ཕུགས་རྒྱང་རིང་པོར་མུ་མཐུད་ཧུར་བརྩོན་བྱེད་དགོས།

སྙན་ངག་ཅེས་པའི་ཚིག་དེ་ངག་དེ་སྙན་པའི་སྒོ་ནས་གོ་ཐུབ་པ་ཞིག་ལ་སྙན་ངག་ཟེར་ཞིང་། ལུས་ངག་ཡིད་གསུམ་གྱི་སྤྱོད་པའི་ཐོག་ནས་ལུས་ཀྱི་སྒོ་ནས་ཡ་རབས་སྤྱོད་བཟང་དང་། ངག་གི་སྒོ་ནས་སྙན་པོ་དགོས་པ་ཞིག་ལ་ལབ་ཀྱི་ཡོད་རེད། ཅེས་དགེ་བཤེས་ལྷག་རྡོར་ལགས་ཀྱིས་བརྗོད།

དེ་རིང་ཞོགས་པའི་ཆུ་ཚོད་ ༡༠ སྟེང་དྷ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་<<སེམས་ཀྱི་གསང་བ་>>ཞེས་པའི་སྙན་དེབ་ཅིག་དབུ་འབྱེད་གནང་སོང་། སྙན་དེབ་དབུ་འབྱེད་ཀྱི་སྐུ་མགྲོན་གཙོ་བོར་གངས་སྐྱིད་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་གཙོས་པའི་དོ་སྣང་ཅན་ ༣༠ ལྷག་འཛོམས་འདུག

དཔེ་དེབ་དེའི་ནང་སྙན་ངག་ཚིག་བཅད་ ༥༩ དང་ཤོག་ངོས་ ༦༢ ལས་གྲུབ་པའི་དེབ་ཆུང་ཞིག་ཡིན་ཞིང་། དེབ་དེའི་མགོར་དགའ་ལྡན་ཕོ་བྲང་གི་ཞུ་ཚིག་ཅིག་ཕུལ་ཡོད་པའི་ནང་། “སྔ་ལོ་བོད་ཕྲུག་ཁྱིམ་སྡེར་ནང་ཆོས་ངོ་སྤྲོད་སྐབས་སྙན་ངག་གྱེར་འདོན་བྱས་པ་༧རྒྱལ་བ་དགྱེས་པའི་མཆོད་སྤྲིན་དུ་གྱུར་ཡོད་པ་ལྟར་ཡར་རྒྱས་ལ་མཐའ་མེད་པས་མུ་མཐུད་མདུན་བསྐྱོད་ཐུབ་པའི་རེ་བ་ཡོད། ཁོ་རང་གི་དམིགས་དོན་བཞིན་གཞོན་སྐྱེས་གཞན་རྣམས་ཀྱིས་ཀྱང་མིག་དཔེ་ཡར་ལྟོས་ཀྱི་ཚུལ་དུ་བོད་ཡིག་འབྲི་རྩོམ་ཐོག་རང་དོན་རང་གཅེས་ཀྱིས་སེམས་ཁུར་དོ་སྣང་མི་ལྷོད་པ་དགོས་པའི་འབོད་སྐུལ་དང་བཅས” ཞེས་སོགས་བཀོད་འདུག

གསར་སྐྱེས་སྙན་ངག་མ་འཇམ་དབྱངས་སྒྲོལ་མ་ལགས་ཀྱིས་ཁོ་མོའི་སྙན་དེབ་སྐོར་ངོ་སྤྲོད་མདོར་བསྡུས་ཤིག་ཞུས་རྗེས། སྐུ་མགྲོན་གཙོ་བོ་དགེ་བཤེས་ལྷག་རྡོར་ལགས་ཀྱིས་གསུང་བཤད་གནང་དོན། འདིར་གཞུང་དང་གཞུང་འབྲེལ་མ་ཡིན་པའི་ཚོགས་པ་སྐྱིད་ཁག་གི་མི་སྣ་དང་རྩོམ་པ་པོ་མང་པོ་ཞིག་ཕེབས་འདུག ང་ཚོ་འདིར་ཡོང་དོན་ལོ་ཆུང་རྩོམ་པ་པོ་མོ་རང་གིས་སོ་སོའི་ཆོས་དང་རིག་གཞུང་ལ་དོ་སྣང་བྱས་ཏེ། སོ་སོའི་སེམས་ཚོར་ཡིག་ཐོག་ཏུ་བཀོད་ནས་དེབ་བཏོན་པ་དེ་ཧ་ཅང་ཡག་པོ་རེད་ཟེར་ནས་ཡོང་བ་རེད། རྩོམ་པ་པོ་འཇམ་དབྱངས་སྒྲོལ་མ་མོ་རང་ལ་མཚོན་ན་ད་དུང་འགྲོ་རྒྱུ་མང་པོ་ཞིག་བསྡད་ཡོད་པ་རེད། ཕུགས་རྒྱང་རིང་བོའི་ཐོག་ནས་མུ་མཐུད་ཧུར་བརྩོན་གནང་དགོས་པ་ཞེ་དྲགས་གལ་ཆེན་པོ་རེད། བོད་པའི་སྐད་དང་ཡི་གེ་ཟེར་བ་དེ་བོད་ཀྱི་ཆོས་དང་རིག་གཞུང་གི་སྲོག་རྩ་རེད། སྲོག་རྩ་དེར་བདག་པོ་མ་བརྒྱབ་ན་ཤི་འགྲོ་རྒྱུ་ཉག་ཅིག་རེད། བཙན་བྱོལ་ནང་སྐྱེས་འཚར་བྱུང་བ་ཚོ་བོད་ཡིག་སྐྱོ་བོ་ཡིན་པ་དེ་དངོས་ཡོད་གནས་ཚུལ་རེད། ཕྱིས་སུ་བོད་ནས་བསླེབས་པའི་མང་པོ་ཞིག་གིས་འབྲི་རྩོམ་ལ་ཐུགས་སྣང་ཆེན་པོ་བྱས་ཏེ་དེང་སང་ཅུང་དྲག་ཏུ་ཕྱིན་ཡོད། ཁྱེད་རང་རྒྱ་གར་ནང་སྐྱེས་པའི་ན་ཆུང་ཞིག་རེད། འདི་འདྲ་དཀའ་ལས་བརྒྱབ་ནས་རྩོམ་བྲིས་ཏེ་དཔེ་དེབ་དཔར་འགྲེམ་བྱེད་རྒྱུ་དེ་ལས་སླ་པོ་ཞིག་རྩ་བ་ནས་མ་རེད། ཡིན་ནའང་ཁྱེད་རང་གིས་སྙན་རྩོམ་འདི་འདྲ་བརྩམས་གནང་བ་ཧ་ལས་པའི་ཡག་པོ་འདུག ཅེས་བརྗོད་བྱུང་།

ཡང་ཁོང་གིས། སྙན་ངག་གི་སྐོར་ནས་ཡིན་ན། སྙན་ངག་ཅེས་པའི་ཚིག་དེ་ངག་དེ་སྙན་པའི་སྒོ་ནས་གོ་ཐུབ་པ་ཞིག་ལ་སྙན་ངག་ཟེར་གྱི་ཡོད་པ་རེད། དེ་འདྲ་ཡིན་དུས་སྤྱིར་བཏང་ང་ཚོའི་ལུས་ངག་ཡིད་གསུམ་གྱི་སྤྱོད་པའི་ཐོག་ནས་བཤད་ན་ལུས་ཀྱི་སྒོ་ནས་ཡ་རབས་སྤྱོད་བཟང་དང་། ངག་གི་སྒོ་ནས་སྙན་པོ་དགོས་པ་ཞིག་ལ་ལབ་ཀྱི་ཡོད་རེད། དགེ་ཆོས་མཆོག་གི་གསུང་བཤད་ཅིག་ཏུ། དེང་སང་གི་མི་ཚོས་ལས་སླ་པོ་ཞིག་ཁག་ཏུ་བཏང་ནས་བྲིས་ན་མཁས་པར་རློམ་གྱི་འདུག་ཅེས་གསུངས་ཡོད་པ་ལྟར་རེད། ཡང་ཕྱི་རྒྱལ་བའི་ལེགས་བཤད་ཅིག་ནང་། རྩོམ་པ་པོ་ཞིག་གིས་རྩོམ་འབྲི་དུས་ཐོག་དང་པོར་ཁོ་རང་དང་དཀོན་མཆོག ཁོ་རང་གི་བཟའ་ཟླ་གསུམ་གྱིས་གོ་གི་ཡོད་ཟེར་བ་དང་། བར་སྐབས་ཤིག་ལ་ཁོ་རང་དང་དཀོན་མཆོག་གཉིས་མ་གཏོགས་གཞན་གྱི་ཤེས་ཀྱི་མེད་ཟེར། མཐའ་མ་དེ་ལ་དཀོན་མཆོག་མ་གཏོགས་ཁོ་རང་གིས་ཀྱང་ཧ་གོ་གི་མེད་ཅེས་བཤད་སྲོལ་ཡོད་པ་རེད། ཅེས་བརྗོད་སོང་།

གཞོན་སྐྱེས་སྙན་ངག་མ་འཇམ་དབྱངས་སྒྲོལ་མ་ལགས་ནི་ཕྱི་ལོ་ ༢༩༩༧ ལོའི་ཕྱི་ཟླ་ ༤ བའི་ཚེས་ ༢ ཉིན་རྒྱ་གར་ལྷོ་ཕྱོགས་སྦེལ་ཀོབ་གཞིས་གྲོང་གཉིས་པའི་ཕ་མེར་བ་སྤེན་པ་ཚེ་རིང་དང་མ་པདྨ་གཡང་སྐྱིད་ཀྱི་བུ་མོར་སྐྱེས་ཤིང་། འཛིན་རིམ་དང་པོ་ནས་བཅུ་བའི་བར་བདེ་སྐྱིད་སླར་གསོའི་དབུས་ཉིན་སློབ་ཏུ་སློབ་སྦྱོང་བྱས་པའི་རིང་ལ་བཀའ་དྲིན་ཅན་གྱི་ཕ་མ་དང་དགེ་རྒན་རྣམས་ཀྱི་ཐུགས་རེ་བཞིན། གཙང་སྦྲ་འཕྲོད་བསྟེན་དང་ཤེས་ཡོན་སློབ་གསོ། ཡ་རབས་སྤྱོད་བཟང་སོགས་ཕྱོགས་གང་ཐད་ནས་ཡག་པོ་ཡོད་སྟབས། སྔ་རྗེས་སུ་སློབ་གྲྭའི་རྒན་བདག་དང་རྩེད་རིགས། རིག་གཞུང་འཁྲབ་སྟོན། རིག་རྩལ་འགྲན་བསྡུར་སོགས་ལ་འགན་ཁུར་བ་དང་མཉམ་ཞུགས་གནང་མྱོང་བ་མ་ཟད། ༢༠༡༥ ལོའི་ཕྱི་ཟླ་ ༡༡ པོའི་ཚེས་ ༡༢ ཉིན་སྦེལ་ཀོབ་དབུས་ཉིན་སློབ་ནས་སློབ་མཐར་ཕྱིན་ཏེ་རྒྱ་གར་རྒྱལ་ཡོངས་ཀྱི་དབུས་བོད་སློབ་འཛིན་ཚོགས་ནང་འཛིན་རིམ་བཅུ་གཉིས་ཡིག་རྒྱུག་ཁྲོད་ཨང་གསུམ་པ་ཐོབ་ཡོད་འདུག

གསར་འགོད་པས་བཅར་འདྲིས་སྐབས་སུ་ཁོ་མོས། དེང་སང་ང་ཚོ་བོད་རིགས་གཞོན་སྐྱེས་ཚོས་བོད་ཡིག་ལ་དོ་སྣང་མི་འདུག གཞོན་སྐྱེས་མང་ཆེ་བས་དབྱིན་ཡིག་གི་སྒྲུང་རྩོམ་མ་གཏོགས། བོད་ཡིག་གི་སྒྲུང་རྩོམ་ཞེ་དྲགས་ཀློག་གི་མི་འདུག དེ་བས་ངས་གོ་བདེ་བའི་ཐོག་ནས་སྙན་རྩོམ་ཐོག་འདི་བྲིས་པ་ཡིན། ང་ཚོ་སྦེལ་ཀོབ་གཞིས་གྲོང་དུ་ང་རང་སྙན་དེབ་རྩོམ་མཁན་ཐོག་མ་ཡིན་རྒྱུ་རེད། ཅེས་བརྗོད་བྱུང་།

གསར་འགོད་པ། པདྨ་རྒྱལ།