དེ་རིང་རྒྱ་གར་ (PTI) གསར་ཁང་གིས་གནས་ཚུལ་སྤེལ་བ་ལྟར་ན།
ཁ་སང་རེས་གཟའ་ཕུར་བའི་ཉིན་རྒྱ་ནག་གཞུང་གིས་རྒྱ་གར་ནང་སྐྱབས་བཅོལ་དུ་སྡོད་པའི་བོད་མིའི་སྒྲིག་འཛུགས་ལ་དུས་ནམ་ཡང་ངོས་ལེན་མེད་ཚུལ་དང་འཛམ་གླིང་རྒྱལ་ཁབ་ཁག་གིས་བོད་རང་བཙན་འཐབ་རྩོད་ཀྱི་སྡིངས་ཆ་མི་བསྐྲུན་པའི་འབོད་སྐུལ་བཏང་ཡོད་འདུག
བཙན་བྱོལ་བོད་མིའི་བཀའ་སྤྱི་གཉིས་ཀྱི་དངོས་གཞིའི་འོས་བསྡུ་ཚུགས་ལ་ཉེ་བའི་སྐབས་དང་བསྟུན་ཏེ། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཁང་ (Lu Kang) ཟེར་བ་ཞིག་གིས། ཁྱོད་རང་ཚོས་ངེས་པར་དུ་རྒྱ་ནག་གིས་རྒྱ་གར་ནང་སྐྱབས་བཅོལ་དུ་སྡོད་པའི་བོད་མིའི་སྒྲིག་འཛུགས་ཟེར་བ་དེར་ནམ་ཡང་ངོས་ལེན་མེད་པའི་ལངས་ཕྱོགས་དེ་གསལ་བོར་ཤེས་དགོས། ཞེས་དང་། ཡང་གསར་འགོད་པ་ཞིག་གིས་ཁོ་ལ། ཟླ་འདིའི་ཕྱི་ཚེས་ ༢༠ ཉིན་རྒྱ་ནག་གཞུང་གི་འདོད་མོས་ཡོད་མེད་གང་ལྟར་ཡང་བོད་མིའི་སྒྲིག་འཛུགས་བཀའ་སྤྱི་གཉིས་ཀྱི་དངོས་གཞིའི་འོས་བསྡུ་ཚུགས་གྲབས་ཡོད་པའི་ཐད་ལྟ་ཚུལ་ག་རེ་ཡོད་མེད་དྲིས་པར་ཁོས། འཛམ་གླིང་རྒྱལ་ཁབ་ཁག་དང་ལྷག་པར་དུ་བོད་མི་ཁ་བྲལ་བར་འབྲེལ་འདྲིས་ཟབ་པའི་རྒྱལ་ཁབ་ཁག་གིས་བོད་རང་བཙན་འཐབ་རྩོད་ཀྱི་སྡིངས་ཆ་མི་བསྐྲུན་རྒྱུར་ང་ཚོས་རེ་བ་བྱེད་ཀྱི་ཡོད་ལུགས་སོགས་བཤད་འདུག
གནས་ཚུལ་འདིའི་ནང་མུ་མཐུད་དུ། ཕྱི་སྡོད་བོད་མིས་གནས་ཚུལ་མཁོ་སྤྲོད་བྱས་པ་ལྟར་ན། ད་ལྟའི་བར་བོད་རང་དབང་དང་༧གོང་ས་མཆོག་ཕྱིར་བོད་ནང་གདན་འདྲེན་དགོས་པའི་འབོད་སྐུལ་ཐོག་བོད་མི་ ༡༣༠ ལྷག་གིས་རང་ལུས་མེར་སྲེག་གནང་ཡོད་སྐོར་དང་། རྒྱ་གར་བྱང་ཕྱོགས་དྷ་རམ་ས་ལར་ཚུགས་པའི་བོད་མིའི་གྲོས་ཚོགས་ནང་ད་ཆར་འཐུས་མི་ ༤༤ གྲུབ་ཅིང་། བོད་མིའི་སྲིད་སྐྱོང་དེའང་བཙན་བྱོལ་བོད་མི་ ༡༥༠,༠༠༠ ལྷག་གིས་ཐད་ཀར་འོས་འདེམས་བྱེད་ཀྱི་ཡོད་སྐོར་སོགས་འཁོད་འདུག
གསར་འགོད་པ། པདྨ་རྒྱལ།
“བོད་མི་ ༡༣༠ ལྷག་གིས་རང་ལུས་མེར་སྲེག་གནང་ཡོད་སྐོར་དང་། “ཞེས་༡༣༠་ལྷག་གིས་ཞེས་བྲིས་པ་འདི་ལ་བསམ་ན་དུས་བབས་ཚང་གིས་རང་ལུས་མེར་སྲེག་པའི་གྲངས་འབོར་ཏག་ཏག་ཅིག་མཁྱེན་གྱི་མེད་པའི་སྣང་བ་ཞིག་ཡོད་པ་མ་ཟད་དེ་ཐོག་དོ་སྣང་ཡང་མ་གནང་བའི་འདུ་ཤེས་ཤིག་ཡོང་གི་འདུག གང་ལྟར་གྲངས་ཀ་ཏག་ཏག་ཅིག་གི་སྒོ་ནས་གསུང་རྒྱུ་གལ་ཆེན་པོ་མཐོང་།
དྲ་གྲོགས་ Dackpa ལགས། བོད་ཀྱི་དུས་བབ་ཀྱིས་བོད་ནང་བོད་མི་ག་ཚོད་ཀྱིས་རང་ལུས་མེར་བསྲེགས་གནང་ཡོད་པ་ཤེས་མིན་ལ་མ་ལྟོས་པར། གསར་འགྱུར་ཡོང་ཁུངས་ན་ཇི་ལྟར་བཀོད་ཡོད་ན་དེ་ལྟར་འགོད་དགོས་པ་གསར་འགྱུར་ལས་རིགས་ཀྱི་རྩ་དོན་རེད།
གང་ལྟར་ངོས་ལེན་མེད་ཅེས་ནན་བརྗོད་བྱེད་བཞིན་པ་འདིས། བོད་ཀྱི་གནད་དོན་འདི་རྒྱ་ནག་དམར་གཞུང་ལ་ཇི་འདྲའི་ཚོར་བ་ཞིག་བསླངས་ཡོད་པ་དེས་ཤེས་ཐུབ། ནམ་ཞིག་ངེས་ལེན་མེད་ཅེས་པའི་ཚིག་འདི་རིང་མིན་ངེས་ལེན་ཅན་དུ་འགྱུར་རྒྱུའི་མངོན་རྟགས་ཤིག་ཀྱང་ཅི་ལ་མིན།