ལྷོ་སུ་ཌན་གི་གྲངས་མང་མི་རིགས་ཌེན་ཀ་དང་ནཱིར་གྲངས་ཉུང་མི་རིགས་གཉིས་བར་གྱི་འཁྲུག་ཟིང་ཁྲོད་ཡུལ་མི་ཁྲི་ ༥༠ རྐྱེན་འདས་དང་ཡུལ་མི་ས་ཡ་ ༢.༢ ཙམ་ལ་དཀའ་རྙོག་སྣ་ཚོགས་འོག་ཡུལ་ལུང་གཞན་ནང་སྐྱབས་བཅོལ་དུ་གྱར་དགོས་བྱུང་ཡོད་འདུག
དེ་རིང་རོའུ་ཌར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ལྷག་པའི་ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་བདེ་རྩའི་ལས་ཚབ་ཁང་ཁག་གིས་ལྷོ་སུ་ཌན་རྒྱལ་ནང་དུ་འདས་པའི་ལོ་ངོ་གཉིས་རིང་གི་ནང་འཁྲུག་ཁྲོད་ཡུལ་མི་ཁྲི་ ༥༠ ཙམ་གྱི་ཚེ་སྲོག་ཤོར་ཡོད་པ་དང་། ཟླ་སྔོན་མའི་ཟླ་མགོ་ནས་བཟུང་བསྐྱར་དུ་ལྷོ་སུ་ཌན་ནང་གི་དུས་ཟིང་ཁྲོད་ཤི་རྨས་གྲངས་འབོར་མང་དུ་འགྲོ་བཞིན་ཡོད་སྐོར་བརྗོད་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་དཔོན་རིགས་ཤིག་གིས་གསར་འགོད་གསལ་བསྒྲགས་ཤིག་གི་སྟེང་། འདས་པའི་ལོ་ཤས་ནང་ལྷོ་སུ་ཌན་ནང་མི་སྟོང་ཕྲག་ལྔ་བཅུ་དམར་གསོད་དང་ཡུལ་མི་ས་ཡ་ ༢.༢ ཙམ་ལ་སྡོད་གནས་མེད་པ་དང་མུ་གེ་བྱུང་སྟེ་ཡུལ་ལུང་གཞན་ནང་ཡུལ་གྱར་གྱི་འཚོ་བ་སྐྱེལ་དགོས་བྱུང་ཡོད། ང་ཚོས་འདས་ལོའི་ཕྱི་ཟླ་ ༨ པའི་ནང་བཞག་པའི་ཞི་བདེའི་གྲོས་ཆོད་ཁག་ལག་བསྟར་བྱེད་ཀྱི་ཡོད་དམ་ཞེ་ན། ཡུལ་གནས་གང་དུའང་ཡོད་པ་མ་རེད། དུས་ཡུན་རིང་པོར་ལྷོ་སུ་ཌན་རྒྱལ་ཁབ་ཀྱི་མི་རིགས་ས་གནས་ཁག་ཏུ་དྲག་སྤྱོད་ཟིང་འཁྲུག་ཁྱབ་ཆེ་རུ་འགྲོ་བཞིན་ཡོད་སྐོར་སོགས་བརྗོད་འདུག
གནས་ཚུལ་ལྟར་ན། སུ་ཌན་ནང་གི་དུས་ཟིང་གི་འབྱུང་རྐྱེན་གཙོ་བོ་ཡུལ་ལུང་དེའི་སྲིད་འཛིན་ལས་ཐོག་སལ་བ་ཁཱེར་ (Salva Kiir) དང་བློན་ཆེན་ཟུར་བ་རིག་མ་ཆར་ (Riek Machar) གཉིས་བར་གྱི་མི་རིགས་ཀྱི་ཕྱོགས་རིས་འཐེན་འཁྱེར་ཞིག་ཡིན་པ་དང་། ཕྱི་ལོ་ ༢༠༡༣ ལོ་ནས་བཟུང་སྲིད་འཛིན་ཁཱེར་གྱི་གྲངས་མང་མི་རིགས་ཌེན་ཀ་ (Dinka) དང་བློན་ཆེན་ཟུར་བའི་ནཱིར་གྲངས་ཉུང་མི་རིགས་ (Nuer) གཉིས་བར་བསྐྱར་དུ་འཁྲུག་རྩོད་འབྱུང་མུས་ཡིན་པ་རེད། མི་རིགས་ཀྱི་ཕྱོགས་རིས་འཐེན་འཁྱེར་ལ་བརྟེན་ནས་ཕྱི་ལོ་ ༢༠༡༡ ལོ་ནས་ལྷོ་སུ་ཌན་རྒྱལ་ཁབ་ཁ་འཐོར་ཡ་བྲལ་དུ་འགྲོ་མགོ་ཚུགས་ཡོད་པ་རེད།
འདས་ལོའི་ཕྱི་ཟླ་ ༨ པའི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གཙོ་སྐྱོང་འོག ཕྱོགས་གཉིས་བར་ཞི་འགྲིག་གི་གྲོས་ཆོད་ཁག་བཞག་སྟེ་རྒྱལ་ནང་གི་དུས་ཟིང་ཞོད་འཇགས་བཟོས་ཡོད་པ་མ་ཟད། ད་ལོའི་ཕྱི་ཟླ་ ༢ པའི་ནང་འཛིན་ལས་ཐོག་སལ་བ་ཁཱེར་སྲིད་འཛིན་དང་བློན་ཆེན་ཟུར་བ་རིག་མ་ཆར་སྲིད་འཛིན་གཞོན་པར་བསྐོ་བཞག་གིས་ཕྱོགས་གཉིས་བར་གྱི་འཁྲུག་རྩོད་འདུམ་འགྲིག་བཟོས་ཡོད་ནའང་། གྲོས་ཆོད་དེ་ལ་དོན་ཕན་ཅི་ཡང་མ་བྱུང་བར། ད་ལོའི་ཕྱི་ཟླ་ ༢ ནས་བསྐྱར་དུ་འཁྲུག་ཟིང་བྱུང་སྟེ་མི་རིགས་ཕན་ཚུན་བར་དམར་གསོད་དང་བཅོམ་འཕྲོག ཡུལ་གྱར་བཅས་ཀྱི་ཛ་དྲག་གི་གནས་ཚུལ་འབྱུང་མུས་ཡིན་སྟབས། ད་ཆར་ལྷོ་སུ་ཌན་རྒྱལ་ཁབ་ཀྱི་མི་རིགས་ས་གནས་ཁག་ ༦ ནང་མཉམ་འབྲེལ་རྒྱལ་ཚོགས་ཀྱི་ཞི་བདེ་སྲུང་དམག་ (peacekeepers) འབུམ་ ༢༠༠ ཙམ་ཆེད་གཏོང་བྱས་ཡོད་འདུག
གསར་འགོད་པ། པདྨ་རྒྱལ།
