར་གསར་ཁང་གིས་བསྒྲགས་པའི་གནས་ཚུལ་ལྟར་ན། ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་པ་ཀི་སི་ཐན་གྱི་བུ་མོ་མཱ་ལཱ་ལཱ་ལགས་ཀྱིས། བདུན་ཕྲག་སྔོན་མར་ལོན་ཊོན་གྲོང་ཁྱེར་དུ་ཚོགས་པའི་རྒྱལ་སྤྱིའི་དབུ་ཁྲིད་ཀྱི་བགྲོ་གླེང་ཚོགས་ཆེན་སྟེང་། ད་ལོར་སི་རི་ཡའི་སྐྱབས་བཅོལ་ཕྲུ་གུ་ཚོར་སློབ་གསོ་བསྒྲུབ་ཐབས་སུ་ཨ་སྒོར་ཡ་ ༡.༤ མཐུན་འགྱུར་ཡོང་བའི་རེ་སྐུལ་ཞུས་ཡོད་འདུག
དེ་ཡང་བདུན་ཕྲག་སྔོན་མའི་རེས་གཟའ་མིག་དམར་ཉིན་གྲོང་ཁྱེར་ལོན་ཊོན་ནང་འཛམ་གླིང་མཉམ་འབྲེལ་རྒྱལ་ཚོགས་དང་དབྱིན་ཇིའི་དབུས་གཞུང་གི་གཙོས་པའི་འཇར་མན་དང་ནོར་ཝེ། ཁུ་ཝེ་ཊ་སོགས་འཛམ་གླིང་ཤར་ནུབ་རྒྱལ་ཁབ་ཁག་གི་སྲིད་བློན་རྣམ་པས་སི་རི་ཡའི་ཟིང་འཁྲུག་ཁྲོད་ཀྱི་རྒྱ་ཆེའི་མི་མང་གི་དཀའ་སྡུག་སེལ་ཐབས་སུ་ཐེབས་རྩ་ཁང་གསར་འཛུགས་གནང་ཕྱོགས་སྐོར་ཡིན་ཞིང་། སྐབས་དེར་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་པ་ཀི་སི་ཐན་གྱི་བུ་མོ་མཱ་ལཱ་ལཱ་ལགས་ཀྱིས། རྒྱལ་སྤྱིའི་དབུ་ཁྲིད་ཚོར་ད་ལོར་སི་རི་ཡའི་སྐྱབས་བཅོལ་བའི་ཕྲུ་གུ་ཚོར་སློབ་གསོ་རག་ཐབས་སུ་ཨ་སྒོར་ས་ཡ་ ༡.༤ རོགས་སྐྱོར་ཡོང་བའི་སྐུལ་འདེད་བཏང་ཡོད་པ་རེད།
པ་ཀི་སི་ཐན་གྱི་བུ་མོ་མཱ་ལཱ་ལཱ་ལགས་ཀྱིས་ཁ་པར་སྐུད་ལམ་གྱི་བཅའ་འདྲི་ཞིག་གི་སྐབས་སུ། ང་རང་སི་རི་ཡའི་སྐྱབས་བཅོལ་ཕྲུ་གུ་མང་པོར་ཐུག་སོང་། ཁོ་ཚོ་ད་དུང་ངའི་སེམས་ན་ཡོད། ངས་ཁོ་ཚོ་བརྗེད་ཐུབ་པ་མི་འདུག ཕྲུ་གུ་དེ་ཚོར་སོ་སོའི་མི་ཚེའི་ནང་སློབ་གསོ་རག་གི་མེད་པ་དེ་འཇིགས་སུ་རུང་བ་ཞིག་རེད། ངས་དེ་རང་དགར་བསྐྱུར་ཐུབ་པ་མི་འདུག ང་ཚོས་ཕྲུ་གུ་དེ་ཚོར་རོགས་སྐྱོར་བྱེད་མུས་ཡིན། ང་ཚོས་ཕྲུ་གུ་དེ་ཚོར་སྲུང་སྐྱོབ་བྱེད་བཞིན་ཡོད། ཁོ་ཚོ་དཀག་སྡུག་གི་གནས་བབ་འོག་བསྐྱུར་མེད། དེང་སྐབས་ཁོ་ཚོར་སློབ་གྲྭ་དགོས་ཀྱི་འདུག ཁོ་ཚོར་སློབ་དེབ་དགོས་ཀྱི་འདུག ཁོ་ཚོར་དགེ་རྒན་དགོས་ཀྱི་འདུག ཐབས་ལམ་འདི་བརྒྱུད་ནས་ང་ཚོས་སི་རི་ཡའི་མ་འོངས་པ་སྲུང་སྐྱོབ་བྱེད་ཀྱི་ཡོད་ཅེས་དང་། ཁོང་མོས་སི་རི་ཡའི་སྐྱབས་བཅོལ་བུ་མོ་ཆུང་ཆུང་ཁྲིད་ཡོང་སྟེ། རྒྱལ་སྤྱིའི་དབུ་ཁྲིད་རྣམ་པས་བུ་མོ་འདིའི་སྐད་ཆར་ཉོན་དང་། ཁོ་མོའི་དངོས་འབྲེལ་གཏམ་རྒྱུད་དེ་མི་སེམས་འགུལ་བ་ཞིག་རེད། བུ་མོ་འདིས་རྒྱལ་སྤྱིའི་དབུ་ཁྲིད་ཚོར། སི་རི་ཡའི་ཕྲུ་གུ་ཚོར་ཤེས་ཡོན་སློབ་གསོ་རག་པའི་ཁེ་དབང་ཡོད་དུས། ཁྱེད་རྣམས་པས་གནད་དོན་འདི་རྒྱ་ཡན་དུ་མི་གཏོང་བའི་རེ་སྐུལ་ཞུ་རྒྱུ་རེད། ཅེས་སོགས་བརྗོད་འདུག
གནས་ཚུལ་ལྟར་ན། ད་ལོར་ལོ་ན་ ༡༨ ལ་སོན་པའི་པ་ཀི་སི་ཐན་གྱི་བུ་མོ་མཱ་ལཱ་ལཱ་ལགས་ནི་སྤྱིར་དབྱིན་ཡུལ་དུ་གནས་སྡོད་བྱེད་མུས་ཡིན་ནའང་། ཁོ་མོའི་ཆུ་ཚོད་དང་ནུས་སྟོབས་ཡོད་ཚད་ཇོར་ཌན་དང་ལི་བྷ་ནོན། དཀྱིལ་ཤར་ཡུལ་གྲུ་ཁག་ཏུ་ཡོད་པའི་སི་རི་ཡའི་སྐྱབས་བཅོལ་ཕྲུ་གུ་ཚོར་སློབ་གསོ་བསྒྲུབ་ཐབས་སུ་གཏོང་གི་ཡོད་པ་དང་། དེ་ཡང་མཱ་ལཱ་ལཱ་ཐེབས་རྩ་ཁང་ (Malala Fund) གིས་སྙན་ཐོ་ཞིག་བཏོན་པའི་ནང་། ཇོར་ཌན་ (Jordan) དང་ལི་བྷ་ནོན་ (Lebanon)། དེ་བཞིན་དཀྱིལ་ཤར་ཡུལ་གྲུའི་རྒྱལ་ཁབ་ཁག་ (Middle Eastern countries) ཏུ་སི་རི་ཡའི་སྐྱབས་བཅོལ་ཕྲུ་གུ་འབུམ་ ༧ ཙམ་ཡོད་པ་ཚང་མར་ཤེས་ཡོན་སློབ་གསོ་རག་གི་མེད་སྟབས། མཱ་ལཱ་ལཱ་ཐེབས་རྩ་ཁང་གིས་བྱིས་པའི་སློབ་གསོ་བསྒྲུབ་བའི་བྱ་འགུལ་སྤེལ་བཞིན་ཡོད་འདུག
གཞན། མཉམ་འབྲེལ་རྒྱལ་ཚོགས་ཀྱི་ངོས་ནས་ད་ལོར་སི་རི་ཡའི་ཕྱི་སྡོད་སྐྱབས་བཅོལ་རོགས་དངུལ་ཨ་སྒོར་ཐེར་འབུམ་ ༧.༧༣ དང་སི་རི་ཡའི་རྒྱལ་ནང་གི་དཀའ་རྙོག་སེལ་ཐབས་སུ་ཨ་སྒོར་ཐེར་འབུམ་ ༡.༢ ལྷག་གཏོང་གི་ཡོད་འདུག
གསར་འགོད་པ། པདྨ་རྒྱལ།
