འཛམ་གླིང་གི་མི་འབོར་མང་ཤོས་དང་བཏུང་ཆུ་བཙོག་ཤོས།

རྒྱ་གར་ནང་ཡུལ་མི་ཁྱོན་ས་ཡ་དོན་བདུན་དང་འབུམ་བདུན་ཁྲི་བདུན་སྟོང་བདུན་བདུན་བརྒྱ་གོ་བདུན་ལ་ (༧༥,༧༧༧,༩༩༧) བཏུང་ཆུ་གཙང་མའི་ཐོན་ཁུངས་ཆད་པའི་དཀའ་ཁག་ལ་འཕྲད་ཀྱི་ཡོད་འདུག

དེ་རིང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱལ་སྤྱིའི་བཏུང་ཆུའི་མཐུན་འགྱུར་བདེ་རྩ་ཁང་ (Water Aid) གིས་སྙན་ཐོ་ཞིག་བཏོན་པའི་ནང་། རྒྱ་གར་ནི་འཛམ་གླིང་སྟེང་མི་འབོར་མང་ཤོས་དང་བཏུང་ཆུ་བཙོག་ཤོས་དེ་ཆགས་ཀྱི་ཡོད་སྐོར་བརྗོད་འདུག

སྙན་ཐོ་དེའི་ནང་མུ་མཐུད་དུ། དེང་སྐབས་མི་འབོར་ས་ཡ་ ༧༨.༨ ལྷག་ཟིན་པའི་རྒྱ་གར་མི་མང་གིས་རིན་གོང་མཐོ་པོ་སྤྲད་ནས་གཏེར་ཆུ་ཉོ་བའམ། ཡང་ན་རྫས་འགྱུར་སྣ་ཚོགས་འདྲེས་པའི་བཙོག་ཆུ་བཏུང་དགོས་ཆགས་ཡོད་པ་དང་། གནས་བབ་དེས་འཛམ་གླིང་སྟེང་བཏུང་ཆུ་གཙང་མ་རག་གི་མེད་པའི་མི་འབོར་ས་ཡ་ ༦༥༠ བརྒྱ་ཆ་ ༡༠ ལྷག་ཟིན་གྱི་ཡོད་པ་དང་། གླིང་ཆེན་ཨ་ཧྥི་རེ་ཁ་དང་རྒྱ་ནག་གཉིས་ནང་ཡུལ་མི་ས་ཡ་ ༦༣ ལྷག་ལ་བཏུང་ཆུ་གཙང་མའི་ཐོན་ཁུངས་མེད་ཅིང་། ཕྱི་ལོ་ ༡༩༩༠ རྗེས་སུ་འཛམ་གླིང་ཡུལ་གྲུ་གང་སར་བཏུང་ཆུ་གཙང་མ་རག་གི་མེད་པའི་གནས་བབ་ཅུང་ཡར་རྒྱས་ཕྱིན་ཏེ་འཛམ་གླིང་མི་འབོར་ཐེར་འབུམ་ ༢.༦ ལ་གཙང་ཆུ་རག་གི་ཡོད་ནའང་། ད་དུང་བཙོག་ཆུ་ལ་བརྟེན་ནས་འཛམ་གླིང་མི་འབོར་བརྒྱ་ཆ་ ༡༠ ནང་གི་ ༡ ལ་ནད་ཡམས་འདྲ་མིན་སྣ་ཚོགས་འགོས་ཁྱབ་འབྱུང་བཞིན་ཡོད་པ་རེད། རྒྱ་གར་ནང་གཙང་ཆུའི་ཐོན་ཁུངས་དོ་དམ་དང་གཙང་ཆུ་མཁོ་འདྲེན་ལས་འཆར་སོགས་གང་ཡང་ལེགས་པོ་མེད་པ་དང་། ཧ་ལམ་རྒྱ་གར་མི་མང་བྱིངས་ལ་གཙང་ཆུའི་ཐོན་ཁུངས་དཀོན་སྟབས། འཛམ་གླིང་ཤར་ནུབ་ཀྱི་རྒྱལ་ཁབ་ཕ་ཕཱི་ནི་ཝ་ཇེ་ནི་ (Papua New Guinea) དང་ཨི་ཁུ་ཊོ་རིད་ཇེ་ནི་ (Equatorial Guinea)། ཨན་གྷོ་ལ་ (Angola) དང་ཆ་ཌི་ (Chad)། མཱོ་རྫམ་བྷེ་ཁི་ (Mozambique) སོགས་ཀྱི་གྲས་ནས་མི་འབོར་མང་ཤོས་དང་བཏུང་ཆུ་བཙོག་ཤོས་དེ་རྒྱ་གར་ཆགས་ཀྱི་ཡོད་པ་དང་། ཕ་ཕཱི་ནི་ཝ་ཇེ་ནི་རྒྱལ་ཁབ་ནང་མི་འབོར་ས་ཡ་ ༤.༥ ལ་གཙང་ཆུའི་ཐོན་ཁུངས་མེད་སྟབས། ཁོ་ཚོས་ཉིན་རེའི་འཚོ་བའི་ཡོང་འབབ་ལས་བརྒྱ་ཆ་ ༥༠ བཏུང་ཆུར་གཏོང་གི་ཡོད་པ་དང་། གནམ་གཤིས་འགྱུར་ལྡོག་དང་རྒྱ་མཚོ་འཕྱུར་བ་སོགས་ཀྱི་རྐྱེན་པས། མིའི་བཏུང་ཆུ་དང་མིའི་འཚོ་གནས་ལ་འཇིག་ཉེན་ཆེན་པོ་འབྱུང་གི་ཡོད་སྐོར་སོགས་འཁོད་འདུག

གནས་ཚུལ་ལྟར་ན། རྒྱ་གར་ནང་ཉིན་རེའི་བཏུང་ཆུ་རྒྱ་མ་ ༥༠ ལ་ཆ་སྙོམ་ཧིན་སྒོར་ ༤༧ གཏོང་གི་ཡོད་པ་དེས་རྒྱ་གར་མི་མང་གི་ཉིན་རེའི་འཚོ་བའི་ཡོང་འབབ་ལས་བརྒྱ་ཆ་ ༢༠ ཟིན་གྱི་ཡོད་པ་དང་། གནས་བབ་དེ་དབྱིན་ཇི་དང་བསྡུར་ན། དབྱིན་ཡུལ་དུ་བཏུང་ཆུ་རྒྱ་མ་ ༥༠ ལ་ཆ་སྙོམ་ཧིན་སྒོར་ ༦ ལྷག་ལས་གཏོང་གི་མེད་པ་དང་། བཙོག་ཆུ་ལ་བརྟེན་ནས་རྒྱ་གར་ནང་ལོ་རེར་མི་མང་བགྲང་ལས་འདས་པར་ནམ་ཡམས་འགོས་ཁྱབ་འབྱུང་གི་ཡོད་པ་དང་། རྒྱལ་སྤྱིའི་སྟེང་ན་ནིང་གཅིག་པུར་འཁྲུ་ནད་དང་བཤལ་ནད་ཀྱི་རྐྱེན་པས་བྱིས་པ་ཐེར་འབུམ་ ༣༡༥ ལྷག་འདས་གྲོངས་ཕྱིན་པའི་གྲས་ཀྱི་བྱིས་པ་བུམ་ ༡༤༠ རྒྱ་གར་ནང་རྐྱེན་འདས་སུ་གྱུར་ཡོད་འདུག

རྒྱ་གར་གྱི་ཆུ་བོ་ཁག་འབག་བཙོག་ཆགས་པ་དང་ལྷག་པར་དུ་ཞིང་བ་མང་ཚོགས་ཀྱིས་ཆུ་སྦུག་ལ་རྟགས་དཔྱད་དོ་དམ་ལེགས་པོ་མ་བྱས་པའི་རྐྱེན་པས། ས་འོག་གི་ཆུ་བྲི་ནས་བཏུང་ཆུའི་དཀའ་ངལ་ལ་འཕྲད་ཀྱི་ཡོད་པ་ལྟར། གནམ་གཤིས་དྲོ་གྲང་གི་འགྱུར་ལྡོག་ལ་བརྟེན་ནས་འཛམ་གླིང་ཡུལ་གྲུ་ཁག་མང་པོ་ཞིག་གི་ཆུའི་འབབ་རྒྱུན་ཉུང་དུ་སོང་ནས་བཏང་ཆུའི་དཀའ་ཁག་གཅིག་མཚུངས་ལ་འཕྲད་ཀྱི་ཡོད་འདུག

འདས་པའི་ལོ་ངོ་ ༡༥ རིང་རྒྱ་གར་གཞུང་གིས་གྲོང་དང་གྲོང་ཁྱེར། ཞིང་ལས་དང་བཟོ་ལས་ས་ཁུལ་ཁག་ནང་རྒྱ་གར་གྱི་ཆུའི་ཐོན་འབབ་བརྒྱ་ཆ་ ༥༠ མཁོ་འདོན་ཐུབ་པར་རེ་ལྟོས་བྱས་ཡོད་འདུག

གསར་འགོད་པ། པདྨ་རྒྱལ།