རྒྱ་ནག་གི་སློབ་མར་ཁྲིམས་ཐག་བཅད།

ཨ་རིའི་མཐོ་རིམ་ཁྲིམས་ཁང་ཞིག་གིས་ཨ་རིའི་ནང་མཐོ་སློབ་འགྲིམ་བཞིན་པའི་རྒྱ་ནག་གི་སློབ་མ་གསུམ་ལ་ལོ་ ༦ ནས་ ༡༣ བར་གྱི་བཙོན་འཇུག་ཁྲིམས་ཐག་བཅད་འདུག

ཁ་སང་ཕྱི་ཚེས་ ༡༧ ཉིན་ཨ་རིའི་མངའ་སྡེ་ཁ་ལི་ཧྥོར་ནི་ཡའི་ནང་ཡོད་པའི་ཕོ་མོ་ནཱ་མཐོ་རིམ་ཁྲིམས་ཁང་( Pomona Higher Law)གིས། སློབ་གྲོགས་བཀག་ཉར་བྱས་ཏེ་གནོད་འཚེ་ཚབས་ཆེན་བཏང་བའི་ནག་ཉེས་འོག མཐོ་སློབ་འགྲིམ་བཞིན་པའི་རྒྱ་ནག་གི་སློབ་ཕྲུག་བུ་མོ་དི་ཡེན་ཡོ་ཟེར་བ་ཞིག་ལ་ལོ་ ༡༣ དང་། ཡང་ཡཱས་ཧན་ལ་ལོ་ ༡༠། ཀྲང་ཞིན་ལི་ལ་ལོ་ ༦ བཅས་ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། བཙོན་འཇུག་དུས་ཡུན་ཚང་རྗེས་སློབ་མ་དེ་དག་རྒྱ་ནག་ཏུ་ཕྱིར་ལོག་གཏོང་རྒྱུ་ཡིན་སྐོར་ཡོངས་བསྒྲཊ་བྱས་འདུག་ལ། ད་དུང་སློབ་མ་ ༦ བཀག་ཉར་འོག་ཡོད་པ་དང་སློབ་མ་ ༤ བྲོས་བྱོལ་དུ་ཕྱིན་པ་བཅས་རྒྱ་ནག་གི་ཕྱི་སྡོད་མཐོ་རིམ་དང་འབྲིང་རིམ་སློབ་མ་ ༡༣ ཙམ་ཉེས་དོན་དེར་འབྲེལ་བ་ཡོད་འདུག

བྷི་བྷི་སིས་གནས་ཚུལ་སྤེལ་བ་ལྟར་ན། སློབ་ཕྲུག་དེ་དག་གིས་འདས་ལོའི་ཕྱི་ཟླ་ ༣ པའི་ནང་ཁུལ་དེའི་མཐོ་སློབ་ནང་ཡོད་པའི་རྒྱ་ནག་གི་སློབ་ཕྲུག་བུ་མོ་ལོ་ན་ ༡༦ དང་ ༡༨ ཅན་ཞིག་བཀག་ཉར་བྱས་ཏེ། གཅེར་བུར་ཕུད་པ་དང་རུབ་རྡུང་བཏང་བ། ལུས་ལ་ཐ་མག་གི་མེས་བསྲེགས་པ་སོགས་ཀྱི་མནར་གཅོད་བཏང་ཡོད་པ་དང་། ལོ་ ༡༦ ཅན་གྱི་བུ་མོ་དེས་ཁོ་ཚོར་བརྩི་བཀུར་མ་བྱས་པ་དང་། ལོ་ ༡༨ ཅན་དེས་ཟ་རིན་མ་སྤྲད་པ་དང་སྐྱེས་པ་ཞིག་གི་རྩོད་རྙོག་ཁུར་ཏེ་རུབ་རྡུང་བཏང་ཡོད་འདུག

གཅར་རྡུང་ཕོག་པའི་སློབ་ཕྲུག་གཉིས་ཀྱིས་གུན་གསབ་སྒོར་མོ་སྤྲོད་དགོས་པའི་རེ་འདུན་བཏོན་ཡོད་ཀྱང་། ལོ་ན་ ༡༨ ལོན་པའི་ཉེས་ཅན་སློབ་ཕྲུག་ ༤ ལ་གུན་གསབ་སྒོར་མོ་སྤྲོད་རྒྱུ་མེད་ལ། ཁོ་ཚོའི་ཕ་མ་ཚོས་ཀྱང་གུན་གསབ་དེར་འགན་འཁུར་དགོས་ཀྱི་མེད་པ་རེད། ཡིན་ནའང་། ལོ་ན་ ༡༨ མ་ལོན་པའི་ཉེས་ཅན་ཚོའི་གུན་གསབ་ཨ་སྒོར་ཁྲི་ ༢.༥ དེ་ཕ་མ་ཚོས་སྤྲོད་དགོས་པའི་ཐག་གཅོད་བྱས་ཡོད་འདུག

འདས་ལོའི་ཕྱི་ཟླ་ ༡ ཚེས་ ༥ ཉིན་ཁྲིམས་ཆད་ཕོག་པའི་སློབ་ཕྲུག་གསུམ་གྱིས་སོ་སོའི་ནག་ཉེས་ཁས་ལེན་བྱས་ཡོད་པ་དང་། ཁ་ལི་ཧྥོར་ནི་ཡའི་བཅའ་ཁྲིམས་ནང་མནར་གཅོད་བཏང་བའི་ནག་ཉེས་ནི་ཧ་ཅང་ཚབས་ཆེན་དུ་རྩི་ཡི་ཡོད་པས་ཚེ་བཙོན་གྱི་ཁྲིམས་ཆད་ཕོག་ཉེན་ཡོད་སྟབས། ཉེས་ཅན་སློབ་ཕྲུག་ཚོའི་ངོས་ནས་ཁྲིམས་རའི་ཐག་གཅོད་དང་ལེན་བྱ་རྒྱུ་ཡིན་པས་མནར་གཅོད་བཏང་བའི་ནག་ཉེས་ཕྱིར་བསྡུ་དགོས་པའི་རེ་འདུན་བཏོན་ཡོད་པ་ལྟར། ཁྲིམས་ཞིབ་ཁང་ནས་ཁོ་ཚོའི་མནར་གཅོད་ཀྱི་ནག་ཉེས་ཕྱིར་བསྡུས་ཡོད་འདུག

ལོ་ ༡༣ བཙོན་འཇུག་ཁྲིམས་ཐག་བཅད་པའི་བུ་མོ་དི་ཡེན་ཡོ་ཟེར་བ་དེས། རྒྱ་ནག་ནང་ཡོད་པའི་མོ་རང་གི་ཕ་མ་གཉིས་ཀྱིས་རང་དབང་ལྡན་པའི་ཐོག་ནས་མོས་སྔར་ལས་འཚོ་བ་ལེགས་པོ་ཞིག་སྐྱེལ་ཐུབ་པ་དང་སློབ་སྦྱོང་ཚད་ལྡན་ཞིག་འཐོན་པའི་ཆེད་དུ་ཨ་རིར་བཏང་བ་ཡིན་ཡང་། མོ་ཨ་རིར་བསླེབས་རྗེས་ཁེར་རྐྱང་གི་སྡུག་བསྔལ་མྱང་ཞིང་བརྩེ་སེམས་བརླགས་སོང་བ་དང་། ཕ་མ་དང་ཁ་བྲལ་ནས་ཁེར་རྐྱང་གིས་འཚོ་བ་དེ་མོ་རང་གིས་ནག་ཉེས་བཟོས་པའི་རྒྱུ་རྐྱེན་གཙོ་བོ་ཞིག་ཆགས་ཡོད་སྐོར་བརྗོད་འདུག་ལ། ལོ་ ༦ ཁྲིམས་ཆད་ཕོག་པའི་སློབ་མ་ཡང་ཡཱས་ཧན་ཟེར་བ་དེས་ཀྱང་ཕ་མས་སེམས་པ་བཟང་པོ་བཅངས་ཏེ་སོ་སོའི་བུ་ཕྲུག་རྒྱང་རིང་དུ་བཏང་བ་ཡིན་ནའང་། གནས་དེར་ལྟ་སྐྱོང་འདང་ངེས་མེད་པ་དང་རང་དབང་ཆེ་དྲགས་ན་ཉེན་ཁ་ཞིག་ཆགས་ཡོད་སྐོར་བརྗོད་འདུག

འདས་ལོའི་ཕྱི་ཟླ་ ༥ པའི་ཚེས་ ༢༦ ཉིན་ཨ་རིའི་ཧཱ་རིན་(Huaren Education)ཤེས་ཡོན་ཞིབ་འཇུག་ལྟེ་གནས་ཁང་གིས། ༢༠༡༥ ལོའི་ཨ་རིའི་རྒྱ་ནག་གི་སློབ་མའི་གནས་ཚུལ་སྐོར་གྱི་རྒྱབ་ཤ་དཀར་པོའི་དེབ་ཞེས་པ་ཞིག་ཕྱིར་བསྒྲགས་བྱས་པའི་ནང་། ད་སྐབས་ཨ་རིའི་ནང་རྒྱ་ནག་གི་སློབ་མ་ཁྲི་ ༥༠ ཙམ་ཡོད་པ་དང་། ཁོ་ཚོ་ལས་མང་ཆེ་བ་ཨ་རིའི་སྐད་གྲགས་ཅན་གྱི་སློབ་ཆེན་མང་པོ་ཡོད་པའི་རྒྱལ་ས་ཝ་ཤིང་ཊོན་དང་ཁ་ལི་ཧྥོར་ནི་ཡ་(California)། ཧྥི་ལོ་རི་ཌཱ་(Florida)སོགས་ཀྱི་ནང་ཡོད་པ་དང་། ཕྱི་ལོ་ ༢༠༡༤ ལོར་ཨ་རིའི་ནང་ཡོད་པའི་རྒྱ་ནག་གི་སློབ་མ་ ༨༠༠༠ སློབ་གྲྭ་ནས་ཕྱིར་འབུད་བཏང་ཡོད་པ་དང་། དེའི་ནང་ནས་བརྒྱ་ཆའི་ ༢༢.༩༨ རིག་གཞུང་ཞིབ་འཇུག་གི་སྤྱོད་ལམ་མ་གཙང་བ་དང་། བརྒྱ་ཆའི་ ༥༧.༥༦ རིག་གཞུང་གི་སྣང་ཚུལ་ཞན་དྲགས་པའི་རྐྱེན་གྱིས་ཡིན་ལ། ཕྱིར་འབུད་བཏང་བའི་སློབ་མ་དེ་དག་ལས་བརྒྱ་ཆའི་ ༨༨.༧ ནི་ལོ་ན་ ༡༨ ནས་ ༢༥ བར་ཡིན་ཞིང་། བརྒྱ་ཆའི་ ༧ ལྷག་དངོས་གཞིའི་སློབ་ཆེན་པ་དང་འབུམ་རམས་པ་རྐྱང་རྐྱང་ཡིན་སྐོར་བརྗོད་ཡོད་པ་རེད།

གསར་འགོད་པ། པདྨ་མཚོ།