འབར་མའི་སྲིད་འཛིན་རྒྱལ་ཁ་ཧ་ཊེན་ཀ་ཡ་ཝ་ལགས་ལ་ཐོབ།

འབར་མའི་རྒྱལ་ཡོངས་དམངས་གཙོ་ཚོགས་པའི་སྲིད་འཛིན་འོས་མི་སྐུ་ཞབས་ཧ་ཊེན་ཀ་ཡ་ཝ་ལགས་ལ་འབར་མའི་སྲིད་འཛིན་རྒྱལ་ཁ་ཐོབ་པ་འདི་ནི་འབར་མའི་སྲིད་དོན་ལོ་རྒྱུས་ཁྲོད་འབར་མའི་དམག་གཞུང་གི་སྲིད་དབང་སྒེར་གཅོད་འོག་དམངས་གཙོའི་སྲིད་འཛིན་འོས་མི་ཞིག་འབར་མའི་སྲིད་འཛིན་ལ་འདེམས་ཐོན་བྱུང་བ་ཐོག་མ་དེ་ཆགས་ཀྱི་ཡོད་པ་རེད།

རེས་གཟའ་མིག་དམར་ཉིན་འབར་མའི་ནེ་ཕེ་ཌ་ཝ་ (Naypyidaw) གྲོང་ཁྱེར་ནང་ཚུགས་པའི་འབར་མའི་སྲིད་འཛིན་འོས་འདེམས་ཁྲོད་ལྕམ་ཨང་སན་སུའུ་སྐྱིད་མཆོག་གི་བློས་ཐུབ་གྲོགས་པོ་དང་བློ་འདོན་པ་སྐུ་ཞབས་ཧ་ཊིན་ཀ་ཡ་ཝ་ (Htin Kyaw) ལགས་ལ་གྲོས་ཚོགས་སྲིད་སྟེགས་ ༦༥༢ ལས་སྲིད་སྟེགས་ ༣༦༠ ཐོབ་ཏེ་འབར་མའི་རྒྱལ་ཡོངས་དམངས་གཙོ་ཚོགས་པའི་སྲིད་འཛིན་རྒྱལ་ཁ་ཐོབ་ཡོད་ཡོད་པ་དང་། རྒྱལ་ཁའི་གསར་འགོད་ལྷན་ཚོགས་ཐོག་སྐུ་ཞབས་ཧ་ཊིན་ཀ་ཡ་ཝ་ལགས་ཀྱིས། འདི་ནི་ལྕམ་སྲིང་ཨང་སན་སུའུ་སྐྱིད་མཆོག་གི་རྒྱལ་ཁ་ཡིན་སྐོར་བརྗོད་ཅིང་། སྲང་ལམ་དུ་སྔོ་ཚལ་འཚོང་མཁན་ལོ་ ༦༠ ཡིན་ཞིང་མིང་ལ་ཌ་ཝ་མ་ཡ་ (Daw Mya) ཞུ་བ་ཞིག་གིས། འདི་ནི་ཨ་མ་ཨང་སན་སུའུ་སྐྱིད་མཆོག་གི་འདམ་ག་རེད། ཧ་ཊིན་ཀ་ཡ་ཝ་ལགས་ད་ལྟ་ང་ཚོའི་སྲིད་འཛིན་ཆགས་པ་རེད། ཁོས་ལྕམ་ཨང་སན་སུའུ་སྐྱིད་མཆོག་དང་ལྷན་དུ་ཡུན་རིང་བོར་ལས་དོན་སྒྲུབ་མྱོང་ཡོད་སྟབས། ཁོ་སྲིད་འཛིན་ཡག་པོ་ཞིག་ཡིན་སྲིད་སྐོར་སོགས་བརྗོད་འདུག

སྐུ་ཞབས་ཧ་ཊིན་ཀ་ཡ་ཝ་ལགས་ནི་ལྕམ་ཨང་སན་སུའུ་སྐྱིད་མཆོག་གི་བློས་ཐུབ་གྲོགས་པོ་དང་ཁོང་མོའི་བློ་འདོན་པ་བཅས་ཡིན་ཞིང་། ཁོང་གི་ཨ་ཕ་ལགས་འབར་མའི་ངག་རྒྱུན་ལོ་རྒྱུས་རྩོམ་པ་པོ་དང་འབར་མའི་རྒྱལ་ཡོངས་དམངས་གཙོ་ཚོགས་པའི་ཚོགས་མི་ཡིན་སྟབས། འབར་མའི་མི་མང་གིས་ཁོང་ལ་ཡིད་རྟོན་དང་བརྩི་མཐོང་ཆེན་པོ་གནང་གི་ཡོད་པ་དང་། ཁོང་ད་ལྟ་ལོ་ ༦༩ ཡིན་པ་དང་ཁོང་གི་བཟའ་ཟླའི་མིང་ལ་སུ་སུ་ལ་ཝེན་ (Su Su Lwin) ཟེར་ཞིང་། ཁོང་མོ་འབར་མའི་རྒྱལ་ཡོངས་དམངས་གཙོ་ཚོགས་པའི་ཚོགས་མི་དང་། ཁོང་མོའི་ཨ་ཕ་འབར་མའི་རྒྱལ་ཡོངས་དམངས་གཙོ་ཚོགས་པའི་མགྲིན་ཚབ་པ་དང་ལྕམ་ཨང་སན་སུའུ་སྐྱིད་མཆོག་གི་ཐེབས་རྩ་ཚོགས་པའི་ཚོགས་མི་བཅས་ཡིན་འདུག

སྐུ་ཞབས་ཧ་ཊིན་ཀ་ཡ་ཝ་ལགས་སྔོན་ཆད་འབར་མའི་སྲིད་དོན་ལས་སྒོར་ཞུགས་མྱོང་མེད་ནའང་། ད་རེབ་ལྕམ་ཨང་སན་སུའུ་སྐྱིད་གཙོས་པའི་ཁོང་མོའི་རྒྱབ་སྐྱོར་བ་ཚོའི་རམ་འདེགས་ལ་བརྟེན་ནས་ཁོང་འབར་མའི་སྲིད་འཛིན་དུ་བདམས་པ་ཡོད་པ་དང་། ད་ལོའི་ཕྱི་ཟླ་ ༤  ཚེས་ ༡ ཉིན་ཁོས་དངོས་སུ་འབར་མ་དམངས་གཙོའི་སྲིད་གཞུང་གསར་བ་འཛིན་སྐྱོང་གནང་རྒྱུ་ཡིན་པ་དང་། འདི་ནི་འབར་མའི་སྲིད་དོན་ལོ་རྒྱུས་ཁྲོད་འབར་མའི་དམག་གཞུང་གི་སྲིད་དབང་སྒེར་གཅོད་འོག་དམངས་གཙོའི་སྲིད་འཛིན་འདེམས་ཐོན་བྱུང་བ་ཐོག་མ་དེ་ཆགས་ཀྱི་ཡོད་ནའང་། འབར་མའི་དམག་གཞུང་གིས་ད་དུང་གལ་འགེངས་ཆེ་བའི་འབར་མའི་ནང་སྲིད་དང་མཐའ་སྲུང་། རྒྱལ་སྲུང་ལྷན་ཁང་ཁག་གི་དབང་ཤུགས་ཆེན་པོ་བཟུང་ཡོད་འདུག

འབར་མའི་སྲིད་འཛིན་འོས་འདེམས་ཁྲོད་ལྕམ་ཨང་སན་སུའུ་སྐྱིད་མཆོག་འབར་མའི་སྲིད་འཛིན་འོས་བསྡུའི་ནང་ཞུགས་མ་བཅུག་ནའང་། ན་ནིང་ཕྱི་ཟླ་ ༡༡ པའི་ནང་འབར་མའི་རྒྱལ་ཡོངས་འོས་བསྡུའི་ཆེན་མོའི་ཁྲོད་འབར་མའི་གྲོས་ཚོགས་གོང་འོག་གཉིས་ནང་རྒྱལ་ཡོངས་དམངས་གཙོ་ཚོགས་པར་རྒྱལ་ཁ་ཐོབ་པ་བརྒྱུད། ཁོང་མོས་རང་གི་བློས་ཐུབ་ཀྱི་གྲོགས་པོ་ཞིག་ཁོང་མོའི་ཚབ་ཏུ་འབར་མའི་སྲིད་འཛིན་དུ་བསྐོ་བཞག་གནང་ཐུབ་ཡོད་འདུག

ཐེངས་འདིའི་འབར་མའི་གྲོས་ཚོགས་ཀྱི་སྲིད་འཛིན་འོས་འདེམས་ནང་སྲིད་འཛིན་འོས་མི་ ༣ བཏོན་པའི་གྲས་ཀྱི་མ་ཡེན་ཊ་ས་ཝི་ (Myint Swe) དང་བན་ཐཱོ་ (Van Thio) གཉིས་འབར་མའི་སྲིད་འཛིན་གཞོན་པར་བསྐོ་བཞག་གནང་རྒྱུ་ཡིན་པ་དང་། སྐུ་ཞབས་མ་ཡེན་ཊ་ས་ཝི་ལགས་ནི་འབར་མའི་དམག་གཞུང་གི་སྲིད་འཛིན་འོས་མི་ཡིན་ཞིང་། སྐུ་ཞབས་བན་ཐཱོ་ལགས་འབར་མའི་གྲངས་ཉུང་མི་རིགས་ཀྱི་སྲིད་འཛིན་འོས་མི་བཅས་ཡིན་འདུག

གསར་འགོད་པ། པདྨ་རྒྱལ།