ཁ་སང་ཡེ་ཤུ་འདས་ལོག་དུས་ཆེན་སྲུང་གཙིའི་ཐོག་འགད་རྫས་གཏོར་ཏེ་མི་ ༧༠ རྐྱེན་འདས་དང་མི་ ༣༤༠ རྨས་སྐྱོན་བཟོས་ཡོད་འདུག
དེ་རིང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་པ་ཀི་སི་ཐན་ཤར་རྒྱུད་ལཱ་ཧོར་ (Lahore) གྲོང་ཁྱེར་གྱི་གླིང་ག་ཞིག་ཏུ་ཡེ་ཤུ་འདས་ལོག་དུས་ཆེན་སྲུང་གཙིའི་ཐོག་འགད་རྫས་གཏོར་བའི་ཁྲོད་མི་ ༧༠ རྐྱེན་འདས་དང་ཡུལ་མི་ ༣༤༠ རྨས་སྐྱོན་ཕོག་པའི་གྲས་ཀྱི་མང་ཆེ་བ་བྱིས་པ་དང་བུད་མེད་ཡིན་ཞིང་། ཤི་རྨས་ཐེབས་པའི་གྲངས་འབོར་མུ་མཐུད་འཕར་བཞིན་ཡོད་པ་དང་། ཐེངས་འདིའི་འགད་རྫས་གཏོར་མཁན་ཁ་ཆེ་འཇིགས་སྐུལ་དྲག་སྤྱོད་ཚོགས་པ་དང་འབྲེལ་བ་ཡོད་པའི་པ་ཀི་སི་ཐན་རྒྱལ་ནང་གི་ཊ་ལེ་བྷན་ (Taliban) ཚོགས་པ་ཡིན་པར་དོགས་གཞི་བྱེད་བཞིན་འདུག
པ་ཀི་སི་ཐན་དམག་དཔུང་མགྲིན་ཚབ་པ་ཨ་སེམ་བྷ་ཇ་ཝ་ (Asim Bajwa) ཟེར་བ་ཞིག་གིས། ང་ཚོས་ངེས་པར་དུ་ཉེས་མེད་མི་སེར་དམར་གསོད་གཏོང་མཁན་ཚོར་ཁྲིམས་བཤེར་ནན་མོ་བྱས་ཏེ། ད་ཕན་ང་ཚོའི་རང་དབང་དང་མི་ཚེ་ལ་དབང་བསྒྱུར་དུ་འཇུག་མི་རུང་། ཞེས་སོགས་བརྗོད་འདུག
གནས་ཚུལ་ལྟར་ན། ཕྱི་ལོ་ ༢༠༠༡ ལོའི་ཟླ་ ༩ པའི་ཚེས་ ༡༡ ཉིན་ཨལ་ཁཱ་ཌ་ (Al-Qaeda) འཇིགས་སྐུལ་དྲག་སྤྱོད་པས་ཨ་རིར་འཇབ་རྒོལ་བྱས་རྗེས། ཨ་རི་དང་པ་ཀི་སི་ཐན་མཉམ་འབྲེལ་དམག་དཔུང་གིས་ཁ་ཆེ་འཇིགས་སྐུལ་དྲག་སྤྱོད་པར་རྒོལ་འཛིང་བྱེད་མགོ་བཙུགས་པ་ནས་འདས་པའི་མི་ལོ་ ༡༥ རིང་པ་ཀི་སི་ཐན་རྒྱལ་ཁབ་བཟློག་ཏུ་མེད་པའི་དམག་འཁྲུག་ནང་ཚུད་པ་དང་། པ་ཀི་སི་ཐན་དམག་མི་དང་ཉེན་རྟོག་པ། སྲིད་གཞུང་། ནུབ་གླིང་རྒྱལ་ཁབ་ཁག་བཅས་ཀྱིས་པ་ཀི་སི་ཐན་རྒྱལ་ནང་གི་ཊ་ལེ་བྷན་དང་ཁོ་ཚོའི་ཤོག་ཁག་དམིགས་འབེན་དུ་བཟུང་ཡོད་སྟབས། འཇིགས་སྐུལ་དྲག་སྤྱོད་པས་ཡི་ཤུ་བ་གཙོས་པའི་གྲངས་ཉུང་མི་རིགས་ཀྱི་ཆོས་ལུགས་སྤྱི་ཚོགས་ཁག་ལ་གཏོར་རྒོལ་གཏོང་གི་ཡོད་པ་དང་། སྤྱིར་པ་ཀི་སི་ཐན་ནི་ཁ་ཆེ་གྲངས་མང་མི་རིགས་འདུས་སྡོད་ཀྱིས་གྲུབ་པའི་རྒྱལ་ཁབ་ཅིག་ཡིན་ནའང་། པ་ཀི་སི་ཐན་ནང་ཡི་ཤུ་ཆོས་ལུགས་ལ་དད་གུས་ཞུ་མཁན་མི་འབོར་ས་ཡ་ ༢ ཡོད་འདུག
ཕྱི་ལོ་ ༢༠༡༣ ལོར་པ་ཀི་སི་ཐན་ནུབ་བྱང་གྲོང་ཁྱེར་ཕི་ཤཱ་ཝར་ (Peshawar) གྱི་ཡི་ཤུ་ལྷ་ཁང་ཞིག་གི་ནང་འགད་རྫས་གཏོར་བའི་ཁྲོད་མི་ ༨༠ དམར་གསོད་བཏང་ཡོད་པ་དང་། ཕྱི་ལོ་ ༢༠༡༤ ལོའི་ཟླ་ ༡༢ པའི་ནང་ཕི་ཤཱ་ཝར་གྲོང་ཁྱེར་གྱི་དམག་འབྲེལ་སློབ་གྲྭ་ཞིག་གི་ནང་ལག་ཏུ་མེ་མདའ་ཐོགས་པའི་ཊ་ལེ་བྷན་འཇིགས་སྐུལ་དྲག་སྤྱོད་པས་སློབ་རའི་ནང་གང་བྱུང་མེ་མདའ་བརྒྱབ་ཏེ་སློབ་ཕྲུག་ ༡༣༤ དམར་གསོད་བཏང་ཡོད་པ་རེད།
གསར་འགོད་པ། པདྨ་རྒྱལ།
