དེ་རིང་སྔ་དྲོར་གཞོན་ལྷན་གྱི་གོ་སྒྲིག་འོག་ལྷ་རྒྱ་རིར་བོད་གཞུང་མང་གཉིས་མཉམ་འཛོམས་ཐོག་རྒྱལ་གཅེས་དཔའ་བོ་རྡོ་རྗེ་ཚེ་རིང་ལགས་སུ་གུས་འདུད་མྱ་ངན་དང་བཅས་་སྐུ་ཕུང་ཞུགས་འབུལ་གནང་སོང་།
དེ་རིང་ཞོགས་པའི་ཆུ་ཚོད་ ༨།༣༠ སྟེང་རྒྱལ་གཅེས་དཔའ་བོ་རྡོ་རྗེ་ཚེ་རིང་ལགས་ཀྱི་སྐུ་ཕུང་དྷ་སའི་སེར་སྐྱ་མི་མང་གི་ཕེབས་བསུ་འོག་ལྷ་རྒྱ་རིར་གདན་འདྲེན་ཞུས་པ་དང་། ཆུ་ཚོད་ ༩ སྟེང་བོད་གཞུང་མང་སེར་སྐྱ་མང་ཚོགས་ ༤༠༠ ཙམ་ལྷན་འཛོམས་ཀྱིས་བོད་རྒྱལ་ཁབ་ཀྱི་རྩ་དོན་ཆེད་དུ་སྐུ་ལུས་མེར་བསྲེགས་གནང་མཁན་རྡོ་རྗེ་ཚེ་རིང་ལགས་སུ་མྱ་ངན་གུས་འདུད་ཞུ་བའི་མཛད་མཛད་སྒོ་ཚོགས་རྗེས། ཆུ་ཚོད་ ༡༠།༡༥ ཡས་མས་སུ་རྒྱལ་གཅེས་དཔའ་བོ་ཁོང་གི་སྐུ་ཕུང་ཞུགས་འབུལ་གནང་སོང་།
མྱ་ངན་གུས་འདུད་མཛད་སྒོའི་ཐོག་གཞོན་ལྷན་དབུས་རྒྱུན་ཚོགས་གཞོན་རྟ་མགྲིན་སྲིད་གཅོད་ལགས་ཀྱིས། ཕྱི་ལོ་ ༡༩༤༩ ལོར་རྒྱ་ནག་གིས་བོད་བཙན་བཟུང་བྱས་ནས་ད་ལྟའི་བར་དུ་རྒྱལ་གཅེས་དཔའ་བོ་རྡོ་རྗེ་ཚེ་རིང་ལགས་ལྟ་བུའི་རྒྱལ་གཅེས་དཔའ་བོ་དཔའ་མོ་བརྒྱ་ཕྲག་མང་པོ་བྱུང་ཡོད་པ་རེད། ༡༩༨༩ ལོའི་ཕྱི་ཟླ་ ༤ བར་གཞོན་ལྷན་གྱི་སྒྲིག་འཛུགས་འོག་རྒྱ་གར་རྒྱལ་ས་ལྡི་ལིར་བོད་ཞི་བའི་ངོ་རྒོལ་ལས་འགུལ་སྐབས་སུ། བོད་རྒྱལ་ཁབ་དང་མི་རིགས་ཀྱི་ཆེད་དུ་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་མཆོག་གིས་སྐུ་ལུས་མེར་བསྲེགས་གནང་བ་ནས་བཟུང་ད་ལྟའི་བར་དུ་བོད་ཕྱི་ནང་གཉིས་སུ་རྒྱལ་གཅེས་དཔའ་བོ་དཔའ་མོ་ ༡༥༠ ལྷག་ཅིག་གིས་སྐུ་ལུས་མེར་བསྲེགས་གནང་ཡོད་པ་དང་། བཙན་བྱོལ་ནང་ལོགས་སུ་བོད་རྒྱལ་ཁབ་དང་མི་རིགས་ཀྱི་ཆེད་དུ་སྐུ་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་ཚོའི་གྲས་ནས་དེ་རིང་འདིར་ང་ཚོའི་མིག་མདུན་དུ་ཡོད་པའི་རྒྱལ་གཅེས་དཔའ་བོ་རྡོ་རྗེ་ཚེ་རིང་ལགས་ལོ་ན་ཆུང་ཤོས་དེ་ཆགས་ཀྱི་ཡོད་པ་དང་། དེ་བཞིན་བོད་ནང་ལོགས་སུ་ཉི་མ་དེ་རང་དུ་རྒྱལ་གཅེས་དཔའ་བོ་སྐལ་བཟང་དབང་འདུས་ལགས་ཀྱིས་སྐུ་ལུས་མེར་བསྲེགས་གནང་ཡོད་པ་རེད། ཁོང་རྣམ་པ་གཉིས་ཟླ་གཅིག་ཉིན་གཅིག་ལ་བོད་རང་དབང་རང་བཙན་སླར་གསོ་དང་བོད་རྒྱལ་ཁབ་རང་བཙན་ཡིན་པའི་འབོད་སྐུལ་ཐོག་ནས་སོ་སོའི་གཅེས་སྲོག་ཕུལ་ཡོད་སྟབས། ང་ཚོས་འདིར་བོད་ཕྱི་ནང་གཉིས་ཀྱི་བོད་མི་ས་ཡ་དྲུག་གི་ཚབ་བྱས་ཏེ་བོད་རྒྱལ་ཁབ་ཀྱི་ཆེད་དུ་སྐུ་སྲོག་བློས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་པར་གུས་འདུལ་མྱ་ངན་ཞུ་རྒྱུ་དང་། ལྷག་པར་དུ་ཁོང་རྣམ་པའི་ནང་མི་ཡོངས་ལ་གདུང་སེམས་མཉམ་སྐྱེད་ཞུ་རྒྱུ་ཡིན། ཞེས་བརྗོད་སོང་།
དེའི་རྗེས་རྡོ་རྗེ་ཚེ་རིང་ལགས་ཀྱི་ཕ་ཐུབ་བསྟན་ལགས་ནས། བུ་རྡོ་རྗེ་ཚེ་རིང་གིས་བོད་ཕྱི་ནང་གཉིས་སུ་ད་ལྟའི་བར་བོད་མི་ ༡༥༠ ལྷག་གིས་སྐུ་ལུས་མེར་བསྲེགས་བཏང་ཡང་འགུལ་ཀྱོག་རྩ་བ་ནས་ཐེབས་མ་སོང་། དེ་རིང་ལོ་ ༡༦ ཅན་ཞིག་གིས་སྐུ་ལུས་མེར་བསྲེགས་བཏང་བ་ཡིན་ན། འཛམ་བུ་གླིང་དུ་བོད་དོན་ལ་དོ་སྣང་ཡོང་ཐབས་སུ་འགྱུར་ཞིག་ཐེབས་མི་ཡོང་ངམ་སྙམ་ཞེས་སོགས་གསལ་བོར་བརྗོད་ཡོད་སྐོར་དང་། ཡང་ཁོང་གིས་བོད་གཞུང་མང་གཉིས་ནས་ཁོང་དང་ཁོང་གི་ནང་མི་ཡོངས་ལ་གདུང་སེམས་མཉམ་སྐྱེད་ཀྱི་ཕྱག་རོགས་ཧ་ཅང་ཡག་པོ་གནང་བར་དགའ་བོ་བྱུང་། ཞེས་གསུངས་སོང་།
གསར་འགོད་པ། པདྨ་རྒྱལ།
ད་ཆ་བོད་གཞུང་ནས་མ་འོངས་སྲིད་སྐྱོང་གི་འགྲན་རྩོད་ནང་ཞུགས་བཞིན་པའི་སྐབས་འདིར་བོད་ཕྱི་ནང་ས་གནས་གཉིས་ནས་བོད་ཀྱི་ན་གཞོན་གཉིས་ཀྱིས་རང་སྲོག་བློས་གཏོང་སོང་། དེ་ནས་ང་ཚོའི་སྲིད་སྐྱོང་བློ་བཟང་སེང་གེ་ཡིས་རང་ཉིད༢༠༡༦ ལོར་སྲིད་སྐྱོང་འོས་འདེམས་བྱེད་པར་ཆེད་དུ་དམངས་ཚོགས་དང་མཉམ་དུ་གླུ་གཞིས་ལེན་འདུག དེ་མཐོང་པ་ན་ཡིད་སེམས་སྐྱོ་སོང་། དུས་འདི་འདྲ་ཞིག་ལ་ཁོའི་བྱ་བ་འདི་འདྲ་བྱས བོད་མིའི་སྐྱིད་སྡུག་མ་ཤེས་ནི་རེད འདི་འདྲའི་སྲིད་སྐྱོང་མེད་ན་བཟང་། བོད་ལ་དགོས་པའི་སྲིད་སྐྱོང་ཁོ་བོ་མིན།
བློ་སེང་ལྟ་བུ་མི་འདི་དག་གིས་གོང་ས་མཆོག་ལ་བཀོལ་སྤྱོད་བྱེད་ནས་དམངས་ཚོགས་ལ་མགོ་སྐོར་བྱས། དེ་རིང་ས་འདི་ནས་བོད་མིའི་སྐྱིད་སྡུག་བཤད་བཞིན།སངས་ཉིན་ས་ཕ་རོལ་ན་གླུ་གཞིས་ལེན་བཞིན་འདུག འདི་འདྲའི་མི་ཞིག་ལ་སྐྲག་སྣང་སྐྱེས།
http://www.khabdha.org/?p=81029 ནས་བཤུས།