ཨོ་སི་ཊོ་ལི་ཡའི་ནང་གི་བོད་པའི་ཆབ་སྲིད་བཙོན་ཟུར་དང་ལས་འགུལ་བ་སྐོར་ཞིག་གིས་ཉེ་ལམ་ཨོ་སི་ཊོ་ལི་ཡའི་གྲོས་ཚོགས་གོང་འོག་སོགས་སུ་བོད་དོན་ཞུ་གཏུག་གི་ལས་འགུལ་ཞིག་སྤེལ་འདུག
ཨོ་སི་ཊོ་ལི་ཡའི་བོད་དོན་ལས་འགུལ་ལྷན་ཁང་གིས་གོ་སྒྲིག་འོག ཕྱི་ལོ་ ༢༠༡༦ ཟླ་ ༢ ཚེས་ ༢༨ ནས་ཕྱི་ཟླ་ ༣ ཚེས་ ༡ ཉིན་བར་ཨོ་སི་ཊོ་ལི་ཡའི་རྒྱལ་ས་ཁམ་བྷེ་ར་ནས་གཞུང་གི་ཕྱི་སྲིད་ལྷན་ཁང་གི་རྒྱ་ནག་གི་འགྲོ་བ་མིའི་ཐོབ་ཐང་ཞིབ་འཇུག་སྡེ་དང་གྲོས་ཚོགས་གོང་འོག་གཉིས་དང་ལྗང་ཁུ་ཚོགས་པ་བཅས་གཞུང་གི་གནད་ཡོད་མི་སྣ་ ༤ དང་གྲོས་ཚོགས་འཐུས་མི་ ༣༢ ལ་མཇལ་འཕྲད་ཀྱིས་བོད་ནང་གི་ཛ་དྲག་གནས་སྟངས་དང་བོད་ཀྱི་ཁོར་ཡུག་གི་གནས་བབ་སོགས་ཀྱི་ཐད་ནས་བོད་དོན་ཞུ་གཏུགས་ལས་འགུལ་ཐེངས་ལྔ་པ་དེ་སྤེལ་ཡོད་འདུག
ཐེངས་འདིའི་ཞུ་གཏུགས་ལས་འགུལ་ནང་མཉམ་ཞུགས་བྱེད་མཁན་ཨོ་སི་ཊོ་ལི་ཡའི་གྲོང་ཁྱེར་ཁག་དྲུག་ནས་བོད་དོན་ལ་དམིགས་བསལ་དོ་སྣང་ཡོད་པའི་གཞོན་སྐྱེས་ཤེས་ཡོན་ཅན་དང་ལས་འགུལ་བ། བོད་རིགས་མཐུན་ཚོགས་ཁག་གི་ཚོགས་གཙོ་བཅས་ཁྱོན་མི་ ༦ མཉམ་ཞུགས་བྱས་ཡོད་པ་དང་། ཨོ་སི་ཊོ་ལི་ཡའི་བོད་དོན་ལས་འགུལ་ཁང་གི་ལས་འགུལ་འཛིན་གདོང་འདུས་སྐྱིད་འཛོམས་ལགས་ཀྱིས། རྒྱ་ནག་གཞུང་གིས་ག་དུས་ཡིན་ནའང་ཨོ་སི་ཊོ་ལི་ཡའི་གཞུང་དང་གྲོས་ཚོགས་གོང་འོག་གི་འཐུས་མི་ཚོར་དངོས་ཤུགས་བརྒྱུད་གསུམ་ནས་འགྲོ་སོང་ཆེན་པོ་བཏང་ནས་བོད་ཀྱི་གནད་དོན་ཐད་ལ་འཁྱོག་བཤད་རྐྱང་རྐྱང་བྱེད་བཞིན་ཡོད་སྟབས། ཨོ་སི་ཊོ་ལི་ཡར་གནས་སྡོད་བོད་མི་མང་ཆེས་ཤོས་ནི་ཆབ་སྲིད་བཙོན་ཟུར་རེད། གྱི་རྒྱ་གཞུང་གི་སྲིད་བྱུས་ལ་ལུས་སེམས་གཉིས་ཀའི་ཐོག་ནས་ཉམས་མྱོང་ཆ་ཚང་བསགས་ཡོད་སྟབས། བོད་ནང་གི་གནས་བབ་ག་འདྲ་ཞིག་ཡིན་པ་དངོས་ཡོད་ཀྱི་ཐོག་ནས་ཁུངས་སྐྱེལ་ཐུབ་ཀྱི་ཡོད། དེ་ལ་ཨོ་སི་ཊོ་ལི་ཡའི་གཞུང་དང་གྲོས་ཚོགས་འཐུས་མི་ཚོས་ཀྱང་བོད་ནང་གི་གནས་སྟངས་ངོ་མ་ཤེས་རྟོགས་ཐུབ་ཀྱི་ཡོད་པ་རེད། དཔེར་ན། ཞུ་གཏུགས་མགོ་བཙུགས་ནས་ད་ལྟའི་བར་བོད་ཀྱི་གནད་དོན་སྐོར་ལ་ཚོགས་འདུ་ ༢༠༠ ལྷག་ཅིག་འཚོགས་ཐུབ་ཡོད་པ་རེད། གྲོས་ཚོགས་གོང་འོག་དང་ལྗང་ཁུ་ཚོགས་པ་སོགས་ཀྱི་ནང་དུ་བོད་དོན་གླེང་སློང་ཤུགས་ཆེ་རུ་འགྲོ་བཞིན་ཡོད་པ་རེད། ཅེས་བརྗོད་སོང་།
ཨོ་སི་ཊོ་ལི་ཡའི་བོད་ཀྱི་སྐུ་ཚབ་དོན་གཅོད་ལྷག་པ་མཚོ་སྒོ་ལགས་སུ་ཞུ་གཏུགས་ལས་འགུལ་འདི་ལ་ཕན་ནུས་ག་འདྲ་ཡོད་མེད་བཀའ་འདྲི་ཞུས་སྐབས་ཁོང་གིས་གསུངས་དོན། གོ་སྒྲིག་གནང་མཁན་ན་ཆ་མཚོན་ན། བོད་དོན་རྒྱབ་སྐྱོར་བ་ཤུགས་ཆེ་ཤོས་དང་རྒྱུན་རིང་ཤོས་ཡིན་པའི་ཆ་ནས་ཁོང་ཚོའི་བོད་དོན་ལ་རྒྱབ་སྐྱོར་གྱིས་ཕྱག་ལས་གནང་དང་གནང་བཞིན་པར་བསྔགས་བརྗོད་ཡོད། མ་ཟད་བོད་དོན་ཞུ་གཏུགས་ལས་འགུལ་འདི་རྒྱུན་མཐུད་ནས་ཨོ་སི་ཊོ་ལི་ཡའི་གཞུང་དང་གྲོས་ཚོགས་ནང་ཆབ་སྲིད་བཙོན་ཟུར་རྣམས་ཀྱི་ཉམས་མྱོང་དང་ལོ་རྒྱུས་ཀྱིས་བོད་ཀྱི་གནས་བབ་དངོས་གནས་དེ་རྒྱུ་མཚན་ཁུངས་ལུང་ལྡན་པའི་ཐོག་ནས་འགྲེལ་བརྗོད་གནང་སའི་སྡིངས་ཆ་ཞིག་བསྐྲུན་པ་དེས་བོད་ཀྱི་ཛ་དྲག་གི་གནས་སྟངས་དེ་གསལ་བོ་བཟོ་བྱེད་ཀྱི་ཐབས་ལམ་ཡག་ཤོས་ཤིག་ཡིན་སྟབས། མུ་མཐུད་ནས་མཇུག་སྐྱོང་གནང་དགོས་པ་གལ་ཆེན་པོ་ཡིན་སྐོར་གསུངས་སོང་།
གཞན་ཡང་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་བློ་བཟང་ལུང་རྟོགས་ལགས་ཀྱིས་ཞུ་གཏུགས་ལས་འགུལ་འདི་ལ་གཟིགས་ཚུལ་གསུངས་དོན། བོད་དོན་ཞུ་གཏུག་ལས་འགུལ་འདི་ཧ་ཅང་གནད་དུ་འཁེལ་བའི་ལས་འགུལ་ཡག་ཤོས་ཤིག་ལ་མཐོང་གི་ཡོད། རྒྱལ་ཡོངས་བོད་རིགས་མཐུན་ཚོགས་ཀྱི་ངོས་ནས་ཞུ་གཏུགས་ལས་འགུལ་གལ་ཆེན་པོ་བརྩི་ཡི་ཡོད། ལྷག་པར་དུ་ཆབ་སྲིད་བཙོན་ཟུར་རྣམས་ཀྱིས་བོད་ནང་གི་དཀའ་ངལ་ངོ་མ་དེ་ཉམས་མྱོང་གི་ཐོག་ནས་གྲོས་ཚོགས་འཐུས་མི་ཚོར་ངོ་སྤྲོད་བྱེད་ཡོང་དུས། རྒྱ་གཞུང་གི་བོད་ཐོག་འཛིན་བཞིན་པའི་སྲིད་བྱུས་ཀྱི་གདོང་རིས་ངོ་མ་དེ་གསལ་སྟོན་བྱེད་ཐུབ་པས་ན། མ་འོངས་པ་ན་ལས་འགུལ་འདིའི་ཚགས་ཇེ་ཚུད་དུ་གཏོང་དགོས་པ་གལ་ཆེན་པོ་མཐོང་གི་ཡོད། ཅེས་བརྗོད་སོང་།
ཕྱི་ཟླ་ ༢ ཚེས་ ༢༨ དང་ ༢༩ སོ་སོར་གྲོས་ཚོགས་གོང་འོག་གཉིས་ཀའི་ནང་བོད་ཀྱི་ཁོར་ཡུག་གི་གནས་བབ་སྐོར་ནས་གྲོས་ཚོགས་འཐུས་མི་ ༦ གིས་གླེང་སློང་ཤུགས་ཆེན་པོ་གནང་སྟེ་བོད་ཀྱི་ཁོར་ཡུག་གིས་མཚོན་པའི་བོད་ཀྱི་གནད་དོན་ལ་རྒྱབ་སྐྱོར་ཆེན་པོ་ཡོད་པའི་རྣམ་འགྱུར་བསྟན་པ་མ་ཟད། ཕྱི་ཟླ་ ༣ ཚེས་ ༡ ཉིན་གྱི་ཞོགས་པར་ཨོ་སི་ཊོ་ལི་ཡའི་ཕྱི་སྲིད་ལྷན་ཁང་གི་རྒྱ་ནག་འགྲོ་བ་མིའི་ཐོབ་ཐང་ཉམས་ཞིབ་སྡེ་ཚན་འགན་འཛིན་སྐུ་ཞབས་བྷོ་ཁྲོན་(Broughton Robertson)སོགས་དཔོན་པོ་མཐོ་ཤོས་ ༤ ལ་ཆབ་སྲིད་བཙོན་ཟུར་བློ་བཟང་ལུང་རྟོགས་དང་ཚེ་རིང་རྡོ་རྗེ། དོན་གྲུབ་ཚེ་རིང་དང་རྨེའུ་དཀོན་རྒྱམ་བཅས་ཀྱི་སོ་སོའི་མྱོང་བ་རྣམས་གཞིར་བཞག་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་དང་ཆབ་སྲིད་བཙོན་པའི་དཀའ་ངལ། རྒྱ་གཞུང་གི་ཁྲིམས་དང་ལག་ལེན་གཉིས་ཀྱི་བར་ལ་འགལ་ཟླ་ཆེན་པོ་ཡོད་པའི་སྐོར་ནས་འགྲེལ་བརྗོད་བྱེད་སྐབས་སུ། སྐུ་ཞབས་བྷོ་ཁྲོན་ལགས་ཀྱིས་བོད་ནང་གི་འགྲོ་བ་མིའི་ཐོབ་ཐང་ཡར་རྒྱས་གཏོང་ཕྱོགས་སུ་རྒྱ་གཞུང་ལ་འབོད་སྐུལ་དང་ཉམས་ཞིབ་སྔར་ལས་ལྷག་པར་བྱེད་རྒྱུ་མ་ཟད། གདུང་སེམས་མཉམ་བསྐྱེད་ཡོད་སྐོར་བརྗོད་སོང་།
ཡང་ཉིན་དེའི་དགོང་མོར་བོད་དོན་ལ་རྒྱབ་སྐྱོར་མཐའ་གཅིག་ཏུ་གནང་མཁན་གྲོས་ཚོགས་གོང་མའི་འཐུས་མི་ལྕམ་ལེ་ས་(Senator Lisa Singh)ལགས་ཀྱིས་གྲོས་ཚོགས་ནང་ང་དེ་རིང་བོད་ཀྱི་ཆབ་སྲིད་བཙོན་ཟུར་དང་གཞོན་སྐྱེས་ལས་འགུལ་བ། བོད་རིགས་མཐུན་ཚོགས་ཁག་གི་མགོ་ཁྲིད་སོགས་ལ་མཇལ་འཕྲད་བྱས་ཏེ་བོད་ནང་གི་འགྲོ་བ་མིའི་ཐོབ་ཐང་དང་བོད་ཀྱི་ཁོར་ཡུག ཆབ་སྲིད་བཙོན་པའི་གནས་བབ་སྐོར་ནས་གྲོས་བསྡུར་བྱས་པ་ཡིན། སྐབས་དེར་ཁོང་ཚོའི་མྱོང་བ་དང་འབོད་སྒྲ་སོགས་གསལ་བོ་ཤེས་རྟོགས་ཐུབ་ཀྱི་འདུག་པས། ཨོ་སི་ཊོ་ལི་ཡའི་གཞུང་དང་གྲོས་ཚོགས་འཐུས་མི་རྣམས་ཀྱིས་བོད་མིའི་དྲང་བདེན་དང་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གྲུབ་འབྲས་ལྡན་པ་ཞིག་གནང་རོགས་ཞེས་འབོད་སྐུལ་ཡང་ཞུས་ཡོད་འདུག རྨེའུ་དཀོན་རྒྱམ་ལགས་ཀྱིས་གནས་ཚུལ་བཏང་འབྱོར་བྱུང་།
