མ་འོངས་པར་བོད་པ་སྐྱབས་བཅོལ་ཞུ་མཁན་ཚོར་དཀའ་ངལ་ཆེ་རུ་འགྲོ་སྲིད་པ་རེད།

དེ་རིང་སྤྱི་འཐུས་གྲོས་ཚོགས་ནང་ཡུ་རོབ་ནང་གི་བོད་པ་སྐྱབས་བཅོལ་བའི་སྐོར་ལ་དྲི་བ་དྲིས་ལན་སྐབས་སྲིད་སྐྱོང་མཆོག་གིས་ད་སྔ་ཡིག་ཆ་ནག་པོ་ཆགས་ཡོད་པ་དག་ལ་དཀའ་ངལ་ཡོད་པ་དངོས་ཡོད་ཡིན་ནའང་། མ་འོངས་པར་གསར་དུ་བོད་པ་སྐྱབས་བཅོལ་ཞུ་མཁན་ཚོའི་ཐོག་དེ་ལས་ལྷག་གི་དཀའ་ངལ་འཕྲད་སྲིད་སྐྱོར་གསུངས་སོང་།

དེ་རིང་སྔ་དྲོར་བོད་མི་མང་སྤྱི་འཐུས་གྲོས་ཚོགས་ནང་ཕྱི་དྲིལ་ལས་ཁུངས་ཀྱི་སྔོན་རྩིས་གཏན་འབེབས་དང་འབྲེལ་ཏེ། སྤྱི་འཐུས་ཁག་ཅིག་གིས་ཡུ་རོབ་ནང་གི་བོད་པ་སྐྱབས་བཅོལ་བའི་དཀའ་ངལ་སེལ་ཕྱོགས་སྐོར་དང་། སྔར་ལོའི་ཕྱི་ཟླ་ ༡༢ པའི་ནང་བོད་པ་སྐྱབས་བཅོལ་བ་སྐོར་ཞིག་ཊར་ཀའེ་(Turkey)ནང་འབྱོར་ཡོད་པ། དེ་བཞིན་སུད་སིའི་ནང་གི་བོད་པ་སྐྱབས་བཅོལ་བ་ཚོའི་སྐྱབས་བཅོལ་ལག་འཁྱེར་སྟེང་དེ་སྔོན་ཆད་བོད་ཞེས་བཀོད་ཡོད་ཀྱང་། སྔར་ལོའི་ལོ་མཇུག་ཙམ་ནས་ལག་འཁྱེར་དེ་དག་ཡར་བསྡུས་ཏེ་རྒྱ་ནག་(China)ཞེས་བཀོད་ཡོད་པ་བཅས་ཀྱི་སྐོར་བཀའ་ཤག་ལ་དྲི་བ་བཏོན་པར། སྲིད་སྐྱོང་མཆོག་གིས་ཊར་ཀའེ་དང་སུད་སིའི་ནང་གི་གནས་ཚུལ་དེ་གཉིས་ཐད་ལན་ཁ་གསལ་བསྐྱོན་མ་སོང་།

སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས། ཡུ་རོབ་ནང་བོད་པ་སྐྱབས་བཅོལ་བ་ཚོར་སྐྱབས་བཅོལ་མ་རག་པའི་དཀའ་ངལ་འཕྲད་བཞིན་སྟབས། ཁོ་ཚོ་ཨོ་སི་ཊོ་ལི་ཡ་དང་ཁེ་ན་ཌ་སོགས་རྒྱལ་ཁབ་གཞན་ནང་གནས་སྤོ་སྐྱབས་བཅོལ་ཞུ་བའི་ཐབས་ལམ་ཡོད་མེད་དྲི་བ་བཏོན་པའི་ལན་དུ། སྲིད་སྐྱོང་མཆོག་གིས་ཡུ་རོབ་རྒྱལ་ཁབ་ཁག་ནང་གི་བོད་པ་སྐྱབས་བཅོལ་མ་རག་པ་དེ་དག་ཁེ་ན་ཌ་དང་ཨོ་སི་ཊོ་ལི་ཡ་སོགས་རྒྱལ་ཁབ་གཞན་ནང་གཏོང་རྒྱུ་དེ་དཀའ་ལས་ཁག་པོ་ཡིན་པ་དང་། དེ་ནི་གཙོ་བོ་ཁེ་ན་ཌ་དང་ཨོ་སི་ཊོ་ལི་ཡའི་གཞུང་གི་སྲིད་བྱུས་ལངས་ཕྱོགས་ཐོག་ནས་ཐག་གཅོད་དགོས་པ་ཞིག་ཆགས་ཡོད་སྐོར་གསུངས་སོང་།

གོང་གསལ་དྲི་བའི་ལན་དང་འབྲེལ་ཏེ་སྲིད་སྐྱོང་མཆོག་གིས་ཡུ་རོབ་ནང་གི་བོད་པ་སྐྱབས་བཅོལ་བའི་སྤྱི་ཡོངས་གནས་སྟངས་སྐོར་གསུངས་དོན། “ ཡུ་རོབ་རྒྱལ་ཁབ་ཁ་ཤས་ནང་བོད་མི་ཚོར་ཡིག་ཆ་མ་རག་པའི་དཀའ་ངལ་ཡོད་པ་དངོས་ཡོད་གནས་ཚུལ་རེད། སྦེལ་རྗམ་དང་ནའེ་ཊར་ལན་ཌི་སོགས་ལ་དེ་སྔོན་ཡིན་ན་སྲིད་སྐྱོང་དང་ཕྱི་དྲིལ་བཀའ་བློན་སོགས་བཀའ་བློན་རྣམ་པ་སུ་ཕེབས་ནའང་ཕྱི་སྲིད་ལས་ཁུངས་དང་གནད་ཡོད་མི་སྣ། གྲོས་ཚོགས་འཐུས་མི། བོད་དོན་རྒྱབ་སྐྱོར་བ་སོགས་དང་མཇལ་ནས་ཞུས་པ་ཡིན། དེ་སྔ་སྲིད་སྐྱོང་དང་བཀའ་བློན་སུ་ཞིག་ཡུ་རོབ་ནང་ཕེབས་ཀྱང་རྒྱལ་ཁབ་སོ་སོའི་སྐྱབས་བཅོལ་ལས་ཁུངས་ཀྱི་འགན་འཛིན་ལ་ཐུག་ཐབས་བྱས་ཏེ། བོད་པའི་གནས་སྟངས་མ་འདྲ་བ་ཡིན་པ་དང་བོད་ནང་གི་གནས་ཚུལ། བོད་མི་ཆབ་སྲིད་སྐྱབས་བཅོལ་བའི་གནས་སྟངས་སོགས་ཞིབ་ཕྲ་ཞུས་ཡོད། ཁོ་རང་ཚོས་བཤད་སྟངས་ལ་བོད་པ་བརྒྱ་ཆ་ ༩༠ ལ་དགའ་ངལ་ཡོད་པ་མ་རེད། བརྒྱ་ཆ་ ༡༠ ཙམ་ལ་སྐྱབས་བཅོལ་མ་རག་གི་ཡོད་པ་མ་རེད། རྒྱལ་ཁབ་གཞན་ནས་ཡོང་བའི་མི་རིགས་གཞན་པ་ཚོར་བརྒྱ་ཆ་ ༥༠ ལ་སྐྱབས་བཅོལ་རག་གི་ཡོད་པ་མ་རེད་གསུང་གི་འདུག” ཅེས་དང་། “ བོད་མི་བཞི་བརྒྱ་ལ་དཀའ་ངལ་འཕྲད་པ་དཀའ་ངལ་ཆེན་པོ་རེད། ཤ་ཁྲག་གཅིག་པའི་བོད་རིགས་སྤུན་ཟླ་རེད། གོ་སྐབས་འདི་བརྒྱུད་ནས་དེ་དག་སྤྱི་ཡོངས་ལ་ཞུ་རྒྱུ་ག་རེ་ཡོད་ཟེར་ན། མ་འོངས་པར་བོད་པ་སྐྱབས་བཅོལ་ཞུ་མཁན་ཚོར་ཁྱོན་ཡོངས་ནས་དཀའ་ངལ་ཆེ་རུ་འགྲོ་སྲིད་པ་རེད། ད་སྔ་ཕར་འབྱོར་བ་ཚོ་འབྱོར་ཚར་བ་རེད། ད་ལྟ་ཕར་འགྲོ་རྒྱུར་གྲ་སྒྲིག་གནང་བཞིན་པ་ཚོས་ངེས་པར་དུ་དགོངས་པ་བཞེས་རོགས་གནང་། གང་ཡིན་ཟེར་ན། སུད་སི་གཞུང་གིས་སྙན་ཐོ་ཞིག་བཏོན་ཡོད་པ་རེད། སྙན་ཐོ་དེའི་ནང་རྒྱ་གར་ནང་བོད་པ་ཚོར་ཐོབ་ཐང་མང་པོ་ཡོད་པ་དང་། ཁྲིམས་ཐོག་ནས་ཀྱང་སྲུང་སྐྱོབ་ཡོད་པ་སོགས་གསལ་བསྡད་ཡོད་པ་རེད། དེའི་ཐོག་ལ་ཡུ་རོབ་རྒྱལ་ཁབ་ཁ་ཤས་ཀྱི་མི་སྣ་ཕེབས་ཏེ་ཞིབ་འཇུག་བྱས་པ་རེད། སྐབས་དེར་ང་ཚོ་བཀའ་བློན་རྣམ་པ་ཚོས་གསལ་ཁ་བཏོད་གང་ཐུབ་ལ་འབད་བརྩོན་ཞུས་པ་ཡིན། ཁོ་རང་ཚོའི་སྙན་ཐོའི་ནང་དུའང་རྒྱ་གར་ནང་གི་བོད་པ་ཚོར་དམིགས་བསལ་གནས་སྟངས་ཡག་ཏུ་འགྲོ་བཞིན་ཡོད་པ་འཁོད་ཡོང་གི་འདུག དེའང་མ་རེད་ཟེར་ཐབས་ཡོད་པ་མ་རེད། རྒྱ་གར་གཞུང་གིས་མཐུན་རྐྱེན་མང་པོ་ཞིག་སྦྱར་ནས་ཡོང་གི་ཡོད་པ་རེད། བོད་པ་ཚོར་རྒྱ་གར་གཞུང་གིས་དམིགས་བསལ་ལྟ་སྐྱོང་སྲིད་བྱུས་(Tibetan Rehabilitation Policy 2014)ཞེས་ཁ་གསལ་བོར་བཏོན་ཡོད་སྟབས། རྒྱ་གར་ནས་ཕྱི་རྒྱལ་ཁག་ཏུ་འགྲོ་མཁན་བོད་པ་སྐྱབས་བཅོལ་བ་ཚོས་ང་ཚོར་རྒྱ་གར་ནང་དཀའ་ངལ་འདུག་ཟེར་ནས་བཤད་ཁག་པོ་ཆགས་ཡོད་པ་རེད། དེ་བཞིན། སྐྱབས་བཅོལ་ལག་དེབ་(R.C)ཡང་ལོ་ལྔ་ལ་འཕར་འགྱངས་ཞུ་དགོས་པ་བཟོས་ཡོད་སྟབས། ཛ་དྲག་གི་གནས་སྟངས་མེད་པར་རྒྱ་གར་ནང་ལོ་ལྔ་ལ་བསྡད་ཆོག་གི་ཡོད་པ་རེད། ཕྱི་རྒྱལ་ལུང་པ་གང་ཞིག་ཏུ་སྐྱབས་བཅོལ་ཞུས་ཀྱང་ཁྲིམས་ཐོག་ནས་སྐྱབས་བཅོལ་རག་ཁག་པོ་ཆགས་ཀྱི་ཡོད་པ་རེད། དེར་བརྟེན། མ་འོངས་པར་ཕྱི་རྒྱལ་ཁག་ཏུ་བོད་པར་སྐྱབས་བཅོལ་རག་རྒྱུ་དཀའ་ལས་ཁག་ཏུ་ཁག་ཏུ་འགྲོ་རྒྱུ་ཡིན་པ་བསལ་བོ་རེད། ཡུ་རོབ་ཁག་ཏུ་མཚོན་ལ་མི་རིགས་གཞན་པའི་སྐྱབས་བཅོལ་བ་ས་ཡང་མང་པོ་ཡོང་གི་ཡོད་སྟབས། ཆབ་སྲིད་གནས་སྟངས་ཐོག་ནས་ཀྱང་སྐྱབས་བཅོལ་བའི་གནས་སྟངས་ཐོག་དམ་དྲགས་ཤུགས་ཆེ་རུ་འགྲོ་བཞིན་ཡོད་པ་རེད། རྒྱལ་ཁབ་སོ་སོའི་མང་ཚོགས་ནང་དུའང་ཕྱི་ལོགས་ཀྱི་སྐྱབས་བཅོལ་བའི་ཐོག་དགོངས་ཚུལ་སྣ་ཚོགས་ཡོང་གི་ཡོད་པ་རེད། དེར་བརྟེན། གྲོས་ཚོགས་ར་བ་འདི་བརྒྱུད་ནས་ད་ལྟའི་ཆར་སྐྱབས་བཅོལ་ཞུ་བའི་ཁོར་ཡུག་ཡག་པོ་མི་འདུག་ཅེས་བཀའ་ཤག་ལ་འགན་ཡོད་སྟབས་ཞུ་བཞིན་ཡོད།” ཅེས་གསུངས་སོང་།

ཁོང་གིས་མུ་མཐུད་དུ་ང་ཚོས་ཕར་འབྲེལ་བ་ཞུ་སྐབས་བོད་པ་སྐྱབས་བཅོལ་བའི་གནས་སྟངས་དབྱེ་བ་འགར་ཁག་པོ་འདུག གང་ཡིན་ཟེར་ན། དང་པོ་སྐྱབས་བཅོལ་ཞུ་སྐབས་བོད་པ་ཡིན། བོད་ནང་ཆབ་སྲིད་དཀའ་ངལ་འོག་ནས་སྐྱབས་བཅོལ་དུ་ཡོང་བ་ཡིན་ཞེས་ཞུས་ཡོད་ཀྱང་རྒྱལ་ཁབ་སོ་སོའི་མཐོ་གཞུང་ནང་དུ་རྒྱ་ནག་ཞེས་བཀོད་ཡོད་སྟབས་དབྱེ་བསྲེས་བྱེད་ཁག་པོ་ཆགས་བསྡད་ཡོད་པ་རེད། ང་ཚོར་ནང་གནས་ཤིག་རེག་པའི་ནང་གཟིགས་པ་ཡིན་ན། ༢༠༡༡ ལོ་ནས་ ༢༠༡༥ ལོའི་བར་དུ་བོད་པ་སྐྱབས་བཅོལ་ཞུ་མཁན་ཚོར་སྐྱབས་བཅོལ་ཡིག་ཆ་མ་རེག་མཁན་ལོ་རེ་ནས་ལོ་རེར་མང་དུ་ཕྱིན་འདུག དེ་ཐུག་ས་གཙོ་བོ་དེ་སྐྱབས་བཅོལ་དང་པོ་ཞུ་སའི་རྒྱལ་ཁབ་དེའི་ནང་སྐྱབས་བཅོལ་རག་ཡོད་མེད་དེ་རེད། ང་ཚོ་བོད་པ་ཚོ་སྐྱབས་བཅོལ་དང་པོ་ཞུ་ས་དེ་རྒྱ་གར་ཡིན་སྟབས། བོད་པ་ཚོར་རྒྱ་གར་ནང་བསྡད་ཆོག་པའི་སྐྱབས་བཅོལ་ཡིག་ཆ་རག་ཡོད་པའི་དབང་གིས་སྐྱབས་བཅོལ་གཉིས་པ་རག་གི་ཡོད་པ་མ་རེད་ཅེས་སོགས་གསུངས་སོང་།

སྤྱི་འཐུས་སྨོན་ལམ་མཐར་ཕྱིན་ལགས་ཀྱིས། ཉེ་ལམ་ཊར་ཀེའེ་ནང་མཚོ་གྲུ་ཞིག་རླུང་གིས་དེད་ཡོང་བའི་ནང་བོད་མི་སྐྱབས་བཅོལ་བ་འགའ་ཡོད་པའི་གནས་ཚུལ་སྐོར་ལ་བཀའ་ཤག་གིས་གང་འདྲ་གནང་ཡོད་མེད་དྲིས་པའི་ལན་དུ་སྲིད་སྐྱོང་མཆོག་གིས། “ བོད་པ་ཁ་ཤས་གྷི་རི་སི་ལ་ལྷག་པ་དང་། ཊར་ཀའེ་ནང་བསླེབས་པ། ཡུ་ཁི་རེན་ནང་བསླེབས་པ་སོགས་ཡོང་གི་ཡོད་ས་རེད། ང་ཚོས་ཤེས་པ་དང་མ་ཤེས་པ་གཉིས་ལ་མ་ཤེས་པ་མང་བ་ཡོང་གི་ཡོད་པའི་བཟོ་ལྟ་འདུག” ཅེས་དང་། “ཊར་ཀའེ་ནང་གི་གནས་ཚུལ་དེའི་ཐད་དོན་གཅོད་ལ་ཞིབ་འཇུག་གནང་རོགས་ཞེས་མངགས་ཡོད། དེ་སྔོན་ཡང་ཊར་ཀའེ་ནང་བོད་པ་ ༡༣ ཞིག་ལ་དཀའ་ངལ་འཕྲད་ཡོད་པ་རེད། དེ་དག་ཀྱང་བོད་མིའི་སྒྲིག་འཛུགས་མིན་ཡང་། རིམ་གྱིས་ལུང་པ་གཞན་དག་ནང་བསླེབས་ཐུབ་པ་བྱུང་ཡོད་པ་རེད།” ཅེས་ལན་འདེབས་གནང་བ་ལས་ཊར་ཀའེ་ནང་འབྱོར་བའི་བོད་མི་དེ་དག་གི་གནས་སྟངས་ཅི་ཆགས་ཁ་གསལ་གསུངས་མ་སོང་།

ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས། ཁོང་རང་སི་པན་ནང་སྡོད་མཁན་ཞིག་ཡིན་པའི་ཆ་ནས་སི་པན་ནང་གི་བོད་པ་ཚང་མར་སྐྱབས་བཅོལ་སྤྲད་མེད་ཀྱང་། ལོ་ ༣ རིང་སི་པན་ནང་ནག་པོའི་ངོ་བོའི་ཐོག་ནས་བསྡད་པ་ཡིན་ན་མུ་མཐུད་སྡོད་ཆོག་པའི་ལག་འཁྱེར་སྤྲོད་བཞིན་ཡོད་པ་རེད། ཡིན་ནའང་དཀའ་ངལ་འཕར་མ་ཞིག་ག་རེ་ཡོད་པ་རེད་ཟེར་ན། སི་པན་ནང་རྒྱ་གར་ནས་འཁྱེར་ཡོང་བའི་ཕྱི་སྐྱོད་ལག་འཁྱེར་དེབ་ཟེར་པོ་(IC)དེ་བེད་སྤྱོད་ཡོད་པ་རེད། ཡིན་ནའང་དེབ་སེར་པོའི་དུས་ཚོད་རྫོགས་སྐབས་ངེས་པར་དུ་རྒྱ་གར་ནང་ཡོང་ནས་འཕར་འགྱངས་ཞུ་དགོས་ཀྱི་འདུག རྒྱ་གར་ནང་ཟླ་བ་གཉིས་གསུམ་རིང་དུས་ཚོད་འཕར་འགྱངས་ཞུ་ཐུབ་ཀྱི་མེད་སྟབས། ཕར་ནས་ལས་ཀ་ཤོར་བ་སོགས་ཀྱི་དཀའ་ངལ་མང་པོ་འཕྲད་བཞིན་ཡོད་སྟབས། མ་འོངས་པར་བྱུང་ན་སི་པན་ནང་གི་རྒྱ་གར་གཞུང་ཚབ་ནས་ཕྱི་སྐྱོད་ལག་འཁྱེར་གྱི་དུས་ཚོད་འཕར་འགྱངས་བྱེད་ཐུབ་པ་དང་། གལ་སྲིད་དེ་ལྟར་མ་བྱུང་ཡང་། ཚུར་རྒྱ་གར་ནང་ཡོང་ན་དུས་ཚོད་འཕར་འགྱངས་དང་དེབ་གསར་པ་ཞུ་རྒྱུ་སོགས་ཟླ་གཅིག་ནང་ཚུད་དུ་ཡོང་ཐུབ་ཐབས་ལ་བཀའ་ཤག་གིས་འབད་བརྩོན་གནང་རོགས། ཞེས་འབོད་སྐུལ་ཞུས་པའི་ལན་དུ་སྲིད་སྐྱོང་མཆོག་གིས། “ རྒྱ་གར་ནང་ཛ་དྲག་གནས་ཚུལ་མང་པོ་བྱུང་བར་བརྟེན་ཏེ་རྒྱ་གར་ཁྱོན་ཡོངས་ཀྱི་སྲིད་བྱུས་ལ་འགྱུར་བ་ཐེབས་ཏེ། རྒྱ་གར་མི་སེར་ཡིན་ན་ཕྱི་རྒྱལ་ལུང་པ་སོ་སོའི་རྒྱ་གར་གཞུང་ཚབ་ནས་ཕྱི་སྐྱོད་ལག་འཁྱེར་དུས་ཚོད་རྫོགས་རིགས་བསྐྱར་དུ་ཞུས་ཆོག་གི་ཡོད་པ་རེད། དེ་མ་ཡིན་པའི་བོད་པ་གཙོས་པའི་རྒྱ་གར་ནང་སྐྱབས་བཅོལ་ཞུས་ཡོད་མཁན་ཚང་མའི་ཕྱི་སྐྱོད་ལག་འཁྱེར་གྱི་དུས་ཡུན་ལོ་ ༡༠ དེ་རྫོགས་པ་ཡིན་ན། ཕྱིར་རྒྱ་གར་ནང་ཡོང་སྟེ་དུས་ཚོད་འཕར་འགྱངས་ཞུ་དགོས་ཀྱི་ཡོད་པ་རེད།” ཅེས་གསུངས་སོང་།

ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་ཀྱིས། ང་རང་གི་གོ་སྟངས་བྱས་ན་ཡུ་རོབ་སྤྱི་ཡོངས་ནས་བོད་པ་སྐྱབས་བཅོལ་བའི་ཐོག་གཅིག་གྱུར་གྱི་སྲིད་བྱུས་ཤིག་གཏན་འབེབས་གནང་འཆར་ཡོད་པ་འདྲ། གཉིས་པ། ཡུ་རོབ་རྒྱལ་ཁབ་ཁག་གིས་རྒྱ་གར་དང་རྒྱ་ནག་མཉམ་དུ་སྐྱབས་བཅོལ་གནས་བབ་སྐོར་ལ་གྲོས་བསྡུར་ཞིག་འགྲོ་བཞིན་ཡོད་ས་རེད། དེ་དག་དང་འབྲེལ་བ་ཆགས་ཀྱི་ཡོད་མེད་མི་ཤེས་མོད། ཟླ་ཤས་སྔོན་ལ་སུད་སིའི་གཞུང་གིས་བོད་མི་སྐྱབས་བཅོལ་བ་ཚོའི་ཡིག་ཆ་ཡར་བསྡུས་ཏེ། སྔོན་ཆད་བོད་པ་སྐྱབས་བཅོལ་བ་ཚོའི་ཡིག་ཆའི་ནང་ (Tibet) ཞེས་བཀོད་ཡོད་པ་དེ་ད་ཆར་གཅིག་གྱུར་བཟོས་ཏེ་ ‘China’ ཞེས་པར་བསྒྱུར་འདུག ང་ཚོས་རྩད་གཅོད་བྱས་པ་ལྟར་ན། ཧྥ་རན་སི་དང་སྦེལ་ཇམ་ནང་ལག་བསྟར་བྱེད་སྟངས་ལ་འགྱུར་བ་ཕྲན་བུ་འདུག རྩ་བའི་ཡུ་རོབ་ནང་རྒྱ་ནག་གི་ནུས་པ་ཆེན་པོ་བསླེབས་ཡོད་སྟབས། སུད་སིར་ལས་དོན་དེ་ལམ་འགྲོ་བྱུང་བ་ཡིན་ན་རྒྱལ་ཁབ་གཞན་པའི་ནང་དུའང་དཀའ་ངལ་དེ་འཕྲད་རྒྱུ་ཡིན་པ་གསལ་བོ་རེད། དེའི་སྐོར་ལ་སྲིད་སྐྱོང་གིས་ཐུགས་སྣང་གང་འདྲ་གནང་ཡོད་མེད་དྲི་བ་དོན་པའི་ལན་དུ་སྲིད་སྐྱོང་མཆོག་གིས། “ང་ཚོར་རག་པའི་ནང་གནས་ནང་དུའང་བཀོད་འདུག བོད་པ་ཚོ་རྒྱ་རིགས་དང་མཉམ་དུ་བོད་ནས་ཡིན་ཞེས་བཀོད་ཡོད་སྟབས། རྒྱལ་ཁབ་ཀྱི་ཐོ་གཞུང་ནང་དུ་རྒྱ་ནག་ཞེས་བཀོད་ཡོང་སྐབས། སྦེལ་ཇམ་ནང་བོད་པ་སྐྱབས་བཅོལ་བ་ག་ཚོད་ཡོད་ལབ་ན་བཤད་ཐུབ་ཀྱི་མི་འདུག ཡིན་ནའང་རྒྱ་མི་ལས་བོད་པ་ཚོར་སྐྱབས་བཅོལ་མང་བ་སྤྲོད་ཀྱི་ཡོད་པ་རེད་ཟེར་ནས་ཚོད་དཔག་བྱེད་ཀྱིན་འདུག” ཅེས་གསུངས་ཏེ། སྤྱི་འཐུས་ཀྱི་དྲི་བར་ལན་གང་ཡང་བཏབས་མ་སོང་།

གསར་འགོད་པ། དོན་འགྲུབ་བཀྲ་ཤིས།