རང་ལུས་ལ་གྲིས་རྒྱག་མཁན་དེར་རྨ་བཟོས་མི་འདུག

གསུམ་བཅུའི་དུས་དྲན་ཉིན་ནེའུ་ཌར་ལན་ཌིའི་རྒྱ་ནག་གཞུང་ཚབ་མདུན་དུ་བོད་དོན་ཆེད་རང་ལུས་ལ་གྲིས་རྒྱག་མཁན་རིག་འཛིན་རྡོ་རྗེ་ལཊ་སུ་རྨ་བཟོས་མི་འདུག་ལ། ཆུ་ཚོད་ཁ་ཤས་རིང་བཀག་ཉར་བྱས་རྗེས་ཀློད་གྲོལ་བཏང་འདུག

ཁ་སང་གསུམ་བཅུའི་དུས་དྲན་གྱི་ཉིན་མོར། ནེའུ་ཌར་ལན་ཌིའི་(Netherlands)ནང་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་བོད་མི་ཚོས་ཞི་རྒོལ་སྐད་འབོད་བྱེད་སྐབས། རང་ལུས་ལ་གྲིས་བརྒྱབ་ནས་རང་སྲོག་གཅོད་རྩིས་བྱེད་མཁན་བོད་རིགས་གཞོན་ནུ་དེའི་མིང་ལ་རིག་འཛིན་རྡོ་རྗེ་ཟེར་ཞིང་། ཁོང་གིས་རང་ལུས་ལ་གྲིས་རྒྱག་སྐབས་འགྲམ་དུ་ཡོད་པའི་ཕོ་གསར་དེས་ལམ་སང་བཟུང་སྟེ་རྨ་བཟོས་མེད་ལ། ཆུ་ཚོད་འགའ་ལ་བཀག་ཉར་བྱས་པ་མ་གཏོགས་སྨན་ཁང་དུ་ཁྲིད་དགོས་བྱུང་མི་འདུག་ཟེར།

ད་ལྟ་རང་ས་གནས་དེ་རང་དུ་ཡོད་པའི་བོད་མི་བརྩོན་འགྲུས་ལགས་ཀྱིས་འདི་གར་བརྗོད་དོན། བོད་དོན་ཆེད་རང་ཉིད་ལ་གྲི་རྒྱག་མཁན་གཞོན་ནུ་དེའི་མིང་ལ་རིག་འཛིན་རྡོ་རྗེ་ཟེར་ཞིང་། ཕ་ཡུལ་ནག་ཆུ་སོག་རྫོང་ནས་ཡིན་པ་དང་། ཁོང་གིས་གྲི་ཡིས་བརྒྱབ་སྟེ་རང་སྲོག་གཅོད་རྩིས་བྱེད་སྐབས་དེ་མ་ཐག་ཁོང་རང་གི་འགྲམ་དུ་ཡོད་པའི་ཕོ་གསར་དེས་འཇུས་ནས་རྨ་བཟོ་ཐུབ་མི་འདུག དེ་ནས་ཉེན་རྟོག་པས་འཛིན་བཟུང་བྱས་སོང་། ཕྱི་དྲོར་ས་གནས་བོད་རིགས་ཚོགས་པ་དང་ཁོང་གི་ཨ་མ་ལགས་བཅས་ཉེན་རྟོག་ཁང་ལ་ལེན་དུ་ཕྱིན་ཡོད་ཀྱང་། ཁོ་རང་བཏང་ཚར་ཡོད་འདུག ང་ཚོས་མེ་འཁོར་འབབ་ཚུགས་ནས་སྒུག་ནས་བསྡད་པ་དང་། ཕྱི་དྲོའི་ཆུ་ཚོད་ ༤ པ་ཙམ་ལ་ཁོ་རང་བདེ་ཐང་ངང་བསླེབས་སོང་། ཅེས་དང་།

ཡང་ཁོང་གིས། ཁོ་རང་དང་ཁོང་གི་ནང་མི་ཚང་མ་བོད་དོན་ཐོག་དོ་སྣང་དང་སེམས་ཤུགས་ཧ་ཅང་ཆེན་པོ་ཡོད་མཁན་དེ་འདྲ་རེད་འདུག ནམ་རྒྱུན་བོད་དོན་ལས་འགུལ་ཅི་ཞིག་སྤེལ་བ་ཡིན་ནའང་ཁོང་ནང་མི་ཚང་མ་མཉམ་ཞུགས་བྱེད་ཀྱི་ཡོད་པ་རེད། ཡིན་ནའང་། ད་ཐེངས་ཁོང་གིས་ཨ་མ་ལགས་ལ་ཁྱོད་རང་མཉམ་ཞུགས་བྱེད་མི་དགོས་ཟེར་ནས་ཐེངས་མང་པོ་བཤད་སོང་ཟེར་གྱི་འདུག འོན་ཀྱང་། ཨ་མ་ལགས་མཉམ་ཞུགས་བྱས་འདུག སྐད་ཆར་གཞིགས་ན་སྔོན་ནས་ཁོང་རང་གིས་འཆར་གཞི་བཏོན་ནས་ཡོང་འདུག སྟབས་ལེགས་པ་ཞིག་ལ་གནས་ཚུལ་ཆེན་པོ་དེ་འདྲ་བྱུང་མ་སོང་། ཅེས་བརྗོད་བྱུང་།

གསར་འགོད་པ། པདྨ་མཚོ།