བོད་རིཊ་མཐོ་རིམ་སློབ་མའི་རེ་སྐུལ།

བོད་རིགས་མཐོ་རིམ་སློབ་མའི་ཚོགས་ཆེན་ཐོག་རིག་གནས་རབ་འབྱམས་པའི་བསླབ་གཞི་གཏན་འབེབས་དང་སློབ་གྲྭ་ཁག་ཏུ་དུད་ཆང་དང་དུག་རྫས་རིགས་སྤྱོད་མཁན་ཧ་ཅང་མང་བ་འགོག་ཐབས་དགོས་པ་སོགས་གྲོས་ཆོད་དོན་ཚན་ ༢༠ ལྷག་སྤྱི་མོས་གཏན་འབེབས་གནང་འདུག

བོད་རིགས་མཐོ་རིམ་སློབ་མའི་ཚོགས་ཆེན་སྐབས་བཅུ་པ་ཁ་སང་ས་རཱ་མཐོ་སློབ་ནས་ མཇུག་སྒྲིལ་ཡོད་པ་དང་། ཐེངས་འདིའི་ཚོགས་ཆེན་ཐོག་བོད་རིགས་མཐོ་རིམ་སློབ་མ་ ༦༥ ཙམ་གྱིས་ཉིན་གྲངས་ ༦ རིང་བགྲོ་གླེང་གཏམ་བཤད་གནང་བ་བརྒྱུད། བོད་མིའི་སྒྲིག་འཛུགས་ཤེས་རིག་ལས་ཁུངས་དང་བོད་མི་མང་སྤྱི་འཐུས་ལྷན་ཚོགས། བོད་ཕྲུག་ཁྱིམ་སྡེ། མ་སུ་རི་བོད་ཁྱིམ་བཅས་ལ་སྙན་གསེང་ཞུ་རྒྱུའི་གྲོས་ཆོད་དོན་ཚན་ ༢༠ ལྷག་སྤྱི་མོས་གཏན་འབེབས་གནང་འདུག

བོད་རིགས་མཐོ་རིམ་སློབ་མའི་ཞིབ་འཇུག་ཚོགས་ཆུང་གི་ཚོགས་གཙོ་གསར་པ་བསོད་ནམས་ཚེ་བརྟན་ལགས་སུ། ཐེངས་འདིའི་གྲོས་ཆོད་རྣམས་གཏན་འབེབས་གནང་ཕྱོཊ་དང་། ཚོགས་ཆེན་ཐེངས་དགུ་པའི་སྙན་ཞུའི་གྲོས་ཆོད་རྣམས་ལ་གྲུབ་འབྲས་ཅི་ཙམ་ཐོན་ཡོད་ དྲིས་པར་ཁོང་གིས། སྤྱིར་བཏང་ང་ཚོས་གྲོས་ཆོད་ཧང་སང་བ་མང་པོ་བཞག་ཡོད་པ་རེད། ཡིན་ནའང་། ཤེས་རིག་དང་གྲོས་ཚོགས། བོད་ཁྱིམ་གཉིས་བཅས་ལ་འབུལ་རྒྱུ་དེ་ཚོ་སྤྱི་མོས་ཀྱིས་གཏན་ལ་ཕབ་པའི་གྲོས་ཆོད་རྣམས་རེད། ད་རེས་ཚོགས་ཆེན་ཐོག་ཤེས་རིག་བཀའ་བློན་མཆོག་ཕེབས་ཡོད་པ་དང་། ཚོགས་ཆེན་ཐོག་གང་བྱུང་བ་རྣམས་ཡར་བཀའ་འདྲི་ཞུ་སྐབས་ལན་འདེབས་གནང་བ་དེ་ཚོ་དཔེ་ཚགས་ཚུད་པོ་དང་ཡག་པོ་བྱུང་སོང་། ཞེས་དང་།

ཡང་ཁོང་གིས། ང་ཚོའི་ཚོགས་ཆེན་ཐེངས་དགུ་པའི་སྐབས་སུ་ཕུལ་བའི་གྲོས་ཆོད་མང་ཆེ་བ་ཞིག་ལ་ཤེས་ རིག་དང་གྲོས་ཚོགས། དེ་བཞིན་བོད་ཁྱིམ་བཅས་ཀྱི་ངོས་ནས་ལན་འདེབས་ཧང་སང་བ་ཡག་པོ་གནང་སོང་། ང་རང་ཚོས་རེ་སྐུལ་ཞུས་པ་ལྟར་གྲོས་ཆོད་ཀྱི་ནང་ནས་ཁ་ཤས་ལག་བསྟར་གནང་ཚར་བ་དང་། ཁ་ཤས་ཤིག་ད་ལྟ་ལག་བསྟར་འགྲོ་བཞིན་པ་ཡིན་པ་རེད། ཡང་འགའ་ཤས་ཤིག་མ་འོངས་པར་ལག་བསྟར་གནང་བར་འབད་བརྩོན་གནང་གི་ཡིན་ཞེས་ལན་འདེབས་བྱུང་སོང་ལ། ང་རང་ཚོས་བསམ་པ་ལྟར་གྲུབ་འབྲས་གང་ལ་གང་འཚམ་ཐོབ་སོང་བས་དགའ་ཚོར་བྱུང་ལ། སོ་སོའི་འདོད་བློ་ཚིམ་པ་འདྲ་པོ་ཞིག་བྱུང་། མ་འོངས་པར་གྲོས་ཆོད་དེ་ཚོ་ཏག་ཏག་འགྲོ་ཡི་ཡོད་མེད་ཐོག་མཐོ་རིམ་སློབ་མའི་ཞིབ་འཇུག་ཚོགས་ཆུང་གི་ངོས་ནས་ཞིབ་འཇུག་མཐར་ཕྱིན་པ་བྱས་ཏེ་སྐབས་བཅུ་གཅིག་པའི་ཚོགས་ཆེན་ཐོག་སྙན་གསེང་ཞུ་ཡི་རེད་ལ། དོན་འབྲས་མ་སོན་པ་རྣམས་ཀྱི་ཐད་ང་ཚོས་མུ་མཐུད་ནས་གྲོས་ཆོད་བཞག་སྟེ་འབྲས་བུ་ཐོན་པར་འབད་བརྩོན་བྱེད་ངེས་ཡིན། ཞེས་བརྗོད་བྱུང་།

ཐེངས་འདིའི་ཚོགས་ཆེན་ཐོག་སྤྱི་མོས་བྱུང་བའི་གྲོས་ཆོད་དེ་ཤེས་རིག་ལས་ཁུངས་ལ་ཕུལ་བའི་དོན་ཚན་རྣམས་ནི། ༡༽ བོད་ཀྱི་དཔེ་མཛོད་ཁང་དང་ཤེས་རིག་དཔར་ཁང་སོགས་ནས་དཔེ་དེབ་ཚོང་སྐབས་སློབ་གཉེར་བའི་སྡེ་ཁག་ལ་རིན་གོང་ཏོག་ཙམ་དམའ་བའི་ཐོག་ཚོང་དགོས་པ་དང་། བོད་ནས་བཏོན་པའི་དཔེ་དེབ་གལ་འགངས་རིགས་ཤེས་རིག་ལས་ཁུངས་དང་དཔེ་མཛོད་ཁང་ནས་བསྐྱར་དཔར་ཐུབ་ན་ལེགས།

༢༽ ཇཱ་ཝ་ལ་ནེ་རོ་གཙུག་ལག་སློབ་གཉེར་ཁང་དང་། ལྡི་ལི་གཙུག་ལག་སློབ་གཉེར་ཁང་སོགས་ཀྱི་ནང་རྒྱལ་སྤྱི་སློབ་མའི་སློབ་ཡོན་ཕྱེད་བཅག་གནང་ཀྱིན་ཡོད་པས། དེ་ལྟ་བུའི་ཕྱེད་བཅག་མཐོ་སློབ་གཞན་གྱི་ནང་ཕྱེད་བཅག་ཡོང་ཐབས་སུ་རང་གཞུང་ཤེས་རིག་ལས་ཁུངས་ནས་ཕྱག་ལས་གནང་དགོས།

༣༽ ཆེད་ལས་དགེ་འོས་གསོ་སྐྱོང་ཡང་དག་ཡོང་ཐབས་སུ་ཤེས་རིག་དགེ་འོས་དང་། བྷོམ་རྡར་དགེ་འོས་སོགས་ཀྱི་སློབ་ཚན་གཏན་འབེབས་ཡང་དག་གནང་དགོས་ཀྱིན་འདུག དཔེར་ན། ཨང་རྩིས་དགེ་རྒན་ལ་ཨང་རྩིས་སློབ་དཔེ་གཏན་འབེབས་གནང་བ་སོགས་ཡིན།

༤༽ ཕ་མའི་ཚོགས་ཆེན་ཐེངས་གཉིས་པ་དེ་མ་འོངས་པར་བོད་མིའི་གཞིས་ཆགས་ཤིག་ལ་ཚོགས་འཐུབ་པ་གནང་དགོས་པ་དང་། ཤེས་རིག་ལས་ཁུངས་ནས་ཕ་མ་ཚོས་ཁྱིམ་ཚང་གི་ཕྲུ་གུར་ལྟ་སྐྱོང་བྱེད་སྟངས་ཐོག་ཤེས་རིག་ལས་ཁུངས་ནས་ཞིབ་དཔྱོད་ནན་པོ་གནང་དགོས་ཀྱིན་འདུག

༥༽ སྲིད་སྐྱོང་གཟེངས་རྟགས་བཞིན་བོད་ཀྱི་སྐད་ཡིག་སྦྱང་རྒྱུར་སྤོབས་པ་དང་གདེང་ཚོད་གང་ལེགས་ཡོང་ཐབས་སུ་ལོ་ལྟར་རྒྱ་གར་རྒྱལ་ཡོངས་ཡིག་ཚད་ནང་བོད་ཡིག་བརྒྱ་ཆ་མཐོ་ཤོས་སོན་མཁན་ལ་དམིགས་བསལ་གཟེངས་རྟགས་ཞིག་འབུལ་དགོས་ཀྱིན་འདུག་ཅེས་བཀོད་འདུག

༦༽ དབྱིན་ཇི་དང་རྒྱ་གར་གྱི་བྱིས་པའི་སློབ་གསོ་གློག་བརྙན་འཐུང་ངུ་ Cartoon/ Animation དག་བོད་སྐད་ནང་སྒྲ་སྦྱོར་གནང་ཐབས་སུ་ཤེས་རིག་ལས་ཁུངས་ནས་སྒྲ་སྦྱོར་ཚན་པ་ཞིག་འཛུགས་དགོས་འདུག་ཀྱིན་འདུག

༧༽ བོད་གཞུང་ཤེས་རིག་ལས་ཁུངས་ནས་ཆེད་ལས་པ་དང་། སྒྱུ་རྩལ་པ་རྣམས་གསོ་སྐྱོང་ཡག་པོ་ཡོངས་ཐབས་སུ་དེ་དག་ལ་བདག་སྐྱོང་གནང་དགོས་ཀྱིན་འདུག   དཔེར་ན། གློག་བརྙན་བཟོ་སྐྲུན་པ། པར་པ་སོགས་རེད།

༨༽ རྒྱ་གར་རྒྱལ་ཡོངས་ཀྱི་ NET ཡིག་རྒྱུགས་དེ་དག་བོད་རིགས་སློབ་ཕྲུག་ཚོས་གཏོང་ཆོག་མིན་ཐད་ཤེས་རིག་ཁུངས་ནས་བོད་ཁྱིམ་དང་གཏན་ཉིན་སློབ་གྲྭ་ཁག་གི་ནང་དུ་ལམ་སྟོན་གང་ལེགས་གནང་དགོས་འདུག

༩༽བོད་ཀྱི་མཐོ་རིམ་སློབ་གཉེར་ཁང་སོགས་ཀྱི་ནང་རིག་གནས་རབ་འབྱམས་པའི་ཆེད་ལས་སློབ་གཞི་གཏན་འབེབས་དང་། སློབ་ཚན་བྱེ་བྲག་པ་དཔེར་ན་རྩོམ་རིག་དང་ལོ་རྒྱུས་ཐོག་ཆེད་ལས་སློབ་གཉེར་བ་མང་དག་ཅིག་གསོ་སྐྱོང་བྱ་དགོས་ཀྱིན་འདུག

ཡང་ཚོགས་ཆེན་ཐོག་སྤྱི་མོས་བྱུང་བའི་བོད་མི་མང་སྤྱི་འཐུས་ལྷན་ཚོགས་ལ་དབུལ་རྒྱུའི་སྙན་ཞུའི་ནང་། གཅིག ༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གྱི་སྐུ་ཕྱྭའི་ཉེ་བསྲུང་དང་། སྐུ་ངལ་གསོལ་རྒྱུའི་དུས་ཚོད་མང་ཙམ་གནང་དགོས་ཀྱིན་འདུག

གཉིས། སྤྱི་ཚོགས་དང་མི་མང་ལ་མིག་དཔེ་བཟང་པོ་འགྱུར་ཆེད་གྲོས་ཚོགས་རཱ་བའི་ནང་དུ་སྒེར་གྱི་གནད་དོན་མི་གླེང་བར་སྤྱི་པའི་རྩ་དོན་གཙོ་གནད་འཇོག་རྒྱུར་ཐབས་ཇུས་གསར་པ་ལག་བསྟར་གནང་དགོས།

གསུམ། སློབ་གྲྭ་དང་མཐོ་སློབ་ཁག་ཏུ་ཆང་རག་དང་དུག་རྗས་རིགས་ལོངས་སུ་སྤྱོད་མཁན་ཧ་ཅང་མང་བས། དེའི་ཐོག་སྒྲིག་འཛུགས་ཀྱི་ངོས་ནས་སྲིད་ཇུས་གཏན་འབེབས་དང་། ལག་བསྟར་བྱ་དགོས་འདུག

བཞི། སློབ་གྲྭ་ཁག་གི་ནང་དུ་འཁྲིག་སྤྱོད་ཀྱི་སློབ་གསོ་དང་འབྲེལ་བའི་སྐོར་ལ་ལམ་སྟོན་གང་མང་གནང་དགོས།

ལྔ། ཆོས་རིག་ལས་ཁུངས་བརྒྱུད་ནས་བཤད་གྲྭ་ཡོད་པའི་དགོན་སྡེ་ཁག་བོད་རིགས་མཐོ་རིམ་སློབ་མའི་ཚོགས་ཆེན་ནང་མཉམ་ཞུགས་གནང་བར་འབད་སྐུལ་གནང་རོགས་ཞེས་བརྗོད་འདུག

དེ་བཞིན་བོད་ཁྱིམ་དང་མ་སུ་རི་བོད་ཁྱིམ་ལ་དབུལ་རྒྱུའི་སྙན་ཞུའི་ནང་དུ། སློབ་གྲྭ་ཁག་ཏུ་ཆང་རག་དང་དུག་རྫས་རིགས་སྤྱོད་མཁན་ཧ་ཅང་མང་པོ་ཡོད་པ་དེར་སློབ་གྲྭའི་འཛིན་སྐྱོང་ནས་སྲིད་ཇུས་གཏན་འབེབས་ཀྱིས་ལག་བསྟར་དགོས་པ་དང་། འཁྲིག་སྤྱོད་ཀྱི་སློབ་གསོ་དང་འབྲེལ་བའི་ལམ་སྟོན་གང་མང་གནང་དགོས་པ། དེ་བཞིན་ཡིག་རྒྱུགས་ཀྱི་བརྒྱ་ཆ་ལ་བརྟེན་ནས་འཛིན་གྲྭ་ཁག་ལ་དུང་དཀར་དང་འབུམ་པ། པདྨ་སོགས་ཀྱི་དབྱེ་འབྱེད་བྱས་པ་དེས་སློབ་མའི་ཤེས་སྤྱོད་སོགས་ལ་གནོད་བཞིན་ཡོད་པས་མེད་པ་བཟོས་ན་ཡག་པོ་ཡོད་པ། གཞན་ཡང། བོད་ཀྱི་མཐོ་རིམ་སློབ་གཉེར་ཁང་སོགས་ཀྱི་ནང་རིག་གནས་རབ་འབྱམས་པའི་ཆེད་ལས་བསླབ་གཞི་གཏན་འབེབས་དང་། སློབ་ཚན་བྱེ་བྲག་པ་དཔེར་ན་རྩོམ་རིག་དང་ལོ་རྒྱུས་སོགས་ཀྱི་ཐོག་ཆེད་ལས་སློབ་གཉེར་བ་མང་དག་ཅིག་གསོ་སྐྱོང་དགོས་པ་དང་། མ་སུ་རི་བོད་ཁྱིམ་ནས་ཝཱ་ཎ་མཐོ་སློབ་དང་བྷ་རཱ་ཎ་སི་གཙུག་ལག་གཙུག་ལག་སློབ་གཉེར་ཁང་སོགས་སུ་ཤེས་ཡོན་མཚམས་གཟིགས་ལོ་ལྟར་གནང་དགོས་པ་དང་། མ་སུ་རི་བོད་ཁྱིམ་ནས་སློབ་ཡོན་ཐོབ་བཞིན་པའི་སློབ་མ་རྣམས་ལ་སློབ་ཡོན་དུས་ཐོག་ཏུ་མ་རག་པའི་དབང་གིས་སློབ་མའི་སློབ་བཞུགས་བྱེད་ཕྱོགས་སོགས་ལ་དཀའ་ངལ་འཕྲད་བཞིན་ཡོད་པ་བཅས་བཀོད་འདུག

གསར་འགོད་པ། པདྨ་མཚོ།