ཐའེ་ཝན་གྱི་སྲིད་འཛིན་གསར་པ་ལྕམ་ཚའེ་ཡེན་ཝིན་གྱིས་ཤར་ནུབ་རྒྱལ་ཁབ་ཚང་མས་ཞི་བདེ་རྩ་བར་བཟུང་སྟེ་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་འདུམ་འགྲིག་ཡོང་ཐབས་བྱེད་དགོས་སྐོར་བརྗོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། དེ་རིང་ཕྱི་ཚེས་ ༡༧ ཉིན་ཐའེ་ཝན་གྱི་སྲིད་འཛིན་གསར་བ་ཚའེ་ཡེན་ཝིན་གྱིས་དེང་སྐབས་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་ཤུགས་ཆེ་རུ་འགྲོ་བཞིན་ཡོད་སྟབས། རྒྱ་ནག་དང་ཨ་རི་གཙོས་པའི་ལྷོ་ཤར་ཨེ་ཤ་ཡ་རྒྱལ་ཁབ་ཁག་གིས་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་དེ་བཞིན་ཞི་བའི་ཐོག་ནས་འདུམ་འགྲིག་ཡོང་ཐབས་བཟོ་དགོས་སྐོར་བརྗོད་ཡོད་པ་དང་། གསར་འགོད་པའི་དྲི་བ་དྲིས་ལན་ཞིག་གི་སྐབས་སུ་ཁོང་མོས། རྒྱལ་ཁབ་ཚང་མས་ཞི་བདེའི་རྩ་འཛིན་དང་རང་ཚོད་ཟིན་པའི་སྒོ་ནས། མཚོ་ཁུལ་རྩོད་གླེང་འདུམ་འགྲིག་དགོས་སྐོར་བརྗོད་ཡོད་འདུག
ལྕམ་ཚའེ་ཡེན་ཝིན་གྱི་བསམ་ཚུལ་དེ་ནི་རྒྱ་ནག་གི་ལྷོ་རྒྱུད་མཚོ་ཁུལ་གྱི་ནགས་ཚུལ་གླིང་ཕྲན་ (Woody Island) ཞེས་པའི་སྟེང་དུ་རྒྱ་ནག་གཞུང་གིས་མཁའ་དམག་གི་རྟེན་གཞི་བཟོས་པའི་རྗེས་སུ་བཤད་པ་ཞིག་ཡིན་ཞིང་། ཟླ་འདིའི་ཕྱི་ཚེས་ ༡༢ ཉིན་རྒྱ་ནག་གཞུང་གིས་ནགས་ཚུལ་གླིང་ཕྲན་ཞེས་པའི་སྟེང་མཁའ་དམག་གི་རྟེན་གཞི་བཟོས་རྐྱེན། ཝེ་ཋི་ནམ་དང་ཐའེ་ཝན། རྒྱ་ནག་རྒྱལ་ཁབ་གསུམ་བར་གྱི་མངའ་ཁོངས་རྩོད་གླེང་གི་རྣོ་ངར་ཇེ་རུ་འགྲོ་བཞིན་ཡོད་འདུག
ཁ་སང་ཕྱི་ཚེས་ ༡༦ ཉིན་ཨ་རིར་འཚོགས་བཞིན་པའི་ལྷོ་ཤར་ཨེ་ཤ་ཡའི་ལྷན་ཚོགས་ཀྱི་ཉིན་གཉིས་པར་ཨ་རིའི་སྲིད་འཛིན་ཨོ་བྷ་མ་གཙོས་པའི་ལྷོ་ཤར་ཨེ་ཤ་ཡའི་རྒྱལ་ཁབ་ ༡༠ དབུ་ཁྲིད་རྣམས་ཀྱིས། རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་དེ་བཞིན་རྒྱལ་སྤྱིའི་རྩ་ཁྲིམས་དང་ཞི་བའི་སྒོ་ནས་འདུམ་ཐབས་ཙམ་ལས། མཚོ་ཁུལ་གྱི་བདག་དབང་རྩོད་གླེང་འདུམ་ཕྱོགས་ཀྱི་གྲོས་ཆོད་གང་ཡང་འཇོག་ཐུབ་མེད་པ་རེད། སྐབས་དེར་ཨ་རིའི་སྲིད་འཛིན་ཨོ་བྷ་མས་གསར་འགོད་གསལ་བསྒྲགས་ཤིག་གི་སྟེང་། ང་ཚོས་གོམ་གང་མདུན་སྤོས་ཀྱིས་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་ཆུང་དུ་གཏོང་རྒྱུ་མ་ཟད། མཚོ་ཁུལ་གྱི་བདག་དབང་དང་འཛུགས་སྐྲུན། མཁའ་དམག་གི་རྟེན་གཞི་བཟོ་བཞིན་པའི་ཐད་ལའང་གྲོས་མོལ་བྱས་པ་ཡིན། ལྷོ་ཤར་ཨེ་ཤ་ཡའི་ལྷན་ཚོགས་ཀྱི་ངོས་ནས་ཕྱི་གསལ་ནང་གསལ་གྱི་སྒོ་ནས་མཚོ་ཁུལ་རྩོད་གླེང་སྐོར་ལ་ཕན་ཚུན་གྱི་བསམ་ཚུལ་བརྗེ་རེས་དང་རྒྱུས་ལོན་བྱས་པ་དེས་འབྱུང་འགྱུར་རྒྱལ་ཁབ་ཕན་ཚུན་གྱི་མངའ་ཁོངས་བདེ་འཇགས་ཡོང་བ་དང་རྒྱལ་ཁབ་ཕན་ཚུན་བར་ཆེས་མཐོང་ཡོང་ཐབས་བཅས་སུ་ཕན་ནུས་འཐོན་གྱི་ཡོད་སྐོར་བརྗོད་འདུག
ཟླ་འདིའི་ཕྱི་ཚེས་ ༡༥ ཉིན་ཨ་རིའི་གཞུང་གིས་རྒྱ་ནག་གི་མཁའ་དམག་གནམ་གྲུ་མང་པོ་རྒྱ་ནག་གི་ལྷོ་རྒྱུད་མཚོ་ཁུལ་གྱི་མིས་བཟོས་གླིང་ཕྲན་སྟེང་འཕུར་སྐྱོད་བྱས་པ་དེས་ཨ་རིའི་མཚོ་དམག་ལ་འཇིགས་སྐུལ་དང་མ་འོངས་མཚོ་ཁུལ་བདེ་འཇགས་ལ་གནོན་སྐྱོན་བཟོ་སྲིད་པར་སྐྱོན་བརྗོད་བྱེད་ཀྱི་ཡོད་ཅིང་། རྒྱ་ནག་དང་ལྷོ་ཤར་ཨེ་ཤ་ཡའི་མཚོ་ཁུལ་བདེ་འཇགས་དབྱེ་ཞིབ་པ་ཚོས། འབྱུང་འགྱུར་ཟླ་བ་ཁ་ཤས་རྗེས་སུ། རྒྱ་ནག་གཞུང་གིས་ལྷོ་རྒྱུད་མཚོ་ཁུལ་དུ་འཛུགས་སྐྲུན་བྱས་པའི་གླེང་ཕྲན་ཁག་གི་སྟེང་མཁའ་དམག་གི་རྟེན་གཞི་བཙུགས་ཏེ་མཚོ་ཁུལ་རྟོག་ཞིབ་བྱ་སྲིད་པར་ཚོད་དཔག་བྱེད་ཀྱི་འདུག
ཕྱི་ཟླ་ ༡ ཚེས་ ༦ ཉིན་རྒྱ་ནག་གི་ཧེ་ནན་མཁའ་ལམ་ཚད་ཡོད་ཚོང་གཉེར་ཁང་ (Hainan Airlines Company Limited) གིས་མཚོ་ཁུལ་དེའི་ (Fiery Cross Reef) ཞེས་པའི་གླིང་ཚོམ་སྟེང་རིང་ཚད་མི་ཊིར་ ༣༠༠༠ ཅན་གྱི་མཁའ་དམག་གནམ་གྲུའི་འཕུར་ལམ་འཛུགས་སྐྲུན་དང་ཚོད་ལྟ་བྱས་ཡོད་སྟབས། ལྷོ་ཤར་ཨེ་ཤ་ཡ་དང་ནུབ་གླིང་རྒྱལ་ཁབ་གིས་རྒྱ་ནག་ལྷོ་རྒྱུད་མཚོ་ཁུལ་རྩོད་གླེང་ཤུགས་ཆེ་རུ་འགྲོ་སྲིད་པའི་སེམས་འཚབ་བྱེད་ཀྱི་ཡོད་པ་དང་། ཉེ་ལམ་ནས་རྒྱ་ནག་གིས་འཛུགས་སྐྲུན་དང་བདག་བཟུང་བྱེད་པའི་མཚོ་ཁུལ་དེ་དག་བརྒྱུད་ཤར་ནུབ་རྒྱལ་ཁབ་ཁག་བར་ལོ་རེར་ཨ་སྒོར་ཐེར་འབུམ་ ༥ ལྷག་གི་ཚོང་ཟོག་སྐྱེལ་འདྲེན་བྱེད་ཀྱི་ཡོད་པ་མ་ཟད། ནུབ་ཤར་ཨ་ཤ་ཡའི་རྒྱལ་ཁབ་ཁག་གིས་མཚོ་ཁུལ་དེ་དག་ནས་རྡོ་སྣུམ་འབོར་ཆེན་མཁོ་འདྲེན་བྱེད་ཀྱི་ཡོད་པ་རེད།
གསར་འགོད་པ། པདྨ་རྒྱལ།
