རྒྱ་ནག་སྐམ་ས་ཆེན་མོའི་བརྙན་འཕྲིན་དང་གནས་འཕྲིན་བརྒྱུད་ལམ་ཁག་ཏུ་ཧོང་ཀོང་གྲོང་ཁྱེར་གྱི་གློག་བརྙན “ལོ་བཅུ”ཞེས་པ་དེ་བསྟན་མི་ཆོག་ཟེར།
ཁ་སང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཧོང་ཀོང་གྲོང་ཁྱེར་གྱི་ “ལོ་བཅུ” ཞེས་པའི་གློག་བརྙན་དེ་ལ་རེས་གཟའ་ཉི་མའི་མཚན་མོར་ཧོང་ཀོང་གྲོང་ཁྱེར་དུ་ཚུགས་པའི་གློག་བརྙན་དུས་སྟོན་ཞིག་གི་ཐོག་གློག་བརྙན་ ༢༠ ལྷག་གི་གྲས་ནས་ཕུལ་བྱུང་གློག་བརྙན་གྱི་བྱ་དགའ་ཐོབ་ཡོད་པ་དང་། གནས་ཚུལ་དེ་རྒྱ་ནག་གི་གློག་བརྙན་འཕྲིན་དང་གནས་འཕྲིན་བརྒྱུད་ལམ་ཁག་ཏུ་བཀག་སྡོམ་བྱས་ཡོད་འདུག
ཧོང་ཀོང་གི་གློག་བརྙན “ལོ་བཅུ” ཞེས་པ་དེའི་འཁྲབ་ཁྲིད་པ་དང་སྒྲིག་བཟོ་མཁན་ནག་ཀ་ལུང་ (Ng Ka-leung) ཟེར་བ་ཞིག་གིས། ང་ཚོའི་རེ་བར་ཧོང་ཀོང་མི་མང་གིས་ང་ཚོར་གདུང་སེམས་མཉམ་སྐྱེད་བྱེད་པ་དང་། ང་ཚོས་གློག་བརྙན་འདི་ལ་བརྟེན་ནས་ཧོང་ཀོང་གྲོང་ཁྱེར་གྱི་འབྱུང་འགྱུར་ལ་མནོ་བསམ་གཏོང་འདོད་ཡོད་སྐོར་བརྗོད་ཅིང་། ཧོང་ཀོང་གྲོང་ཁྱེར་གྱི་གློག་བརྙན་དུས་སྟོན་ཁང་གི་འགན་འཛིན་ཌི་རི་ཀ་ཡའེ་ (Derek Yee) ཟེར་བ་ཞིག་གིས། གློག་བརྙན་དུས་སྟོན་མགོ་མ་ཚུགས་པའི་སྔོན་ཏག་ཏག་ལ“ལོ་བཅུ”ཞེས་པའི་གློག་བརྙན་དེའི་འཁྲབ་གཞུང་རྩོམ་པ་པོ་ངེད་སར་ཡོང་ནས“ལོ་བཅུ”ཞེས་པའི་གློག་བརྙན་འདིས་ཕ་རོལ་བོར་དོ་ཕོགས་བཟོ་སྲིད་མིན་སྐོར་དྲིས་སོང་། ངས་ཁོ་ལ་ང་ཚོ་ཞེད་སྣང་སྐྱེས་དགོས་ས་དེ་ཞེད་སྣང་སྐྱེས་ས་རང་རེད། དེ་བས་ང་ཚོ་ཞེད་སྣང་སྐྱེས་ནས་ཡོང་རྒྱུ་ཡོད་མ་རེད། ཅེས་ལབ་ཡོད་སྐོར་བརྗོད་འདུག
ལུ་ཀྲིན་ (Lu Zhen) ཟེར་བའི་རྒྱ་རིགས་ཤིག་གིས་རྒྱ་ནག་གི་ཝེ་པོ་ (Weibo) ཞེས་པའི་སྤྱི་ཚོགས་བརྒྱུད་ལམ་དུ་འདི་ནི་རྒྱལ་ཁབ་ཅིག་གིས་ཁ་བྲལ་བར་འཛིན་པའི་ངོ་རྒོལ་རེད། གློག་བརྙན་འཕྲིན་དང་གནས་འཕྲིན་བརྒྱུད་ལམ་ཁག་སྟངས་འཛིན་བྱེད་མཁན་ཚོས་ཧོང་ཀོང་གི་རང་དབང་ལ་རྒྱབ་སྐྱོར་མཚོན་པའི་གློག་བརྙན་འདི་འགོག་སྡོམ་བྱེད་དོན་ག་རེ་ཡིན་ནམ། ཞེས་སོགས་བརྗོད་འདུག
གནས་ཚུལ་ལྟར་ན། “ལོ་བཅུ”ཞེས་པའི་གློག་བརྙན་དེ་ནི་ཕྱི་ལོ་ ༢༠༡༥ ལོར་འཁྲབ་ཁྲིད་དང་སྒྲིག་བཟོ་བྱས་པ་ཞིག་ཡིན་ཞིང་། གློག་བརྙན་དེའི་ནང་རྒྱ་ནག་སྐམ་ས་ཆེན་མོའི་དབང་སྒྱུར་ལམ་ལུགས་འོག་གི་ཧོང་ཀོང་གྲོང་ཁྱེར་གྱི་རང་དབང་གླེང་སློང་བྱས་ཡོད་པ་དང་། དེ་ཡང་ཕྱི་ལོ་ ༡༩༩༧ ལོར་རྒྱ་གཞུང་གིས་རྒྱལ་ཁབ་གཅིག་ལམ་ལུགས་གཉིས་ཀྱི་སྲིད་ཇུས་བཏོན་ཏེ་ཧོང་ཀོང་གྲོང་ཁྱེར་ལ་ཚད་མཐོའི་རང་སྐྱོང་དང་སྤྱི་མང་གུ་ཡངས་སྲིད་ཇུས་སོགས་ཁག་ཐག་བྱས་ཡོད་ནའང་། གློག་བརྙན་དེའི་ནང་ ༢༠༢༥ ལོའི་བར་ཧོང་ཀོང་གྲོང་ཁྱེར་དེ་བཞིན་རྒྱ་ནག་སྲིད་གཞུང་གི་དབང་སྒྱུར་དམ་དྲག་འོག་ལྷག་པའི་ངང་ཚུལ་བསྟན་ཡོད་པ་དང་། གློག་བརྙན་དེ་ནི་སྒྲུང་རྩོམ་ཐུང་ཐུང་ ༥ ལྷག་གིས་གྲུབ་ཅིང་། དེའི་ནང་གཙོ་བོ་ཧོང་ཀོང་ཡུལ་མི་ཚོའི་སྡོད་གནས་ཀྱི་གནད་དོན་དང་རྒྱ་ནག་སྲིད་གཞུང་གི་དབང་སྒྱུར་སྲིད་ཇུས། དེ་བཞིན་ས་གནས་ཆབ་སྲིད་སོགས་ཀྱི་གནད་དོན་སྐོར་བྲིས་ཡོད་པ་མ་ཟད། གློག་བརྙན་དེའི་ལེ་ཚན་ཞིག་གི་ནང་ཧོང་ཀོང་རང་དབང་གི་འབོད་སྒྲར་གདུང་སེམས་མཉམ་སྐྱེད་མཚོན་ཐབས་སུ་རྒྱ་རིགས་ཤིག་གིས་དབྱིན་ཇིའི་གཞུང་ཚབ་ཁང་གི་སྒོ་འགྲམ་དུ་རྒྱ་ནག་གི་དབང་སྒྱུར་སྲིད་ཇུས་ལ་ངོ་རྒོལ་བྱས་ཏེ་རང་ལུས་མེར་བསྲེགས་བཏང་བའི་རྣམ་པ་བཀོད་ཡོད་པ་རེད།
ད་ལོའི་ཕྱི་ཟླ་དང་པོར་ “ལོ་བཅུ” ཞེས་བའི་གློག་བརྙན་དེ་ཧོང་ཀོང་གི་གློག་བརྙན་དུས་སྟོན་གྱི་གློག་བརྙན་རྩེ་ཕུལ་གྲས་སུ་དཔྱད་འདེམས་བྱས་པའི་གནས་ཚུལ་ཕྱི་བསྒྲགས་བྱས་པ་དང་། རྒྱ་གཞུང་གིས་རྒྱ་ནག་སྐམ་ས་ཆེན་མོའི་གློག་བརྙན་འཕྲིན་དང་གནས་འཕྲིན་བརྒྱུད་ལམ་ཁག་ཏུ་གནས་ཚུལ་དེ་ཕྱི་བསྡུ་དང་འགོག་སྡོམ་དགོས་པའི་བཀའ་རྒྱ་བཀྲམ་ཡོད་པ་ལྟར། རེས་གཟའ་ཉི་མའི་མཚོན་མོར་རྒྱ་ནག་སྐམ་ས་ཆེན་མོའི་ནང་གི་ཧོང་ཀོང་གྲོང་ཁྱེར་གྱི་གློག་བརྙན་འཕྲིན་གྱི་སྐུད་ལམ་ཁག་ཚང་མ་འགོག་སྡོམ་བྱས་པ་དང་། བརྙན་འཕྲིན་བརྒྱུད་ལམ་ནས“ལོ་བཅུ”ཞེས་པའི་ཧོང་ཀོང་གྲོང་ཁྱེར་གྱི་འབྱུང་འགྱུར་མཚོན་པའི་གློག་བརྙན་དེ་དང་དེའི་གནས་ཚུལ་རིགས་ནག་སུབ་བཏང་ཡོད་འདུག
གསར་འགོད་པ། པདྨ་རྒྱལ།
