རྒྱ་ནག་དབུས་སྤྱི་ཁྱབ་དམག་དཔོན་སྐུ་ཞབས་ཤུ་ཁོ་ལང་གིས་བལ་ཡུལ་དམག་སྤྱིར་རྒྱ་ནག་དང་བལ་ཡུལ་གཉིས་ཀྱི་ཕྱི་འབྲེལ་དམག་ཇུས་ཐོག་མཉམ་རུབ་ཀྱི་ནུས་ཤུགས་ཆེ་རུ་གཏོང་དགོས་པའི་འབོད་སྐུལ་ཞུས་ཡོད་འདུག
ཉིན་ཤས་གོང་བལ་ཡུལ་གྱི་སྲིད་འཛིན་སྐུ་ཞབས་ཀེ་པི་ཤར་མ་ཨོ་ལི་ KP Sharma Oli མཆོག་རྒྱ་ནག་ཏུ་འཚམས་གཟིགས་སུ་ཕེབས་ཏེ་རྒྱ་ནག་གི་སྲིད་འཛིན་ཞི་ཅིན་ཕིན་དང་ཐུག་འཕྲད་བྱས་ཡོད་པ་དང་། སྐབས་དེར་ཞི་ཅིན་ཕིན་གྱིས་རྒྱལ་ཁབ་ཕན་ཚུན་བར་ཕུགས་རྒྱང་རིང་པོར་དམིགས་པའི་འབྲེལ་ལམ་ཡར་རྒྱས་གཏོང་འདོད་ཡོད་པའི་བསམ་ཚུལ་ཤུགས་ཆེན་བཏོན་ཡོད་འདུག
བལ་ཡུལ་སྲིད་འཛིན་གྱི་བདུན་ཕྲག་གཅིག་རིང་གི་རྒྱ་ནག་ནང་ལ་འཚམས་གཟིགས་གྲུབ་སྟེ་ཕྱིར་ལོག་མ་ཐག་བལ་ཡུལ་དམག་སྤྱི་སྐུ་ཞབས་ར་ཇིན་དཱ་ར་ Rajendra Chhettri རྒྱ་ནག་ཏུ་བསྐྱོད་དེ། རྒྱ་ནག་གི་དམག་དོན་སྤྱི་ཁྱབ་ཤུ་ཁོ་ལང་ Xu Qiliang ཟེར་བ་དང་། རྒྱ་ནག་བཅིང་འགྲོལ་དམག་མིའི་དམག་སྤྱི་ཧྥང་ Fang རྣམ་གཉིས་དང་ལྷན་ཐུག་འཕྲད་བྱས་ཡོད་འདུག
སྐབས་དེར་རྒྱ་ནག་དམག་དོན་སྤྱི་ཁྱབ་ཀྱིས་བལ་ཡུལ་དམག་སྤྱིར་མངའ་ཁུལ་གྱི་བདེ་འཇགས་དང་བརྟན་ལྷིང་ཐོག་མཉམ་ལས་འཐབ་ཇུས་ནུས་པ་ཆེ་རུ་གཏོང་དགོས་པའི་རེ་འདུན་བཏོན་ཡོད་པ་མ་ཟད། བལ་ཡུལ་ནང་རྒྱ་གཞུང་ལ་ངོ་རྒོལ་བྱེད་མཁན་ཚོར་དམ་དྲག་ཚགས་ཚུད་བྱུང་བར་བསྔགས་བརྗོད་བྱས་ཤིང་། རྗེས་ཕྱོགས་ཀྱང་མུ་མཐུད་རྒྱལ་ཁབ་གཉིས་བར་ཕྱི་འབྲེལ་དང་གནས་ཚུལ་བརྗེ་ལེན། ཕན་ཚུན་རོགས་ཕན། སྲུང་སྐྱོབ། རྐྱེན་ངན་གྲོལ་འདོམས་སོགས་ཀྱི་ཐད་མཉམ་རུབ་བྱ་དགོས་པའི་རེ་འདུན་བཏོན་ཡོད་འདུག
བལ་ཡུལ་དམག་སྤྱི་དང་རྒྱ་ནག་བཅིང་འགྲོལ་དམག་མིའི་དམག་སྤྱི་ཧྥང་གཉིས་ཐུག་འཕྲད་སྐབས། དམག་སྤྱི་ཧྥང་གིས་བལ་ཡུལ་ནང་བོད་རང་བཙན་ལས་འགུལ་སྤེལ་མཁན་ཚོར་བལ་ཡུལ་དམག་མིས་བཀག་འགོག་བྱ་རྒྱུའི་རོགས་རམ་བྱེད་དགོས་པ་དང་། བལ་ཡུལ་དང་རྒྱ་ནག་གཉིས་ཀྱི་འབྲེལ་ལམ་ནི་ཆིངས་དོན་གཅིག་དང་གཞུང་ལམ་གཅིག་གི་འཐབ་ཇུས་ཤིག་ཡིན་པ་མ་ཟད། ཕྱོགས་གཉིས་ཀའི་དམག་དོན་འབྲེལ་ལམ་ཡང་འཐབ་ཇུས་དེའི་ཆ་ཤས་ཤིག་ཡིན་སྐོར་སོགས་བརྗོད་ཡོད་འདུག
བལ་ཡུལ་དམག་སྤྱིས་རྒྱ་ནག་གཅིག་གི་སྲིད་བྱུས་ཐོག་ཤར་སྐྱོད་བྱ་རྒྱུར་ཡིད་ཆེས་བརྟན་པོ་ཡོད་པ་དང་། བལ་ཡུལ་ནང་རྒྱ་ནག་ལ་གྱེན་ལོགས་བྱེད་མཁན་རིགས་ལ་བཀག་སྡོམ་བྱ་རྒྱུའི་ཆོད་སེམས་ལ་འགྱུར་བ་མེད་སྐོར། དེ་བཞིན། ཉེ་ལམ་བལ་ཡུལ་ནང་ས་ཡོམ་གོད་ཆག་བྱུང་སྐབས་རྒྱ་ནག་གི་དམག་མིས་རོགས་སྐྱོར་གནང་བར་བསྔགས་བརྗོད། བལ་ཡུལ་དམག་མིས་དུས་རྟག་ཏུ་ཁྱིམ་མཚེས་རྒྱལ་ཁབ་གཉིས་ཀྱི་དམག་མི་དང་གཞུང་ཕན་ཚུན་གཉིས་བར་འབྲེལ་ལམ་སྲ་བརྟན་གཏོང་རྒྱུར་གྲ་སྒྲིག་ཡོད་སྐོར་སོགས་བརྗོད་འདུག
ཐེངས་འདིར་རྒྱ་བལ་དམག་སྤྱི་རྣམ་གཉིས་ཐུག་འཕྲད་དང་བསྟུན་ཏེ། རྒྱ་ནག་གི་དམག་མིས་རྒྱ་སྒོར་ས་ཡ་ ༣༠ བལ་ཡུལ་དམག་མིར་མཁོ་སྤྲོད་བྱ་རྒྱུའི་ཆིངས་ཡིག་ཅིག་བཞག་ཡོད་ཅིང་། དེ་ནི་རྒྱ་ནག་གི་དམག་མིས་བལ་ཡུལ་དམག་མིར་དམག་སྦྱོང་སྤྲོད་རྒྱུ་དང་ཛ་དྲག་ཞབས་ཞུ། ཁ་པར་དང་སྨན་ཁང་བཀོལ་སྤྱོད་སོགས་ལ་རོགས་སྐྱོར་བྱ་རྒྱུ་ཡིན་འདུག
རབ་རྒྱས་ཀྱིས་བསྡུས།
བལ་ཡུལ་ནང་གི་བོད་པ་དེ་ཚོའི་ནང་ན་སྐད་ཆ་ཕར་བསྐྱེལ་ཚུར་བསྐྱེལ་བྱེད་མཁན་མང་དྲག་ནས་ནམ་ཡིན་ཡང་བོད་པའི་ལས་དོན་ཆེ་ཕྲ་ཆུང་གསུམ་ལེགས་འགྲུབ་ཡོང་འཇུག་གི་མ་རེད། ད་རེ་རེ་བཞིན་དུ་མིང་འདོན་བྱེད་དགོས་པ་འདྲ་བོ་འདུག
འོན་ཀྱང་བརྒྱུད་ལམ་འདི་ནས་སྟབས་མི་བདེ། ངས་བརྒྱུད་ལམ་གཞན་ཞིག་ནས་མི་ངན་ཁ་ཤས་ཐེར་འདོན་བྱེད་དགོས་བསམ་ཡོད།