སྐལ་བཟང་རྣམ་རྒྱལ།
ཕྱི་ལོ་ ༢༠༡༦ ཟླ་ ༤ ཚེས་ ༦ རེས་གཟའ་ལྷག་པའི་ཉིན་གྲོགས་པོ་ཞིག་གིས་ཞོགས་པ་བདེ་སྲུང་བཀའ་བློན་དགོངས་པ་ཞུས་ཚུལ་ཟེར་གྱི་འདུག་པས་དེ་བདེན་པ་ཡིན་ནམ་ཞེས་སྐད་ཆ་དྲིས་བྱུང་། ངས་གནས་ཚུལ་དེ་གོ་ཐོས་མ་བྱུང་བས་ལམ་སེང་འབྲེལ་ཡོད་ལས་བྱེད་གཅིག་ལ་ཁ་པར་བཏང་ནས་སྐད་ཆ་བྲིས་པར་བདེན་པ་རེད་ཟེར། དེ་རྗེས་གྲོགས་པོ་འགའ་ཤས་དང་དེའི་སྐོར་སྐད་ཆ་བྱུང་། ཉིན་རྒྱབ་ཚུ་ཚོད་ ༢ པའི་རྗེས་ནས་རིམ་བཞིན་བརྒྱུད་ལམ་ཁག་ནས་གཞུང་འབྲེལ་གསལ་བསྒྲགས་དང་། གསར་འགོད་པ་ཁག་གཅིག་གིས་བཀའ་བློན་མཆོག་གི་ལས་ཤག་ལ་ཆེད་བཅར་ཞུས་ཏེ་བཀའ་འདྲི་གནང་བར་ཁོང་ཉིད་ནས་དགོངས་པ་ཞུ་དགོས་པའི་རྒྱབ་ལྗོངས་རྒྱུ་མཚན་དང་བཅས་པ་གསུངས་པའི་བརྙན་པར་བརྒྱུད་ལམ་ཁག་ནས་གཅིག་མཇུག་གཉིས་མཐུད་ཀྱིས་ཐོན་སོང་། སྤྱིར་མང་གཙོའི་སྤྱི་ཚོགས་ནང་གསར་འགྱུར་བརྒྱུད་ལམ་ནི་མང་གཙོའི་ཀ་བ་བཞི་པར་ངོས་འཛིན་གདེང་འཇོག་གནང་གི་ཡོད་ཀྱང་བཙན་བྱོལ་བོད་མིའི་གསར་འགྱུར་བརྒྱུད་ལམ་འགའ་ཤས་ཀྱིས་གནས་ཚུལ་ལ་བལྟས་ནས་གང་ཟག་ལ་བསྒྱུར་བཅོས་གཏོང་རྒྱུ་ལས་ལྡོག་ཏེ་གང་ཟག་ལ་བལྟས་ནས་གནས་ཚུལ་ལ་བསྒྱུར་བཅོས་གཏོང་བའི་གཤིས་ལུགས་ངན་པ་ཞིག་རྒྱུན་འཇགས་སུ་ཡོད་པ་བཞིན། བདེ་སྲུང་བཀའ་བློན་དགོངས་པ་ཞུས་པའི་གནས་ཚུལ་གྱི་ཁ་ཕྱོགས་ལའང་ཕར་འཐེན་ཚུར་འཐེན་བྱེད་མགོ་ཚུགས་སོང་། འདི་ལོའི་འོས་བསྡུའི་ལས་རིམ་ཁྲོད་ཀྱི་གོམས་གཤིས་ངན་པ་དེ་ད་དུང་དག་སེལ་མཚམས་འཇོག་བྱུང་མེད་པས་ངོ་དེབ་སོགས་སྤྱི་ཚོགས་དྲ་ལམ་ཁག་ཏུའང་དེ་མཚུངས་བཤད་ཡམ་སྤེལ་མགོ་ཚུགས།
དགོངས་ཤོག་ཕུལ་བའི་རྒྱུད་རིམ།
སྐུ་ངོ་བཀའ་བློན་མཆོག་གློ་བུར་དགོངས་སྙན་ཕུལ་བའི་རྒྱུད་རིམ་ལ་བལྟས་ན་༸གོང་ས་༸སྐྱབས་མགོན་ཆེན་པོ་མཆོག་གིས་སྨན་རྩིས་ཁང་དབུ་བརྙེས་ནས་ལོ་བརྒྱ་ཐམ་པ་འཁོར་བའི་དུས་དྲན་མཛད་སྒོའི་ཐོག་འཕྲོད་བསྟེན་ལྷན་ཁང་འོག་བཙན་བྱོལ་བོད་མིའི་སྤྱི་ཚོགས་ནང་སྨན་བཅོས་ལྟ་སྐྱོང་ཐད་འཐུས་ཤོར་ཆེན་པོ་ཕྱིར་ཡོད་པ་དང་། བོད་མིའི་སྤྱི་ཚོགས་ནང་བཟང་སྤྱོད་ཉམས་ཆག་འགྲོ་གི་ཡོད་པ་སོགས་ཀྱི་ཐད་བཀའ་སློབ་ལྕི་ནན་ཕེབས་པ་དང་། དེ་ནས་འཕྲོས་ཏེ་བོད་མི་མང་སྤྱི་འཐུས་སྐབས་བཅོ་ལྔ་པའི་གྲོས་ཚོགས་ཚོགས་དུས་མཐའ་མའི་ནང་སྐུ་ངོ་སྤྱི་འཐུས་རྣམ་པའི་ཆ་ཤས་བཞེས་སྟངས་དང་། བཀའ་ཤག་ལྷན་རྒྱས་ནང་བཀའ་བསྡུར་ཇི་བྱུང་། འཕྲོད་བསྟེན་ལྷན་ཁང་ནས་༸གོང་ས་མཆོག་ལ་དགོངས་སེལ་སྙན་ཞུ་འབུལ་སྟངས། དེའི་མཇུག་དེ་མ་ཐག་ཏུ་གཞུང་བསྟེན་ལྷ་སྲུང་གནས་ཆུང་ཆོས་རྒྱལ་ཆེན་པོ་དང་། ཚེ་རིང་མཆེད་ལྔ་སྐུ་གསོལ་སྐབས་བཀའ་ལུང་རྔམ་བརྗིད་ལྗིད་ཅན་ཕེབས་པ་སོགས་ཀྱི་རྒྱུད་རིམ་ཆ་ཚང་ལ་དགོངས་པ་གཟབ་ནན་ཡང་ནན་ཏུ་བཞེས་ཏེ་སྤྱི་དོན་ཐད་ལྷ་བླའི་གཟིགས་ཚུལ་འདི་ལྟ་བུ་ཡོད་མུས་ཐོག་ད་དུང་སྤྱི་མ་སྤོམ་བཤད་བྱས་ཏེ་སྡོད་ཐབས་མི་འདུག་དགོངས་ཏེ་བློ་ཐག་རྦད་བཅད་ཀྱིས་སྐུ་ངོ་སྲིད་སྐྱོང་མཆོག་གི་སྐུ་མདུན་དུ་བཅར། ཡང་སྐྱར་བཀའ་བློན་ཞིག་རྩ་དགོངས་ཞུ་བར་ཕེབས་པ་དེས་སྐུ་ངོ་སྲིད་སྐྱོང་མཆོག་ཐུགས་ཚབས་ཆེན་པོ་བྱུང་སྟེ་ཛ་དྲག་ཐོག་བཀའ་ཤག་ལྷན་རྒྱས་ཚུགས་པ་དང་། སྐུ་ངོ་བཀའ་བློན་མཆོག་གི་དགོངས་ཤོག་ཕྱིར་འཐེན་ཡོང་བའི་རེ་བ་ཞུས་ཀྱང་སྐུ་ངོ་བཀའ་བློན་མཆོག་ནས་སེམས་ཐག་གཙང་བཅད་ཟིན་པ་ཡིན་སྐོར་ཞུས་པས། ཚོགས་ཐོག་དེ་རང་ནས་བདེ་སྲུང་བཀའ་བློན་འབྲོང་ཆུང་དངོས་གྲུབ་དགོངས་འཁྲོལ་ཐོག་དཔལ་འབྱོར་བཀའ་བློན་ཚེ་རིང་དོན་གྲུབ་ཀྱིས་བདེ་སྲུང་བཀའ་བློན་གཅིག་ལྕོགས་གནང་རྒྱུའི་ཐག་གཅོད་དང་འབྲེལ་གཞུང་འབྲེལ་གསལ་བསྒྲགས་བསྐྱངས་འདུག སྐུ་ངོ་བདེ་སྲུང་བཀའ་བློན་ནི་དོན་གནད་ཅིག་གི་ཐོག་ཐག་གཅོད་གནང་རྒྱུར་གཟབ་ནན་ཆེ་བ་དང་ཐག་གཅོད་བྱས་ཟིན་པའི་ཐད་འགྱུར་བ་རྩ་བ་ནས་མི་གཏོང་མཁན་ཞིག་ཡིན་པར་གངས་ཅན་སྐྱིད་གཤོངས་ཀྱི་ལས་བྱེད་ནང་ཡོངས་སུ་གྲགས་པ་བཞིན་ད་རེས་ཁོང་གི་ཐག་གཅོད་ལ་སུས་ཀྱང་འགྱུར་བ་གཏོང་ཐུབ་མེད་པ་རེད།
དགོངས་ཞུའི་རྒྱབ་ལྗོངས་རྒྱུ་རྐྱེན་ཇི་ཡིན།
ཕྱི་ལོ་ ༢༠༡༦ ལོའི་བཀའ་སྤྱི་གཉིས་ཀྱི་འོས་བསྡུའི་རྒྱུད་རིམ་ནང་སྐུ་ངོ་འབྲོང་ཆུང་དངོས་གྲུབ་ལགས་ནས་གྲོས་ཚོགས་སུ་སྔོན་ཚུད་ནས་འོས་མི་རྣམ་པ་དང་རྒྱབ་སྐྱོར་བ་རྣམས་ནས་སྐྱབས་བཅོལ་བའི་གནས་བབས་ངོས་འཛིན་ཐོག་ཡུལ་མིའི་མཐོང་སྣང་མི་མཛེས་པ་མི་ཡོང་བའི་ཐད་ཡིད་གཟབ་བྱ་དགོས་པའི་སྔོན་བརྡ་ཐོག་མར་བཏང་ཡོད་པ་དེ་ནི་མྱོང་ཅན་རྒད་པོའི་འབེལ་གཏམ་རང་བྱུང་ཡོད། སྲིད་སྐྱོང་དངོས་གཞིའི་འོས་མི་གཉིས་ཀྱི་བགྲོ་གླེང་འགོ་ཚུགས་ཁྲོད་ཕྱོགས་སོ་སོའི་རྒྱབ་སྐྱོར་བ་སོགས་ཀྱིས་རྐྱེན་བྱས་ཏེ་གླེང་གཞི་ཆེན་པོར་གྱུར། སྔོན་འགྲོ་དང་དངོས་གཞིའི་འོས་བསྡུའི་བར་ཐག་རིང་པོ་དེས་ཆེད་དུ་སྤྱི་ཚོགས་འཁྲུགས་སའི་གཞི་རྟེན་ལྟ་བུར་གྱུར་ཏེ་བཟང་སྤྱོད་ལས་འདས་པའི་གོང་བུ་ཆིག་སྒྲིལ་གྱི་ནུས་པ་ཉམས་དམས་སུ་འགྲོ་བའི་སྤྱི་ཚོགས་ཀྱི་སྣང་ཚུལ་ངན་པ་བྱུང་བར། ༸གོང་ས་༸སྐྱབས་མགོན་ཆེན་པོ་མཆོག་གིས་དབུས་གནད་ཡོད་སྐུ་བགྲེས་མང་པོར་ཐུགས་ཚབས་དགོངས་བབས་མ་བྱུང་བ་དང་། ལྷ་མི་ཀུན་སྤྱོད་གཅིག་པའི་རྟེན་འབྲེལ་འོག་གཞུང་རྟེན་ལྷ་སྲུང་རྣམས་ཀྱང་ཐུགས་ཁྲེལ་ཏེ་༸རྒྱལ་བའི་ལྷ་དགོངས་འཁྲུགས་གཞིར་གྱུར་པའི་ལས་ཚབས་ཆེ་བ་བསགས་ན་སྐུ་ཕྱྭའི་འགན་ལེན་མི་བཟོད་པའི་རྡོ་རྗེའི་བཀའ་ལུང་བརྗིད་ནན་ཕེབས་པར་བརྟེན་བཀའ་སྤྱི་ལྷན་རྒྱས་ནས་དེའི་ཐད་དགོངས་པ་གཟབ་བཞེས་གནང་རྒྱུ་ནི་གནད་ཀྱི་དོན་པོ་རེད།
སྐུ་ངོ་འབྲོང་ཆུང་དངོས་གྲུབ་ལགས་ནས་མི་ལོ་བཞི་བཅུ་ཙམ་རིང་བདེ་སྲུང་ལས་ཁུངས་སུ་ཕྱག་ལས་གནང་བ་དང་། ༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་ཡུལ་གྲུ་ཁག་ཏུ་སྐུའི་གསང་བ་གསུམ་གྱི་མཛད་པ་རླབས་པོ་ཆེ་རྒྱས་བཞིན་པའི་གལ་ཆེའི་དུས་ཡུན་ནང་སྐུ་ཕྱྭའི་ལས་འགན་རྐང་བཞེས་གནང་བའི་ཉམས་མྱོང་འོག་གཟུགས་ཅན་དང་གཟུགས་མེད་གཉིས་ཀའི་ཕྱར་གྲུ་མཉམ་འདེགས་མེད་ཐབས་མེད་པའི་རྒྱུས་མངའ་ཡོད་པས། ད་རེས་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་རྒྱལ་ཆེན་པོས་སྐུ་ཕྱྭར་འགན་བཟོད་ཐབས་མེད་པའི་བཀའ་ཕེབས་པ་དེ་ནི་གོས་ཐུང་གི་སྐེད་རགས་དཔྱི་མགོའི་འོག་ནས་འཆིང་མཁན་གྱི་དེང་རབས་ཕོ་གསར་མོ་གསར་ཚོ་དང་། ཁ་ཕྱི་བལྟས་ཀྱི་ཤགས་འགྱེད་པ་ལ་དགའ་བའི་རྟོག་གེ་མགོ་མཁྲེགས་ཅན་ཚོའི་སེམས་ནང་དངངས་ཚབས་དེ་ཙམ་མེད་ངེས་ཀྱང་། སྐུ་ཕྱྭའི་སྲི་ཞུ་བ་རྒད་པོ་མྱོང་ཅན་ཁོང་ལྟ་བུ་ཞིག་གི་ངོས་ནས་ཐུགས་ཚབས་ཧ་ཅང་ཆེན་པོ་བྱུང་ཡོད་པ་ནི་གདོན་མི་ཟ་བ་རེད། དེར་བརྟེན་བཀའ་བློན་མཆོག་ནས་དགོངས་པ་གཟབ་ནན་བཞེས་ཏེ་ལུགས་མཐུན་བཟང་སྤྱོད་ཀྱི་ཐོག་བཀའ་བློན་གྱི་ལས་གནས་ནས་རྩ་དགོངས་ཞུས་གནང་ཡོད་པ་རེད་འདུག།།
དགོངས་པ་ཞུས་ན་བཟང་སྤྱོད་ཨེ་ཡིན། བཟང་སྤྱོད་ཡིན་ན་དགོངས་པ་ཞུ་དགོས་པའི་ཕྱིར།་་་་་་་་་ང་གྲྭ་པ་མིན་ནོ།