ཨ་རིའི་རྒྱལ་ས་ཝ་ཞིན་ཊོན་དུ་འཛམ་གླིང་གི་མགོ་ཁྲིད་ཁག་གི་ཚོགས་ཆེན་ཞིག་ཡོད་པ་ལྟར་ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཐེངས་འདིའི་ཚོགས་ཆེན་སྟེང་ཐུག་འཕྲད་བྱ་རྒྱུ་ཡིན་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཨ་རིའི་སྲིད་ཨོ་བྷ་མ་དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་ཨ་རིའི་རྒྱལ་ས་ཝ་ཞིན་ཊོན་དུ་ཐུག་འཕྲད་བྱེད་ཀྱི་ཡོད་པ་དང་། རེས་གཟའ་ལྷག་པའི་ཉིན་སྲིད་འཛིན་ཨོ་བྷ་མ་དང་ཞི་ཅིན་ཕིན་གཉིས་ཀྱིས་བྱང་ཀོ་རི་ཡའི་རྡུལ་ཕྲན་མཚོན་ཆའི་གནད་དོན་དང་དྲ་ལམ་བདེ་འཇགས། དེ་བཞིན་འགྲོ་བ་མིའི་ཐོབ་ཐང་གི་དཀའ་རྙོག་བཅས་ཀྱི་ཐད་གྲོས་མོལ་ཚོགས་ཆེན་མ་ཚུགས་སྔོན་ཏེ། དེ་རིང་ཨ་རིའི་རྒྱལ་ས་ཝ་ཞིན་ཊོན་ནང་ཐུག་འཕྲད་བྱེད་ཀྱི་ཡོད་སྐོར་འཁོད་འདུག
ཡ་ཧོ་གསར་ལམ་དུ་གནས་ཚུལ་བ་སྤེལ་བ་ལྟར་ན། རེས་གཟའ་ཟླ་བའི་ཉིན་ནས་འདས་པའི་ཉིན་གསུམ་རིང་རྒྱ་ནག་གི་སྲིད་འཛིན་ཞི་ཅིན་ཕིན་ཅེཀ་སྤྱི་མཐུན་རྒྱལ་ཁབ་ནང་ཚོང་དོན་སྐོར་སྐྱོད་སྐབས་སུ་ཕྱི་སྡོད་བོད་རིགས་དང་བོད་དོན་རྒྱབ་སྐྱོར་བ་མི་གྲངས་ ༥༠༠ བརྒལ་བས་གནམ་ཐང་དང་རྒྱལ་ས་ཕ་ར་གྷུའི་ (Prague) སྲང་ལམ་གཡས་གཡོན་དུ་རྒྱ་ནག་གི་རྒྱལ་དར་མར་ཕབ་པ་དང་མཚོན་རྩི་ནག་པོ་བྱུགས་པ། བོད་ཀྱི་རྒྱལ་དར་སྒྲེང་འཛུགས་བྱས་ཏེ་ངོ་རྒོལ་སྐད་འབོད་ཤུགས་ཆེན་སྤེལ་བ་ཡོད་པ་དང་། སྐབས་དེར་བོད་དོན་འགུལ་བ་ ༡༢ ཙམ་འཛིན་བཟུང་བྱས་པ་ཡོད་པ་མ་ཟད། ཧེལ་ཊོན་གསོལ་མགྲོན་ཁང་ (Hilton Hotel) གི་ཕྱི་ལོགས་སུ་ཕྱི་སྡོད་རྒྱ་རིགས་ ༥༠ ལྷག་གིས་རྒྱ་ནག་གི་དར་དམར་འཕྱར་ཏེ་བོད་དོན་ལས་འགུལ་བའི་ཐོག་མི་འདོད་པའི་རྣམ་འགྱུར་ཡང་བསྟན་ཡོད་འདུག
གསར་འགོད་པ། པདྨ་རྒྱལ།
