རྒྱ་ནག་དབུས་དམག་དོན་ལྷན་ཁང་གི་གཙོ་འཛིན་གཞོན་པ་གོ་པའོ་ཞོང་གིས་དམངས་སྒོར་ས་ཡ་ ༨༠ ལྐོག་ཟ་བྱས་ཡོད་པ་དང་ཁོ་དང་འབྲེལ་ཡོད་དཔོན་རིགས་པའོ་ཞི་ལེ་ཡིས་དམངས་སྒོར་ས་ཡ་ ༢༠ ལྐོག་ཟ་བྱས་ཡོད་འདུག
རྒྱ་ནག་ལྷོ་རྒྱུད་ནང་མོའི་གསར་ཤོག་ (scmp) ཅེས་པའི་སྟེང་རྒྱ་ནག་མི་དམངས་བཅིངས་འགྲོལ་དམག་གི་དམག་སྤྱི་ཆེན་མོ་ཟུར་བ་གོ་པའོ་ཞོང་ (Guo Boxiong) གིས་དམངས་སྒོར་ས་ཡ་ ༨༠ ལྐོག་ཟ་བྱས་པའི་ནག་ཉེས་འོག་མུ་མཐུད་ཞིབ་བཤེར་བྱེད་མུས་ཡིན་ལུགས་འཁོད་འདུག
གོ་པའོ་ཞོང་ད་ལོ་ལོ་ ༧༤ ཡིན་ཞིང་རྒྱ་ནག་དབུས་དམག་དོན་ལྷན་ཁང་གི་གཙོ་འཛིན་གཞོན་པ་དང་། རྒྱ་ནགམི་དམངས་བཅིངས་འགྲོལ་དམག་ཟེར་བའི་དམག་སྤྱི་ཆེན་མོ། རྒྱ་ནག་དབུས་ཆབ་སྲིད་ལྷན་ཁང་གི་ཚོགས་མི་ཉེར་ལྔའི་གྲས་སོགས་ཡིན་པ་དང་། ཞི་ཅིན་ཕིན་གྱི་ལྐོག་ཟ་རུལ་སུངས་གཙང་བཤེར་ལས་འགུལ་ཁྲོད་ཁོ་ལ་ན་ནིང་ཕྱི་ཟླ་ ༤ བ་ནས་ཞིབ་བཤེར་བྱེད་མགོ་བཙུགས་ཏེ། ཕྱི་ཟླ་ ༧ པའི་ནང་དམར་ཤོག་ཚོགས་ཁོང་ནས་ཕྱིར་ཕུད་བཏང་སྟེ་རྒྱ་ནག་མི་དམངས་བཅིངས་འགྲོལ་དམག་གི་སྒྲིག་ཁྲིམས་ལྟ་ཞིབ་ཁང་གིས་མུ་མཐུད་ཞིབ་བཤེར་བྱེད་བཞིན་ཡོད་པ་མ་ཟད། ཁོ་དང་འབྲེལ་ཡོད་དཔོན་རིགས་དང་ནང་མི་བཅས་ལའང་ཞིབ་བཤེར་བྱེད་བཞིན་ཡོད་ཅིང་། གནས་ཚུལ་འདིའི་ནང་གོ་པའོ་ཞོང་ཕྱི་ལོ་ ༡༩༤༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་པ་ནས་ད་ལྟའི་བར་ཉེས་དོན་སྣ་ཚོགས་ཐོག་ཞིབ་བཤེར་དང་ཁྲིམས་བཤེར་བྱེད་མུས་ཡིན་ལུགས་བཤད་འདུག
འདས་པའི་བདུན་ཕྲག་གཅིག་རིང་གོ་པའོ་ཞོང་གི་ལྐོག་ཟ་རུལ་སུངས་དང་འབྲེལ་ཡོད་ཆེས་མཐོའི་དཔོན་རིགས་ཁག་ལའང་ཞིབ་བཤེར་བྱེད་མགོ་བཙུགས་པ་ཡོད་པ་དང་། དེའི་གྲས་སུ་ཁོའི་བུ་གོ་ཀྲིན་ཀང་ (Guo Zhenggang) དང་རྒྱ་ནག་དབུས་ཆབ་སྲིད་ལྷན་ཁང་གི་ཚོགས་མི་ཟུར་བ་པའོ་ཞི་ལེ་ (Bo Xilai) དང་ཁོའི་བཟའ་ཟླ་ཀོའུ་ཁེ་ལི་ (Gu Kailai) བཅས་ཡོད་པ་དང་། པའོ་ཞི་ལེ་ཡིས་གོ་པའོ་ཞོང་དང་ཁོའི་ནང་མིའི་འབྲེལ་ལམ་བརྒྱུད་ནས་དམངས་སྒོར་ས་ཡ་ ༢༠ ལྐོག་ཟ་བྱས་ཡོད་པ་དང་། རྒྱ་ནག་དབུས་དམག་དོན་ལྷན་ཁང་གི་གཙོ་འཛིན་གཞོན་པ་ཞི་ཚེ་ཧུའུ་ (Xu Caihou) ཕྱི་ལོ་ ༢༠༡༤ ལོའི་ཕྱི་ཟླ་ ༣ པའི་ནང་ལྐོག་ཟ་རུལ་སུངས་ཀྱི་ཉེས་དོན་ཐོག་འཛིན་བཟུང་བྱས་པ་དང་། ལོ་དེའི་ཕྱི་ཟླ་ ༦ པར་དམར་ཤོག་ཚོགས་ཁོངས་ནས་ཕྱིར་ཕུད་བཏང་སྟེ་ཞིབ་བཤེར་བྱེད་བཞིན་ཡོད་ནའང་། ན་ནིང་ཕྱི་ཟླ་ ༣ པའི་ནང་ཁོ་འབྲས་ནད་ཀྱི་རྐྱེན་པས་ཚེ་ལས་འདས་ཡོད་པ་རེད།
རྒྱ་ནག་དམར་ཤོག་གཞུང་འབྲེལ་ཡིག་ཆ་ཞིག་གི་ནང་རྒྱ་ནག་གི་ལྷན་ཁང་ཁག་ཡོངས་ཀྱི་དཔོན་རིགས་མང་ཤོས་གོ་པའོ་ཞོང་ནང་བཞིན་རྒྱལ་ནང་གི་ལྐོག་ཟ་རུལ་སུངས་ཀྱི་གནད་དོན་ཡོད་ལུགས་འཁོད་འདུག
རྒྱལ་ཁབ་ཀྱི་འཕྲོད་བསྟེན་དང་འཆར་ལྡན་བུ་སྐྱེས་ལྷན་ཚོགས་ཀྱི་དྲ་ཚིགས་སྟེང་གོ་པའོ་ཞོང་གི་ལྐོག་ཟ་རུལ་སུངས་ཞིབ་བཤེར་ལས་དོན་སྐོར་བཀོད་པའི་ནང་། རྒྱལ་ནང་གི་ལྐོག་ཟ་རུལ་སུངས་ལ་གུ་ཡངས་དང་བཟོད་སྲན་གཏན་ནས་མེད་པའི་དམར་ཤོག་ཚོགས་པའི་རྩ་འཛིན་གསལ་བོར་བསྟན་འདུག
སྔོན་ཆད་ཧུ་ཅིན་ཐོའི་སྲིད་དབང་སྐབས་སུ་གོ་པའོ་ཞོང་ཆེད་གཉེར་དམག་དོན་པ་དང་རྒྱ་ནག་དབུས་དམག་དོན་ལྷན་ཁང་གི་གཙོ་འཛིན་གཞོན་པ་བཅས་སུ་བསྐོ་བཞག་བྱས་ཡོད་ནའང་། འདས་པའི་མི་ལོ་བཅུ་ཕྲག་ཅིག་རིང་ཁོ་ལ་རྒྱལ་ཁབ་ཀྱི་ཉེས་དོན་སྣ་ཚོགས་ཐོག་ཉིན་བཞིན་ཞིབ་བཤེར་བྱེད་ཀྱི་ཡོད་པ་དང་། ཁོས་སྔོན་ཆད་ལན་ཀྲུ་དམག་ཁུལ་གྱི་དབང་ཤུགས་གཙོ་བོ་བཟུང་ཡོད་ནའང་། ད་ལོར་ལན་ཀྲུ་དམག་ཁུལ་གྱི་སྒྲིག་ཁྲིམས་ལ་བཅོས་བསྒྱུར་བྱས་ཡོད་པ་རེད།
གསར་འགོད་པ། པདྨ་རྒྱལ།
