མི་རབས་གསར་པའི་མཐུན་ཚོགས་ཀྱིས་ལོ་ལྟར་བོད་པའི་ལོ་གསར་ཚེས་གཅིག་ཉིན་བོད་དོན་ཞུ་བའི་ལས་འགུལ་སྤེལ་བཞིན་ཡོད་པ་ལྟར་ད་ལོའང་སུད་སིའི་གྲོང་ཁྱེར་ཛུ་རིག་ནང་སྤེལ་འདུག
ཟླ་འདིའི་ཚེས་ ༩ ཉིན་བོད་པའི་ལོ་སར་ཚེས་གཅིག་དང་བསྟུན་ཏེ། སུད་སིའི་བོད་ཀྱི་མི་རབས་གསར་བའི་མཐུན་ཚོགས་ཀྱི་གོ་སྒྲིག་འོག སུད་སིའི་གྲོང་ཁྱེར་ཛུ་རིག་གྲོང་ཁྱེར་ནས་རྒྱ་ནག་གཞུང་ཚབ་མདུན་བར་བོད་དོན་སྐད་འབོད་ལས་འགུལ་ཞིག་སྤེལ་ཡོད་འདུག
ཡུ་རོབ་བོད་རིགས་གཞོན་ནུའི་མཐུན་ཚོགས་ཀྱི་སྐུ་ཚབ་ཟླ་བ་ལགས་ཀྱིས་ལས་འགུལ་དང་འབྲེལ་བའི་གཏམ་བཤད་དང་། མཐུན་ཚོགས་ཀྱི་ཚོགས་གཞོན་གྱིས་ལས་འགུལ་གྱི་དམིགས་ཡུལ་ངོ་སྤྲོད་དང་འབྲེལ་བསྒྲགས་གཏམ་ཞིག་སྤེལ་ཡོད་པའི་ནང་། དེ་རིང་ནི་བོད་ཀྱི་ལོ་སར་ཡིན་ལ། བོད་མི་ཡོངས་ཀྱིས་ལོ་གཅིག་གི་དུས་ཆེན་གལ་ཆེན་ཞིག་དང་། བོད་མི་ཚོས་བཟའ་མི་ལྷན་འཛོམས་དང་དགའ་དགའ་སྤྲོ་སྤྲོ་བྱེད་པའི་དུས་ཆེན་ཁྱད་པར་བ་ཞིག་ཡིན། དེ་བས་བོད་ཀྱི་མི་རབས་གསར་བའི་མཐུན་ཚོགས་ཀྱི་ངོས་ནས་བོད་མི་ཡོངས་ལ་ལོ་སར་གྱི་འཚམས་འདྲི་དང་། ཚོགས་མི་ཡོངས་ཀྱི་ལོ་སར་ལ་དགའ་སྤྲོ་བག་ཕེབས་ཀྱིས་རོལ་དགོས་པའི་གནས་སྟངས་ཤིག་ཆགས་དགོས་ཀྱི་ཡོད་ཀྱང་། སྟབས་མ་ལེགས་པ་ཞིག་ལ་རྒྱ་ནག་དམར་ཕྱོགས་ཟེར་བའི་སྒེར་གཅོད་སྲིད་གཞུང་གིས། བོད་ས་ཡོངས་རྫོགས་བཙན་བཟུང་བྱས་པ་ནས་བོད་པ་ཚོར་དགའ་སྤྲོ་བག་ཕེབས་ཀྱི་གནམ་ལོ་གསར་བ་ཞིག་ལ་རོལ་བའི་དུས་ཚོད་བདེ་སྐྱིད་ལྡན་པ་ཞིག་ཤར་མྱོང་མེད། དེ་ལས་ལྡོག་སྟེ་བོད་མིའི་འདུ་འཛོམས་ལ་བཀག་སྡོམ་དང་། སྐད་ཡིག་སྲུང་སྐྱོབ་ལ་ཚོད་འཛིན། དགོན་སྡེ་ཁག་གཏོར་བཅོམ་སོགས་ཀྱིས་མཚོན་པའི་བོད་མི་ས་ཡ་གཅིག་དང་ཕྱེད་ཀ་ལྷག་དམར་གསོད། ནང་མི་ཁ་བྲལ་བྲལ་གྱི་གདུང་བ་ཉིན་རེར་བཞིན་མཚམས་ཆད་ཀྱིན་མེད་པར་བོད་ས་ཡོངས་རྫོགས་བཙོན་ར་ལྟ་བུར་བསྒྱུར་ཡོད། ལྷག་པར་དུ་བོད་མི་ཚོས་རྒྱ་གཞུང་གི་རྩ་ཁྲིམས་ཀྱི་ཡིག་ཆ་ཁག་ནང་གསལ་བའི་ཁྲིམས་ཀྱི་ཁེ་དབང་ཁག་ལ་ལོངས་སྤྱོད་བྱེད་པའི་ཐོབ་ཐང་སྤྲོད་ཀྱིན་མེད། ཅེས་སོགས་བཀོད་འདུག
བསྒྲགས་གཏམ་ནང་མུ་མཐུད་དུ་འཁོད་དོན། གོང་དུ་བཤད་པའི་ཤ་རུས་ཁྲག་རྒྱུན་གཅིག་པའི་བོད་མི་འདི་དག་ལ་ནང་མི་དང་། བུ་ཕྲུག་བཟའ་ཟླ་སོགས་ཡོད་ཅིང་། ཕ་མ་སྤུན་མཆེད་དང་དགའ་ཉེ་གྲོགས་པོ་སོགས་ཅི་ལ་མེད། ཁོང་ཚོས་འཇིག་རྟེན་ཕྱི་མར་ཆས་ཟིན་པའི་བཟའ་ཟླ་དང་བུ་ཕྲུག སྤུན་མཆེད་དང་ཕ་མ། དགའ་ཉེ་གྲོགས་པོ་སོགས་ཀྱི་ཆེད་དུ་སྡུག་གི་མཆི་མ་སྐམ་མེད་ལ། ཁོང་ཚོས་བོད་བསྟན་སྲིད་མི་རིགས་ཀྱི་ཆེད་དུ་གཤེགས་པའི་དགོས་པ་དང་དམིགས་ཡུལ། བློས་གཏོང་སོགས་ལ་བཞགས་པའི་ཁྲག་གི་ཡི་གེའི་ཁ་ཆེམས་སོགས་ད་དུང་གྲང་མོ་ཆགས་མེད།
དེ་རིང་ལོ་སར་ཚེས་གཅིག་ཉིན་ཡིན་ནའང་བོད་མི་ཚོས་དཀའ་སྡུག་དང་། གདུང་སེམས་མཉམ་སྐྱེད། བོད་དོན་འཐབ་རྩོད་སོགས་མི་བརྗེད་མི་སྲིད་པའི་དྲན་སྐུལ་ཞུ་རྒྱུ་དང་། རྒྱ་ནག་དམར་ཕྱོགས་གཞུང་ལ་བོད་དོན་བདེན་མཐའ་མ་སེལ་བའི་བར་དུ་བོད་མི་ཚོས་ཉིན་གཅིག་ལའང་འཐབ་རྩོད་ཀྱི་ནུས་པ་མི་འདོར་བའི་བརྡ་ལན་གསལ་བོ་ཞིག་སྤྲོད་རྒྱུ་ཡིན་ལ། རྒྱ་གཞུང་ལ་སྟོབས་ཤུགས་ཇི་ལྟར་ཆེ་ན། ང་ཚོའི་བདེན་དོན་འཐབ་རྩོད་ཀྱི་སྙིང་སྟོབས་དེ་ལས་ཆེ་རུ་འགྲོ་བཞིན་ཡོད་པས། བོད་དོན་ལ་སྣང་ཆུང་དང་། བོད་རིགས་ལ་མཐོང་ཆུང་གི་སྲིད་བྱུས་འོག་བོད་རིགས་རྩ་མེད་དུ་གཏོང་འདོད་ཀྱི་ཧམ་སེམས་ཡོངས་སུ་ཕམ་སྲིད་པའི་ཡིད་ཆེས་དང་དམ་བཅའ་བརྟན་པོ་ཡོད། ཅེས་སོགས་འཁོད་ཡོད་འདུག
གསར་འགོད་པ། ཙ་ཡུས་ཕུན་ཚོགས།
ཁྱེད་ཅག་གི་སྙིང་སྟོབས་དང་སེམས་ཤུགས་ལ་རྗེས་སུ་ཡི་རང་ཞུ།