ཐེ་ཝན་དུ་ས་ཡོམ་ཚད་རིམ་ ༦.༤ བརྒྱབ་འདུག

དེ་རིང་ཞོགས་པའི་ཐོ་རངས་ཁར་ཐའེ་ཝན་ལྷོ་རྒྱུད་ཐའེ་ནན་གྲོང་ཁྱེར་དུ་ཚད་རིམ་ ༦.༤ ས་ཡོམ་བརྒྱབ་ཏེ་ཡུལ་མི་ ༡༢༠ ལྷག་ལ་ཤི་རྨས་བྱུང་འདུག

 
རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། དེ་རིང་ཞོགས་པའི་ཐོ་རངས་ཆུ་ཚོད་ ༤ བའི་ཐོག་ཐའེ་ཝན་ལྷོ་རྒྱུད་ཐའེ་ནན་གྲོང་ཁྱེར་ནང་ཚད་རིམ་ ༦.༤ ཅན་གྱི་ས་ཡོམ་བརྒྱབ་ཏེ་རྩེག་རིམ་ ༡༧ ཅན་གྱི་ཁང་རྩེག་ཆེན་པོ་ཞིག་རྡིབ་སྐྱོན་བྱུང་བའི་ཁྲོད་ད་ཆར་ཡུལ་མི་ ༢ རྐྱེན་འདས་དང་ཡུལ་མ་ ༡༢༠ ལྷག་རྨས་སྐྱོན་ཕོག་ཡོད་འདུག

ཐའེ་ནན་གྲོང་ཁྱེར་གྱི་མེ་སྐྱོན་སྔོན་བརྡ་ཚན་པའི་འགན་འཛིན་ལི་ཕོ་མེན་ (Lee Po Min) ཟེར་བ་ཞིག་གིས། རྩེག་རིམ་ ༡༧ ཡོད་པའི་ཁང་རྩེག་དེའི་ནང་ཡུལ་མི་ ༢༤༠ འཚོ་སྡོད་བྱས་ཡོད་པ་དང་། གྲོང་ཁྱེར་སྨན་ཁང་ཁག་ཏུ་ད་ཆར་རྨས་མ་ ༡༡༥ ཟིན་གྱི་ཡོད་སྐོར་བརྗོད་འདུག

ལོ་ ༧༠ སོན་རྒན་པོ་ཞིག་གིས། སྐབས་དེར་ངས་བརྙན་འཕྲིན་ལ་ལྟ་བཞིན་ཡོད། གློ་བུར་དུ་ས་ངོས་ཡོམ་ཡོམ་འགུལ་གྱི་འདུག ངས་ལྡིར་སྒྲ་ཞིག་ཐོས་བྱུང་། ངས་ལྕག་སྒོ་ཕྱེས་ནས་ལྟ་དུས། ཁ་གཏད་ཀྱི་ཁང་རྩེག་དེ་རྡིབ་འདུག རྨས་སྐྱོན་ཕོག་པའི་བུད་མེད་ཅིག་གིས་ང་ལ་ཁོང་མོའི་ཁྱོ་བོ་དང་ཕྲུ་གུ་གཉིས་སྐྱོབ་རོགས་ཞུས་ཀྱང་། སོལ་རླངས་འགལ་འཐོར་འབྱུང་བར་ཞེད་ནས་ང་ནང་ལ་འགྲོ་མ་ཕོད། སྐབས་དེར་རྡིབ་སྐྱོན་བྱུང་བའི་ཐོག་རྩེག་ཁང་གི་འོག་ཏུ་མི་མང་པོས་སྲོག་སྐྱོབ་རོགས་ཞེས་འབོད་བཞིན་འདུག ཡིན་ནའང་ངའི་སྐས་འཛེག་ཐུང་དྲགས་ནས་ཁོ་ཚོ་སྐྱོབ་ཐབས་མི་འདུག ཅེས་བརྗོད་འདུག

ཐའེ་ཝན་གྱི་སྲིད་འཛིན་ལས་ཐོག་མ་ཡེན་ཇཱོ་ཡིས་རོའུ་ཊར་གསར་འགོད་པར། ད་ཆར་ང་ཚོས་མི་མང་ཉེན་སྐྱོབ་བྱེད་བཞིན་པའི་སྒང་ཡིན། ཐེངས་འདིའི་ས་ཡོམ་གོད་ཆས་ཀྱི་གནས་ཚུལ་ལ་ད་དུང་གསལ་ཁ་བྱུང་ཐུབ་མེད་སྐོར་བརྗོད་ཡོད་འདུག

གནས་ཚུལ་ལྟར་ན། ཐའེ་ཝན་ལྷོ་རྒྱུད་ཐའེ་ནན་གྲོང་ཁྱེར་དུ་བྱུང་བའི་ཚད་རིམ་ ༦.༤ ཅན་ས་ཡོམ་དེའི་གཏིང་ཚད་སྤྱི་ལེ་ ༢༣ དང་རིང་ཚད་སྤྱི་ལེ་ ༢༧ ཟིན་གྱི་ཡོད་པ་དང་། ཐའེ་ནན་གྲོང་ཁྱེར་ནང་ཐའེ་ཝན་ཡུལ་མི་ས་ཡ་ ༢ ལྷག་འཚོ་སྡོད་བྱས་ཡོད་པ་དང་། ཐེངས་འདིའི་ས་ཡོམ་ཁྲོད་དུ་ཐོག་རྩེག་མང་པོ་ཡོ་བ་དང་གས་ཁ་ཤོར་ཡོད་སྟབས། ད་ཆར་ཉེན་སྐྱོབ་རུ་ཁག་མང་པོ་འབྱོར་ནས་མི་མང་ཉེན་སྐྱོབ་དང་སྲུང་སྐྱོབ་གནང་བཞིན་ཡོད་འདུག

གསར་འགོད་པ། པདྨ་རྒྱལ།