ཆབ་སྲིད་བཙོན་ཟུར་ངག་དབང་གསང་གྲོལ།
༄༅། མཆོག་ཏུ་བཀུར་འོས་པའི་བདེ་སྲུང་བཀའ་ཟུར་སྐུ་ངོ་འབྲོང་ཆུང་དངོས་གྲུབ་མཆོག་ལ་སྐུ་ཁམས་བཟང་བའི་འཚམས་འདྲི་ཞུ་བ་དང་ཆབས་ཅིག གུས་མོས་སེམས་གཏིང་ནས་ཁྱེད་ལ་རྗེས་དྲན་གྱི་ཚིག་འབྲུ་འགའ་ཞུ་འདོད་བྱུང་སོང་།
ཁ་སྔོན་ཕྱི་ལོ་ ༢༠༡༦ ཟླ་ ༤ ཚེས་ ༦ ཉིན་སྐུ་ངོ་མཆོག་གིས་བར་ལམ་༧གོང་ས་མཆོག་གི་བཀའ་སློབ་དང་ཆོས་སྐྱོང་སྲུང་མའི་བཀའ་ལུང་གཞི་ལྗིད་པོ་དེ་དག་ཕེབས་པར་ཐུགས་འགན་མ་བཟོད་པར་བཟང་སྤྱོད་ཀྱི་ཐོག་ནས་བཀའ་བློན་གྱི་མཚན་གནས་ནས་དགོངས་པ་ཞུས་གནང་མཛད་པའི་གསལ་བསྒྲགས་དེ་ཐོས་མ་ཐག གུས་མོའི་སེམས་ནང་ཤིན་ཏུ་མི་བདེ་བ་ཞིག་དང་སྐྱོ་སྣང་དྲག་པོ་ཞིག་བྱུང་སོང་།
ལྷག་བསམ་དང་ཉམས་མྱོང་མཁྱེན་ཡོན་སོགས་ཀྱིས་ཤིན་ཏུ་ཕྱུག་པའི་དབུ་ཁྲིད་ཁྱེད་ནི་ངེད་ཅག་བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་དབུ་འོག་དཔུང་འདེགས་ཞུ་གནང་མཁན་གལ་འགངས་ཤིན་ཏུ་ཆེ་བའི་མི་སྣ་མེད་དུ་མི་རུང་བ་ཞིག་ཡིན་པ་སྨོས་ཅི་དགོས།
དེར་མ་ཟད། ད་བར་སྐུ་ངོ་མཆོག་ནས་མི་ལོ་ཧྲིལ་བོ་བཞི་བཅུ་ལྷག་རིང་བོད་རྒྱལ་ཁབ་དང་མི་རིགས་བཅས་ཀྱི་སླད་དུ་བཙན་བྱོལ་སྤྱི་ཚོགས་ནང་ཧ་ཅང་དཀའ་ངལ་་གཉན་འཕྲང་གི་དུས་རིམ་ཞིག་གི་ནང་དུ། སྐུ་ངལ་འཛེམས་མེད་ཀྱིས་ཕྱག་ལས་རླབས་ཆེན་གནང་བའི་རིང་། བོད་ཕྱི་ནང་གཉིས་ཀྱི་བོད་མི་ཚོའི་སེམས་ནང་དྲོད་སྐྱིད་ཅིག་བཞག་གནང་མཛད་ཡོད་པ་མ་ཟད། མི་མང་གིས་སྐུ་ཉིད་ལ་རེ་བ་དང་ཡིད་ཆེས་ཧ་ཅང་ཟབ་པའི་རྐྱེན་གྱིས་སྐུ་ཉིད་ཀྱིས་ལམ་སྟོན་གང་ཞིག་གནང་ཡང་ཡིད་གཉིས་ཐེ་འཚོམ་མེད་པར་ཤར་སྐྱོད་དང་ལེན་བྱེད།
ཁྱེད་ནི་བོད་ཕྱི་ནང་གཉིས་ཀྱི་བོད་མི་ཚོའི་ཡིད་ཆེས་བློ་གཏད་བཅོལ་ཡུལ་དབུ་ཁྲིད་བཟང་པོ་ཞིག་ཡིན་ལ། ཁྱེད་ནི་བོད་ནས་འབྱོར་བའི་སྐྱབས་བཅོལ་བོད་མི་སྤྱི་དང་། ཡང་སྒོས་ཆབ་སྲིད་བཙོན་པ་དང་འབྲེལ་ཡོད་འབྲེལ་ཆགས་ཚོའི་བདེ་སྡུག་ཞུ་ཡུལ་གྱི་སེམས་ཐག་ཉེ་ཤོས་ཀྱི་མི་སྣ་ཞིག་ཡིན།
གུས་མོ་ཐོག་མར་སྐུ་ཉིད་ལ་མཇལ་སྐབས། ཁྱེད་ནི་བབ་རླིང་དང་བརྟན་གསུམ་ལྡན་ཞིང་། བྱམས་བརྩེའི་འཛུམ་བག་དང་བཅས་གུས་མོར་བཀའ་འདྲི་ཞུས་པ་དང་། བཀའ་སློབ་ལམ་སྟོན་མང་པོ་གནང་དེ་དག་གིས། ཚིག་ངན་སྡང་མིག་དང་བཙན་པོ་དབང་ཡོད་དཔོན་ངན་རིང་ལུགས་པའི་འོག་ནས་བྲོས་ཐར་བྱུང་མ་ཐག་པའི་གུས་མོར་ཡང་། འཇིགས་ཞུམ་བྲལ་ཞིང་སེམས་ཁུངས་ལ་དྲོད་སོབ་སོབ་ཀྱི་བློ་སྟོབས་ཤིག་སྦྱིན་སོང་།
སྐུ་ངོ་མཆོག་ཁྱེད་ནི་ངེད་བོད་མི་ཚོས་ནམ་ཡང་བརྗེད་པར་དཀའ་བའི་དབུ་ཁྲིད་བཟང་པོ་ཞིག་ཡིན་ལ། ཁྱེད་ཀྱིས་ཐུགས་ཐག་བཅད་པའི་དོན་བྱ་གང་ཞིག་ཡིན་ཡང་། ང་ཚོས་ཡིད་ཆེས་དང་རྒྱབ་སྐྱོར་མཐའ་གཅིག་ཏུ་ཞུ་རྒྱུ་ཡིན་ཞེས་ཞུ་འདོད་བྱུང་སོང་།
ཕྱི་ལོ་ ༢༠༡༦ ཟླ་ ༤ ཚེས་ ༡༢ ལ་ཕུལ།།
