དམངས་ཆེན་ཚོགས་འདུའི་སྟེང་རྒྱལ་དོན་ཇི་ལྟར་སྒྲུབ་ཀྱི་ཡོད་དམ།

རྩོམ་མཁན་ཨོ་སི་ཊེན་རམ་ཙེ། (Austin Ramzy) པདྨ་རྒྱལ་གྱིས་སྒྲིག་བསྒྱུར་བྱས།

_____རེས་གཟའ་སྤེན་པའི་ཉིན་ཚུགས་པའི་རྒྱ་ནག་རྒྱལ་ཡོངས་དམངས་ཆེན་ཚོགས་འདུའི་སྐོར་ནས་ཁྱེད་རང་གིས་ངེས་དགོས་པའི་དོགས་འདྲི་ཁག་བཞི།

དོན་དངོས་སུ་རྒྱ་ནག་རྒྱལ་ཡོངས་དམངས་ཆེན་ཚོགས་འདུ་ལ་ (N.P.C) དབང་ཆ་ཞིག་ཡོད་དམ།

དམངས་ཆེན་ཚོགས་འདུ་ལ་དབང་ཆ་ཡོད་པ་རེད། འོན་ཀྱང་དབང་ཆ་ཆེན་པོ་ཡོད་པ་མ་རེད། འཐུས་ཚབ་ ༣༠༠༠ ལྷག་ལས་མང་ཆེ་བ་དཔོན་རིགས་དང་དམར་ཤོག་ཚོགས་མི་ཡིན་ཞིང་། ཁོ་ཚོས་གོ་དབང་རྩོད་ལེན་ཐུབ་པ་མ་རེད། ཕུགས་དོན་ནི་རྒྱ་ནག་གི་སྲིད་དབང་དེ་དམར་ཤོག་ཚོགས་པའི་ལག་ཏུ་ཡོད་པ་དང་། སྲིད་འཛིན་ཞི་ཅིན་ཕིན་གྱིས་སྣེ་འཁྲིད་པའི་རྒྱ་ནག་དབུས་ཆབ་སྲིད་ལྷན་ཁང་ (PSC) གིས་རྒྱ་ནག་གི་སྲིད་ཇུས་གཏན་འབེབས་བྱེད་ཀྱི་ཡོད་སྟབས། རྒྱ་ནག་རྒྱལ་ཡོངས་དམངས་ཆེན་ཚོགས་འདུའི་ཤུགས་རྐྱེན་ལ་ཚོད་འཛིན་ཐེབས་ཀྱི་ཡོད་པ་རེད།

ད་ལྟའི་ཆར་ད་དུང་རྒྱ་ནག་དབུས་ཆབ་སྲིད་ལྷན་ཁང་གིས་བཙན་ཤེད་ལ་བརྟེན་ནས་རྒྱ་ནག་གི་སྲིད་ཇུས་བསྐྱར་ཞིབ་གྲོས་འཆར་ཁག་ནར་འགྱང་གཏོང་གི་ཡོད་ཅིང་། ཕྱི་ལོ་ ༡༩༩༢ ལོར་འཐུས་མི་སུམ་ཆ་གཅིག་གིས་འགག་གསུམ་ཨར་ལས་བཟོ་སྐྲུན་ (Three Gorges Dam) གྱི་རྩོད་རྙོག་ལ་མོས་མཐུན་མེད་པའི་བསམ་ཚུལ་བསྟན་པ་དང་། ལས་གཞི་དེ་དག་ད་དུང་རྩོད་རྙོག་ཆགས་བསྡད་ཡོད་ནའང་། རྒྱ་ནག་གི་སྲིད་དབང་སྒེར་འཛིན་ལམ་ལུགས་འོག་ཐ་ན་འཐུས་མི་ཉུང་ཉུང་ཞིག་ལ་མོས་མཐུན་མེད་པའི་བསམ་ཚུལ་ཙམ་གྱི་ཐད་ལའང་བསྒྲགས་གཏམ་སྤེལ་གྱི་ཡོད་པ་རེད།

གནས་བབ་དེ་འདྲ་ཞིག་གི་འོག་ཏུ་ཁྱེད་ཀྱིས་ཅི་ཞིག་ལ་དོ་སྣང་བྱེད་ཀྱི་ཡོད་དམ།

རྒྱ་ནག་རྒྱལ་ཡོངས་དམངས་ཆེན་ཚོགས་འདུའི་གྲོས་འཆར་ཁག་གཟབ་ནན་གྱི་སྒོ་ནས་ཡིག་ཐོག་ཏུ་འགོད་ཀྱི་ཡོད་པ་དང་། གྲོས་འཆར་དེ་དག་རྒྱལ་ནང་གི་ཆབ་སྲིད་གནད་དོན་དང་དཔལ་འབྱོར་རེ་ལྟོས་བཅས་མངོན་འགྱུར་ཡོང་ཐབས་སུ་བེད་སྤྱོད་ཆེན་པོ་ཡོད་པ་རེད། རྒྱ་ནག་གི་དཔོན་རིགས་ཚོས་དམངས་ཆེན་ཚོགས་འདུ་ཐེངས་སྔོན་མའི་སྟེང་བཏོན་པའི་གྲོས་འཆར་ཁག་གཞིར་བཟུང་སྟེ། སྲིད་ཇུས་ཀྱི་གྲོས་འཆར་འདོན་གྱི་ཡོད་པ་དང་། དེ་ཡང་སྔོན་མའི་འཆར་ལྡན་བུ་སྐྱེས་ཀྱི་སྲིད་ཇུས་མཇུག་བསྡུས་པ་དང་འདྲ་བོ་ཡོད་པ་རེད།

མ་ཟད་རྒྱ་ནག་གཞུང་གིས་ནམ་རྒྱུན་དམངས་ཆེན་ཚོགས་འདུའི་སྟེང་དམག་དཔུང་གི་འགྲོ་གྲོན་སྔོན་རྩིས་གསལ་བསྒྲགས་བྱེད་ཀྱི་ཡོད་པ་དང་། དམག་དཔུང་གི་འགྲོ་གྲོན་སྔོན་རྩིས་དེ་ཡང་སྤྱི་བསྡོམས་ཤིག་ཡིན་སྟབས། དེའི་ཐད་ལ་རྩོད་གླེང་མེད་ནའང་ལོ་རེར་དམག་དཔུང་གི་འགྲོ་གྲོན་འཕར་བཞིན་པ་དེ་ནི་དྲག་ཆས་དམག་དཔུང་གི་སྟོབས་ཤུགས་སྔར་བས་མཐོར་འདེགས་གཏོང་ཐབས་སུ་ཞིབ་འཇུག་བྱས་པ་ལས་བྱུང་བ་ཞིག་ཡིན་ཞིང་། རྒྱལ་ཡོངས་དམངས་ཆེན་ཚོགས་འདུའི་མགྲིན་ཚབ་པ་བུད་མེད་ཅིག་གིས། ད་ལོར་རྒྱ་ནག་གི་དམག་དཔུང་འགྲོ་གྲོན་སྔོན་རྩིས་དེ་བཞིན་སྔར་ལས་བརྒྱ་ཆ་ ༧ ནས་ ༨ བར་འཕར་ཡོད་ཚུལ་བརྗོད་འདུག

དམངས་ཆེན་ཚོགས་འདུའི་སྟེང་ཟུར་ཞུགས་སམ་ཆེད་བཅར་གསར་འགོད་པ་གང་ཡིན་ནའང་། ཁོ་ཚོ་ཚོགས་ཞུགས་དཔོན་རིགས་ཚོའི་སར་བཅར་མི་ཆོག་པ་དང་། ཡང་སྐབས་རེར་ཡིག་ཐོག་ཏུ་མ་བཀོད་པའི་གྲོས་མོལ་ལ་བསྐྱར་ཞིབ་དང་བརྒྱུད་གཏོང་མི་ཆོག་པ་བྱས་འདུག རྒྱ་ནག་རྒྱལ་ཡོངས་དམངས་ཆེན་ཚོགས་འདུའི་འཐུས་མི་བྱིངས་ཀྱིས་གྲོས་འཆར་འདོན་ཆོག་པ་དང་། ཁོ་ཚོའི་བསམ་འཆར་དེ་གྲོས་ཚོགས་དང་འབྲེལ་བ་མེད་ནའང་། ཁོ་ཚོས་རྒྱལ་ནང་གི་བཟོ་ལས་ཐོན་སྐྱེད་དང་མངའ་ཁོངས་བདག་དབང་། སྤྱི་དམངས་ཀྱི་སེམས་ཁྲལ་དང་འབྲེལ་བའི་རྩོད་རྙོག་རིགས་ལའང་གྲོས་འཆར་འདོན་དགོས་པ་རེད།

འདི་ལོར་དག་དོན་ཅི་ཞིག་འབྱུང་སྲིད་དམ།

རྒྱ་ནག་རྒྱལ་ཡོངས་དམངས་ཆེན་ཚོགས་འདུའི་འཐུས་མི་ཚོས་རྒྱ་ནག་གི་ལོ་ངོ་ ༡༣ རིང་གི་ལས་འཆར་ཡོངས་སུ་རྫོགས་པར་ཚོད་དཔག་དགོས་པ་དང་། ལས་འཆར་དེ་དག་ནི་ཕྱི་ལོ་ ༢༠༡༦ ནས་ ༢༠༢༠ ལོའི་བར་གྱི་རྒྱ་ནག་གི་སྤྱི་ཚོགས་དཔལ་འབྱོར་གྱི་དམིགས་འབེན་གཙོ་བོ་ཁག་ཅིག་ཡིན་པ་རེད། ལས་འཆར་དེའི་སྙིང་བསྡུས་ཤིག་འདས་ལོའི་ཕྱི་ཟླ་ ༡༠ པར་ཚུགས་པའི་རྒྱ་ནག་དབུས་དམར་ཤོག་ཚོགས་པའི་ཚོགས་ཆེན་རྗེས་སུ་ནང་ཁུལ་དུ་བརྒྱུད་བསྒྲགས་བྱས་ཡོད་པ་དང་། ཟླ་འདིའི་ཕྱི་ཚེས་ ༡༦ ཉིན་ཏེ་རྒྱལ་ཡོངས་དམངས་ཆེན་ཚོགས་འདུའི་རྗེས་སུ་ལས་འཆར་དེ་དག་ཡོངས་ཁྱབ་གསལ་བསྒྲགས་བྱ་རྒྱུ་ཡིན་པ་འདྲ།

དཔལ་འབྱོར་འཕལ་རྒྱས་ཀྱི་འགྲོས་ཤིན་ཏུ་དལ་བར་བརྟེན། འཛམ་གླིང་སྤྱིའི་དཔལ་འབྱོར་ཞིབ་འཇུག་གི་དངངས་འཚབ་འོག་ཏུ་རྒྱ་ནག་གི་དཔལ་འབྱོར་འདུ་འགོད་ཀྱི་ལས་འཆར་དེ་དག་ཉམས་རྒུད་དུ་འགྲོ་བཞིན་ཡོད་པ་རེད། རྒྱལ་ནང་གི་བཟོ་ལས་ཐོན་སྐྱེད་ཇེ་ཉུང་དང་བུན་དངུལ་ཇེ་མང་དུ་འགྲོ་བཞིན་པའི་སྐབས་འདིར། སྐུ་ཞབས་ཞི་ཅིན་ཕིན་གྱིས་དཔལ་འབྱོར་འཛུགས་སྐྲུན་དང་དངོས་ཟོག་ཕྱི་འདྲེན། དེང་རབས་དཔལ་འབྱོར་ཁྲོམ་རའི་འགྲན་རྩོད་ཁྲོད་དུ་རྒྱལ་ནང་གི་དཔལ་འབྱོར་འཕེལ་རྒྱས་ཐད་ལ་ནུས་པ་མ་ཐོན་པའི་དཀའ་ཁག་ལ་འཕྲད་ཡོད་པ་རེད། རེས་གཟའ་སྤེན་པའི་ཉིན་རྒྱ་ནག་གི་སྲིད་བློན་ལེ་ཁི་ཆང་གིས་ཁོ་རང་གི་ལོ་འཁོར་སྙན་ཐོ་འདོན་སྤེལ་བྱེད་རྒྱུ་ཡིན་པ་དང་། ལོ་འཁོར་སྙན་ཐོ་དེའི་ནང་ལོ་རྗེས་མར་རྒྱ་ནག་གི་དཔལ་འབྱོར་འདུ་འགོད་ལ་འཕོ་འགྱུར་ཅི་ཙམ་འབྱུང་སྲིད་པའི་སྐོར་འཁོད་ཡོད་པ་རེད།

དཔལ་འབྱོར་རིག་པ་བ་ཚོས་རྒྱ་ནག་གཞུང་གི་དཔལ་འབྱོར་ལས་གཞི་ཁག་ལ་དོགས་སློང་བྱེད་བཞིན་པའི་སྐབས་འདིར། རྒྱལ་ཡོངས་དམངས་ཆེན་ཚོགས་འདུའི་འཐུས་མི་ཚོར་རྒྱལ་ནང་གི་འཁྲུག་ཆ་དོད་པའི་དཔལ་འབྱོར་འདུ་འགོད་ཀྱི་འགྲོས་ཅི་ཙམ་དལ་བར་གཏོང་བའི་ཐད་ལ་ངེས་ཤེས་བསྐྱེད་པར་རེ་སྒུག་བྱེད་དུ་བཅུག་ཡོད་པ་རེད། སྐབས་རེར་རྒྱ་ནག་གི་དཔོན་རིགས་ཚོའི་བསམ་ཕྱོགས་ཀྱི་གསང་བ་ཕྱི་ལ་ཤོར་གྱི་ཡོད་སྟབས། དམངས་ཆེན་ཚོགས་འདུའི་རྗེས་སུ་སྲིད་བློན་ལེ་ཁི་ཆང་གིས་གསར་འགོད་ལྷན་ཚོགས་ཀྱི་སྒོ་མོ་རྒྱག་སྲིད་པ་རེད།

རྒྱ་ནག་རྒྱལ་ཡོངས་དམངས་ཆེན་ཚོགས་འདུའི་སྟེང་རྩོད་གླེང་ཅི་ཙམ་བྱུང་ཡོད་དམ།

ཝ་ཞིན་ཊོན་ནང་བཞིན་རྩོད་གླེང་བྱུང་ཡོད་པ་མ་རེད། ལོ་ངོ་ ༥ ཡི་འཆར་གཞི་ལྟར། གལ་འགངས་ཆེ་བའི་ཐག་གཅོད་ཁག་འབྱུང་འགྱུར་གྱི་ལོ་ཟླ་ཁ་ཤས་རིང་གི་མདུན་སྐྱོད་ཁྲོད་ཞི་འཇགས་བཟོ་གི་རེད། ཉེ་བའི་ཉིན་འདི་ཚོར་རྒྱ་ནག་གི་བརྒྱུད་ལམ་ཁག་ཏུ་ཆབ་སྲིད་སློབ་སྟོན་པ་ཚོ་ལས་འཕྲོས་ཏེ། རྒྱལ་ནང་གི་སྲིད་གྲོས་ལ་བློ་ཁ་མཐུན་མིན་སྐོར་གྱི་རྩོམ་ཡིག་མང་པོ་སྤེལ་བཞིན་འདུག

བློ་ཡིད་ལས་འདས་པའི་ཆབ་སྲིད་སྒྲིག་འཛུགས་ཀྱི་རྩོད་གླེང་ཁྲོད་དུ་དམར་ཤོག་ཚོགས་པས་བཙན་ཤེད་བཀོལ་ཡང་སྲིད་པའི་སྐབས་འདིར། རྒྱལ་ཡོངས་དམངས་ཆེན་ཚོགས་འདུའི་འཐུས་མི་ཚོས་སོ་སོའི་སྙན་སེང་གཞིར་བཟུང་སྟེ་སེམས་ཁྲལ་མང་པོ་ཞིག་ལ་བསམ་གཞིག་གཏོང་གི་ཡོད་པ་རེད། རྒྱ་ཡོངས་དམངས་ཆེན་ཚོགས་འདུ་དང་ལྷན་ཅིག རྒྱལ་ཡོངས་སྲིད་གྲོས་ (CPPCC) ཀྱང་འཚོགས་བཞིན་ཡོད་པ་དང་། ཚོགས་ཆེན་འདི་གཉིས་ཀྱི་འཐུས་མིའི་གྲས་སུ་ཚོང་པ་དང་ཁྲིམས་དཔོན། རི་མོ་བ་སོགས་ལས་རིགས་སྣ་ཚོགས་ཀྱི་འཐུས་ཚབ་ཡོད་པ་དང་། དེ་ནི་ཐད་ཀར་རྒྱ་ནག་སྲིད་གཞུང་གི་སྲིད་ཇུས་ཁ་ཕྱོགས་ལ་བསམ་འཆར་འདོན་ཐབས་ཤིག་ཡིན་ནའང་། དེའི་ནང་ཁྲིམས་བཟོའི་དབང་ཆ་ཚུད་ཡོད་པ་མ་རེད།