འོས་འདེམས་མི་མང་གིས་རྒྱལ་ནང་གི་དཔལ་འབྱོར་ཁེ་ལས་བཅོས་བསྒྱུར་ཡོང་བར་རེ་ལྟོས་བྱེད་ཀྱི་ཡོད་སྟབས། ང་ཚོས་མི་མང་གི་རེ་འདུན་ལོག་སྤྱོད་བྱས་པ་ཡིན། མི་མང་གི་རེ་ལྟོས་ཐད་རྩོད་རྙོག་འབྱུང་གི་རེད།
ཧྥ་རན་སིའི་གསར་ཁང་ (AFP) གིས་གནས་ཚུལ་སྤེལ་བ་ལྟར་ན། འབར་མའི་རྒྱལ་ཡོངས་དམགས་གཙོ་ཚོགས་པའི་དཔལ་འབྱོར་ཚོགས་ལྷན་ཚོགས་ནས་འབར་མའི་ནང་རྒྱ་ནག་གི་ཆུ་རགས་འཛུགས་སྐྲུན་ལས་གཞིར་བསྐྱར་དུ་བསམ་གཞིག་གཏོང་རྒྱུ་དང་འབར་མའི་དམག་གཞུང་གི་དཔལ་འབྱོར་ཁེ་ལས་མཉམ་འབྲེལ་ལྷན་ཁང་མཇུག་བསྡུ་རྒྱུ་ཡིན་སྐོར་བརྗོད་འདུག
འབར་མའི་རྒྱལ་ཡོངས་དམངས་གཙོ་ཚོགས་པའི་དཔལ་འབྱོར་ལྷན་ཚོགས་ཀྱི་གཙོ་འཛིན་ཧན་ཐ་མ་ཡེན་ཊི་ (Hantha Myint) ཟེར་བ་ཞིག་གིས། འབར་མའི་འོས་འདེམས་མི་མང་གིས་རྒྱལ་ནང་གི་དཔལ་འབྱོར་ཁེ་ལས་ལ་བཅོས་བསྒྱུར་ཡོང་བར་རེ་ལྟོས་བྱེད་ཀྱི་ཡོད་སྟབས། ང་ཚོས་མི་མང་གི་རེ་འདུན་ལོག་སྤྱོད་བྱས་པ་ཡིན། མི་མང་གི་རེ་ལྟོས་ཐད་རྩོད་རྙོག་འབྱུང་གི་རེད། གལ་ཏེ་ང་ཚོས་ཀ་ཆེན་མངའ་སྡེ་ (Kachin State) ནང་གི་མ་ཡེ་ཊི་སོན་ཆུ་རགས་ (Myitsone Dam) འཛུགས་སྐྲུན་ལས་གཞི་མཚམས་འཇོག་ཏུ་བཅུག་ཚེ། ང་ཚོའི་ཆུ་བོའི་མགོ་ཁུངས་ནས་ཆུ་རགས་གཞན་གཞན་མང་པོ་འཛུགས་སྐྲུན་གྱིས་ཆུ་གློག་མཁོ་འདྲེན་དགོས་ཀྱི་ཡོད་སྐོར་དང་། འབར་མའི་དམག་གཞུང་གི་དཔལ་འབྱོར་ཁེ་ལས་མཉམ་འབྲེལ་ལྷན་ཁང་ (MEHL) ལ་ཕྱོགས་ཡོངས་ནས་བཅོས་བསྒྱུར་གཏོང་བའི་དུས་ལ་འཁེལ་ཡོད་པ་དང་། དེ་སྔོན་འབར་མའི་དམག་གཞུང་གིས་རྒྱལ་ནང་གི་དཔལ་འབྱོར་ཁེ་དབང་ཡོད་ཚོད་འབར་མའི་དཔལ་འབྱོར་ཁེ་ལས་མཉམ་འབྲེལ་ལྷན་ཁང་ལ་སྤྲད་ཡོད་ནའང་། ང་ཚོས་འབར་མའི་དཔལ་འབྱོར་ཁེ་དབང་དེ་འབར་མའི་དཔལ་འབྱོར་ཁེ་ལས་མཉམ་འབྲེལ་ལྷན་ཁང་ལ་སྤྲོད་ཐུབ་ཀྱི་མེད་སྐོར་སོགས་བརྗོད་འདུག
གནས་ཚུལ་ལྟར་ན། འབར་མའི་རྒྱལ་ཡོངས་དམངས་གཙོ་ཚོགས་པའི་སྲིད་གཞུང་གསར་བས་འབར་མའི་དམག་གཞུང་གི་དཔལ་འབྱོར་སྲིད་ཇུས་ལ་ལེགས་བཅོས་དང་། རྒྱ་ནག་དང་འབར་མ་རྒྱལ་ཁབ་གཉིས་བར་གྱི་ཉོ་འཚོང་འབྲེལ་ལམ་འཛིན་སྐྱོང་དགོས་པའི་སྐབས་འདིར། རྒྱལ་ནང་གི་དཔལ་འབྱོར་འདུ་འགོད་ཀྱི་འགྲན་རྩོད་མང་པོར་གདོང་ལེན་བྱེད་དགོས་ཀྱི་ཡོད་པ་དང་། ལྕམ་ཨང་སན་སུའུ་སྐྱིད་ལགས་ཀྱིས་དབུ་ཁྲིད་པའི་རྒྱལ་ཡོངས་དམངས་གཙོ་ཚོགས་པས་འདི་ལོའི་ཕྱི་ཟླ་ ༤ ནང་དངོས་སུ་སྲིད་གཞུང་གསར་བ་འཛིན་སྐྱོང་དང་། དཔལ་འབྱོར་སྲིད་ཇུས་གསར་བ་གཏན་འབེབས་དང་ལག་ལྟར་བྱ་འཆར་ཡོད་འདུག
འབར་མའི་ནུབ་རྒྱུད་ཀྱི་ཀ་ཆེན་མངའ་སྡེའི་མ་ཡེ་ཊི་སོན་ཆུ་རགས་འཛུགས་སྐྲུན་ལས་གཞི་དེ་ནི་ཨ་སྒོར་ཐེར་འབུམ་མང་པོ་བཏང་བའི་ཆུ་གློག་མཁོ་འདྲེན་ལས་གཞི་ཞིག་ཡིན་ཞིང་། འབར་མའི་གྲངས་ཉུང་མི་རིགས་ས་ཁུལ་ཁག་བར་གྱི་དཔལ་འབྱོར་ཁེ་གཉེར་རྩོད་གླེང་གི་རྐྱེན་པས་ཕྱི་ལོ་ ༢༠༡༡ ལོར་ཆུ་རགས་འཛུགས་སྐྲུན་ལས་གཞི་དེ་ཡོངས་སུ་མཚམས་འཇོག་ཏུ་བཅུག་ཡོད་པ་དང་། ཆུ་རགས་འཛུགས་སྐྲུན་ལས་གཞི་དེ་ལ་ས་ཡོམ་སྐབས་སུ་རྡིབ་སྐྱོན་འབྱུང་བའི་ཉེན་ཁ་ཧ་ཅང་ཆེ་ནའང་། རྒྱ་ནག་གི་ཨར་ལས་འཆར་འགོད་པ་ཚོས་ཉེན་ཁ་ཚབས་ཆེན་མེད་ལུགས་བརྗོད་ཡོད་པ་རེད།
མ་ཟད་གསར་ཁང་འདིའི་གནས་ཚུལ་གཞན་ཞིག་གི་ནང་། ཟླ་འདིའི་ཕྱི་ཚེས་ ༤ ཉིན་གྱི་འབར་མའི་རྒྱལ་ཡོངས་གྲོས་ཚོགས་ཐོག་ལྕམ་ཨང་སན་སུའུ་སྐྱིད་ལགས་འབར་མའི་སྲིད་འཛིན་འོས་གཞི་ནས་ཕྱིར་འཐེན་བྱས་ཏེ་ཚབ་ཏུ་ཁོང་མོའི་རླངས་འཁོར་ཁ་ལོ་བ་ཟུར་བ་ཧ་ཊིན་ཀ་ཡ་ཝ་ (Htin Kyaw) ཟེར་བ་ཞིག་སྲིད་འཛིན་འོས་གཞིར་བཏོན་ཡོད་པ་དང་། སྐུ་ཞབས་ཧ་ཊིན་ཀ་ཡ་ཝ་ལགས་ནི་ད་ལྟ་ལོ་ ༦༩ ཡིན་པ་དང་ལྕམ་ཨང་སན་སུའུ་སྐྱིད་ཀྱི་ཐེབས་རྩ་ཁང་གི་ལས་མི་ཡིན་སྐོར་འཁོད་འདུག
གསར་འགོད་པ། པདྨ་རྒྱལ།
