བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་དྲན་པ།

བདེ་སྲུང་ལས་བྱེད་ཟུར་པ་ལྷག་པ་ཚེ་རིང་།

མི་ལོ་ཧྲིལ་པོ་བཞི་བཅུའི་རིང་བོད་བསྟན་སྲིད་དང་མི་རིགས་སྤྱིའི་སླད་དུ་རང་ཟོན་སྤངས་ཏེ་ཞབས་འདེགས་སྒྲུབ་མཁན་དང་། གཞིས་བྱེས་གཉིས་ཀྱི་འབྲེལ་ཟམ་ལྟ་བུར་གྱུར་པའི་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་ནས་ཉེ་ལམ་རང་ཐག་རང་གཅོད་ཀྱིས་བཀའ་བློན་གྱི་མཛད་འགན་ནས་ལུགས་མཐུན་དགོངས་པ་ཞུ་འཁྲོལ་བྱུང་བའི་བཀའ་དྲུང་ཡིག་ཚང་གི་གསལ་བསྒྲགས་དྲ་ལམ་ནས་མཐོང་མ་ཐག །ངས་གང་ཉིད་ཀྱི་ཐག་གཅོད་དེར་རྒྱབ་སྐྱོར་དང་བརྩི་བཀུར་ཞུས་པ་ཡིན། དེའི་རྒྱུ་མཚན་ནི། སྐུ་ངོ་མཆོག་གིས་རྒྱུན་དུ་ཐག་གཅོད་ཆུང་ཙག་གི་རིགས་ལའང་དགོངས་པ་ཞིབ་ཕྲ་བཞེས་གནང་གི་ཡོད་སྟབས། ད་རེས་ཀྱི་གནད་དོན་གལ་ཆེ་འདི་ལྟ་བུར་ཕྱོགས་ཡོངས་ནས་དགོངས་བཞེས་ཞིབ་ཕྲ་གནང་སྟེ་ཐག་གཅོད་མཛད་ཡོད་པ་ནི་ཐེ་ཚོམ་མི་དགོས་པ་ཞིག་རེད།

ཕྲན་ལ་མཚོན་ན་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གི་སྐུ་འགྲམ་དུ་མི་ལོ་ཧྲིལ་པོ་ཉི་ཤུའི་རིང་སྲི་ཞུ་བསྒྲུབས་མྱོང་སྟབས་སྐུ་ངོ་མཆོག་གི་རྒྱུན་གཏན་བབ་ལྷིང་བརྟན་གསུམ་གྱི་ཕྱག་ལས་མཛད་ཕྱོགས་མཐའ་དག་ལ་མིག་མཐོང་ལག་ཟིན་གྱི་ཆ་རྒྱུས་ཟབ་མོ་ཡོད། སྐུ་ངོ་ཁོང་གིས་ལྷག་བསམ་རྣམ་དག་ངང་ཉིན་རེའི་མཛད་འགན་བཞེས་སྟངས་ཀྱི་ཐོག་ནས་ཉེ་འཁོར་གྱི་ལས་བྱེད་ཆེ་ཕྲ་ཡོངས་ལ་རྒྱུན་པར་སྐུལ་ལྕག་དང་འགན་འཁྲིའི་སེམས་ཚོར་སྦྱིན་པའི་ལེགས་ཆ་ནི་བརྗོད་ཀྱི་མི་ལང་བ་ཞིག་རེད།

ཕྲན་རང་ལ་མཚོན་ན། བོད་ནང་འཚར་ལོངས་བྱུང་སྟེ་རྒྱ་དམར་གྱི་བཙོན་དོང་ནང་སྡུག་སྦྱོང་ཕོག་ནས་བཙན་བྱོལ་དུ་ཡོང་དགོས་བྱུང་བའི་གྲས་ཤིག་ཡིན། བཙན་བྱོལ་དུ་འབྱོར་རྗེས་ནད་མནར་དཀའ་སྡུག་འཕྲད་པའི་སྐབས་སུ། ཕ་མས་བུ་ཕྲུག་སྐྱོང་བ་ལྟར་དུ་གཟིགས་རྟོགས་བཀའ་དྲིན་བསྐྱངས་ཏེ་མཐའ་མ་བོད་མིའི་སྒྲིག་འཛུགས་ཀྱི་གལ་ཆེའི་བདེ་སྲུང་ལས་ཁུངས་ནང་ཞབས་ཞུ་སྒྲུབ་རྒྱུའི་གོ་སྐབས་བསྐྲུན་པ་སོགས་བོད་ནས་འབྱོར་བའི་སྲིད་དོན་བཙོན་ཟུར་ཞིག་ལ་གཟིགས་སྐྱོང་གནང་བའི་དཔེ་མཚོན་འཇོག་ཡུལ་ཞིག་ཏུ་བྱས་ཀྱང་མི་ཆོག་པ་མེད།

བདེ་སྲུང་གི་ལས་སྣེར་འཁོད་རྗེས་རིམ་པས་ཕྲན་ལ་བདེ་སྲུང་ལས་ཁུངས་ཀྱི་བོད་གནས་དང་འབྲེལ་བའི་འགན་འཁུར་དང་། སྐུ་ངོ་བཀའ་བློན་མཆོག་གི་སྒེར་དྲུང་གི་ལས་འགན་གནང་བས། དུས་ཡུན་དེའི་རིང་སྐུ་ངོ་མཆོག་ནི་བོད་ནང་གི་གནས་སྟངས་མཁྱེན་རྒྱ་ཟབ་མོ་ཡོད་མཁན་ཞིག་དང་ཐུགས་སྣང་ཅན་ཞིག་ཡིན་པའི་ངེས་ཤེས་བྱུང་ལ། ཐེངས་གྲངས་མང་པོར་བོད་ནང་གི་གནད་ཡོད་མི་སྣར་ཐུག་འཕྲད་ཀྱིས་བོད་ཕྱི་ནང་གི་བསམ་ཚུལ་བརྗེ་ལེན་དང་། འབྲེལ་ཟམ་ལྟ་བུའི་ཕྱག་ལས་རླབས་ཆེ་གནང་ཡོད་པ་སོགས་ནི་རེ་རེ་བཞིན་ཞུ་ཐབས་མེད་པ་ཞིག་རེད།

སྐུ་ངོ་ཁོང་བོད་ནང་དཀའ་ལས་བརྒྱབ་སྟེ་བཙན་བྱོལ་དུ་བསླེབས་པའི་ཆབ་སྲིད་བཙོན་ཟུར་དང་། འབྲེལ་ཆགས་འབྲེལ་ཡོད་སོགས་ལ་དབྱེ་འབྱེད་མེད་པར་རྒྱུན་དུ་གཟིགས་རྟོགས་དང་ལམ་སྟོན། མཐུན་འགྱུར་ཇི་ཡོད་ངེས་པར་གནང་དགོས་ངེས་ཡིན་པའི་དགོངས་ཚུལ་ཤུགས་ཆེར་འཛིན་མཁན་ཞིག་ཡིན་སྟབས། བོད་མིའི་སྒྲིག་འཛུགས་ཀྱི་གལ་ཆེའི་ལྷན་ཚོགས་ནང་། དེའི་སྐོར་གླེང་སློང་ཡང་ཡང་གནང་བ་དང་། དེ་བཞིན་སྐུ་ངོ་མཆོག་དྲུང་ཆེའི་ཐུགས་འགན་བཞེས་མུས་སུ་ཨོ་སི་ཊོ་ལི་ཡར་བོད་མི་གཞིས་བསྐྱོད་བྱ་རྒྱུའི་གོ་སྐབས་བསྐྲུན་ཐུབ་པ་བྱུང་སྟེ། གོ་སྐབས་འདི་བཞིན་བོད་ནས་ཕེབས་པའི་ཆབ་སྲིད་བཙོན་ཟུར་དང་འབྲེལ་ཆགས་འབྲེལ་ཡོད་ཚོར་གནང་ཐུབ་པའི་གཞུང་འབྲེལ་གྱི་སྲིད་བྱུས་དེ་ད་ལྟ་བར་ཧྲ་ཐག་གེར་གནས་ཡོད་པ་དེ་ཚོའི་ཐོག་ཏུ་སྐུ་ངོ་བཀའ་བློན་མཆོག་གིས་ནུས་པ་ཤུགས་ཆེ་བཏོན་ཡོད།

ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཐད། རྒྱུན་པར་ལས་བྱེད་ཆེ་ཕྲ་ཡོངས་ལ་སྐུ་ཕྱ་སྲུང་སྐྱོབས་ཀྱི་ལས་འགན་ནི་ལུས་དང་གྲིབ་མ་འགྲོགས་པ་བཞིན་ཡིན་པས་དུས་ཚོད་དང་ས་གནས་ཀྱི་དབྱེ་མཚམས་མེད་པར་ངེས་པར་དུ་ཚང་མས་འཁུར་མཉམ་ལེན་དགོས་པའི་བསླབ་བྱ་ནན་པོ་གནང་སྟེ་དོ་ནན་ཞིབ་ཚགས་གནང་མཁན་ཞིག་ཡིན་ཞིང་། སྐུ་ཕྱྭའི་ལས་དོན་ཐད། གཡས་ཁག་གཡོན་དཀྲི་མེད་པར་སྐབས་འཕྲལ་སོ་སོར་བརྡ་དེད་དང་། སྐུ་ཕྱྭར་བདོ་བའི་ལས་ངན་རྩོམ་མཁན་ཡོངས་ལ་མདུན་དུ་མཆོངས་ཏེ་བཤད་ཕོད་པ་དང་བྱེད་ཕོད་པའི་ཐབས་བྱུས་ཐོག་ནས་གདོང་ལེན་ཞུས་ཡོད་པར་བརྟེན། ད་བར་སྐུ་ཕྱྭར་བདོ་བའི་ལས་ངན་རྩོམ་མཁན་ཡོངས་ལས་རྣམ་པར་རྒྱལ་ཏེ་རྐྱེན་ངན་གང་ཡང་བྱུང་མེད་པའི་མཛད་རྗེས་དེའི་ཁྲོད་དུ་སྐུ་ངོ་མཆོག་གི་མཛད་རྗེས་ནི་བསུབ་ཐབས་མེད་པའི་རྡོ་རིང་ལྟར་དུ་གནས་ཡོད།

མཐའ་དོན་ཡིག་ཚོགས་ལ་འཇིགས་ཏེ་རིང་པོར་འབྲི་བར་ངལ་བ་མ་བྱས་ཀྱང་། གངས་ཅན་སྐྱིད་གཤོངས་ཀྱི་དཀྱིལ་འཁོར་དེའི་ནང་མི་ལོ་ཉི་ཤུའི་རིང་སྲི་ཞུ་གྲུབ་རིང་། ངས་མཐོང་ཐོས་མྱོང་གསུམ་བྱུང་བའི་གཞུང་ཞབས་སྲི་ཞུ་བ་དང་། རྒྱ་ཆེའི་མང་ཚོགས། ལྷག་པར་གཞིས་ཞུགས་བོད་མི་ཚོས་ཆེ་མཐོང་ཆེ་ཤོས་ཞུ་ཡུལ་བཀའ་བློན་ཞིག་བྱུང་ཡོད་པ་དེ་ནི་འབྲོང་ཆུང་དངོས་གྲུབ་ལགས་ཡིན་ཞིང་། དེ་འདྲའི་བཀའ་བློན་ཞིག་ཕྱིས་སུ་འབྱུང་མིན་ཞུ་དཀའ་ཡང་། སྔོན་ཆད་བྱུང་མེད་པ་ནི་ངེས་གཏན་རེད།

ད་ལན་སྐུ་ངོ་བཀའ་བློན་འབྲོང་ཆུང་དངོས་གྲུབ་མཆོག་ནས་རང་ཐག་རང་གཅོད་ཀྱིས་བཀའ་བློན་གྱི་མཛད་འཁུར་ནས་བཟང་སྤྱོད་ཐོག་ནས་དགོངས་ཞུ་གནང་བར་རྒྱབ་སྐྱོར་དང་བརྩི་བཀུར་ཞུ་བཞིན་ཡོད།། །།