རྒྱལ་ས་ལྡི་ལིར་མི་མང་གིས་འོས་ལངས།

རྒྱ་གར་བྱང་རྒྱུད་མངའ་སྡེ་ཧར་ཡ་ནའི་ནང་རིགས་རུས་མཐོ་དམན་གྱི་ཐོག་ནས་གཞུང་གི་ལས་གནས་དང་མཐོ་རིམ་སློག་གསོའི་ཐོབ་ཐང་མ་རག་མཁན་མང་པོས་གཟའ་འཁོར་གཅིག་རིང་ངོ་རྒོལ་གནང་བཞིན་ཡོད་འདུག

དེ་རིང་རྒྱ་གར་དུས་བབ་གསར་ཁང་གིས་གནས་ཚུལ་སྤེལ་དོན་ལྟར་ན། རྒྱ་གར་བྱང་རྒྱུད་མངའ་སྡེ་ཧར་ཡ་ན་ (Haryana) ནང་ཡོད་པའི་རྗ་ཊ་ (Jat) མི་རིགས་ལ་གཞུལ་འབྲེལ་ལས་གནས་དང་མཐོ་རིམ་སློབ་གསོའི་ཐོབ་ཐང་རག་གི་མེད་སྟབས། མང་ཚོགས་སྟོང་ཕྲག་མང་པོ་འདུ་འཛོམས་ཀྱིས་འདས་པའི་གཟའ་འཁོར་གཅིག་རིང་ངོ་རྒོལ་ལས་འགུལ་སྤེལ་ཏེ། རེས་གཟའ་སྤེན་པའི་ཉིན་ནས་ངོ་རྒོལ་ལས་འགུལ་བ་ཚོས་ཁང་པ་མེར་བསྲེགས་དང་། མེ་འཁོར་དང་རླངས་འཁོར་ས་ཚུགས། གཞུང་ལམ་ཁག་བཀག་སྟེ་དྲག་པོའི་ཟིང་ཆ་ལངས་པ་དང་། རྒྱ་གར་གཞུང་གིས་དམག་མི་ཆིག་ཁྲི་ཆིག་སྟོང་ལྷག་འགྲེམས་འཇོག་གིས་ཟིང་འཁྲུག་ཞི་འཇགས་སུ་གཏོང་གི་ཡོད་ནའང་། ངོ་རྒོལ་ལས་འགུལ་བ་ཚོས་མུ་མཐུད་དྲག་པོའི་ངོ་རྒོལ་ལས་འགུལ་སྤེལ་མུས་ཡིན་ཞིང་། ཐེངས་འདིའི་ངོ་རྒོལ་ལས་འགུལ་ལ་བརྟེན་ནས་ཧར་ཡ་ན་མངའ་སྡེའི་མེ་འཁོར་དང་འགྲིམ་འགྲུལ་ས་ཚུགས། གཞུང་ལམ་ཁག་ ༤༤༩ བཀག་སྡོམ་བྱས་ཡོད་སྟབས། འགྲུལ་བ་སྟོང་ཕྲག་མང་པོའི་འགྲོ་ལམ་བཅད་པའི་དཀའ་རྙོག་ལ་འཕྲད་ཡོད་འདུག

གནས་ཚུལ་ལྟར་ན། ཐེངས་འདིའི་ངོ་རྒོལ་ལས་འགུལ་ཁྲོད་ཡུལ་མི་ ༡༠ འདས་གྲོངས་དང་ཡུལ་མི་ ༡༥༠ ལྷག་ལ་རྨེས་སྐྱོན་བྱུང་ཡོད་པ་དང་། ངོ་རྒོལ་ལས་འགུལ་གྱི་འབྱུང་རྐྱེན་གཙོ་བོ་ (Scheduled Castes) དང་ (Scheduled Tribes) དེ་བཞིན་ (Other Backward Classes) སོགས་རྒྱ་གར་གྱི་རིགས་རུས་ཁག་ཅིག་ལ་རྒྱལ་ནང་གི་གཞུང་འབྲེལ་ལས་གནས་དང་མཐོ་རིམ་ཤེས་ཡོན་སློབ་གསོའི་གོ་སྐབས་རག་གི་མེད་པར་བརྟེན་ནས་བྱུང་བ་དང་། རྩོད་རྙོག་འདི་ཕྱི་ལོ་ ༡༩༥༥ ནས་བྱུང་བ་ཞིག་ཡིན་འདུག

དེང་སྐབས་ལྡི་ལི་སྲིད་གཞུང་གིས་ད་ལན་གྱི་ངོ་རྒོལ་ལས་འགུལ་ལ་བརྟེན་ནས་རྒྱལ་ས་ལྡི་ལིའི་གཞུང་ལས་དང་ཚོང་ལས། སློབ་གྲྭ་ཁག་བཅས་ལས་རིགས་ཁག་གི་སྒོ་རྒྱག་དགོས་འབྱུང་སྲིད་པར་སེམས་བྱེད་ཀྱིན་ཡོད་འདུག

གསར་འགོད་པ། པདྨ་རྒྱལ།