པེ་ཅིན་གྲོང་ཁྱེར་གྱི་གནམ་ས་གཉིས་སུ་དམག་དཔུང་གིས་ལྟ་སྲུང་བྱས་ཏེ་རྒྱ་ནག་རྒྱལ་ཡོངས་དམངས་ཆེན་དང་སྲིད་གྲོས་སྐབས་ ༡༢ པའི་ཚོགས་ཆེན་ཐེངས་ ༤ པ་ཚོགས་ཀྱི་འདུག
དེ་རིང་སྔ་དྲོར་རྒྱ་ནག་རྒྱལ་ཡོངས་སྲིད་གྲོས་སྐབས་ ༡༢ པའི་ཚོགས་ཆེན་ཐེངས་ ༤ པ་པེ་ཅིན་དུ་འཚོགས་མགོ་བརྩམས་ཡོད་པ་དང་། གནངས་ཉིན་རྒྱལ་ཡོངས་དམངས་ཆེན་སྐབས་ ༡༢ པའི་ཚོགས་ཆེན་ཐེངས་ ༤ པ་མགོ་འཛུགས་རྒྱུ་ཡིན་སྟབས། ཕྱི་ཟླ་ ༢ ཚེས་ ༢༩ ཉིན་ནས་བཟུང་༼རྒྱལ་སའི་གསོལ་མགྲོན་ཁང་ཆེན་མོའི་༽ནང་ཕྱོགས་ཡོང་གི་ཚོགས་བཅར་བར་སྣེ་ལེན་བྱེད་མགོ་བརྩམས་པ་དང་བསྟུན། པེ་ཅིན་གྲོང་ཁྱེར་གྱི་གནམ་ས་གཉིས་སུ་དྲག་ཆས་སྤྲས་པའི་དམག་མི་མང་པོས་ཆུ་ཚོད་ ༢༤ རིང་ལྟ་སྲུང་བྱས་ཏེ། སྔར་ལས་དམ་དྲག་ཞིབ་བཤེར་ཤུགས་ཆེན་བྱེད་བཞིན་ཡོད་པ་མ་ཟད། ཚོགས་ཆེན་གྱི་ཉིན་གྲངས་ ༡༠ རིང་པེ་ཅིན་གྲོང་ཁྱེར་ནང་ཐ་ན་སློབ་གསོ་དང་རོལ་དབྱངས། ཁྱབ་བསྒྲགས་རང་བཞིན་གྱི་ལས་འགུལ་རིགས་གཅིག་ཀྱང་སྤེལ་མི་ཆོག་པ་དང་། གལ་སྲིད་ཁྲིམས་འགལ་གྱི་བྱ་སྤྱོད་རིགས་བྱུང་ཚེ་ཐག་གཅོད་ནན་པོ་བྱ་རྒྱུ་ཡིན་ལུགས་བསྒྲགས་འདུག
འདས་ལོའི་ལོ་མཇུག་ནས་བཟུང་པེ་ཅིན་གྱི་མཁའ་དབུགས་ལ་འབག་བཙོག་ཚབས་ཆེན་གྱི་སྣང་ཚུལ་བསྟུན་མར་བྱུང་ཡོད་པ་ལྟར། ཁ་སང་སྔ་དྲོ་ནས་པེ་ཅིན་གྱི་མཁའ་དབུགས་འབག་བཙོག་ཚབས་ཆེན་ཡིན་པའི་ཉེན་བརྡ་སེར་པོ་བཏང་སྟེ། སློབ་གྲྭ་ཆུང་འབྲིང་དང་བྱིས་གཉོར་ཁང་སོགས་སྒོ་བརྒྱབ་ཡོད་པ་མ་ཟད། འབག་བཙོག་གི་སྣང་ཚུལ་དེ་བསྟུན་མར་ཉིན་གཉིས་རིང་འབྱུང་རྒྱུ་ཡིན་སྐོར་བསྒྲགས་ཡོད་སྟབས། སྤྱི་ཚོགས་དྲ་ལམ་ཁག་ནས་པེ་ཅིན་གྱི་དུད་སྨུག་གིས་ཕྱོགས་ཡོང་གི་འཐུས་མི་ཚོར་དགའ་བསུ་བྱེད་བཞིན་ཡོད་ལ། དུད་སྨུག་དེ་རྒྱ་གཞུང་གིས་འཐུས་མི་ཚོར་སྤྲད་པའི་ལེགས་སྐྱེས་ཀྱང་ཡིན་པས། འཐུས་མི་རྣམས་ཡོང་སྐབས་ཏག་ཏག་ཅིག་ཏུ་ཁེལ་ཡོད་སྐོར་རྗོད་ཀྱི་འདུག་ལ། བརྒྱུད་ལམ་ཁག་ནས་ཐེངས་འདིའི་ཚོགས་ཆེན་གཉིས་ཀྱི་སྟེང་ལོ་ལྔའི་འཆར་གཞི་བཅུ་གསུམ་པར་གྲོས་བསྡུར་དང་སྔོན་རྩིས་གཏན་འབེབས་སོགས་ཀྱི་ལས་རིམ་ཁྲོད། པེ་ཅིན་དང་ཐན་ཅིན། ཐང་ཧྲན་སོགས་ཀྱི་མཁའ་དབུགས་འབག་བཙོག་གི་གནད་དོན་དེ་གླེང་གཞི་གཙོ་བོ་ཞིག་ཏུ་ཆགས་རྒྱུར་དོ་སྣང་ཆེན་པོ་བྱེད་ཀྱིན་ཡོད་པ་རེད།
ཁ་སང་ཕྱི་དྲོར་པེ་ཅིན་དུ་བསྡུས་པའི་སྲིད་གྲོས་ཀྱི་གསར་འགོད་ལྷན་ཚོགས་ཐོག རྒྱ་ནག་གི་གསར་འགོད་མགྲིན་ཚབ་པ་ཝང་གོ་ཆིན་གྱིས་གསར་འགོད་པས་ཚོར་བ་རྣོ་བའི་གནད་དོན་གླེང་བར་སྐྲག་རྒྱུ་མེད་ལ། ག་ཚོད་ཚོར་བ་རྣོ་བའི་གནད་དོན་ཞིག་ཡིན་ནའང་ཐབས་ཤེས་གཏང་ནས་གསལ་པོ་བཤད་རྒྱུ་ཡིན། རྒྱལ་ཁབ་ཀྱི་བདེ་འཇགས་དང་སྤྱི་ཡོངས་ལ་གནོད་པ་མེད་ཚེ། གནད་དོན་ཁ་ཤས་ག་རེ་བྱས་ནས་བཤད་མི་ཆོག་པ་རེད། ཅེས་བརྗོད་ཡོད་པ་དེས། བརྒྱུད་ལམ་ཁག་ཏུ་ཚོར་བ་རྣོ་བའི་གནད་དོན་སྣ་ཚོགས་ཀྱི་གླེང་གཞི་བསླངས་ཡོད་པའི་ཁྲོད། སྲིད་འཛིན་ཟུར་པ་ཅང་ཙེ་མིན་གྱིས་མིང་བཏགས་ཤིང་། གཤམ་དུ་༼ཅང་ཙེ་མིན༽ཞེས་མིང་ཡིག་བྲིས་པའི་ཧྥུའུ་ཅན་གྱི་ཟམ་ཆེན་ཞིག་གི་མིང་བྱང་རྡོ་རིང་ལ་ཕྱི་ཟླ་ ༢ ཚེས་ ༢༩ ཉིན་གློ་བུར་དུ་གཏོར་བཤིག་ཐེབས་ཡོད་པ་དང་། རྒྱ་ནག་དྲིལ་བསྒྲགས་ཁང་གིས་གནས་ཚུལ་དེའི་སྐོར་མང་པོ་གླེང་སློང་བྱེད་མི་ཆོག་ལ། ལྷག་པར་དུ་ཆབ་སྲིད་དང་འབྲེལ་བའི་དཀྲོག་གཏམ་རིགས་སྤེལ་མི་ཆོག་ཅེས་བཀའ་རྒྱ་བཏང་ཡོད་འདུག
ཨ་རིའི་ནང་ཡོད་པའི་སྤྱི་མང་ནུས་ཤུགས་གོང་སྤེལ་ཚོགས་པ་གསར་འཛུགས་མཁན་རྒྱ་རིགས་འབུམ་རམས་པ་སྐུ་ཞབས་ཡཱང་ཅན་ལི་ལགས་ཀྱིས། ཆོས་འཁོར་རྩ་རླུང་ནི་རྒྱ་གཞུང་གི་གནོད་འཚེ་ཐེབས་ས་ཆེས་ཚབས་ཆེ་ཤོས་ཤིག་ཡིན་ཡང་། ད་ལྟའི་བར་ཚོར་བ་རྣོ་ཤོས་ཀྱི་གནད་དོན་ཞིག་ཏུ་གྱུར་ཏེ་དྲང་བདེན་གྱི་ཐག་གཅོད་ཅིག་གཏན་ནས་བྱུང་མེད་སྟབས། རྒྱ་ནག་མི་མང་ཁྲི་ ༢༠ ལྷག་གིས་ཆོས་འཁོར་རྩ་རླུང་སྒོམ་སྒྲུབ་པ་ཚོར་དྲག་གནོན་དམར་གསོད་གཏོང་མཁན་སྲིད་ཟུར་ཅང་ཙེ་མིན་གྱི་ནག་ཉེས་ཞུ་གཏུག་བྱས་ཡོད་པ་དང་། སྲིད་འཛིན་ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་སྲིད་བྱུས་དེ་དངོས་གནས་ཁ་ཞེ་གཉིས་མེད་ཡིན་ཚེ། ཅང་ཙེ་མིན་ཁྱིམ་ཚང་ནི་ལྐོག་ཟ་རུལ་སུངས་བྱས་པ་ཚབས་ཆེ་ཤོས་ཀྱི་ཁྱིམ་ཚང་གཅིག་པུ་དེ་ཡིན་སྟབས། གདམ་ག་རང་བཞིན་ཅན་གྱི་རྒོལ་རྡུང་ཙམ་མིན་པར་ཅང་ཙེ་མིན་ལ་ཁྲིམས་བཤེར་ཐག་གཅོད་བྱ་རྒྱུ་ངེས་པར་དུ་ལག་བསྟར་བྱེད་དགོས་སྐོར་བརྗོད་འདུག
ཆབ་སྲིད་དཔྱད་ཞིབ་པ་ཚོས། འདས་པའི་ལོ་ ༣ ཙམ་གྱི་རིང་ཞི་ཅིན་ཕིན་གྱིས་རྒྱ་ནག་དམར་ཤོག་ཚོགས་པའི་འབྲེལ་ཡོད་མགོ་ཁྲིད་ཚོགས་ཆུང་ཁག་གི་དབང་ཆ་གཅིག་ཏུ་བསྡུས་ཏེ། ཏང་ནང་ཁུལ་གྱི་ཁོ་རང་གི་དབང་ཤུགས་བརྟན་པོ་བཟོས་ཡོད་པ་མ་ཟད། དམག་སྡེའི་སྒྲིག་བཀོད་བཅོས་བསྒྱུར་བྱས་ཏེ་དམག་ཁུལ་གྱི་མགོ་ཁྲིད་ནུས་པ་ཤུགས་སྣོན་བྱས་ཡོད་པ་དང་། ཉེ་སྔོན་ནས་དྲིལ་བསྒྲགས་སྒྲིག་སྲོལ་བཅོས་བསྒྱུར་བྱས་ནས་སྟངས་འཛིན་དོ་དམ་བྱས་ཡོད་པ་སོགས་ནི། ཞི་ཅིན་ཕིན་ཁོ་རང་དབང་ཤུགས་ཀྱི་ལྟེ་བར་འགྱུར་ཐབས་ཁོ་ན་ཡིན་ལ། ཁོའི་རྨི་ལམ་དེ་ཐེངས་འདིའི་ཚོགས་ཆེན་ཐོག་མངོན་འགྱུར་བྱུང་མ་ཐུབ་པ་ཡིན་ནའང་། ཕྱི་ལོ་ ༢༠༡༧ ལོར་འཚོགས་འཆར་ཡོད་པའི་ཏང་གི་ཚོགས་ཆེན་ ༡༩ པའི་ཐོག་ཏན་ཏན་མངོན་འགྱུར་འབྱུང་རྒྱུ་ཡིན་སྐོར་རྗོད་ཀྱི་འདུག
གསར་འགོད་པ། པདྨ་མཚོ།