ཞི་ཅིན་ཕིན་དགོངས་ཞུ་དགོས་པའི་ཡོངས་གྲགས་ཞུ་ཡིག

(ལར་ཞེན་ཅན་གྱི་ཏང་མི་འགས་(རྒྱ་ནག་གི་)སྲིད་འཛིན་ཞི་ཅིན་ཕིན་གྱིས་དགོངས་པ་ཞུ་དགོས་པའི་ཡོངས་གྲགས་ཞུ་ཡིག་ཕུལ།)

གཞིས་ཆགས་བུས་བོད་སྒྱུར་བྱས།

བློ་མཐུན་ཞི་ཅིང་ཕིང་ལགས། ང་ཚོ་ནི་ལར་ཞེན་ཆེ་བའི་ཏང་མི་ཡིན། ད་རེས་རྒྱལ་ཡོངས་ “ལྷན་ཚོགས་གཉིས་” ཀྱི་དུས་སྐབས་འདིར་ང་ཚོས་ཁྱེད་ཉིད་ཏང་དང་ (ཀྲུང་དབྱངས་) སྲིད་གཞུང་གི་ལས་གནས་ཡོངས་རྫོགས་ནས་རྩ་དགོངས་ཞུ་རོགས་ཞུ་རྒྱུ་ཡིན། ང་ཚོས་ཞུ་སྐུལ་འདི་ནི་ཏང་གི་རྩ་དོན། ཀྲུང་དབྱངས་དང་ཀྲུང་དབྱངས་མི་མང་། ད་དུང་ཁྱེད་རང་སྒེར་དང་ཁྱེད་ཀྱི་ནང་མིའི་བདེ་འཇགས་བཅས་ལ་སེམས་འཁུར་ཡོད་པའི་ཐོག་ནས་ཞུས་པ་ཡིན།

བློ་མཐུན་ཞི་ཅིང་ཕིང་ལགས། ཁྱེད་ཉིད་རྒྱལ་ཡོངས་མི་དམངས་འཐུས་མི་ཚོགས་ཆེན་ཐེངས་བཅོ་བརྒྱད་པའི་སྟེང་དུ་གུང་ཁྲན་ཏང་གི་སྤྱི་ཁྱབ་དྲུང་ཆེར་(ཧྲུའུ་ཅི་)འདེམས་ཐོན་བྱུང་བ་ལྟར། ཁྱེད་ནས་ “སྟག་རྣམས་རྡུང་རྡེག་བཏང་ནས་” ལྐོག་ཟ་རུལ་སུངས་ཀྱི་དཀའ་ངལ་དེ་སེལ་རྒྱུའི་བློ་ཐག་བཅད་པ་དེས་གུང་ཁྲན་ཏང་ནང་ལོགས་སུ་གནོད་འཚེ་ཅན་གྱི་ལྐོག་ཟའི་རང་གཤིས་དེ་ཏོག་ཙམ་ཇེ་བཟང་དུ་ཕྱིན་ཡོད། དེ་བཞིན་ཁྱེད་ནས་ཁྱབ་ཆེ་བའི་བཅོས་སྒྱུར་གྱི་ཆེད་དུ་དབུས་ཀྱི་ལས་དོན་རུ་ཁག་གཙོ་བོ་འགའི་ཐོག་ཏུ་ཁྱེད་རང་སྒེར་ནས་དབུ་འཁྲིད་ཅིང་། དེ་མཚུངས་རྒྱལ་ཁབ་ཀྱི་དཔལ་འབྱོར་གནས་སྟངས་ཡར་རྒྱས་ཀྱི་ཐོག་ལ་བྱ་བ་རླབས་པོ་ཆེ་ཞིག་བསྒྲུབས་ཡོད་པ་ལའང་མི་མང་ནས་རྒྱབ་སྐྱོར་ཐོབ་ཡོད། འབད་རྩོལ་དེ་དག་ང་ཚོས་དོ་སྣང་མ་བྱུང་བ་དེ་འདྲ་རྩ་བ་ནས་མིན།

འོན་ཀྱང་བློ་མཐུན་ཞི་ཅིན་ཕིན་ལགས། ང་ཚོ་ལ་ནོར་འཁྲུལ་འཐེར་འདོན་བྱ་རྒྱུ་ལས་གདམ་ཁ་གཞན་མེད། དོན་དམ་དུ་ཁྱེད་ཀྱི་ལག་ཏུ་དབང་ཆ་ཡོད་ཚད་བཟུང་ནས་ཐད་ཀར་ཐག་གཅོད་བྱེད་ཀྱི་ཡོད་པར་བརྟེན། ད་ཆ་ང་ཚོར་ཆབ་སྲིད་དང་ཤེས་ཡོན། ལྟ་གྲུབ། ལེགས་བྱང་བཅས་ཀྱི་ཕྱོགས་ཐམས་ཅད་ཀྱི་ནང་དུ་སྔར་མ་གྲགས་པའི་དཀའ་ངལ་མང་པོ་ཞིག་འཕྲད་བཞིན་ཡོད།

ཆབ་སྲིད་ཐོག་ལ་མཚོན་ན། ཁྱེད་ནས་གལ་གནད་ཆེ་བའི་གུང་ཁྲན་ཏང་གི་ལམ་སྲོལ་རྣམས་རྡོག་རོལ་དུ་བཏང་། དེའི་ནང་དུ་གཙོ་བོ་གུང་ཁྲན་ཏང་གི་དབུས་རྒྱུན་རྣམས་ནས་མཉམ་མཐུད་འགན་འཁུར་གྱི་དམངས་གཙོའི་ལམ་སྲོལ་དེ་རྒྱབ་སྐྱུར་དང་། དེའི་དོད་དུ་དཔོན་རིགས་རིམ་པ་ཚང་མས་ “གཙོ་བོ་” ཁྱེད་ཀྱི་འདོད་ཚུལ་ལ་རྒྱབ་སྐྱོར་དགོས་པ་བཅས་ནི་ཚད་ལས་བརྒལ་བའི་དབང་ཆའི་དམིགས་ཡུལ་གྱི་གནས་སུ་ལྷུང་ཡོད་པར་མཚོན། རྒྱལ་ཡོངས་མི་དམངས་འཐུས་མི་ཚོགས་ཆེན་དང་ཀྲུང་དབྱངས་མི་དམངས་ཆབ་སྲིད་སློབ་སྟོན་ལྷན་ཚོགས། སྲིད་གཞུང་ལྷན་ཁང་ནང་དངོས་སུ་ཏང་གི་ལས་དོན་ཚོགས་ཆུང་གི་དབང་ཆ་ཇེ་མཐོ་ཇེ་བརྟན་དུ་གཏོང་བ་དང་བསྟུན་ཏེ། ཁྱེད་ཀྱིས་སྲིད་བློན་ལི་ཁེ་ཆིང་དང་གཞན་དཔོན་རིགས་རྣམས་ཐེ་བའི་སྲིད་གཞུང་གི་ལས་ཁུངས་ཚང་མའི་རང་རང་གི་དབང་ཆ་རྣམས་ཇེ་ཆུང་ཇེ་ཞན་དུ་བཏང་། དེ་དང་མཉམ་དུ་ལས་དོན་ཁང་དང་སྲིད་གཞུང་འོག་གི་ཚོང་ལས་སྒྲིག་འཛུགས་ཁག་ཏུ་དབུས་སྒྲིག་ཁྲིམས་ཞིབ་བཤེར་ལྷན་ཁང་རྩ་འཛུགས་བྱེད་བཞིན་པ་དེ་ཡིས་དབང་ཆའི་ལམ་ལུགས་གསར་པ་ཞིག་འཛུགས་པ་དང་། སྲིད་གཞུང་གི་རིམ་པ་ཚང་མའི་ནང་དུ་གསལ་ཁ་མེད་པ་ཆགས་ཤིང་། ཐག་གཅོད་ཀྱི་བརྒྱུད་རིམ་ལའང་ཐེ་ཚོམ་སྐྱེས་གཞིར་འགྱུར།

(རྒྱལ་ཁབ་) གཞན་དང་འབྲེལ་ལམ་གྱི་ཐད་ལ་མཚོན་ན། ཁྱེད་ཀྱིས་བློ་མཐུན་ཏུན་ཞོ་ཕིན་གྱི་ཡིད་བརྟན་འཕེར་བའི་སྲིད་བྱུས་ “ཁྱེད་ཀྱི་ནུས་སྟོབས་རྣམས་སྐུངས། ཁྱེད་ཀྱིས་དུས་ཚོད་ལ་སྒུགས་” ཅེས་པ་རྒྱབ་སྐྱུར་བྱས་པ་དེས་རྒྱལ་སྤྱིའི་འབྲེལ་ལམ་གྱི་ཁོར་ཡུག་བཟང་པོ་ཞིག་བསྐྲུན་ཐུབ་མེད་པ་ཙམ་མ་ཟད། ད་དུང་བྱང་ཀོ་རི་ཡའི་རྡུལ་ཕྲན་ཚོད་ལྟ་ཡོངས་རྫོགས་ལེགས་བསྒྲུབ་བྱེད་དུ་བཅུག་པ་དེ་ནི་རྒྱ་ནག་གི་རྒྱལ་སྲུང་ལའང་ཉེན་ཚབས་ཧ་ཅང་ཆེན་པོར་འགྱུར་བཞིན་ཡོད། ད་དུང་ཨ་རིའི་དབང་ཤུགས་ཀྱང་ལམ་ལྷོངས་ལྡན་པའི་སྒོ་ནས་ཨེ་ཤ་ཡའི་ནང་དུ་ཕྱིར་སླེབས་སུ་བཅུག་ནས་རྒྱ་ནག་དང་མཉམ་འབྲེལ་གྱིས་ལྷོ་ཀོ་རི་ཡ་དང་ཉི་ཧོང་། ཧྥི་ལི་པིན། ལྷོ་ཤར་ཨེ་ཤ་ཡའི་རྒྱལ་ཁབ་བཅས་དང་ལྷན་དུ་འཐབ་ཕྱོགས་གཅིག་འགྱུར་ཞིག་བཟོས། དེ་བཞིན། ཧོང་ཀོང་དང་མེ་ཀའོ། ཐེ་ཝན་བཅས་ཀྱི་དཀའ་ངལ་རྣམས་ནི་བློ་མཐུན་ཏུན་ཞོ་ཕིན་གྱི་བློ་གྲོས་ཅན་གྱི་ལྟ་ཚུལ་ “རྒྱལ་ཁབ་གཅིག་ལ་ལམ་ལུགས་གཉིས་” ཅེས་པར་དང་ལེན་མི་བྱེད་པས་དཀའ་ངལ་འཕར་མ་ཞིག་ཆགས་པ་དང་། དེ་ཡིས་ཐེ་ཝན་ནང་དམངས་གཙོ་མདུན་སྐྱོད་ཚོགས་པ་ལ་(ཐེ་ཝན་གཞུང་འཛིན་གྱི་འོས་བསྡུའི་ནང་དུ་) རྒྱལ་ཁ་འཐོབ་ཡོད་པ་མ་ཟད། ཧོང་ཀོང་རང་བཙན་(ཧོང་ཀོང་རང་སྐྱོང་) གྱི་བསམ་བློ་དེ་ཇེ་ཆེར་འགྲོ་རུ་བཅུག་ཡོད། ད་དུང་ཧོང་ཀོང་དང་འབྲེལ་བའི་གནད་དོན་བྱེ་བྲག་པ་གཅིག་ནི། ཧོང་ཀོང་གི་དཔེ་དེབ་འཚོང་མཁན་རྣམས་ཁྲིམས་མཐུན་མིན་པའི་སྒོ་ནས་རྒྱ་ནག་རྒྱལ་ནང་དུ་བཙན་འཁྲིད་བྱས་པ་ཡིས་ཐད་ཀར་ “རྒྱལ་ཁབ་གཅིག་ལ་ལམ་ལུགས་གཉིས་” ཀྱི་སྲིད་བྱུས་དེར་དོ་ཕོག་བཏང་ཡོད།

དཔལ་འབྱོར་གྱི་ཐད་ལ་མཚོན་ན། ཁྱེད་ཉིད་རྒྱལ་ཁབ་ཀྱི་དངུལ་རྩིས་དང་དཔལ་འབྱོར་ལས་དོན་གྱི་སྡེ་ཚན་གཙོ་བོ་རྣམས་ཀྱི་མགོ་འཁྲིད་ཡིན་པའི་ཆ་ནས། ཁེ་ལས་ཆེ་ཆུང་རྣམས་གོང་འཕེལ་གྱི་སྲིད་བྱུས་ནང་ཁྱེད་ཀྱིས་ཐད་ཀར་ཐེ་ཇུས་བྱས་པ་དེ་ཡིས་མ་ཤེར་(stock) ཁྲོམ་ར་དང་རྒྱུ་ནོར་(property)ཁྲོམ་ར་དེ་བརྟན་ལྷིང་མེད་པ་བཟོས་པར་བརྟེན་མི་སེར་དཀྱུས་མ་བརྒྱ་ཕྲག་སྟོང་ཕྲག་མང་པོའི་རྒྱུ་ནོར་རྣམས་སྟོང་ནས་གྱོང་གུད་ཆེན་པོ་ཕོག་ཡོད། དགོས་མཁོ་ཟུར་བཀོལ་བཅོས་སྒྱུར་(supply side reforms) དང་ཐོན་སྐྱེད་མང་མཐའི་ཚད་ཀྱི་སྲིད་བྱུས་(production capacity policies) རྣམས་ཀྱིས་སྲིད་གཞུང་འོག་གི་ཚོང་ལས་ཁང་དག་ཏུ་ལས་མེད་ཀྱི་གྲངས་མང་པོ་འཕར་བ་དང་། སྒེར་བདག་ཅན་གྱི་ཚོང་ལས་ཁང་རྣམས་སྒོ་བརྒྱབ་པ་ལའང་བརྟེན་ནས་ལས་མེད་ཀྱི་གྲངས་ཇེ་མང་དུ་འགྱུར་བ་རེད། “ལམ་གཅིག་དང་ས་རྒྱུད་(སྐ་རགས་) གཅིག་” ཅེས་པའི་ལས་འཆར་གྱིས་ཕྱི་དངུལ་བརྗེ་ལེན་གྱི་ཟུར་བཅད་(foreign exchange reserve) དངུལ་འབོར་ཧ་ཅང་མང་པོ་ཞིག་ཁེ་འབབ་གང་ཡང་མེད་པའི་ཐོག་ནས་ཟིང་འཁྲུག་ཅན་གྱི་རྒྱལ་ཁབ་དང་ས་ཁུལ་རྣམས་སུ་འཇོག་དགོས་པ་ཆགས། ཕྱི་དངུལ་བརྗེ་ལེན་ཟུར་བཅད་(foreign exchange reserve) ཀྱི་ཉེར་སྤྱོད་མང་སྐྱོན་དང་རྒྱ་ནག་གི་དངུལ་གྱི་འཛའ་ཆག་རྒྱུན་འཁོར་(renminbi devaluation cycle)དག་གིས་ཚང་མའི་གདེང་སྤོབས་བརླག་པ་ལ་བརྟེན་ཏེ། རྒྱལ་ཡོངས་ཀྱི་དཔལ་འབྱོར་གྱི་གནས་སྟངས་དེ་ནི་ཉམས་སྐྱོན་གྱི་མཐའ་ཟུར་ཞིག་ཏུ་བསླེབས་ཡོད། མི་མང་རྣམས་ལ་འགྱུར་བ་ཞིག་འདོད་ཀྱི་ཡོད།

ལྟ་གྲུབ་ཀྱི་ཐད་ལ་མཚོན་ན། ཁྱེད་ཀྱིས་ “(གསར་འགྱུར་)བརྒྱུད་ལམ་རྣམས་གུང་ཁྲན་ཏང་གི་ངོ་བོར་” ནན་བཤད་བྱས་པ་དེས་མི་མང་ཚབ་མཚོན་གྱི་(གསར་འགྱུར་) བརྒྱུད་ལམ་གྱི་ཁྱད་ཆོས་ལ་བརྩི་མེད་སྣང་ཆུང་དུ་བཏང་སྟེ་རྒྱལ་ཁབ་(མི་མངས་)་ཡོངས་རྫོགས་ཧང་སང་དགོས་པར་ཆགས། ད་དུང་ཁྱེད་ནས་ཀྲའོ་ཞི་ཕིང་(Zhou Xiaoping) དང་ཧོ་ཁིན་ཧྥང་(Hua Qianfang) གཉིས་རིག་རྩལ་གྱི་འཐུས་ཚབ་ཏུ་བསྐོས་པ་དེས་རྩོམ་པ་པོ་དང་སྒྱུ་རྩལ་བ་གྲངས་ལས་འདས་པ་ཞིག་ལ་བློ་ཕམ་བྱུང་ཡོད། ད་དུང་ཁྱེད་ཀྱིས་རིག་གཞུང་སྡེ་ཁག་ནས་ཁྱེད་ལ་བསྟོད་གླུ་བླངས་པ་རྣམས་ཐད་ཀར་སྣང་མེད་དུ་སྐྱུར་བ་དང་། ཁྱེད་ཀྱི་གཟའ་ཟླའི་པེན་ལི་ཡོན་གྱི་མིང་སྲིང་ནི་རྒྱ་གཞུང་བརྙན་འཕྲིན་ལས་ཁང་གི་དཔྱིད་ཀྱི་དུས་སྟོན་ཆེན་མོའི་སྣེ་འཁྲིད་པ་དང་བཀོད་སྒྲིག་པར་བསྐོས་པ་དེ་ཡིས་གྲགས་ཆེ་བའི་དུས་སྟོན་དེ་ཡང་ཁྱེད་རང་སྒེར་གྱི་དྲིལ་བསྒྲགས་ཀྱི་ལག་ཆ་ཞིག་ཏུ་འགྱུར། འདི་ལྟ་བུའི་སྐྱེ་བུ་བྱེ་བྲག་གི་ཆོ་ག་ལ་ཁྱེད་ཀྱིས་སྣང་མེད་དང་། དབུས་གཞུང་གི་“ཚུལ་མཐུན་མིན་པའི་གྲོས་བསྡུར་” བཀག་འགོག་བྱེད་པ་། “འབོད་སྒྲ་གཅིག་གི་ཚོགས་པའི་”ཐབས་བྱུས་བཅས་ཀྱིས་ང་ཚོ་རིག་གནས་གསར་བརྗེ་ཆེན་མོའི་ནང་དུ་མྱངས་ཟིན་པ་རྣམས་ཀྱིས་གསང་བའི་སྒོ་ནས་སེམས་ཚབས་བྱེད་ཐུབ་མ་སོང་། ང་ཚོའི་ཏང་དང་ཀྲུང་དབྱངས། ཀྲུང་དབྱངས་མི་དམངས་བཅས་ཀྱིས་གོད་ཆག་ཅན་གྱི་ལོ་ངོ་བཅུ་ཕྲག་གཞན་གཅིག་བཟོད་གླགས་ཐུབ་ཐབས་མི་འདུག

བློ་མཐུན་ཞི་ཅིན་ཕིན་ལགས། ཁྱེད་ཀྱིས་ལྐོག་ཟ་རུལ་སུངས་འགོག་རྒྱུའི་ལས་འགུལ་གནོན་ཤུགས་ཆེན་པོ་ཞིག་ལག་བསྟར་བྱེད་བཞིན་པ་དེས་གུང་ཁྲན་ཏང་ནང་གི་གནོད་འཚེ་ཅན་གྱི་རང་གཤིས་དེ་(ཡོ་བསྲང་) སྐྱོན་སེལ་བྱེད་པ་ལ་ཕན་གྲོགས་བྱུང་ཡོད་ན་ཡང་། སྐྱོར་བྱེད་ཀྱི་ཐབས་བྱུས་སམ་དམིགས་ཡུལ་གང་ཡང་མེད་པར་བརྟེན་སྲིད་གཞུང་གི་རིམ་པ་ཚང་མའི་ནང་དུ་ “འགན་འཁུར་མེད་པའི་(གནས་ཚུལ་)་” མང་པོ་ཞིག་ཐོན་བཞིན་པ་དང་སྦྲགས་ནས་ལས་བྱེད་རྣམས་ལས་དོན་བྱེད་པ་ལ་ཧ་ཅང་འཇིགས་དགོས་པར་འགྱུར། མི་དམངས་ནས་མི་འདོད་པའི་རྣམ་འགྱུར་འཛེམ་ཟོན་མེད་པར་བསྟན་པ་དང་། ང་ཚོའི་(རྒྱལ་ཁབ་)དཔལ་འབྱོར་གྱི་ཉམས་རྒུད་ནི་ཇེ་ཞན་ཇེ་སྡུག་རེད། མ་ཟད་ང་ཚོས་ལྐོག་ཟ་རུལ་སུངས་འགོག་རྒྱུའི་ལས་འགུལ་གྱི་དམིགས་ཡུལ་གཙོ་བོ་ནི། དབང་ཆ་འཐབ་རྩོད་ཁོ་ན་ཞིག་ཏུ་མཐོང་གིན་འདུག དེར་བརྟེན་གུང་ཁྲན་ཏང་ནང་ངོས་སུ་འདི་ལྟ་བུའི་དབང་ཆ་འཐབ་རྩོད་ཀྱིས་ཁྱེད་དང་ཁྱེད་ཀྱི་ནང་མིའི་བདེ་འཇགས་ལའང་ཉེན་ཁའང་འབྱུང་སྲིད་པས་ང་ཚོར་སེམས་ཁྲལ་འདུག

དེ་འདྲ་སོང་ཙང་བློ་མཐུན་ཞི་ཅིན་ཕིན་ལགས། ཁྱེད་ལ་མ་འོངས་ལོ་ཟླའི་ནང་དུ་གུང་ཁྲན་ཏང་དང་ཀྲུང་དབྱངས་ཀྱི་སྣེ་འཁྲིད་ཐུབ་པའི་འཇོན་ནུས་གང་ཡང་ལྡན་མི་འདུག་པ་ང་ཚོས་ཚོར་ཞིང་། ཧྲུ་ཅི་ཡི་གོ་གནས་དེ་ནི་ད་ཆ་ཁྱེད་ལ་འཚམས་པོ་མེད་པ་ང་ཚོར་ཡིད་ཆེས་ཡོད། དེར་བརྟེན་ཏང་(དམར་ཤོག་ཚོགས་པའི་)གི་རྩ་དོན་དང་ཀྲུང་དབྱངས་ཀྱི་ཞི་བདེ་ཡུན་གནས། རྒྱལ་ཁབ་སྲ་བརྟན། ཁྱེད་རང་སྒེར་དང་ནང་མི་བཅས་ཀྱི་ཆེད་དུ་ང་ཚོས་ཁྱེད་ཉིད་ཏང་(དམར་ཤོག་ཚོགས་པ་) དང་སྲིད་གཞུང་མགོ་འཁྲིད་ཀྱི་ལས་གནས་ཐམས་ཅད་ནས་དགོངས་ཞུ་དང་། ཏང་ཨུ་ཡོན་ལྷན་ཁང་དང་ཀྲུང་དབྱངས་མི་མངས་ནས་མ་འོངས་ལོ་ཟླའི་ནང་དུ་སྙིང་སྟོབས་ཆེན་པོས་སྣེ་འཁྲིད་ཐུབ་མཁན་གྱི་དྲང་ཚུགས་ཅན་གྱི་དབུ་འཁྲིད་གཅིག་འདེམ་དུ་འཇུག་རོགས་ཅེས་ཞུ་རྒྱུ་ཡིན།

ལར་ཞེན་ཅན་གྱི་ཏང་མི་རྣམས་ཀྱིས། ཕྱི་ལོ་ ༢༠༡༦ ཟླ་བ་ ༣ པར།

མ་རྩོམ་འབྲེལ་ཐག http://chinadigitaltimes.net/2016/03/open-letter-devoted-party-members-urge-xis-resignation/