རྒྱ་ནག་གཞུང་གིས་བོད་དང་བོད་མིའི་ངོ་བོ་རྩ་མེད་བཟོ་ཐབས་ཀྱི་དབང་བསྒྱུར་སྲིད་ཇུས་མུ་མཐུད་ལག་ལེན་སྟར་བཞིན་པའི་སྐབས་འདིར། བོད་མི་ཚོས་དམངས་གཙོའི་འོས་བསྡུ་ལ་བརྟེན་ནས་བོད་རྒྱའི་ཆབ་སྲིད་དཀའ་རྙོག་སེལ་རྒྱུ་གཏན་འཁེལ་ཡོད་པ་རེད།
དེ་རིང་སྔ་དྲོའི་ཆུ་ཚོད་ ༡༡ སྟེང་གངས་སྐྱིད་ལྷག་པ་ཚེ་རིང་ཚོགས་ཁང་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་འབྲེལ་མཐུད་དང་རྒྱལ་སྤྱིའི་བོད་དོན་ལས་འགུལ་ཁང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གསུམ་མཉམ་འབྲེལ་གོ་སྒྲིག་འོག་བོད་མིའི་འོས་བསྡུ་རྟོག་ཞིབ་པ་རྣམས་ཀྱིས་གསལ་འགོད་གསལ་བསྒྲགས་ཤིག་བསྐྱངས་སོང་།
ལྷན་ཚོགས་སྟེང་འཇར་མན་གྲོས་ཚོགས་འཐུས་མི་སྐུ་ཞབས་ཐོ་མ་སི་མ་ནན་ (Thomas Mann) ལགས་དང་། ཧྥ་རན་སིའི་གྲོས་ཚོགས་འཐུས་མི་ཨན་ཌ་རི་གྷ་ཊོ་ལེན་ (Andre Gattolin) ལགས། ཁེ་ན་ཌའི་གྲོས་ཚོགས་འཐུས་མི་ཟུར་པ་ཌེ་ནེ་ནོ་ (Di Nino) ཨོ་སི་ཊོ་ལེ་ཡའི་གྲོས་ཚོགས་འཐུས་མི་ལྕམ་ལེ་ས་སེན་ཧ་ (Lisa Singh) ལགས། ཧང་གྷ་རེའི་གྲོས་ཚོགས་འཐུས་མི་ལྕམ་ཨན་ན་ཧྥི་རིན་ཙེ་ (Anna Ferenczy) ལགས། ཡུ་རོབ་གྲོས་ཚོགས་འཐུས་མི་ཇོན་བྷ་ཀིར་ (John Baker) ལགས་བཅས་ཀྱི་གཙོས་པའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་མི་ཁག་སེ་ (Matteo Mecacci) ལགས་དང་འགན་འཛིན་གཞོན་པ་བུ་ཆུང་ཚེ་རིང་ལགས་བཅས་སོགས་ཕེབས་འདུག
རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་མི་ཁག་སེ་ལགས་ཀྱིས་རྒྱལ་སྤྱིའི་གྲོས་ཚོགས་འཐུས་མི་རྣམས་ཀྱིས་བོད་མིའི་འོས་བསྡུ་ལ་རྟོག་ཞིབ་གནང་བའི་དགོས་དམིགས་སྐོར་ངོ་སྤྲོད་གནང་རྗེས། འཇར་མན་གྲོས་ཚོགས་འཐུས་མི་སྐུ་ཞབས་ཐོ་མ་སི་མ་ནན་ལགས་ཀྱིས་བོད་མིའི་འོས་བསྡུ་ལ་རྟོག་ཞིབ་གནང་བའི་སྐོར་གྱི་བསྒྲགས་གཏམ་ཞིག་སྒྲོག་སྦྱང་གནང་བའི་ནང་། རྒྱ་ནག་གཞུང་གིས་མུ་མཐུད་བོད་ནང་བོད་མི་ས་ཡ་དྲུག་གི་རང་དབང་དམངས་གཙོའི་མངོན་འདོད་དེ་བཞིན་ངོས་ལེན་བྱེད་ཀྱི་མེད་ནའང་། འཛམ་གླིང་གི་རང་དབང་ཡུལ་ལུང་གང་སའི་བོད་མི་ཚོར་དམངས་གཙོའི་འོས་བསྡུ་བརྒྱུད་མཛེས་སྡུག་གི་འབྱུང་འགྱུར་ཞིག་འཐོབ་ཀྱི་ཡོད་པར་ང་ཚོ་རྒྱལ་སྤྱིའི་གྲོས་ཚོགས་འཐུས་མི་ཚོ་ཧ་ཅང་དགའ་བོ་བྱུང་།
བཙན་བྱོལ་བོད་མི་བྱིངས་དམངས་གཙོའི་འོས་བསྡུའི་ལས་རིམ་ནང་མཉམ་ཞུགས་བྱས་པར་ང་ཚོས་བསྔགས་བརྗོད་འོས་པ་ཞིག་ཏུ་མཐོང་གི་ཡོད། རྒྱ་ནག་གཞུང་གིས་བོད་དང་བོད་མིའི་ངོ་བོ་རྩ་མེད་བཟོ་ཐབས་ཀྱི་དབང་བསྒྱུར་སྲིད་ཇུས་མུ་མཐུད་ལག་ལེན་སྟར་བཞིན་པའི་སྐབས་འདིར། བོད་མི་ཚོས་དམངས་གཙོའི་འོས་བསྡུ་ལ་བརྟེན་ནས་བོད་རྒྱའི་ཆབ་སྲིད་དཀའ་རྙོག་སེལ་རྒྱུ་གཏན་འཁེལ་ཡོད་པ་རེད།
ང་ཚོས་རྒྱལ་སྤྱིའི་སྤྱི་ཚོགས་དང་གྲོས་ཚོགས། སྲིད་གཞུང་དང་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་ཡོངས་ནས་བཙན་བྱོལ་བོད་མིའི་སྤྱི་ཚོགས་ཀྱིས་འཚེ་མེད་ཞི་བ་དང་གྲོས་མོལ་གྱི་ལམ་ནས་འདས་པའི་མི་ལོ་དྲུག་བཅུ་ལྷག་རིང་གི་བོད་རྒྱའི་རྩོད་རྙོག་སེལ་ཐབས་འཚོལ་བཞིན་པར་རྒྱབ་སྐྱོར་ཡོང་བའི་འབོད་སྐུལ་ཞུ་ཡི་ཡོད།
བཙན་བྱོལ་བོད་མིའི་སྲིད་སྐྱོང་འོས་བསྡུའི་ཁྲོད་དུ་བཙན་བྱོལ་བོད་མི་བྱིངས་ལ་སྲིད་སྐྱོང་འོས་མིར་བཞེངས་མཁན་སྲིད་སྐྱོང་ལས་ཐོག་བློ་བཟང་སེང་གེ་མཆོག་དང་ཚོགས་གཙོ་སྤེན་པ་ཚེ་རིང་གཉིས་ལ་འོས་འཕེན་པའི་གོ་སྐབས་ཐོབ་ཡོད་པ་དང་། ༢༠༡༥ ལོའི་ཕྱི་ཟླ་ ༡༠ པའི་ནང་སྲིད་སྐྱོང་འོས་བསྡུའི་སྔོན་འགྲོའི་སྐབས་སུ་སྲིད་སྐྱོང་འོས་མི་གཉིས་ཀྱི་འོས་འདེམས་དེ་བཞིན་ཅུང་འཁྲུག་ཆ་དོད་པོ་ཆགས་ཡོད་པ་དང་། དེའི་རྗེས་སྲིད་སྐྱོང་འོས་མི་གཉིས་ནས་དངོས་གཞིའི་འོས་བསྡུ་ཚུགས་རག་བར་བཙན་བྱོལ་མིའི་འདུ་གནས་འཛམ་གླིང་ཤར་ནུབ་ཡུལ་གྲུ་ཁག་ཏུ་ཕྱིན་ཏེ་གཞི་རྒྱ་ཆེ་བའི་བྱ་འགུལ་སྤེལ་བ་དང་། སྤྱི་འཐུས་འོས་འདེམས་ཁྲོད་དུ་ཆོལ་ཁ་གསུམ་ནས་འོས་མི་གསར་བ་མང་པོ་ཞིག་མཉམ་ཞུགས་བྱས་ཡོད་ནའང་། ང་ཚོ་རྟོག་ཞིབ་ཚན་པའི་ངོས་ནས་བཙན་བྱོལ་བོད་མིའི་འོས་བསྡུའི་སྒྲིག་སྲོལ་དང་འགལ་བའི་གནད་དོན་གང་ཡང་མཐོང་མ་སོང་།
ཕྱི་ཟླ་ ༤ བའི་ཚེས་ ༢༧ ཉིན་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་རྗེས་སུ། ང་ཚོ་བོད་མིའི་འོས་བསྡུ་རྟོག་ཞིབ་ཚན་པས། ད་ལན་གྱི་འོས་བསྡུའི་འགྲོ་གྲོན་དང་། བུད་མེད་འོས་ཞུགས། ཆོས་ལུགས་ཆོལ་ཁའི་འཐུས་མིའི་འོས་བསྡུའི་སྒྲིག་སྲོལ། འཛམ་གླིང་གི་རང་དབང་ཡུལ་ལུང་གང་སའི་བོད་མི་བྱིངས་འོས་བསྡུའི་ནང་མཉམ་ཞུགས་ཐུབ་ཡོད་མེད་སོགས་ཀྱི་རྟོག་ཞིབ་གྲུབ་འབྲས་གསལ་བསྒྲགས་ཞུ་རྒྱུ་ཡིན།
རྒྱ་གར་གཞུང་མང་གི་ངོས་ནས་བཙན་བྱོལ་བོད་མི་ཚོར་སོ་སོའི་རིག་གནས་དང་ཡུལ་སྲོལ་གོམས་གཤིས་སོགས་ཡར་རྒྱས་གཏོང་བའི་མཐུན་རྐྱེན་གནང་བར་ང་ཚོས་ཐུགས་རྗེ་ཆེ་ཞུ་རྒྱུ་མ་ཟད། བོད་མིའི་སྒྲིག་འཛུགས་དང་། ལྷག་དོན་བོད་མིའི་གྲོས་ཚོགས་དང་དབུས་འོས་བསྡུ་ལས་ཁང་གིས་ང་ཚོར་བོད་མིའི་འོས་བསྡུ་ལ་རྟོག་ཞིབ་བྱེད་བཅུག་པར་ང་ཚོས་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་འཁོད་འདུག
དེའི་རྗེས་དྲི་བ་དྲིས་ལན་སྐབས་སུ། གསར་འགོད་པས་རྒྱ་གར་ལྟ་བུར་ཆ་མཚོན་ན་སྲིད་བློན་འོས་མི་མང་པོ་བཏོན་ཆོག་གི་ཡོད་པ་དང་། མི་མང་གིས་སྲིད་བློན་འོས་མི་མང་པོའི་ཁྲོད་ནས་སོ་སོའི་མོས་འདུན་ལྟར་འདེམས་ཆོག་གི་ཡོད་པ་མ་ཟད། འོས་མི་དེ་ཚོར་མོས་འདུན་མེད་ཚེ། མ་འདམ་ནའང་ཆོག་གི་ཡོད་པ་རེད། བཙན་བྱོལ་བོད་མིའི་སྔོན་འགྲོའི་འོས་བསྡུའི་སྐབས་སུ་སྲིད་སྐྱོང་འོས་མི་ལྔ་བཏོན་ཡོད་ནའང་། དངོས་གཞིའི་སྐབས་སུ་སྲིད་སྐྱོང་འོས་མི་གཉིས་མ་གཏོགས་བཏོན་ཆོག་གི་མེད་སྟབས། ང་ཚོའི་འོས་འདེམས་མི་མང་ལ་སྲིད་སྐྱོང་འོས་མིའི་འདམ་ག་མང་པོ་མེད་པའམ། སྲིད་སྐྱོང་འོས་མི་ཉུང་དུ་བཏང་བའི་གནས་སྟངས་ཤིག་མཐོང་གི་ཡོད་མེད་དྲིས་པར། ཨོ་སི་ཊོ་ལེ་ཡའི་གྲོས་ཚོགས་འཐུས་མི་ལྕམ་ལེ་ས་སེན་ཧ་ལགས་ཀྱིས། ང་ཚོ་ཨོ་སི་ཊོ་ལེ་ཡར་ཆ་མཚོན་ན། སྲིད་འཛིན་འོས་མི་ག་ཚོད་བཏོན་པ་ཡིན་ནའང་། འོས་ཤོག་ངོས་ཀྱི་སྲིད་འཛིན་འོས་གཞི་དེ་ཚོར་མོས་འདུན་ཡོད་མེད་གང་ལྟར། དེ་ཚོའི་གྲོས་ནས་འོས་མི་གཅིག་འདམ་དགོས་ཀྱི་ཡོད་པ་དང་། གལ་སྲིད་འོས་ཤོག་ངོས་ཀྱི་འོས་མི་གཅིག་ཀྱང་མ་འདམ་པ་ཡིན་ན་ཆད་པ་གཅོད་ཀྱི་ཡོད་པ་ལྟར། ཡུལ་ལུང་སོ་སོའི་དམངས་གཙོའི་འོས་བསྡུའི་སྒྲིག་སྲོལ་འདྲ་གི་མེད་སྐོར་སོགས་བརྗོད་སོང་།
གསར་འགོད་པ། པདྨ་རྒྱལ།
